സെന്റ് ആൻസ് എയുപിഎസ് നീലേശ്വരം/പ്രവർത്തനങ്ങൾ/2025-26

സ്കൂൾ

സൗകര്യങ്ങൾ

പ്രവർത്തനങ്ങൾ

ക്ലബ്ബുകൾ

ചരിത്രം

അംഗീകാരം

Home

2025-26

2026-27

Archive 2022-23 2023-24 2024-25 2025-26

📅 12 March 2026

തേൻ നെല്ലിക്ക: അറിവിന്റെയും സർഗ്ഗാത്മകതയുടെയും ഡിജിറ്റൽ ലോകം

തേൻ നെല്ലിക്ക

മാറുന്ന കാലത്തിനനുസരിച്ച് വിദ്യാഭ്യാസ രംഗത്തുണ്ടാകുന്ന ഡിജിറ്റൽ മാറ്റങ്ങളെ ഉൾക്കൊണ്ടുകൊണ്ട് സെന്റ് ആൻസ് എ.യു.പി സ്കൂൾ തയ്യാറാക്കിയ സവിശേഷമായ പ്ലാറ്റ്‌ഫോമാണ് തേൻ നെല്ലിക്ക. കുട്ടികളുടെ സർഗ്ഗവാസനകളെ പരിപോഷിപ്പിക്കുന്നതിനും അവരുടെ രചനകളെ ഡിജിറ്റൽ ക്യാൻവാസിലേക്ക് എത്തിക്കുന്നതിനുമായാണ് ഈ പദ്ധതി വിഭാവനം ചെയ്തിരിക്കുന്നത്.

വിദ്യാർത്ഥികൾ തയ്യാറാക്കുന്ന മികച്ച സൃഷ്ടികൾ ഇനി ഈ പ്ലാറ്റ്‌ഫോമിലൂടെ വായനക്കാരിലേക്ക് എത്തും. പ്രധാനമായും താഴെ പറയുന്നവയാണ് ഇതിൽ ഉൾപ്പെടുത്തിയിരിക്കുന്നത്:

• 📖 കഥകൾ
• ✍️ കവിതകൾ
• ✈️ യാത്രാവിവരണങ്ങൾ
• 🎨 ചിത്രങ്ങൾ

ഇതിനായി എഴുത്തുപുര പോലുള്ള പ്രത്യേക വിഭാഗങ്ങളും ഡിജിറ്റൽ മാഗസിനിൽ ഒരുക്കിയിട്ടുണ്ട്. കുട്ടികളുടെ സർഗ്ഗവേദിയെ പുതിയ കാലത്തിന്റെ സാങ്കേതിക വിദ്യയുമായി കൂട്ടിയിണക്കുന്ന ഈ സംരംഭം, അവരുടെ സർഗ്ഗാത്മകമായ വളർച്ചയിൽ ഒരു വലിയ നാഴികക്കല്ലായിരിക്കും.

കുട്ടികളുടെ വായനയും എഴുത്തും പ്രോത്സാഹിപ്പിക്കുന്നതിനൊപ്പം, അവർക്ക് സ്വന്തമായി രചനകൾ പ്രസിദ്ധീകരിക്കാനുള്ള ഒരിടം നൽകുക എന്ന വലിയ ലക്ഷ്യമാണ് 'തേൻ നെല്ലിക്ക'യിലൂടെ സ്കൂൾ അധികൃതർ മുന്നോട്ട് വെക്കുന്നത്.

കുട്ടികളുടെ രചനകൾ വായിക്കാനും ഡിജിറ്റൽ മാഗസിൻ കാണാനും താഴെ ക്ലിക്ക് ചെയ്യുക:

🌐 തേൻ നെല്ലിക്ക പോർട്ടൽ സന്ദർശിക്കുക

📅 4 February 2026

ശുചിത്വസന്ദേശ റാലി

2026 ഫെബ്രുവരി 4-ന് രാവിലെ 10 മണിക്ക് രണ്ടാം ക്ലാസ്സിലെ കുട്ടികളുടെ 'ആരോഗ്യം സമ്പത്ത്' എന്ന പാഠഭാഗവുമായി ബന്ധപ്പെട്ട് ഒരു ശുചിത്വസന്ദേശ റാലി സംഘടിപ്പിച്ചു. ഹെഡ്മിസ്ട്രസ് അധ്യക്ഷത വഹിച്ച യോഗത്തിൽ ഹരിതസേന അംഗം റാലി ഉദ്ഘാടനം ചെയ്തു. ഹെഡ്മിസ്ട്രസ് ഹരിതസേന സമൂഹത്തിന് നൽകുന്ന വിലപ്പെട്ട സംഭാവനകളെക്കുറിച്ച് സംസാരിച്ചു. ചടങ്ങിൽ അവരെ ആദരിച്ചു. കുട്ടികൾ അവരോട് ചോദ്യങ്ങൾ ചോദിക്കുകയും അവർ മറുപടി പറയുകയും ചെയ്തു. തുടർന്ന് പ്ലക്കാർഡുകൾ ഉയർത്തി മുദ്രാവാക്യം വിളിച്ച് കുട്ടികൾ സ്കൂളിന് മുമ്പിലുള്ള റോഡിലൂടെ റാലി നടത്തി.

