പറമ്പിൽ എൽ .പി. സ്കൂൾ
പറമ്പിൽ എൽ .പി. സ്കൂൾ | |
---|---|
![]() | |
വിലാസം | |
പൊൻമേരി പറമ്പിൽ പൊൻമേരി പറമ്പിൽപി.ഒ, , തോടന്നൂർ 673542 | |
സ്ഥാപിതം | 1899 |
വിവരങ്ങൾ | |
ഫോൺ | 04962273032 |
ഇമെയിൽ | parambillpschool@gmail.com |
വെബ്സൈറ്റ് | parambillpschool.webs.com |
കോഡുകൾ | |
സ്കൂൾ കോഡ് | 16748 (സമേതം) |
വിദ്യാഭ്യാസ ഭരണസംവിധാനം | |
റവന്യൂ ജില്ല | കോഴിക്കോട് |
വിദ്യാഭ്യാസ ജില്ല | വടകര |
സ്കൂൾ ഭരണ വിഭാഗം | |
സ്കൂൾ വിഭാഗം | പൊതു വിദ്യാലയം |
പഠന വിഭാഗങ്ങൾ | എൽ.പി |
മാദ്ധ്യമം | മലയാളം |
സ്കൂൾ നേതൃത്വം | |
പ്രധാന അദ്ധ്യാപകൻ | Babu O 8086022054 |
അവസാനം തിരുത്തിയത് | |
13-10-2017 | 16748 |
കോഴിക്കോട് ജില്ലയിലെ തോടന്നൂർ ഉപജില്ലയിൽ പൊൻമേരി പറമ്പിൽ എന്ന സ്ഥലത്ത് സ്ഥിതിചെയ്യുന്ന ഒരു എയ്ഡഡ് എൽ. പി, വിദ്യാലയമാണ് പറമ്പിൽ എൽ .പി. സ്കൂൾ . ഇവിടെ 93 ആൺ കുട്ടികളും 79 പെൺകുട്ടികളും അടക്കം ആകെ 149 വിദ്യാർത്ഥികൾ പഠിക്കുന്നുണ്ട്.
ചരിത്രം
1899 ൽ സ്ഥാപിതമായി. പറമ്പിൽ ഹിന്ദു ഗേൾസ് എന്നായിരുന്നു ആദ്യത്തെ പേര്. അയനാട്ട് ഗോവിന്ദക്കുറുപ്പ് ആയിരുന്നു ആദ്യത്തെ മാനേജർ. 1990 കളിൽ പഠന രീതിയിലും പഠന പ്രക്രിയയിലും കാതലായതും സമഗ്രവുമായ മാറ്റങ്ങൾ വരുത്തിക്കൊണ്ട് കേരള സംസ്ഥാനത്ത് ഒരു പുതിയ പാഠ്യപദ്ധതി പ്രൈമറി തലത്തിൽ നിലവിൽ .വന്നു. അതിന്റെ ചുവടുറപ്പിച്ച് അധ്യയനത്തിലും അധ്യാപനത്തിലും പ്രക്രിയാബന്ധിതവും പഠിതാവിനെ കേന്ദ്രീകരിച്ചുള്ളതുമായ ഒരു വിദ്യാഭ്യാസ സമ്പ്രദായം പറമ്പിൽ എൽ പി സ്കൂളിലും നടപ്പിലാക്കുകയുണ്ടായി. പാഠ്യപദ്ധതിയുടെ ഘടനയിലുണ്ടാകുന്ന