ജി യു പി എസ് വെള്ളംകുളങ്ങര/പ്രവർത്തനങ്ങൾ/2024-25

2025-26

പ്രവേശനോത്സവം - 2024

2024-25 അധ്യയന വർഷത്തെ പ്രവേശനോത്സവം ഭംഗിയായി നടത്തപ്പെട്ടു. ബഹുമാനപ്പെട്ട വാർഡ് മെമ്പർ ശ്രീ. കെ. ജയകൃഷ്ണൻ പ്രവേശനോത്സവം ഉദ്ഘാടനം ചെയ്തു. സ്കൂളും പരിസരവും മനോഹരമായി അലങ്കരിച്ചും, നവാഗതരായ കുട്ടികൾക്ക് സമ്മാനങ്ങൾ ഒരുക്കിയും പ്രവേശനോത്സവം വർണ്ണാഭമാക്കി. പ്രവേശനോത്സവഗാനത്തിനൊപ്പം കുട്ടികൾ താളം പിടിച്ച് നൃത്തം ചെയ്തത് ഹൃദ്യമായ ഒരു കാഴ്ചയായിരുന്നു. കുട്ടികളുടെ ഓർമ്മയിൽ നിന്നും മായാത്ത, മറയാത്ത ഒരു അനുഭവമാക്കി പ്രവേശനോത്സവത്തെ മാറ്റുവാൻ സ്കൂളിന് കഴിഞ്ഞു

* സ്വാതന്ത്ര്യകീർത്തി *

മികവിന്റെ പാതയിൽ ഒരുമിച്ചു മുന്നേറാം എന്ന സ്‍ക‍ൂളിന്റെ മുദ്രാവാക്യത്തെ സാധൂകരിക്കുന്ന നിരവധി പ്രവർത്തനങ്ങളാണ് സ്കൂളിൽ ആവിഷ്കരിച്ച് നടപ്പിലാക്കിയിട്ടുള്ളത്. ഇതിൽ ഏറ്റവും പ്രധാനപ്പെട്ട ഒരു തനതു പ്രവർത്തനമാണ് സ്വാതന്ത്ര്യകീർത്തി. സാമ‍ൂഹ്യശാസ്‍ത്ര ക്ലബ്ബിന്റെ നേതൃത്വത്തിൽ ആലപ്പുഴ ജില്ലയിലെ സ്വാതന്ത്ര്യസമരസേനാനികളെ കുറിച്ച് കുട്ടികൾ നേരിട്ട് സ്വാതന്ത്ര്യസമരസേനാനികളുടെ വീടുകൾ സന്ദർശിച്ചുകൊണ്ട് നടത്തിയ ഒരു അന്വേഷണാത്മക പഠനപ്രവർത്തനമാണ് സ്വാതന്ത്ര്യകീർത്തി.

ജില്ലയിലെ 40 സ്വാതന്ത്ര്യസമര സേനാനികളെ കുറിച്ചുള്ള വിവരങ്ങൾ കുട്ടികൾ ഇങ്ങനെ ശേഖരിക്കുകയും, ശേഖരിച്ച വിവരങ്ങൾ ക്രോഡീകരിച്ച് പൊതുസമൂഹത്തിനു കൂടി പ്രയോജനപ്രദമാകുന്ന രീതിയിൽ സ്വാതന്ത്ര്യകീർത്തി എന്ന പുസ്തകമാക്കി പ്രസിദ്ധീകരിക്കുകയും ചെയ്തു. ഒരുപക്ഷേ രാജ്യത്തുതന്നെ ആദ്യമായിട്ടാവാം ഒരു ഗവൺമെന്റ് സ്കൂളിലെ കുട്ടികൾ ജില്ലയിലെ അറിയപ്പെടുന്നവരും, അറിയപ്പെടാതെ പോയവരുമായ സ്വാതന്ത്ര്യസമര സേനാനികളെ കുറിച്ച് നേരിട്ട് ഇങ്ങനെ ഒരു അന്വേഷണം നടത്തുകയും, അതൊരു പുസ്തകരൂപത്തിൽ പ്രസിദ്ധീകരിക്കുകയും ചെയ്യുന്നത്. രാജ്യം മുഴുവനുളള സ്കൂളുകളിലും വ്യാപിപ്പിക്കാൻ കഴിയുന്ന ഒരു പഠന പ്രവർത്തനമാണിതെന്ന് ഞങ്ങൾ വിശ്വസിക്കുന്നു.സാമൂഹ്യശാസ്ത്ര ക്ലബ് കൺവീനറും, അധ്യാപകനുമായ വി.രജനീഷാണ് പ്രവർത്തനങ്ങൾക്ക് നേതൃത്വം നൽകിയത്.