📅 14 January 2026

പഠനയാത്ര 2026 - പ്രീ-പ്രൈമറി & ഒന്നാം ക്ലാസ് വിദ്യാർത്ഥികൾ

ഈ വർഷത്തെ നമ്മുടെ കൊച്ചു കൂട്ടുകാരുടെ (പ്രീ-പ്രൈമറി, ഒന്നാം ക്ലാസ്) പഠനയാത്ര അവിസ്മരണീയമായ അനുഭവങ്ങളാൽ സമ്പന്നമായിരുന്നു.

സന്ദർശിച്ച സ്ഥലങ്ങൾ: ജനതാ പാർക്ക്, ചന്തേര പോലീസ് സ്റ്റേഷൻ, ഫയർ സ്റ്റേഷൻ, വിസ്മയ പാർക്ക്.

ജനതാ പാർക്ക്: യാത്രയുടെ തുടക്കം ജനതാ പാർക്കിലായിരുന്നു.

ചന്തേര പോലീസ് സ്റ്റേഷൻ: തുടർന്ന് ചന്തേര പോലീസ് സ്റ്റേഷൻ സന്ദർശിച്ചു. പോലീസ് സ്റ്റേഷന്റെ പ്രവർത്തനങ്ങളെക്കുറിച്ചും അവിടുത്തെ ഉദ്യോഗസ്ഥരുടെ ചുമതലകളെക്കുറിച്ചും ഒരു ഉദ്യോഗസ്ഥൻ കുട്ടികൾക്ക് വളരെ ലളിതമായി വിശദീകരിച്ചു നൽകി.

ഫയർ സ്റ്റേഷൻ: പോലീസ് സ്റ്റേഷന് അടുത്തുള്ള ഫയർ സ്റ്റേഷനായിരുന്നു അടുത്ത ലക്ഷ്യം. അഗ്നിശമന സേനാംഗങ്ങൾ ഉപയോഗിക്കുന്ന വിവിധ ഉപകരണങ്ങൾ കുട്ടികൾക്ക് പരിചയപ്പെടുത്തിക്കൊടുക്കുകയും, അവ എങ്ങനെയൊക്കെയാണ് പ്രവർത്തിക്കുന്നതെന്ന് നേരിട്ട് കാണിച്ചു കൊടുക്കുകയും ചെയ്തു.

വിസ്മയ പാർക്ക്: ഉച്ചയോടെ വിസ്മയ പാർക്കിൽ എത്തിച്ചേർന്നു. അവിടെ വിവിധ റൈഡുകളിൽ കയറിയ കുട്ടികൾ ഉച്ചഭക്ഷണത്തിന് ശേഷം വാട്ടർ റൈഡുകളിൽ കളിച്ച് ആസ്വദിച്ചു. വിജ്ഞാനവും വിനോദവും പകർന്ന ഈ യാത്ര കുട്ടികൾക്ക് വേറിട്ടൊരു അനുഭവമായി മാറി.

യാത്രാനുഭവങ്ങൾ: കുട്ടികളുടെ കണ്ണിലൂടെ

പഠനയാത്ര വെറുമൊരു യാത്ര മാത്രമല്ല, കുട്ടികളുടെ സർഗാത്മകതയെ ഉണർത്തുന്ന ഒരു അനുഭവം കൂടിയായിരുന്നു എന്ന് അവരുടെ പ്രതികരണങ്ങൾ തെളിയിക്കുന്നു. യാത്രയ്ക്ക് ശേഷം കുട്ടികൾ തങ്ങളുടെ അനുഭവങ്ങൾ കുറിപ്പുകളായും ചിത്രങ്ങളായും പകർത്തി. ഒന്നാം ക്ലാസിലെ വിദ്യാർത്ഥിനിയായ ഇഷാനി ദക്ഷ തയ്യാറാക്കിയ യാത്രാവിവരണവും, യാത്രയിലെ പ്രധാന കാഴ്ചകളെ ഉൾക്കൊള്ളിച്ചു കൊണ്ട് വരച്ച ചിത്രവും ഈ യാത്ര അവർക്ക് എത്രത്തോളം പ്രിയപ്പെട്ടതായിരുന്നു എന്നതിന്റെ തെളിവാണ്.