മാറ്റത്തോടൊപ്പം പഠനാന്തരീക്ഷവും മാറേണ്ടതുണ്ട് എന്ന കാഴ്ചപ്പാടിലൂന്നിക്കൊണ്ട് 1995ൽ സ്കൂൾ ചുവരിൽ ലോകപ്രസിദ്ധ ചിത്രകാരനായ പാബ്ലോ പിക്കാസോയുടെ ഗോർണിക്ക എന്ന ചിത്രം വരച്ചുവക്കുകയുണ്ടായി. ജഡമായ സ്കൂൾ ചുവരുകൾ ക്യാൻവാസുകളാക്കി മാറ്റിക്കൊണ്ട് കാഴ്ചയുടെ സംവേദനതലം വൈവിധ്യമാർന്നതാക്കുന്ന ഒരു വ്യത്യസ്ത പ്രവർത്തനമായിരുന്നു ഇത്. ഇന്ന് പറമ്പിൽ എൽ പി സ്കൂളിന്റെ ചുവരുകൾ ഒരു ഗ്യാലറിയാണ്. ആൾട്ടാമിറയിൽ നിന്ന് തുടങ്ങുന്ന ലോക ചിത്രകലയുടെ വികാസ പരിണാമങ്ങളുടെ രേഖപ്പെടുത്തലുകൾ സ്കൂൾ ചുവരിൽ കാണാം. \ പഠനബോധന മനഃശാസ്ത്രത്തിൽ ആധുനിക ലോകം അവലംബിച്ചിട്ടുള്ള ജ്ഞാനനിർമ്മിതിവാദവും (Constructivism)ഉപവിഭാഗമായ സാമൂഹ്യ ജ്ഞാനനിർമ്മിതിവാദവും (Social Constructivism) അടിസ്ഥാന ധാരകളാക്കിയപ്പോൾ കേരളത്തിലെ വിദ്യാഭ്യാസരംഗത്ത് സംഭവിച്ച ചില മാറ്റങ്ങളുടെ പ്രതിഫലനങ്ങൾ ഈ സ്കൂളിലും ഉണ്ടായി. പ്രിന്റഡ് മാഗസിനുകളും വാർഷികപ്പതിപ്പുകളും സ്മരണികകളും പ്രസിദ്ധീകരിക്കപ്പെട്ടിരുന്ന വിദ്യാലയ മുറികളിൽ കുട്ടികളുടെ സ്വതന്ത്ര രചനകൾ പുസ്തകങ്ങളായി മാറിയ വർഷങ്ങൾക്കാണ് പറമ്പിൽ എൽ പി സ്കൂൾ പിന്നീട് സാക്ഷ്യം വഹിച്ചത്. സ്കൂൾ പി ടി എ പ്രസാധകരായി മാറിക്കൊണ്ട് തുടർച്ചയായി മികച്ച ആറു പുസ്തകങ്ങൾ ഇവിടെ നിന്നും പുറത്തിറങ്ങി. 2004 ൽ ഒ എം അഖിൽരാജിൻറെ പനന്തത്ത എന്ന കവിതാസമാഹാരം, 2005 ൽ ഫർസാനയുടെ ഡയറിക്കുറിപ്പുകൾ, 2006 ൽ ഉജ്വലിന്റെ രേഖാചിത്രങ്ങൾ, 2007 ൽ അഞ്ജനയുടെ കത്തുകൾ, 2008 ൽ തേജ്നാ സുരേഷിന്റെ വാങ്മയചിത്രങ്ങൾ ,2010 ൽ ജീവനിയുടെ മുടിക്കുത്തി എന്നിവ പ്രസിദ്ധീകരിക്കപ്പെട്ടു. 