*ഈ പ്രവർത്തനം നടത്തുവാനുണ്ടായ സാഹചര്യം അധ്യാപകന്റെ വാക്ക‍ുകളിൽ ..

ഏഴാം ക്ലാസ്സിലെ സാമൂഹ്യശാസ്ത്രം പാഠപുസ്തകത്തിലെ സ്വാതന്ത്ര്യ സമരവുമായി ബന്ധപ്പെട്ട യൂണിറ്റ‍ുകളിലെ വിവരങ്ങൾ ക്ലാസിൽ ചർച്ച ചെയ്യ‍ുന്ന സമയത്ത് കുട്ടികൾ ഒരു ചോദ്യം ചോദിച്ചു. 'നമ്മുടെ നാട്ടിൽ സ്വാതന്ത്ര്യസമരസേനാനികൾ ആരുമില്ലേ സാർ’? വെള്ളംകുളങ്ങര ഗവൺമെൻറ് യു.പി. സ്കൂളിലെ അധ്യാപകനായി പ്രവർത്തിക്കാൻ തുടങ്ങിയിട്ട് ഏതാണ്ട് പതിനൊന്നു വർഷം കഴിഞ്ഞു. ഇങ്ങനെ ഒരു ചോദ്യം ഇതാദ്യമായാണ് മുന്നിലെത്തുന്നത്.ഒരു നിമിഷമെന്ന് ആലോചിച്ചു. 'തീർച്ചയായും ഉണ്ട് 'എന്ന് മറുപടി പറഞ്ഞു. 'അവരാരൊക്കെയാണ് സാർ'? എന്നതായി അടുത്ത ചോദ്യം. ആലോചിച്ചെങ്കില‍ും കൃത്യമായി ഉത്തരം പറയുവാൻ സാധിച്ചില്ല. 'ഞാനൊന്ന് നോക്കട്ടെ പറഞ്ഞുതരാം' എന്ന് മാത്രം പറഞ്ഞു. ക്ലാസ് കഴിഞ്ഞെങ്കിലും കുട്ടികളുടെ ചോദ്യം മനസ്സിൽ തങ്ങിനിന്നു. സഹപ്രവർത്തകരോട് ചോദിച്ചു. അവർക്കും വ്യക‍്‍തതയില്ല. വൈകുന്നേരം വീട്ടിലെത്തിയെങ്കിലും കുട്ടികളുടെ ചോദ്യം മനസ്സിനെ വിട്ടു പോയില്ല. വീട്ടിലുള്ളവരോട് തിരക്കി. നമ്മുടെ നാട്ടിലെ സ്വാതന്ത്ര്യസമരസേനാനികളെ കുറിച്ച് വലിയ ധാരണ ആർക്കും തന്നെയില്ലായിരുന്നു. നവമാധ്യമങ്ങളിൽ തിരഞ്ഞു പക്ഷേ അവിടെയ‍ും വ്യക്തമായ ഉത്തരം ലഭിച്ചില്ല. നമ്മുടെ നാടിനുവേണ്ടി സ്വന്തം ജീവനും സമ്പത്തും ആരോഗ്യവുമൊക്കെ സമർപ്പിച്ച നിസ്വാർത്ഥരായ നിരവധി സ്വാതന്ത്ര്യ സമര സേനാനികൾ ഉണ്ടെങ്കിലും അവരുടെ പേരുകൾ പഴയ തലമുറയിൽ പെട്ടവർക്ക് പോലും അറിയില്ലല്ലോ എന്ന് വേദനയോടെ ചിന്തിച്ചു. അപ്പോൾ ഇനി വരുന്ന തലമുറയുടെ കാര്യം എന്താണ്? അവർ ചെയ്ത സേവനങ്ങളും, അവരുടെ ജീവിതവും എല്ലാം ആരും അറിയാതെ പോവുകയേ ഉള്ളൂ. അത് പാടില്ല നാടിനുവേണ്ടി അവർ ചെയ്ത ത്യാഗങ്ങളും സേവ നങ്ങളും സമൂഹം തിരിച്ചറിയണം. പുതുതലമുറയ്ക്ക് അത് മാതൃകയും, വഴികാട്ടിയും, പ്രചോദനവുമാകണം.