കനവ് ലോകം

---

Ishani Daksha T (STD 1A)

ഇന്ന് എനിക്ക് വളരെ വളരെ സന്തോഷമുള്ള ദിവസമായിരുന്നു. കാരണം ഇന്ന് സ്കൂളിൽ നിന്നും പഠനയാത്ര പോയി. എനിക്ക് ഇത് വിചാരിച്ച് ഇന്നലെ രാത്രി ഉറക്കം പോലും വന്നില്ല. എങ്ങനെയെങ്കിലും നേരം ആയാൽ മതിയായിരുന്നു. ഞാൻ ആദ്യമായാണ് സ്കൂളിൽ നിന്ന് ടൂർ പോകുന്നത്. പോയില്ലെങ്കിൽ വലിയ നഷ്ടമായി മാറിയേനെ. കാരണം ഞാൻ ഈ യാത്ര അത്രയും ആസ്വദിച്ചു. ഞങ്ങൾ ആദ്യം പോയത് ജനത പാർക്കിലായിരുന്നു. അവിടെ പോയി ഫോട്ടോ എടുത്തു. അപ്പോൾ ഞാൻ വിചാരിച്ചു ഇവിടെ വന്നത് ഫോട്ടോ എടുക്കാനാണോയെന്ന്. പിന്നെയല്ലെ ഞങ്ങളെ, കൗതുക ലോകത്തേക്ക് കൊണ്ടുപോയത്. പോലീസ് സ്റ്റേഷനും ഫയർ സ്റ്റേഷനും.

പോലീസ് സ്റ്റേഷനിൽ നിന്നും ഞാൻ ഇതുവരെ കാണാത്ത തോക്ക് കണ്ടു, ലോക്കപ്പ് കണ്ടു, വിലങ്ങ് കണ്ടു. ഇതൊക്കെ ഞാൻ ആദ്യമായിട്ടാണ് കാണുന്നത്. കളിതോക്ക് കൊണ്ടൊക്കെ കളിച്ചിട്ടുണ്ട്. പിന്നെ ഞങ്ങൾ പോയത് ഫയർ സ്റ്റേഷനിൽ ആയിരുന്നു. അവിടെ എനിക്ക് കൗതുകമായി തോന്നിയത് തീ പിടിച്ചാൽ വെള്ളം ഉപയോഗിച്ച് തീ അണയ്ക്കുന്നതാണ്. പിന്നെ എനിക്ക് ചന്ദ്രനിൽ പോകുമ്പോൾ ഇടുന്ന കുപ്പായം ഏറ്റവും ഇഷ്ടപ്പെട്ടു. പിന്നെ ഞങ്ങൾ പോയത് വിസ്മയ ലോകത്തേക്കായിരുന്നു. അതാണ് നമ്മുടെ വി ലാന്റ്. അവിടെ ഞങ്ങൾ അടിച്ചു പൊളിച്ചു. റൈഡ്‌സും കളികളും ഒക്കെയായി അവിടെ നിന്ന് വരാനെ തോന്നിയില്ല. അങ്ങനെ ഈ ദിവസം ഒരിക്കലും മറക്കാൻ പറ്റാത്ത കുറെ നല്ല ഓർമ്മകൾ സമ്മാനിച്ചു കടന്നു പോയി.
- ഇഷാനി ദക്ഷ

📅 14 January 2026

രക്ഷാകർതൃ ബോധവൽക്കരണ ക്ലാസും ക്ലാസ് പിടിഎ യോഗവും

രക്ഷാകർതൃ ബോധവൽക്കരണ ക്ലാസും ക്ലാസ് പിടിഎ യോഗവും

രക്ഷാകർതൃ ബോധവൽക്കരണ ക്ലാസും ക്ലാസ് പിടിഎ യോഗവും

സ്‌കൂളിൽ 2026 ജനുവരി 14-ന് ഉച്ചയ്ക്ക് 2 മണിക്ക് ക്ലാസ് തല പി.ടി.എ യോഗങ്ങളോടനുബന്ധിച്ച് രക്ഷിതാക്കൾക്കായി പ്രത്യേക പൊതുസമ്മേളനവും ബോധവൽക്കരണ ക്ലാസും സംഘടിപ്പിച്ചു. ഒന്നാം ക്ലാസ് മുതൽ ഏഴാം ക്ലാസ് വരെയുള്ള മുഴുവൻ വിദ്യാർത്ഥികളുടെയും രക്ഷിതാക്കൾക്കായി നടത്തിയ പൊതുസെഷനിൽ ചന്തേര പോലീസ് സ്റ്റേഷനിലെ സീനിയർ സിവിൽ പോലീസ് ഓഫീസർ ശ്രീ. പ്രഭേഷ് കുമാർ ബോധവൽക്കരണ ക്ലാസ് നയിച്ചു. കുട്ടികൾക്കിടയിലെ ലഹരി ഉപയോഗം, മൊബൈൽ ഫോണിന്റെ അമിതവും തെറ്റായതുമായ ഉപയോഗം എന്നിവയ്ക്കെതിരെ അദ്ദേഹം രക്ഷിതാക്കൾക്ക് ശക്തമായ മുന്നറിയിപ്പ് നൽകി. തന്റെ ഔദ്യോഗിക ജീവിതത്തിൽ പോലീസ് സ്റ്റേഷൻ പരിധികളിൽ നിന്നും ലഭിച്ച അനുഭവങ്ങൾ പങ്കുവെച്ചുകൊണ്ടാണ് അദ്ദേഹം ക്ലാസ്സ് നയിച്ചത്.