2006 ൽ നടന്ന സംസ്ഥാന സർക്കാരിന്റെ ആദ്യത്തെ മികവ് പരിപാടിയിലേക്ക് കോഴിക്കോട് ജില്ലയിൽ നിന്നും തെരഞ്ഞെടുക്കപ്പെട്ട ഏക എൽ പി സ്കൂൾ ഈ വിദ്യാലയമായിരുന്നു. തുടർച്ചയായ പുസ്തകങ്ങളുടെ പ്രസിദ്ധീകരണമായിരുന്നു അന്ന് പരിഗണിക്കപ്പെട്ടത്. ഇതിൽ ഫർസാനയുടെ ഡയറിക്കുറിപ്പുകൾ കോഴിക്കോട് ഡയറ്റ് പുറത്തിറക്കിയ അധ്യാപകരുടെ കൈപ്പുസ്തകത്തിൽ ഉൾപ്പെടുത്തപ്പെടുകയുണ്ടായി. മാത്രമല്ല മാതൃഭൂമി പുറത്തിറക്കുന്ന ഡയറികളുടെ പരസ്യത്തിനു വേണ്ടി ഈ പുസ്തകത്തിലെ ഒരധ്യായമായിരുന്നു ഉപയോഗിച്ചിരുന്നത്. ഉജ്വലിന്റെ രേഖാചിത്രങ്ങൾ എന്ന പുസ്തകം ഏറെ ശ്രദ്ധിക്കപ്പെടുകയുണ്ടായി. മാതൃഭൂമി ഉജ്വലിനെ ആലപ്പുഴയിലേക്ക് കൂട്ടിക്കൊണ്ടുപോവുകയും ആ വർഷം കേരളം നിയമസഭയിലേക്ക് നടന്ന തെരഞ്ഞെടുപ്പിന്റെ ദൃശ്യങ്ങൾ വി എസ അച്യുതാനന്ദന്റെ മണ്ഡലത്തിൽ പര്യടനം നടത്തി ഉജ്വലിനെ കൊണ്ട് വരപ്പിക്കുകയും ചെയ്തു. ഈ ഡ്രോയിങ്ങുകൾ മാതൃഭൂമിയുടെ സ്റ്റേറ്റ് പേജിൽ വലിയ ഫീച്ചറായി ഒരാഴ്ചയോളം പ്രസിദ്ധീകരിക്കുകയും ചെയ്തു. കേരളത്തിലെ പൊതുവിദ്യാഭ്യാസ രംഗം സർഗാത്മകമായി മാറിയതിന്റെ പ്രതിഫലനങ്ങളായിരുന്നു ഇത്. ഇതിൽ ആർ ജീവനി ഇന്ന് കേരളത്തിലെ പുതിയ എഴുത്തുകാരിൽ അറിയപ്പെടുന്ന ഒരു കവിയാണ്. ജീവനിയുടെ രണ്ടു കവിതാസമാഹാരങ്ങൾ പിന്നീട് പ്രസിദ്ധീകരിക്കുകയുണ്ടായി. അഫറ എന്ന അഞ്ചാം ക്ലാസുകാരി വരച്ച അപൂർവമായ കാർട്ടൂൺ ചിത്രങ്ങളുടെ പ്രദർശനം 2002ൽ നടക്കുമ്പോൾ കാർട്ടൂൺ എന്നത് പാഠപുസ്തകങ്ങളുടെ ഭാഗമായി പ്രത്യക്ഷപ്പെട്ടിരുന്നില്ല. കേരളത്തിലെ സർഗാത്മകതയുള്ള ഒരു കാർട്ടൂണിസ്റ്റായി മാറേണ്ടിയിരുന്ന അഫറ എന്തുകൊണ്ടോ പിന്നീട് നിശ്ശബ്ദയായി മാറുകയാണുണ്ടായത്.