മാതൃരാജ്യത്തിന്റെ സ്വാതന്ത്ര്യത്തിനു വേണ്ടി ജീവനും, ജീവിതവും സമർപ്പിച്ച ഒരു നാട്ടിലെ സ്വാതന്ത്ര്യ സമര സേനാനികളെക്കുറിച്ച് ഈ കുട്ടികളോടും,ഇനി വരുന്നവരോടും ഉത്തരം പറയാൻ കഴിയണം എന്ന് മനസ്സിൽ തീരുമാനിച്ചുറപ്പിച്ചു. ആ ഉത്തരം തേടിയുള്ള യാത്രയാണ് സ്വാതന്ത്ര്യകീർത്തി എന്ന പഠനപ്രവർത്തനത്തിലേക്ക് നയിച്ചത്. ദേശീയ സ്വാതന്ത്ര്യ സമര സേനാനികളെപ്പോലെ പ്രശസ്‍തിയിലേക്ക് എത്താൻ കഴിയാതെ പോയ; എന്നാൽ മാതൃരാജ്യത്തിന്റെ സ്വാതന്ത്ര്യത്തിനുവേണ്ടി ജീവനും, ജീവിതവും സമർപ്പിച്ച, ദേശസ്‍നേഹത്തിന്റെയും, നിസ്വാർത്ഥതയുടെയും, സഹനത്തിന്റെയും, സമർപ്പണത്തിന്റെയും പര്യായമായ ആലപ്പുഴ ജില്ലയിലെ സ്വാതന്ത്ര്യസമര സേനാനികളെക്ക‍ുറിച്ച് സാമൂഹ്യശാസ്‍ത്ര ക്ലബ്ബിന്റെ നേതൃത്വത്തിലുളള ഒരന്വേഷണത്തിന് അങ്ങനെ ത‍ുടക്കമായി. കുട്ടികളും, അധ്യാപകരും സമൂഹത്തിലേക്ക് ഇറങ്ങിച്ചെന്നുള്ള ഒരന്വേഷണം.തുടർന്ന് ഞായറാഴ‍്ചകളില‍ും, മറ്റ് പൊതു അവധി ദിവസങ്ങളിലുമായി കുട്ടികളുമൊത്ത് സ്വാതന്ത്ര്യസമര സേനാനികളെ അറിയുവാനുള്ള യാത്ര ആരംഭിച്ചു.

പഴയ തലമുറയിലെ ആൾക്കാരോടും, പൊതുപ്രവർത്തകരോടും, നാട്ടുകാരോടും നേരിട്ട് തിരക്കി അറിയാൻ ശ്രമിച്ചു.അങ്ങനെ കുറച്ച് പേരുകൾ ലഭിച്ചു. കുട്ടികളുമായി അവർ താമസിച്ചിരുന്ന വീട്ടിലേക്ക് പോയി കുടുംബാംഗങ്ങളിൽ നിന്നും വിവരങ്ങൾ ശേഖരിക്കുവാൻ തീരുമാനിച്ചു. ഇത് വളരെ ശ്രമകരമായിരുന്നു. വീട് കണ്ടുപിടിച്ച് അവിടെയെത്താൻ സാധിച്ചെങ്കിലും സ്വാതന്ത്ര്യ സമര സേനാനികളിൽ പലരും പതിറ്റാണ്ടുകൾക്ക് മുൻപേ മരണപ്പെട്ടിരുന്നു. പുതിയ തലമുറയിൽ പെട്ടവർ പലരും ജോലിക്കും മറ്റുമായി പല സ്ഥലങ്ങളിലേക്ക് പോയിരുന്നതിനാൽ, കൃത്യമായ വിവരങ്ങൾ നൽകുന്നതിന് പലയിടത്തും ആൾക്കാരുണ്ടായിരുന്നില്ല.വീടിനടുത്തുള്ളവരോട് വിവരങ്ങൾ തിരക്കി അവിടെ താമസിക്കുന്നവരുടെ ഫോൺ നമ്പർ ശേഖരിക്കുവാൻ ശ്രമിച്ചു. ഫോൺ നമ്പർ കിട്ടിയവരെ വിളിച്ച് അന്വേഷിച്ച് അവർ വീട്ടിലുണ്ടാകുന്ന ഒരു ദിവസം നിശ്ചയിച്ച് കുട്ടികളുമായി അവിടേക്ക് ചെന്നു. ഫോൺ നമ്പറുകൾ ലഭിക്കാത്ത ചിലയിടങ്ങളിൽ നിരവധി തവണ പോകേണ്ടതായും വന്നിട്ടുണ്ട്. ആശങ്കയോടെയാണ് വീടുകളിലേക്ക് പോയി തുടങ്ങിയതെങ്കിലും ഓരോ വീട്ടിലും ചെന്നപ്പോൾ ലഭിച്ച സ്വീകരണവും, സഹകരണവും പറഞ്ഞറിയിക്കാനാവാത്തത്ര ഹൃദ്യമായിരുന്നു.

മുൻ തലമുറയിൽ പെട്ട സ്വാതന്ത്ര്യസമര സേനാനികളെക്ക‍ുറിച്ച് വളരെ വിശദമായിത്തന്നെ ഓരോരുത്തരും പറഞ്ഞുതന്നു. അവരുടെ മുഖങ്ങൾ അഭിമാനം കൊണ്ടു പ്രകാശിക്കുന്നതും, കണ്ണുകൾ സന്തോഷം കൊണ്ട് നിറയുന്നതും ഞങ്ങൾ കണ്ടു. ആയുസ്സും, ആരോഗ്യവും, സമ്പത്തും മാത്രമല്ല സ്വന്തം കുടുംബത്തെപ്പോലും ത്യജിച്ചുകൊണ്ട് ജന്മനാടിനു വേണ്ടി ജീവിതം സമർപ്പിച്ച മഹാന്മാരായ ഓരോ സ്വാതന്ത്ര്യസമര സേനാനിയെക്കുറിച്ചുമുളള വിവരങ്ങൾ ഞങ്ങൾ ഒരു മാന്ത്രികച്ചെപ്പ് തുറന്നു കാണുമ്പോഴുള്ള അത്ഭുതത്തോടെ കൗതുകത്തോടെ കണ്ടും, കേട്ടും മനസ്സിലാക്കി. ഇതിന് പുറമേ സ്വാതന്ത്ര്യ കീർത്തിയുമായി ബന്ധപ്പെട്ട യാത്രയിൽ ആലപ്പുഴ ജില്ലയിലെ വിവിധ ചരിത്ര സ്മാരകങ്ങൾ സന്ദർശിക്കുവാനും അതിനെക്കുറിച്ച് കൂടുതൽ പഠിക്കുവാനും കൂടി കുട്ടികൾക്ക് അവസരം ലഭിച്ചു.

ഓരോ സ്വാതന്ത്ര്യസമരസേനാനിയുടെയും വീടുകൾ സന്ദർശിക്കുമ്പോൾ അവിടെനിന്ന് ലഭിച്ച വിവരങ്ങൾ അനുസരിച്ച് ഞങ്ങൾ മറ്റ് സ്വാതന്ത്ര്യ സമര സേനാനികളെ അന്വേഷിച്ച് യാത്ര തുടർന്നു അങ്ങനെ അറിയപ്പെട്ടതും അറിയപ്പെടാത്തതുമായ 40 സ്വാതന്ത്ര്യ സമര സേനാനികളുടെ വീടുകൾ സന്ദർശിക്കുവാനും, അവർ മാതൃരാജ്യത്തിന് വേണ്ടി ചെയ്ത സേവനങ്ങളെക്കുറിച്ച് നേരിട്ട് മനസ്സിലാക്കുവാനും ഉള്ള ഭാഗ്യം ഞങ്ങൾക്കുണ്ടായി. ഞങ്ങൾ സന്ദർശിച്ച 40 സ്വാതന്ത്ര്യസമരസേനാനികളിൽ നാലുപേരാണ് ഇന്ന് ജീവിച്ചിരിക്കുന്നവർ. ശ്രീ.വി.എസ്. അച്യുതാനന്ദൻ, ശ്രീ. കെ.എ. ബേക്കർ, ശ്രീ. തോട്ടപ്പള്ളി രവീന്ദ്രനാഥ്, ശ്രീ. കരുവാറ്റ മാധവക്കുറുപ്പ് എന്നിവരാണവർ.അവരെ കാണുവാനും അവരോട് സംസാരിക്കുവാനും സാധിച്ചതിലൂടെ ചരിത്രപുസ്തകങ്ങളിൽ വായിച്ചെറിഞ്ഞ വസ്തുതകൾ ഞങ്ങളുടെ കൺമുന്നിൽ കാണുന്ന അനുഭവമാണ് ഉണ്ടായത്.