പി.ടി.എ പ്രസിഡന്റ് ശ്രീ. മഹേന്ദ്രൻ അധ്യക്ഷത വഹിച്ച ചടങ്ങിൽ സ്കൂൾ ഹെഡ്മിസ്ട്രസ്സ് സിസ്റ്റർ. ജെസ്സി ജോർജ് സ്വാഗതം ആശംസിച്ചു. ചടങ്ങിന് സ്റ്റാഫ് സെക്രട്ടറി സരിത ടീച്ചർ നന്ദി രേഖപ്പെടുത്തി.

പൊതുസമ്മേളനത്തിന് ശേഷം നടന്ന ക്ലാസ് തല പി.ടി.എ യോഗങ്ങളിൽ അധ്യാപകർ ക്ലാസ് തലത്തിൽ ഇത് വരെ നടന്ന പ്രവർത്തനങ്ങളെ കുറിച്ച് റിപ്പോർട്ട് അവതരിപ്പിച്ചു. തുടർന്ന് അർദ്ധവാർഷിക പരീക്ഷാ ഫലത്തെക്കുറിച്ച് അവലോകനം നടത്തി.

കൂടാതെ താഴെപ്പറയുന്ന കാര്യങ്ങളും യോഗത്തിൽ ചർച്ച ചെയ്തു:

• നാലാം തരത്തിലും ഏഴാം തരത്തിലും ഫെബ്രുവരി മാസം നടക്കുന്ന സി.എം കിഡ്സ് സ്കോളർഷിപ്പിനെ കുറിച്ച് അധ്യാപകർ വിശദീകരിച്ചു.
• സ്‌കൂൾ പഠനയാത്ര
• പഠനോത്സവം
• വാർഷികാഘോഷം

📅 22 December 2025

സ്നേഹത്തിന്റെ ക്രിസ്മസ്; പ്രിയ കൂട്ടുകാരനെ തേടി സഹപാഠികൾ വീട്ടിലെത്തി

നവജിനൊപ്പം കുട്ടികൾ

ആഘോഷങ്ങളുടെ ആരവങ്ങൾക്കിടയിൽ സഹജീവി സ്നേഹത്തിന്റെ മാതൃകയായി സെന്റ് ആൻസ് എയുപി സ്കൂളിലെ വിദ്യാർത്ഥികൾ. ക്രിസ്മസ് ആഘോഷവേളയിൽ തങ്ങളുടെ പ്രിയപ്പെട്ട സഹപാഠിയായ നവജിന്റെ വീട്ടിലെത്തിയാണ് കുട്ടികൾ സന്തോഷം പങ്കിട്ടത്.

ഭിന്നശേഷിക്കാരനായ തന്റെ കൂട്ടുകാരന് ആഘോഷവേളകളിൽ ഒറ്റപ്പെടൽ അനുഭവപ്പെടരുത് എന്ന സഹപാഠികളുടെ വലിയ ആഗ്രഹമാണ് ഈ സന്ദർശനത്തിന് പിന്നിൽ. വീട്ടിലെത്തിയ കുട്ടികൾ അവന് ചുറ്റും കൂടി ക്രിസ്മസ് കാരളുകൾ പാടുകയും, ആശംസകൾ നേരുകയും, സമ്മാനങ്ങൾ നൽകുകയും ചെയ്തു.

ഭിന്നശേഷിക്കാരായ കുട്ടികളോടുള്ള മനോഭാവത്തിൽ മാറ്റം വരുത്തുന്നതിനും, അവരെ പൊതുധാരയിലേക്ക് ചേർത്തുപിടിക്കുന്നതിനും ഇത്തരം പ്രവർത്തനങ്ങൾ വലിയ പങ്കുവഹിക്കുന്നു. സഹപാഠികളോടുള്ള കരുതലുമായെത്തിയ വിദ്യാർത്ഥികളുടെ ഈ പ്രവർത്തനം അധ്യാപകരുടെയും രക്ഷിതാക്കളുടെയും അഭിനന്ദനം ഏറ്റുവാങ്ങി. കേവലം ആഘോഷങ്ങൾക്കപ്പുറം, മാനവികതയുടെയും ഉൾച്ചേർക്കലിന്റെയും (Inclusive Education) വലിയൊരു പാഠം കൂടിയായി ഈ സന്ദർശനം മാറി.