ബുദ്ധി ഏകാത്മകമല്ലെന്നും ഓരോ പഠിതാവിന്റെയും ബുദ്ധിക്കു ബഹുമുഖത്വമുണ്ടെന്നുമുള്ള (Multiple intelligence)ഹോവാർഡ് ഗാർഡ്നരുടെ ബുദ്ധിയുടെ ബഹുമുഖത്വം വിദ്യാഭ്യാസ രംഗത്ത് പുതിയ മാറ്റമുണ്ടാക്കിയ കാലഘട്ടത്തിൽ എഴുതാനും വായിക്കാനും നന്നായി ആശയവിനിമയം ചെയ്യാനുമുള്ള കഴിവും (verbal/ linguistic intelligence) നൃത്തം , അഭിനയം, തുടങ്ങിയ ശരീരഭാഷ ഉപയോഗിച്ചുകൊണ്ടുള്ള പ്രവർത്തനങ്ങൾ നടത്താനുമുള്ള കഴിവും (Kinestic intelligence) സംഗീതത്തിന്റെ വിവിധ ഘടകങ്ങൾ പരിപോഷിപ്പിക്കാനുള്ള കഴിവും (musical intelligence) മെച്ചപ്പെട്ട രീതിയിൽ മറ്റുള്ളവരുമായി ഇടപെടുന്നതിനുള്ള കഴിവും ഡയറിയെഴുത്തിലൂടെയും മറ്റും പ്രകാശിതമാകുന്ന സ്വയമറിയാനുള്ള കഴിവും (Intra personal intelligence) സ്വന്തം അസ്തിത്വത്തെ കുറിച്ചറിയാനുള്ള കഴിവും (Existential intelligence) പരിപോഷിപ്പിക്കുന്ന തരത്തിലുള്ള പ്രവർത്തനങ്ങളാണ് സ്കൂൾ ഈ കാലയളവിൽ ചെയ്തിട്ടുള്ളത്.
വിദ്യാലയം ഒരു സാമൂഹ്യ സ്ഥാപനമാണ്. അർത്ഥവത്തായ ഏതു പാഠ്യപദ്ധതിയും സമൂഹത്തോട് കടപ്പാടുള്ളതായിരിക്കണം എന്നാണ് 2005 ലെ National Curriculum Framework for Education ഉദ്ഘോഷിക്കുന്നത്. സമൂഹത്തിന്റെ ആവശ്യങ്ങൾ ഉൾക്കൊണ്ടുകൊണ്ട് സംഭവിക്കുന്നതായിരിക്കണം പഠന പ്രക്രിയയും പഠനപ്രവർത്തനവും. അതിൽ ഊന്നിനിന്നുകൊണ്ടാണ് പഠിതാക്കൾ വയോജനങ്ങളെ സംരക്ഷിക്കുന്നതുമായി ബന്ധപ്പെട്ടു ഒരു പ്രൊജക്ട് ഈ വിദ്യാലയം ഏറ്റെടുക്കുന്നത്. കുട്ടികൾ സ്കൂളിന് ചുറ്റുമുള്ള വൃദ്ധജനങ്ങളെ സന്ദർശിക്കുകയും ശനിയാഴ്ചകളിൽ അവരോടൊത്ത് ഏറെ സമയം ചെലവഴിക്കുകയും ചെയ്യുന്ന ഒരു പ്രവർത്തനമായിരുന്നു അത്. കുട്ടികൾ ആ വയോജനങ്ങളുടെ സുഖദുഃഖങ്ങളിൽ പങ്കു ചേരുകയും അവരിൽ നിന്നും, കാലഹരണപ്പെടുന്ന ഒരു സംസ്കാരത്തിന്റെ അന്തർ വിനിമയങ്ങൾ പിടിച്ചെടുക്കുകയും ചെയ്തു. സ്കൂളിന് ചുറ്റുമുള്ള നിർധന രോഗികളെ സഹായിക്കാൻ ഇവിടുത്തെ കുഞ്ഞുങ്ങൾ സ്വാതന്ത്ര്യ ദിനത്തിൽ പതാകകൾ നിർമ്മിച്ചുകൊണ്ട് സമൂഹത്തിലേക്കിറങ്ങുകയും അതിന്റെ വില്പനയിലൂടെ സമാഹരിച്ച തുക അവർക്കു നൽകുകയും ചെയ്തു. കൂടാതെ സ്കൂളിലെ നാടകസംഘം ഒരു നാടകം രൂപപ്പെടുത്തുകയും നാടിന്റെ വിവിധ ഭാഗങ്ങളിൽ അവതരിപ്പിച്ചുകൊണ്ട് ഇതിൽ നിന്ന് ലഭിക്കുന്ന വരുമാനം നാട്ടിലെ ക്യാൻസർ രോഗികൾക്കും വൃക്ക രോഗികൾക്കും നല്കുകയുമുണ്ടായി. കേരളത്തിൽ സമീപകാലത്തുടലെടുത്ത വൃദ്ധസദനസംസ്കാരത്തിനെതിരെ ഒരു വിദ്യാഭ്യാസസ്ഥാപനം നടത്തുന്ന പ്രതിരോധപ്രവർത്തനം തന്നെയാണിത്. സമൂഹം വിദ്യാലയത്തെയും വിദ്യാലയം സമൂഹത്തെയും പുനഃസൃഷ്ടിക്കുന്ന മുഹൂർത്തങ്ങൾ ചരിത്രത്തിന്റെ ഭാഗമാണ്. പരസ്പരമുള്ള ഈ കൊടുക്കൽ വാങ്ങലുകളാണ് സംസ്കാരത്തെ മുന്നോട്ടു നയിക്കുന്നത്. കുട്ടികളെ മാത്രമല്ല മുതിർന്നവരെയും പഠിപ്പിക്കുക എന്ന ദൗത്യം കൂടി ഏറ്റെടുത്തു നടത്തിയിട്ടുണ്ട് ഈ വിദ്യാലയം. സ്കൂളിന് ചുറ്റുമുള്ള കമ്പ്യൂട്ടർ പരിജ്ഞാനമില്ലാത്തവർക്ക് സ്കൂൾ സമയം കഴിഞ്ഞു വൈകുന്നേരം 5 മണി മുതൽ രാത്രി 9 മണിവരെ ഇവിടുത്തെ സ്മാർട് ക്ലാസ് റൂമിൽനിന്നും കമ്പ്യൂട്ടർ പരിശീലനം നൽകുകയുണ്ടായി. എസ് എസ് ജി യുടെ നേതൃത്വത്തിലായിരുന്നു ഈ പരിശീലനം. ഒരു വർഷത്തോളം നീണ്ടുനിന്ന ഈ പരിശീലന പരിപാടിയിൽ അറുപതോളം പേർ രജിസ്റ്റർ ചെയ്യുകയും 42 പേർ പഠനം പൂർത്തിയാക്കുകയും ചെയ്തു. വീട്ടമ്മമാർ, തൊഴിലാളികൾ, വിദ്യാർത്ഥികൾ തുടങ്ങി വൃദ്ധരായ സ്ത്രീകൾ വരെ ഇതിന്റെ ഭാഗമായി ഇവിടെ എത്തിയിട്ടുണ്ട്. സമൂഹത്തെ വിദ്യാഭ്യാസം ചെയ്യിക്കുക എന്ന മഹത്തായ പ്രവർത്തനത്തിന്റെ തിളങ്ങുന്ന നാഴികക്കല്ലു കളായിരുന്നു ഇത്. ഈ സ്മാർട്ട് ക്ലാസ് റൂമിലെ അഞ്ചു കമ്പ്യൂട്ടറുകളും ഒരു എൽ സി ഡി പ്രൊജക്ടറും നാട്ടുകാർ സംഭാവനയായി തന്നവയാണ്. പൊതുബോധം കുട്ടികളിലുണ്ടാക്കാൻ വിദ്യാലയം നടത്തിയ ഒരു പ്രോജക്ട് ആയിരുന്നു പൊതുകൃഷി. കെ എം അനന്തേട്ടന്റെ നേതൃത്വത്തിൽ മുഴുവൻ വിദ്യാർഥികളും പി ടി എ യും എസ് എസ് ജി യും മാതൃസമിതിയും ഒത്തുചേർന്നു കൃഷി ആരംഭിക്കുകയും അതിന്റെ വിളവ് പൊതുസമൂഹം ഉപയോഗിക്കുകയും ചെയ്ത ഒരു മാതൃകാ പ്രവർത്തനമായിരുന്നു ഇത്. ആർക്കു വേണമെങ്കിലും വിളവെടുക്കാം എന്നതായിരുന്നു