സെന്റ്. ജോൺ ഡി. ബ്രിട്ടോസ് എ. ഐ. എച്ച്. എസ്. ഫോർട്ടുകൊച്ചി/ചരിത്രം

ആദ്യകാലത്ത് മദ്രാസ് ഗവൺമെന്റിന്റെ റെഗുലേഷൻ ഫോർ യൂറോപ്യൻ സ്കൂൾ കോഡ് അനുസരിച്ചാണ് സ്കൂൾ പ്രവർത്തിച്ചിരുന്നത്. കേരള സംസ്ഥാനം രൂപീകൃതമായ ശേഷം 1957 - ൽ കേരള ഗവൺമെന്റിന്റെ കീഴിലുള്ള എയ്ഡഡ് സ്കൂളായി മാറി. 1954മുതൽ കൊച്ചി രൂപതയുടെ കീഴിലുള്ള മാനേജ്മെന്റാണ് സ്കൂൾ നിയന്ത്രിക്കുന്നത്. ഇപ്പോഴത്തെ മാനേജർ റവ.മോൺ ഷൈജു പര്യാത്തുശ്ശേരിയാണ്. ബ്രിട്ടോ സ്കൂളിന്റെ ചരിത്രത്തിലൂടെ കടന്നുപോകുമ്പോൾ വളരെ ദീർഘ വീക്ഷണവും ആത്മീയ ദർശനവുമുള്ള മാനേജർമാരും ഹെഡ്മാസ്റ്റർമാരും ത്യാഗസന്നദ്ധതയോടെ ഒത്തിരി പ്രവർത്തനങ്ങൾ സ്കൂളിന്റെ സമഗ്രപുരോഗതിയ്ക്കായി കാഴ്ച വച്ചിരുന്നുവെന്ന വസ്തുത നമുക്ക് ബോധ്യമാകും. സ്കൂളിന്റെ ഉന്നമനത്തിനും കാലാനുസൃതമായ വികസനത്തിനും അനുയോജ്യമായ പ്രവർത്തനങ്ങളാണ് ഇന്നും മാനേജ്മെന്റും ഹെഡ്മാസ്റ്ററും മറ്റു ജീവനക്കാരും ചേർന്ന് ആസൂത്രണം ചെയ്ത് നടത്തിപ്പോരുന്നത്. വിദ്യാർത്ഥികളുടെ പാഠ്യ-പാഠ്യേതര വിഷയങ്ങളിലെ മികവുകൾ ഇതിന് ഉത്തമ ഉദാഹരണങ്ങളാണ്. ഇപ്പോഴത്തെ ഹെഡ്മിസ്ട്രസ്സ് ഷേർളി ആഞ്ചലോസിന്റെ നേതൃത്വത്തിൽ കുട്ടികളുടെ കലാ - കായിക കഴിവുകളെ പരിപോഷിപ്പിക്കുന്നതിനും, സ്വഭാവരൂപീകരണത്തിനുമായുള്ള പ്രവർത്തനങ്ങൾ നടത്തി വരുന്നു. ഐ.ടി, സയൻസ് ലാബുകൾ സർവ്വസജ്ജമായി പ്രവർത്തിക്കുന്നു. വളരെ നല്ല രീതിയിൽ പ്രവർത്തിക്കുന്ന ഒരു ലൈബ്രറിയും സ്കൂളിന് മുതൽക്കൂട്ടായുണ്ട്. സ്കൂളിന്റെ എല്ലാ പ്രവർത്തനങ്ങൾക്കും പിന്തുണ നൽകുന്ന ശക്തമായ ഒരു പി.ടി.എ യും സ്കൂളിൽ പ്രവർത്തിക്കുന്നുണ്ട്. ജൂനിയർ റെഡ്ക്രോസ് ,സ്കൗട്ട് ആൻഡ് ഗൈഡ്സ് , എൻ.സി.സി , എസ്.പി.സി തുടങ്ങിയവയും കുട്ടികളുടെ സർവ്വോൻമുഖവികസനത്തിനുതകുന്ന രീതിയിൽ പ്രവർത്തിച്ചുവരുന്നു .