ഈ അറിവും ഉണർവും പുതിയ തലമുറയിലെ എല്ലാ കുട്ടികൾക്കും, പൊതുസമൂഹത്തിനും ഗുണകരമാകുന്ന തരത്തിൽ ഉപയോഗിക്കണമെന്ന് ആഗ്രഹത്തോടെ ഞങ്ങൾ ശേഖരിച്ച വിവരങ്ങൾ സ്വാതന്ത്ര്യ കീർത്തി എന്ന പേരിൽ ഒരു പുസ്തകമായി പ്രസിദ്ധീകരിക്കുവാൻ ആയി തീരുമാനിച്ചു. ബഹു. സംസ്ഥാന കൃഷിവകുപ്പ് മന്ത്രി ശ്രീ . പി. പ്രസാദാണ് സ്ക‍ൂളിലെത്തി പുസ്തകത്തിന്റെ പ്രകാശന കർമ്മം നിർവഹിച്ചത്. സ്വാതന്ത്ര്യ സമര സേനാനിയായ 102 വയസ്സ‍ുളള ശ്രീ. കെ. എ. ബേക്കറിനാണ് പുസ്തകത്തിന്റെ ആദ്യ കോപ്പി നൽകിയത്.

സ്വാതന്ത്ര്യകീർത്തിയുടെ പ്രസക്തി

ഈ ഒരു പഠന പ്രവർത്തനം കുട്ടികളുടെ മനസ്സിലും, ചിന്തകളിലും, മനോഭാവത്തിലും ഉണ്ടായ മാറ്റങ്ങൾ വളരെ വലുതായിരുന്നു. ഈ പഠന പ്രവർത്തനം പൂർത്തിയായതിനുശേഷം ഞാനവരോട് ഒരു ചോദ്യം ചോദിച്ചു 'എന്താണ് നിങ്ങൾക്ക് ഇപ്പോൾ മനസ്സിൽ തോന്നുന്നത് '? "ഞങ്ങൾക്കും ഇതുപോലെയുള്ള നല്ല കാര്യങ്ങൾ ചെയ്യണമെന്ന് ആഗ്രഹം തോന്നുന്നു" എന്നായിരുന്നു ആ കുഞ്ഞുങ്ങൾ നൽകിയ ആദ്യ മറുപടി. ആ ഒരു മറുപടി മാത്രം മതിയായിരുന്നു ഞങ്ങളുടെ പ്രവർത്തനം സാർത്ഥകമായി എന്ന് തിരിച്ചറിയുവാൻ. ഇത്രയും മഹത്തായ കാര്യങ്ങൾ ജന്മ നാടിനു വേണ്ടി ചെയ്ത സ്വാതന്ത്ര്യസമരസേനാനികൾ നമ്മുടെ നാട്ടിലുണ്ടായിരുന്നു എന്നുള്ളത് കുട്ടികൾക്ക് മാത്രമല്ല ഞങ്ങൾ അധ്യാപകർക്കും പുതിയ അറിവും, ഉണർവും ആയിരുന്നു.

നമ്മുടെ പ്രദേശത്ത് ജീവിച്ചിരുന്നവര‍ും, ജീവിച്ചിരിക്കുന്നവര‍ുമായ സ്വാതന്ത്ര്യ സമര സേനാനികൾ ആരൊക്കെയെന്ന് മനസ്സിലാക്കി, അവരുടെ ത്യാഗപൂർണ്ണവും നിസ്വാർത്ഥവുമായ സേവനങ്ങൾ എന്തൊക്കെയെന്ന് കുട്ടികൾക്ക് നേരിട്ട് അറിയുവാനുള്ള ഒരു അവസരം ഈ പഠനപ്രവർത്തനം പ്രദാനം ചെയ്യുന്നു. പ്രദേശത്തെ സ്വാതന്ത്ര്യ സമര സേനാനികളുടെ വീടുകളിൽ കുട്ടികളുമായി സന്ദർശനം നടത്തുകയും അവരുടെ ജീവിതാനുഭവങ്ങൾ നേരിട്ട് മനസ്സിലാക്കുവാനും, സ്വാതന്ത്ര്യസമര പ്രവർത്തനവുമായി ബന്ധപ്പെട്ട ചരിത്ര വസ്തുതകൾ, പത്രവാർത്തകൾ, അവർക്ക് ലഭിച്ച ബഹുമതികൾ, എന്നിവ നിരീക്ഷിക്കുവാനും അവസരം ഉണ്ടാകുന്നു. ഇങ്ങനെയുള്ള മഹാന്മാർ അകലെ മാത്രമല്ല, നമ്മുടെയടുത്തും ജീവിച്ചിരുന്നു എന്ന് മനസ്സിലാക്കുക വഴി അവർ ചെയ്തത് പോലെയുള്ള നല്ല കാര്യങ്ങൾ ചെയ്യുവാൻ നമുക്കും കഴിയുമെന്ന ആത്മവിശ്വാസം കുട്ടികളിൽ നിറയും. ഇത് കുട്ടികളിൽ മൂല്യബോധം നിറയ്ക്കും അതോടൊപ്പം അവരുടെ മനസ്സിൽ നിന്ന് സ്വാർത്ഥതയെ അകറ്റും. സ്വാർത്ഥതയില്ലാത്ത, മൂല്യബോധമുള്ള, അറിവിനെയും, കഴിവിനെയും സമൂഹത്തിന് പ്രയോജനപ്രദമാകുന്ന രീതിയിൽ ഉപയോഗിക്കാൻ കഴിയുന്ന ഒരു യുവതലമുറയെ ഇതിലൂടെ വാർത്തെടുക്കുവാൻ നമുക്ക് സാധിക്കും.