ഇതിന്റെ സന്ദേശം. എന്റേത് എന്ന മനോഭാവത്തിൽ നിന്നും നമ്മുടേത് എന്ന മാനസികാവസ്ഥയിലേക്ക് കുട്ടികളെ എത്തിക്കുക എന്നതായിരുന്നു ഈ പ്രോജക്ടിന്റെ ലക്ഷ്യം. താൻ സമൂഹത്തിനു വേണ്ടിയും സമൂഹം തനിക്കു വേണ്ടിയും എന്ന അടിസ്ഥാനപരമായ ധാരണ കുട്ടികളിൽ ഉണ്ടാക്കാൻ പര്യാപ്തമായ ഒരു പ്രവർത്തനമായിരുന്നു ഇത്. ഈ വിദ്യാലയത്തിൽ നടന്ന ഇത്തരം പ്രവർത്തനങ്ങളാണ് സംസ്ഥാന സർക്കാർ 2015-16 വർഷം പുറത്തിറക്കിയ എട്ടാം ക്ലാസ് മലയാളം കേരളപാഠാവലിയിലെ ഒന്നാമത്തെ പാഠത്തിന്റെ പ്രവേശകമായി ഉൾക്കൊള്ളിച്ചിട്ടുള്ളത്. വിദ്യാലയവും സമൂഹവും ഒന്നായി മാറിയ ഒരപൂർവതക്കുള്ള ഒരു അംഗീകാരമായി ഇതിനെ കാണാം. വിവര സാങ്കേതിക വിദ്യ ഫലപ്രദമായി ഉപയോഗിച്ച ചുരുക്കം ചില സ്കൂളുകളിലൊന്നാണ് പറമ്പിൽ എൽ പി സ്കൂൾ. കുട്ടികൾക്ക് കമ്പ്യൂട്ടർ പരിശീലനം നൽകാനായി 2002 ൽ പി ടി എ യുടെ സാമ്പത്തിക സഹായത്തോടെ കമ്പ്യൂട്ടർ വാങ്ങുകയും പരിശീലനം ആരംഭിക്കുകയും ചെയ്യുകയുണ്ടായി. തോടന്നൂർ ഉപജില്ലയിൽ ആദ്യമായി കുട്ടികൾക്ക് കമ്പ്യൂട്ടർ പരിശീലനം നൽകിയ പ്രൈമറി സ്കൂൾ ഇതായിരിക്കണം. കൂടാതെ www.parambillpschool.webs.com എന്ന വെബ്സൈറ്റ് 2005 ൽ തന്നെ ഇവിടെ ആരംഭിക്കുകയുണ്ടായി. കുട്ടികളുടെയും രക്ഷിതാക്കളുടെയും പൂർവ വിദ്യാർത്ഥികളുടെയും രചനകളുൾപ്പെടുത്തിക്കൊണ്ടുള്ള ഒരു വെബ്സൈറ്റായിരുന്നു ഇത്. വിദ്യാഭ്യാസം കൂട്ടായ്മയുള്ള സമൂഹത്തിനു വേണ്ടിയായിരിക്കണം (Education for cohesive society) എന്ന കാഴ്ചപ്പാട് ഉയര്തതപ്പിടിച്ചതിന്റെ ഉദാഹരണമാണ് ൽ മംഗലാട് പള്ളി ആക്രമിക്കപ്പെട്ടപ്പോൾ ഇവിടുത്തെ പി ടി എ കമ്മിറ്റി ഇതിൽ പ്രതിഷേധിച്ചു പ്രമേയം ഇറക്കിയത്. 2004 മുതൽ ഈ വിദ്യാലയത്തിൽ രാവിലെ പഠനം തുടങ്ങുന്നതിനു മുമ്പ് സഹജയോഗ ചെയ്തു വരുന്നു. പ്രഭാതത്തിലെ പ്രാർഥനാ വേളയിൽ ലോകസംഗീതമാണ് കുട്ടികളെ കേൾപ്പിക്കുന്നത്. ബഡാ ഗുലാംഅലിഖാനും ഫരീദ ഖാനുമും പണ്ഡിറ്റ് ജസ്രാജൂം ചെമ്പൈ വൈദ്യനാഥ അയ്യരും ടി എം കൃഷ്ണയും ബിഥോവന്റെ സിംഫണികളും ഇവിടുത്തെ കുട്ടികൾക്ക് പരിചിതമാണ്.