🏆 നേട്ടങ്ങൾ

ഹോസ്ദുർഗ് ഉപജില്ലാ ശാസ്ത്രോത്സവം: സെന്റ് ആൻസ് എ.യു.പി. സ്കൂളിന് മികച്ച വിജയം

ഹോസ്ദുർഗ് ഉപജില്ലാ സ്കൂൾ ശാസ്ത്രോത്സവത്തിൽ നീലേശ്വരം സെന്റ് ആൻസ് എ.യു.പി. സ്കൂളിന് അഭിമാനനേട്ടം. വിവിധ മേളകളിലായി യു.പി. വിഭാഗം ഓവറോൾ കിരീടപ്പോരാട്ടത്തിൽ സ്കൂൾ മികച്ച പ്രകടനം കാഴ്ചവെച്ചു.

സാമൂഹ്യശാസ്ത്ര മേളയിൽ സ്കൂൾ ഒന്നാം സ്ഥാനം കരസ്ഥമാക്കി. ശാസ്ത്രമേളയിലും ഐ.ടി. മേളയിലും രണ്ടാം സ്ഥാനവും, പ്രവൃത്തിപരിചയ മേളയിൽ മൂന്നാം സ്ഥാനവും നേടി സ്കൂൾ മികവ് തെളിയിച്ചു. വിദ്യാർത്ഥികളുടെ അഭിരുചിയും മികച്ച അവതരണവും, അധ്യാപകരുടെ ചിട്ടയായ പരിശീലനവുമാണ് ഈ വിജയത്തിന് പിന്നിൽ. വിവിധ ഇനങ്ങളിൽ വിജയികളായ കുട്ടികളെയും നേതൃത്വം നൽകിയ അധ്യാപകരെയും സ്കൂൾ അധികൃതർ അഭിനന്ദിച്ചു.

🥋 ജില്ലാതല ജൂഡോ മത്സരത്തിൽ മിന്നും വിജയം

   ജില്ലാതല ജൂഡോ മത്സരത്തിൽ നീലേശ്വരം സെന്റ് ആൻസ് എ.യു.പി. സ്കൂളിലെ വിദ്യാർഥികളായ ഇഷാനും ഋതുവർണയും മികച്ച വിജയം നേടി. ഇരുവരും മത്സരത്തിൽ രണ്ടാം സ്ഥാനമാണ് കരസ്ഥമാക്കിയത്.

👵 അന്താരാഷ്ട്ര വയോജന ദിനം ആചരിച്ചു

   സെന്റ് ആൻസ് എ.യു.പി. സ്കൂളിലെ ഭാരത് സ്കൗട്ട് ആൻഡ് ഗൈഡ്സ് (ബുൾബുൾ യൂണിറ്റ്) നേതൃത്വത്തിൽ അന്താരാഷ്ട്ര വയോജന ദിനം വിപുലമായ പരിപാടികളോടെ ആചരിച്ചു. കുട്ടികൾ സ്വന്തം വീടുകളിലും അയൽപക്കങ്ങളിലുമുള്ള വയോജനങ്ങളെ ആദരിച്ചുകൊണ്ട് മാതൃകയായി.

സ്കൂൾ ശുചീകരണത്തിൽ സെൻറ് ആൻസ് യുപി സ്കൂൾ മാതൃകയായി

മെഗാ ശുചീകരണ യജ്ഞം വിജയകരമായി പൂർത്തിയാക്കി. ക്ലീൻ കാസർകോട് പദ്ധതിയുടെ ഭാഗമായി വിദ്യാർത്ഥികളിലും പൊതുജനങ്ങളിലും ശുചിത്വബോധം വളർത്തുക എന്ന ലക്ഷ്യത്തോടെയാണ് വിദ്യാഭ്യാസ വകുപ്പ് ശുചീകരണ യജ്ഞം സംഘടിപ്പിച്ചത്. ഈ യജ്ഞത്തിൽ സെൻറ് ആൻസ് യുപി സ്കൂൾ ശ്രദ്ധേയമായ പങ്കാളിത്തം ഉറപ്പാക്കി. വിദ്യാർഥികളും അധ്യാപകരും പിടിഎ പ്രതിനിധികളും ചേർന്ന് സ്കൂൾ പരിസരം, ക്ലാസ് മുറികൾ, കളിസ്ഥലങ്ങൾ എന്നിവ പൂർണ്ണമായി ശുചീകരിച്ചു. കൂടാതെ സ്കൂളിലെ ടോയ്‌ലറ്റുകൾ ഹൈജീൻ മാനദണ്ഡങ്ങൾ അനുസരിച്ച് വൃത്തിയാക്കുന്നതിൽ പ്രത്യേക ശ്രദ്ധ ചെലുത്തി.