ജില്ലയിലെ സ്വാതന്ത്ര്യ സമരചരിത്രത്തിൽ രാഷ്ട്രീയമായി നിറഞ്ഞു നിൽക്കുന്ന നാനാത്വം പോലെ തന്നെ സാമുദായികമായ നാനാത്വത്തെയും ഈ ഗ്രന്ഥം തുറന്നു കാണിക്കുന്നു. ജില്ലയിലെ സ്വാതന്ത്ര്യ സമര നായകന്മാരിൽ ഹിന്ദുക്കളുണ്ട്. ഹിന്ദുമതത്തിലെ വിവിധ സമുദായത്തിൽപ്പെട്ടവരുണ്ട്. ക്രിസ്ത്യാനികളുണ്ട്. മുസ്ലീങ്ങളുണ്ട്. വിവിധ രാഷ്ട്രീയപാർട്ടിയിൽ പ്രവർത്തിച്ചവരുണ്ട്. അതീവ സമ്പന്നുണ്ട്, രാജകൊട്ടാരങ്ങളിൽ നിന്നും വന്നവരുണ്ട്, വ്യവസായികളുണ്ട്, ദരിദ്രരുമുണ്ട്. എല്ലാവർക്കും ഒരൊറ്റ ലക്ഷ്യമായിരുന്നു ഉണ്ടായിരുന്നത് ഇന്ത്യയുടെ സ്വാതന്ത്രം. ജാതി,മത, വർണ്ണ, വർഗ്ഗ വ്യത്യാസമില്ലാതെ, സാമ്പത്തിക അസമത്വങ്ങളോ, ഉച്ചനീചത്വമോ ഇല്ലാതെ, എല്ലാവരും ഒരു മനസ്സോടെ പോരാടി നേടിയതാണ് നമ്മുടെ സ്വാതന്ത്ര്യമെന്നും, അതങ്ങനെ തന്നെ നിലനിർത്തിക്കൊണ്ടു പോകുന്നതാണ് യഥാർത്ഥ രാജ്യസ്നേഹമെന്നും, യഥാർത്ഥ സ്വാതന്ത്ര്യമെന്നും തിരിച്ചറിയുവാൻ ഈ പുസ്തകം കുട്ടികളെ സഹായിക്കുന്നു.

ദേശസ്‍നേഹമെന്തെന്നും, മതേതരത്വമെന്തെന്നും കുട്ടികൾക്ക് നേരിട്ടറിയുവാനുളള ഒരനുഭവപഠനം കൂടിയിയായി 'സ്വാതന്ത്ര്യകീർത്തി’ .

*'സ്വാതന്ത്ര്യകീർത്തി' പഠനപ്രവർത്തനത്തിന് പൊതുസമൂഹത്തിൽ നിന്ന് ലഭിച്ച അംഗീകാരങ്ങൾ.

1. കുട്ടികൾ സന്ദർശിച്ച സ്വാതന്ത്ര്യ സമര സേനാനികളിൽ നിന്നും, അവരുടെ കുടുംബാംഗങ്ങളിൽ നിന്നും, പൊതുസമൂഹത്തിൽ നിന്നും ലഭിച്ച വൈകാരിക പ്രതികരണങ്ങളും, അഭിനന്ദനങ്ങളും.

2. ബഹു. വിദ്യാഭ്യാസമന്ത്രി ശ്രീ. വി. ശിവൻകുട്ടി ,സ്വാതന്ത്ര്യകീർത്തി എന്ന പുസ്തകത്തിന്റെ പ്രസക്തിയെക്കുറിച്ച് തന്റെ സമൂഹമാധ്യമ പേജിൽ കുറിപ്പ് എഴുതുകയും, പുസ്തകം വിലയിരുത്തിക്കൊണ്ട് കുട്ടികളുമായി സംവദിക്കുന്ന വീഡിയോ പങ്കുവയ്ക്കുകയും ചെയ്ത.