കേൾവിയുടെയും കാഴ്ചയുടെയും സംവേദനതലം കലാത്മകമാകുന്ന ഒരു പാരമ്പര്യം വർഷങ്ങളായി ഈ വിദ്യാലയത്തിനുണ്ട്.എല്ലാ ദിവസങ്ങളിലും ഗാന്ധി ചിത്രത്തിൽ പുഷ്പാർച്ചന നടത്തിക്കൊണ്ടാണ് ഇവിടുത്തെ വിദ്യാലയ ദിനം ആരംഭിക്കുന്നത്. 2007 ൽ KCF രൂപീകരിച്ചു പാഠ്യപദ്ധതി പരിഷ്കരണം നടന്ന അവസരത്തിൽത്തന്നെ അതിന്റെ ചുവട് പിടിച്ച് നിരവധി പ്രവർത്തനങ്ങൾ ഇവിടെ നടക്കുകയുണ്ടായി. അതിലൊന്നാണ് പഠന പിന്നോക്കാവസ്ഥ പരിഹരിക്കാൻ ഈ വിദ്യാലയത്തിൽ നടന്നവ. മനഃശാസ്ത്രജ്ഞനായ എ പി ബാബു മാസ്റ്ററുടെ നേതൃത്വത്തിൽ ചോദ്യാവലികൾ തയ്യാറാക്കി വീടുകളിലെത്തിച്ചുകൊണ്ട് ഒരു സർവേ പൂർത്തിയാക്കുകയും അതിന്റെ വെളിച്ചത്തിൽ ഓരോ കുട്ടിക്കുമുള്ള വിഭിന്ന പഠനാനുഭവം നൽകാൻ രക്ഷിതാക്കളെ സഹായിക്കുകയും ചെയ്യുകയുണ്ടായി. ഇംഗ്ലീഷ് ഭാഷയ്ക്കു പ്രാധാന്യം നൽകുന്ന ഒട്ടനവധി പ്രവർത്തനങ്ങൾ ഇവിടെ നടന്നിട്ടുണ്ട്. തിങ്കളാഴ്ചകളിൽ കുട്ടികൾ ഇംഗ്ലീഷ് മാത്രം സംസാരിക്കുന്ന MONDAY ENGLISH DAY എന്ന പ്രവർത്തനം 2012 മുതൽ ഇവിടെ ആരംഭിച്ചിട്ടുണ്ട്. പി ടി എ യുടെയും എസ് എസ് ജിയുടെയും മാതൃസമിതിയുടെയും പിന്തുണ ഈ വിദ്യാലയത്തിന്റെ ചാലക ശക്തിയാണ്. അതിന്റെ ഉദാഹരണമാണ് 2015 ലെയും 2016 ലെയും ഉപജില്ലയിലെ മികച്ച പി ടി എ യ്ക്കുള്ള അവാർഡ് ഈ സ്കൂളിനെ തേടിയെത്തിയത്. അൺ എയ്ഡഡ് ഇംഗ്ലീഷ് മീഡിയം സ്കൂളുകളുടെ വരവ് കേരളത്തിലെ പൊതുവിദ്യാഭ്യാസ രംഗത്തുണ്ടാക്കിയ ആഘാതങ്ങൾ ഈ സ്കൂളിനെയും ബാധിച്ചിട്ടുണ്ട്. 2004 ൽ 163 കുട്ടികളുണ്ടായിരുന്ന ഇവിടെ 2016 ൽ 149 കുട്ടികളായി കുറയുകയുണ്ടായി. എന്നാൽ 2017 ൽ കുട്ടികളുടെ എണ്ണം 172 ആയി ഉയരുകയുണ്ടായി. സമൂഹത്തിന്റെ വിളഭൂമികളിൽ നിന്നാണ് ഏതൊരു വിദ്യാലയവും അതിന്റെ വിഭവങ്ങൾ കണ്ടെത്തുന്നത്. സമൂഹവും വിദ്യാലയവും തമ്മിലുള്ള പാരസ്പര്യത്തിലൂടെ ഈ കൊടുക്കൽ വാങ്ങലുകൾ പറമ്പിൽ എൽ പി സ്കൂളിൽ നടന്നിട്ടുണ്ട് എന്ന് നിസ്സംശയം പറയാനാവും
ഭൗതികസൗകര്യങ്ങൾ
പാഠ്യേതര പ്രവർത്തനങ്ങൾ
- സ്കൗട്ട് & ഗൈഡ്സ്
- സയൻസ് ക്ലബ്ബ്
- ഐ.ടി. ക്ലബ്ബ്
- ഫിലിം ക്ലബ്ബ്
- ബാലശാസ്ത്ര കോൺഗ്രസ്സ്.