ഗണിതശാസ്ത്ര പ്രവർത്തി പരിചയമേളകൾക്ക് ഉജ്ജ്വല സമാപനം

സെൻറ് ആൻസ് സ്കൂളിൽ നടന്ന ഗണിത ശാസ്ത്ര പ്രവർത്തി പരിചയമേളകൾ വിദ്യാർത്ഥികളുടെ പങ്കാളിത്തം കൊണ്ടും അവതരണ മികവ് കൊണ്ടും ശ്രദ്ധേയമായി. മൂന്നു ദിവസങ്ങളിലായി നടന്ന മേളയിൽ അറിവിനെയും സർഗാത്മകതയും പ്രോത്സാഹിപ്പിക്കുന്ന നിരവധി പ്രൊജക്ടുകളും മാതൃകകളും പ്രദർശിപ്പിച്ചു. ശാസ്ത്രമേളയിൽ വിദ്യാർത്ഥികൾ തയ്യാറാക്കിയ റോബോട്ടുകൾ, സൗരയൂഥ മാതൃകകൾ, പരിസ്ഥിതി സൗഹൃദ ഉൽപ്പന്നങ്ങൾ എന്നിവ ഏറെ ആകർഷകമായിരുന്നു. കുട്ടികൾ ശാസ്ത്രീയ തത്വങ്ങൾ ലളിതമായ രീതിയിൽ വിശദീകരിച്ച് സന്ദർശകരുടെ അഭിനന്ദനങ്ങൾ പിടിച്ചുപറ്റി.

📅 സെപ്റ്റംബർ 25, 26

സ്കൂൾ കലോത്സവത്തിന് തുടക്കമായി

സെൻറ് ആൻസ് എ യുപി സ്കൂളിൽ കലോത്സവം സെപ്റ്റംബർ 25, 26 തീയതികളിലായി നടന്നു. വിദ്യാർത്ഥികളുടെ കലാപരവും പ്രകടനപരവുമായ കഴിവുകൾക്ക് വർണ്ണാഭമായ ഒരു വേദി ആയിരുന്നു ഈ പരിപാടി. കലോത്സവം സെപ്റ്റംബർ 25 വ്യാഴാഴ്ച രാവിലെ 10 മണിക്ക് ഔദ്യോഗികമായി ഉദ്ഘാടനം ചെയ്തു. വിദ്യാഭ്യാസ സ്റ്റാൻഡിങ് കമ്മിറ്റി ചെയർപേഴ്സൺ ആയ ശ്രീമതി ഭാർഗവി ഉദ്ഘാടന ചടങ്ങിൽ മുഖ്യാതിഥിയായി. സമഗ്രമായ വിദ്യാഭ്യാസത്തിൽ കലക്കും സംസ്കാരത്തിനും ഉള്ള പ്രാധാന്യം ശ്രീമതി ഭാർഗവി എടുത്തുപറയുകയും യുവകലാകാരന്മാർക്ക് ഒരു വേദി നൽകാനുള്ള സ്കൂളിൻറെ സമർപ്പണത്തെ അഭിനന്ദിക്കുകയും ചെയ്തു.

സ്കൂൾ കായികമേള

സെൻറ് ആൻസ് യുപി സ്കൂളിലെ വിദ്യാർഥികളുടെ കായിക ശേഷി പ്രോത്സാഹിപ്പിക്കുന്നതിന്റെ ഭാഗമായി വിപുലമായ രീതിയിൽ സ്കൂൾ ഒളിമ്പിക്സ് സംഘടിപ്പിച്ചു. നീലേശ്വരം സബ്ഇൻസ്പെക്ടർ ശ്രീ രതീഷ് കെ വി പരിപാടി ഉദ്ഘാടനം ചെയ്തു. രാവിലെ 10 മണിക്ക് സ്കൂൾ ഗ്രൗണ്ടിൽ വെച്ച് നടന്ന ചടങ്ങിൽ കായികമേളയുടെ പ്രാധാന്യത്തെക്കുറിച്ച് അദ്ദേഹം സംസാരിച്ചു. വിവിധ കായിക ഇനങ്ങളിൽ വിദ്യാർഥികൾ ആവേശപൂർവം പങ്കെടുത്തു. വിജയികളായവർക്ക് ട്രോഫികളും സർട്ടിഫിക്കറ്റുകളും വിതരണം ചെയ്തു. വിദ്യാർത്ഥികളുടെ കലാകായിക കഴിവുകൾ പരിപോഷിപ്പിക്കാൻ ഇത്തരം പരിപാടികൾ സഹായകമാകും എന്ന് സ്കൂൾ അധികൃതർ അറിയിച്ചു. കായികമേളയിൽ പങ്കെടുത്ത എല്ലാ വിദ്യാർത്ഥികളെയും സ്കൂൾ മാനേജ്മെൻറ് അഭിനന്ദിച്ചു.