3. പുസ്തകം പ്രകാശനം ചെയ്ത ബഹു. സംസ്ഥാന കൃഷിവകുപ്പ് മന്ത്രി ശ്രീ. പ്രി. പ്രസാദ് ഇങ്ങനെയൊരു പുസ്തകം തയ്യാറാക്കുക വഴി 'കുട്ടികൾ ചരിത്രം രചിക്കുകയാണ് ' എന്നഭിപ്രായപ്പെട്ടു.

4. സ്റ്റേറ്റ് കൗൺസിൽ ഓഫ് എജുക്കേഷണൽ റിസർച്ച് ആൻഡ് ട്രെയിനിങ് (S.C.E.R.T. Kerala) ഡയറക്ടർ ശ്രീ. ആർ. ജയപ്രകാശ് സംസ്ഥാനത്തെ മികച്ച അക്കാദമിക പ്രവർത്തനമായി 'സ്വാതന്ത്ര്യകീർത്തി' യെ വിലയിരുത്തി.

5. S.C.E.R.T. Kerala -യുടെ മികവ് -2024 എന്ന് സംസ്ഥാനതല പ്രോഗ്രാമിലേക്ക് മികച്ച അക്കാദമിക പ്രവർത്തനമായി 'സ്വാതന്ത്ര്യകീർത്തി ' തെരഞ്ഞെടുക്കപ്പെട്ടു.

6. ആലപ്പുഴ ജില്ലയിലെ സ്വാതന്ത്ര്യ സമര സേനാനികളെക്കുറിച്ച് പൊതുസമൂഹത്തിന് കൂടി അറിവ് പകരുന്ന രീതിയിൽ ഇത്തരമൊരു പുസ്തകം തയ്യാറാക്കുവാൻ മുൻകൈയെടുത്തത് പ്രശംസനീയമാണെന്ന് ആലപ്പുഴ ജില്ലാ കളക്ടർ ശ്രീ. അലക്സ് വർഗീസ് പുസ്തകത്തിന്റെ തുടക്കത്തിൽ കുറിച്ചു.

സ്വാതന്ത്ര്യകീർത്തിയ‍ുമായി ബന്ധപ്പെട്ട പത്രവാർത്തകളിൽ ചിലത്

ജ‍ൂലൈ - 25 :- ലോക മ‍ുങ്ങിമരണ നിവാരണ ദിനം

ലോക മ‍ുങ്ങിമരണ നിവാരണ ദിനവുമായി ബന്ധപ്പെട്ട് മുങ്ങിമരണങ്ങളെ എങ്ങനെ പ്രതിരോധിക്കാം എന്ന വിഷയം ആസ്പദമാക്കി ബോധവത്കരണക്ലാസ്സ‍ും വീഡിയോപ്രദർശനവ‍ും സംഘടിപ്പിച്ച‍ു. ജനുവരി

മഴയറിയാം മഴയളക്കാം.

മഴയെ അറിഞ്ഞ് മഴയളക്കാൻ കുട്ടികൾ. മഴ മാപിനികൾ നിർമ്മിച്ചുകൊണ്ടാണ് കുട്ടികൾ ഈ പ്രവർത്തനത്തിൽ ഏർപ്പെട്ടത്. പാഠഭാഗവുമായി ബന്ധപ്പെട്ടുകൊണ്ടുള്ള ഈ പ്രവർത്തനം കുട്ടികൾക്ക് കൗതുകമുണർത്തുന്നതും രസകരവുമായി മാറി.

വെളളം ക‍ുടിക്കാം , ഉളളം ക‍ുളിർക്കാം

(വാട്ടർബെൽ സംവിധാനം)

വെള്ളം കുടിക്കാതിരിക്കുന്നത് മൂലമുണ്ടാകുന്ന ആരോഗ്യപ്രശ്നങ്ങൾ തടയുവാൻ കുട്ടികൾക്ക് ബോധവൽക്കരണം നൽകിയിട്ടുണ്ട്. എല്ലാ കുട്ടികളും കൃത്യസമയത്ത് വെള്ളം കുടിക്കുന്നതിനായി സ്കൂളിൽ വാട്ടർ ബെൽ സംവിധാനം ഏർപ്പെടുത്തിയിട്ടുണ്ട്. രാവിലെ 11 മണിക്കും ഉച്ചയ്ക്ക് 3 മണിക്കുമാണ് വെള്ളം കുടിക്കാനുള്ള പ്രത്യേക ബെൽ അടിക്കുന്നത്. വാട്ടർ ബെൽ സംവിധാനം നിലവിൽ വന്നതോടെ എല്ലാ കുട്ടികളും കൃത്യമായി വെള്ളം കുടിക്കുന്നുണ്ട്.