- വിദ്യാരംഗം കലാ സാഹിത്യ വേദി.
- ഗണിത ക്ലബ്ബ്.
- സാമൂഹ്യശാസ്ത്ര ക്ലബ്ബ്.
- പരിസ്ഥിതി ക്ലബ്ബ്.
മുൻ സാരഥികൾ
സ്കൂളിലെ മുൻ അദ്ധ്യാപകർ :
- കെ കണാരൻ
- എ കൃഷ്ണകുറുപ്പ്
- എ അപ്പു നമ്പ്യാർ
- കെ ഗോപാലക്കുറുപ്പ്
- കെ കുഞ്ഞിരാമമാരാർ
- എ ഗോവിന്ദക്കുറുപ്പ്
- അമ്മുക്കുട്ടിയമ്മ
- രാമർ കുറുപ്പ്
- കെ രാമൻ നായർ
- കെ എം അപ്പുണ്ണിക്കുറുപ്പ്
- ലക്ഷ്മി അമ്മ
- ഗോവിന്ദ വാര്യർ
- കുഞ്ഞുണ്ണിക്കുറുപ്പ്
- ഗോവിന്ദൻ നമ്പ്യാർ
- കമലാക്ഷി
- പി എം ബാലൻ ഗുരുക്കൾ
- കണ്ടന്നൂർ ലീല
- കെ ചീരു
- ടി നാരായണി
- പി ടി രാധാമണി
- ഇ കെ രത്നമ്മ
- സി എം ജാനു
- ടി എം കണാരൻ
- ടി പി കുഞ്ഞികൃഷ്ണൻ നമ്പ്യാർ
- സി വി കുഞ്ഞിരാമൻ
- ടി കെ അലവിക്കുട്ടി
- ടി സാവിത്രി
- എം കെ രാജൻ
- കെ വിശ്വംഭരൻ
- സി എച്ച് ഹമീദ്
നേട്ടങ്ങൾ
പ്രശസ്തരായ പൂർവവിദ്യാർത്ഥികൾ
- മൂടാടി ദാമോദരൻ മാസ്റ്റർ ( സാഹിത്യകാരൻ )
- ജയൻ തിരുമന (നാടക സംവിധായകൻ )
- ഡോ സി കെ അരവിന്ദാക്ഷൻ (അഭിനേതാവ്)
- റയീസ് റഹ്മാൻ (ഫോട്ടോഗ്രാഫർ)
- ശ്രീലക്ഷ്മി ശ്രീധർ ( സൂര്യ സിംഗർ)
- ജീവനി ആർ ( കവി )
ചിത്രശാല
വഴികാട്ടി
വിദ്യാലയത്തിലേക്ക് എത്തുന്നതിനുള്ള മാർഗ്ഗങ്ങൾ
|
{{#multimaps:11.736983, 76.074789 |zoom=13}}