📅 സെപ്റ്റംബർ 10

പിടിഎ യോഗം

സെൻറ് ആൻസ് യുപി സ്കൂളിൽ ക്ലാസ് പിടിഎ യോഗം നടന്നു. ഒന്നു മുതൽ ഏഴ് വരെ ക്ലാസുകളിലെ വിദ്യാർത്ഥികളുടെ രക്ഷിതാക്കൾക്കായി സംഘടിപ്പിച്ച യോഗം സെപ്റ്റംബർ 10 വെള്ളിയാഴ്ച ഉച്ചക്ക് 2.30ന് സ്കൂളിൽ വച്ച് നടത്തപ്പെട്ടു. ക്ലാസുകളിലെ അക്കാദമിക നിലവാരമുയർത്തുന്നതിനെ കുറിച്ചും കുട്ടികളുടെ പഠന പുരോഗതിയെ കുറിച്ചും യോഗത്തിൽ വിശദമായ ചർച്ചകൾ നടന്നു. വിദ്യാർത്ഥികളുടെ പഠനരീതി മെച്ചപ്പെടുത്തുന്നതിൽ രക്ഷിതാക്കൾക്കുള്ള പങ്ക് വലുതാണെന്ന് അധ്യാപകർ അഭിപ്രായപ്പെട്ടു. സ്കൂളുമായി സഹകരിച്ച് പ്രവർത്തിക്കാനുള്ള പൂർണ്ണ പിന്തുണ രക്ഷിതാക്കളുടെ ഭാഗത്തുനിന്നും ഉണ്ടായതായി ഹെഡ്മിസ്ട്രസും അധ്യാപകരും അറിയിച്ചു.

📅 ആഗസ്റ്റ് 15

സ്വാതന്ത്ര്യദിന ആഘോഷവും അനുമോദനവും

നീലേശ്വരം സെൻറ് ആൻസ് യുപി സ്കൂളിൽ സ്വാതന്ത്ര്യദിനാഘോഷം സമുചിതമായി ആഘോഷിച്ചു. ആഘോഷ പരിപാടികളോടനുബന്ധിച്ച് എൽ എസ് എസ്, യു എസ് എസ് പരീക്ഷകളിൽ വിജയിച്ച വിദ്യാർത്ഥികൾക്ക് അനുമോദനവും നൽകി. പരിപാടിയിൽ സിസ്റ്റർ ജെസ്സി ജോർജ് അധ്യക്ഷത വഹിച്ചു. ശ്രീ മഹേന്ദ്രൻ എം പരിപാടി ഉദ്ഘാടനം ചെയ്തു. ശ്രീ പി കെ രവീന്ദ്രൻ മുഖ്യപ്രഭാഷണം നടത്തി. തുടർന്ന് നടന്ന ചടങ്ങിൽ ശ്രീ ഗോപിനാഥൻ എൻ എസ് സ്വാതന്ത്ര്യദിന സന്ദേശം നൽകി. ചടങ്ങിനോടനുബന്ധിച്ച് വിവിധ കലാപരിപാടികളും അരങ്ങേറി. വിദ്യാർത്ഥികളുടെ ദേശഭക്തിഗാനം, സ്കിറ്റ്, നൃത്താവിഷ്കാരം എന്നിവ ശ്രദ്ധേയമായി.

വിവിധ ബോധവൽക്കരണ പരിപാടികൾ

രക്ഷാകർത്താക്കൾക്ക് ബോധവൽക്കരണ ക്ലാസ്: നീലേശ്വരം ജനമൈത്രി ശിശു സൗഹൃദ പോലീസിൻ്റെ ആഭിമുഖ്യത്തിൽ പള്ളിക്കര സെൻ്റ് ആൻസ് എ.യു.പി.സ്കൂളിൽ രക്ഷകർത്താക്കൾക്ക് ബോധവത്കരണ ക്ലാസ് സംഘടിപ്പിച്ചു.

പേപ്പട്ടി വിഷബാധ-പ്രതിരോധ മാർഗങ്ങൾ: പേപ്പട്ടി വിഷബാധ, പ്രതിരോധ മാർഗങ്ങൾ, സുരക്ഷാ നടപടികൾ എന്നിവ സംബന്ധിച്ച ബോധവത്കരണ ക്ലാസ് കുട്ടികൾക്ക് നൽകി.

ലഹരി വിരുദ്ധ ദിനാചരണം: ലഹരി വിരുദ്ധ ദിനാചരണത്തോടനുബന്ധിച്ച് പ്രത്യേക അസംബ്ലി നടത്തി. ഹെഡ്മിസ്ട്രസ് സിസ്റ്റർ ജെസി ജോർജ് ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. സ്കൗട്ട് ഗൈഡ് കുട്ടികൾ ലഹരി വിരുദ്ധ സന്ദേശം നൽകുന്ന നൃത്ത പരിപാടി അവതരിപ്പിച്ചു. ലഹരി വിരുദ്ധ പോസ്റ്ററുകൾ നിർമ്മിച്ചു പ്രദർശിപ്പിച്ചു. ദിനാചരണത്തോടനുബന്ധിച്ച് നീലേശ്വരം പോലീസ് സ്റ്റേഷൻ അസിസ്റ്റൻറ് രാജേഷ് കുമാർ ടി വി ബോധവൽക്കരണ ക്ലാസ് എടുത്തു.

