ജി എച്ച് എസ് മണത്തല/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | പ്രൈമറി | എച്ച്.എസ് | എച്ച്.എസ്.എസ്. | ചരിത്രം | അംഗീകാരം |
കൂട്ടുങ്ങൽ സ്കൂൾ
മതസൗഹാർദ്ദത്തിന്റെയും പ്രവാസ ജീവിതങ്ങളുടെയും ചരിത്രമുറങ്ങുന്ന ചാവക്കാട് മണത്തല ദേശത്ത് പഴയ പ്രതാപത്തോടെ പുതിയ പ്രൗഢിയോടെ വളർച്ചയുടെ പടവുകൾ ചവിട്ടിക്കയറി നാടിൻറെ മുഴുവൻ ശ്രദ്ധാകേന്ദ്രമായി തലയെടുപ്പോടെ നിലകൊള്ളുകയാണ് മണത്തല ഗവൺമെൻറ് ഹയർ സെക്കണ്ടറി സ്കൂൾ. ചുരുങ്ങിയ നാളുകൾക്കപ്പുറം നൂറ്റാണ്ടിൻറെ പാരമ്പര്യം കൈപ്പിടിയിലൊതുക്കുവാൻ കുതിച്ചുകൊണ്ടിരിക്കുന്ന സ്കൂളിന് കയറിവന്ന പടികളിലോരോന്നിലും വിജയത്തിൻറെ തിളക്കമുണ്ട്.മധുരിക്കുന്ന ഓർമകളുണ്ട്.
തീരദേശത്തിൻറെ പരാധീനതകൾക്കിടയിൽ ഗുണനിലവാരമുള്ള വിദ്യാഭ്യാസം വിദൂര സ്വപ്‌നമായിരുന്ന ഒരുകാലത്ത് പ്രതീക്ഷയുടെ പൊൻതരിവെട്ടം തൂകി കടലിൻറെ മക്കളുടെ ജീവതത്തിലേക്ക് അക്ഷര വെളിച്ചം പകരാൻ 1927 ൽ ഒരേക്കർ എഴുപത്തിമൂന്ന് സെൻറ് സ്ഥലത്ത് മണത്തല സ്കൂൾ സ്ഥാപിതമായി. മലബാർ ഡിസ്ട്രിക്ട് ബോർഡിന്റെ കീഴിൽ പ്രവർത്തിച്ചിരുന്ന ഈ വിദ്യാലയം 1956-ൽ ബോർഡ് മാപ്പിള എലിമെന്ററി സ്കൂൾ കൂട്ടുങ്ങൽ എന്നറിയാൻ തുടങ്ങി.
അതേ വർഷം ഒക്ടോബറിൽ ഗവൺമെൻറ് മാപ്പിള അപ്പർ പ്രൈമറി സ്കൂൾ കൂട്ടുങ്ങൽ എന്ന നാമധേയം ലഭിക്കുകയുണ്ടായി. ഒരു പതിറ്റാണ്ടിനിപ്പുറം 1967-68 കാലഘട്ടത്തിൽ ഗവൺമെൻറ് ഹൈസ്കൂൾ മണത്തലയായി ഉയർത്തപ്പെട്ടു. അതേ അധ്യയന വർഷത്തിൽ IX, X ക്ലാസുകൾ ആരംഭിച്ചു. കുട്ടികളുടെ എണ്ണം നിയന്ത്രണാതീതമായി വർദ്ധിച്ചതിനാൽ ഷിഫ്റ്റ് സമ്പ്രദായം ഏർപ്പെടുത്തി.
ഹൈസ്കൂൾ വിഭാഗത്തിനായി ഒരു പുതിയ കെട്ടിടത്തിൻറ് ആരംഭം കുറിച്ചുകൊണ്ട് , ചാവക്കാട് പഞ്ചായത്ത് പ്രസിഡണ്ട് ശ്രീ. പി പി സെയ്തുമുഹമ്മദ് സാഹിബ് 20/02/1968 ന് തറക്കല്ലിട്ടു.
2004-05 ൽ പ്ലസ് വൺ അനുവദിച്ചതോടെ ഈ സ്കൂൾ ഗവൺമെൻറ് ഹയർ സെക്കണ്ടറി സ്കൂൾ മണത്തല ' എന്നറിയപ്പെട്ടു.