📅 ജൂൺ 21

അന്താരാഷ്ട്ര യോഗ ദിനം

അന്താരാഷ്ട്ര യോഗ ദിനം ജൂൺ 23 തിങ്കളാഴ്ച നടത്തപ്പെട്ടു. പ്രത്യേക അസംബ്ലിയും യോഗയുടെ പ്രാധാന്യത്തെ കുറിച്ചുള്ള സന്ദേശവും നൽകി. ഷൈമ ടീച്ചറുടെ നേതൃത്വത്തിൽ കുട്ടികൾക്ക് യോഗ പരിശീലനം നൽകി. കുട്ടികൾ യോഗാ ദിനവുമായി ബന്ധപ്പെട്ട പോസ്റ്റർ തയ്യാറാക്കി അവതരിപ്പിച്ചു. സൂംബാ ഡാൻസ് അസംബ്ലിയിൽ അവതരിപ്പിച്ചു.

📅 ജൂൺ 19

വായനാദിനം ആചരിച്ചു

ആധുനിക കാലത്ത് വായനയുടെ പ്രാധാന്യവും പങ്കും വ്യക്തമാക്കി വീണ്ടും ഒരു വായനാദിനം കൂടി വന്നെത്തിയിരിക്കുകയാണ്. ഹെഡ്മിസ്ട്രസ് സിസ്റ്റർ ജെസ്സി ജോർജ്ന്റെ ഉദ്ഘാടനത്തോടുകൂടി വായനാ പക്ഷാചരണത്തിന് തുടക്കം കുറിച്ചു. വിദ്യാരംഗം കലാസാഹിത്യവേദിയുടെയും, സാഹിത്യ ക്ലബ്ബിന്റെയും നേതൃത്വത്തിൽ ജൂൺ 19 മുതൽ 25 വരെ വായന വാരാചരണം വിവിധ പരിപാടികളോട് കൂടി നടത്തുകയുണ്ടായി.

📅 ജൂൺ 5

ലോക പരിസ്ഥിതി ദിനം

പരിസ്ഥിതി ദിനം 2025

ലോകപരിസ്ഥിതി ദിനത്തോടനുബന്ധിച്ച് വിവിധങ്ങളായ പരിപാടികൾ സംഘടിപ്പിച്ചു. പോസ്റ്റർ നിർമ്മാണം, പരിസ്ഥിതി ദിന ക്വിസ്, തൈ വിതരണം എന്നിവ നടന്നു. ഭാരത് സ്കൗട്ട് ആൻഡ് ഗൈഡ് വിഭാഗത്തിലെ കുട്ടികൾ സ്കൂളിലേക്ക് തൈകൾ നൽകി.

📅 ജൂൺ 1

പ്രവേശനോത്സവം 2025-26

2025-26 അധ്യയന വർഷത്തെ പ്രവേശനോത്സവം

2025-26 അധ്യയനവർഷത്തെ പ്രവേശനോത്സവം വർണ്ണാഭമായ ചടങ്ങുകളോടെ നടന്നു. നീലേശ്വരം നഗരസഭ പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ കെ.പി.രവീന്ദ്രൻ ഉദ്ഘാടനം ചെയ്തു.

പ്രവേശനോത്സവം കളറാക്കി എഐ ടീച്ചർ ‘ഐറ':

ഐറ ടീച്ചർ

ആർട്ടിഫിഷ്യൽ ഇൻ്റലിജൻസും ഓഗ്മെന്റഡ് റിയാലിറ്റിയുമൊക്കെ അരങ്ങുവാഴുന്ന പുതിയ കാലത്തു 'ഐറ' എന്നു പേരിട്ട എഐ ടീച്ചറെ അവതരിപ്പിച്ചു പ്രവേശനോത്സവം കളറാക്കിയിരിക്കുകയാണ് പൊതുവിദ്യാലയമായ നീലേശ്വരം പള്ളിക്കര സെന്റ് ആൻസ് എയുപി സ്കൂൾ. കുട്ടികളുമായി ആശയവിനിമയം നടത്തിയ എഐ ടീച്ചർ 'ഐറ' അവരുടെ ചോദ്യങ്ങൾക്ക് ഉത്തരം നൽകി സംശയങ്ങൾ ദൂരീകരിച്ചത് ഏവരെയും അതിശയിപ്പിച്ചു. AI ടീച്ചർ ഐറ ടീച്ചർ പ്രവേശനോത്സവത്തിന് വിശിഷ്ട അതിഥിയായി.