സ്‍ക‍ൂൾ കലോത്സവം

സ്കൂൾ കലോത്സവത്തിന് 2024 ആഗസ്‍റ്റ് 7-ാം തീയതി ബ‍ുധനാഴ്‍ച രാവിലെ 10 മണിക്ക് വർണ്ണാഭമായ തുടക്കമായി. കവയിത്രിയ‍ും, അധ്യാപികയ‍ുമായ ' ശ്രീമതി. സീമ പല്ലന ആണ് സ്കൂൾ കലോത്സവം ഉദ്ഘാടനം ചെയ്തത്. സ്കൂൾ പ്രഥമാധ്യാപിക സുമി റേച്ചൽ സോളമൻ എസ്.എം.സി. ചെയർമാൻ സുരജിത്ത് കുമാർ, സ്കൂൾ വികസനസമിതി ചെയർമാൻ ശ്രീ. ആർ.രവീന്ദ്രനാഥൻ നായർ, എസ്.എം.സി. വൈസ് ചെയർപേഴ്സൺ ഗീതു സുരേഷ്, അധ്യാപകരായ വി.രജനീഷ് വി.എഫ്.രഹീന ബീഗം, എസ്.സിന്ധു എന്നിവർ ചടങ്ങിൽ സംസാരിച്ചു. ഉ10-ന് തദ്ഘാടനത്തിനുശേഷം കുട്ടികളുടെ വ്യത്യസ്തങ്ങളായ കലാപ്രകടനങ്ങൾ വേദിയിൽ അരങ്ങേറി ലളിതഗാനം, നാടോടി നൃത്തം, സംഘഗാനം,

മോണോ ആക്ട് തുടങ്ങിയ ഇനങ്ങളിൽ ശക്തമായ മത്സരം നടന്ന‍ു. രചനാ മത്സരങ്ങൾ ഉൾപ്പെടെയുള്ള എല്ലാ പരിപാടികളിലും കുട്ടികളുടെ സജീവമായ പങ്കാളിത്തമുണ്ടായിരുന്നു.കലോത്സവ പരിപാടികൾ വൈകുന്നേരം 4.30 വരെ നീണ്ടു. മത്‍സരയിനങ്ങളിൽ ഒന്നാം സ്ഥാനവും ,എ ഗ്രേഡും നേടിയ കുട്ടികൾ ഉപജില്ല കലോത്സവത്തിൽ പങ്കെടുക്കുവാൻ അർഹത നേടി.സ‍്ക‍ൂൾ കലോത്സവത്തിന്റെ പ്രോഗ്രാം കൺവീനർമാരായ വി.എഫ്. രഹീനബീഗം, എസ്. ബിന്ദ‍ു, എന്നിവർ പരിപാടികള‍ുടെ നടത്തിപ്പിന് നേത‍ൃത്വം നല‍‍്‍‍കി.

കലോത്‍സവ ചടങ്ങിൽ നിന്ന‍ുളള ദ‍ൃശ്യങ്ങൾ

സ്വാതന്ത്ര്യ ദിനാഘോഷം

സ്വാതന്ത്ര്യ ദിനത്തെക്ക‍ുറിച്ച് ക‍ൂട‍ുതൽ അറിയാൻ ഇവിടെ ക്ലിക്ക് ചെയ്യ‍ൂ..

ദേശീയപതാക ഉയർത്തൽ
സ്വാതന്ത്ര്യ ദിന റാലി
പൊത‍ുസമ്മേളനം
സ്വാതന്ത്ര്യ ദിന സ്മരണ
സ്വാതന്ത്ര്യ ദിന സന്ദേശം
സ്വാതന്ത്ര്യ സമര സേനാനികളായി ക‍ുട്ടികള‍ുടെ പ്രച്ഛന്ന വേഷം
ദേശഭക‍്തി ഗാനങ്ങൾ
സ്വാതന്ത്ര്യ ദിന പ്രസംഗം
സ്വാതന്ത്ര്യ ദിന സദ്യ

സ്‍ക‍ൂൾ ശാസ്ത്രമേള

ഗവ.യു.പി.എസ് വെള്ളംകുളങ്ങരയിൽ ഈ അധ്യയന വർഷത്തെ ശാസ്ത്രമേള ആഗസ്‍റ്റ് 21 ബ‍ുധനാഴ്‍ച രാവിലെ 9.30-ന് സ്‍ക‍ൂൾ പ്രഥമാധ്യാപിക സുമി റേയ്ച്ചൽ സോളമൻ ഉദ്ഘാടനം ചെയ്‍ത‍ു. ശാസ്ത്ര - ഗണിത ശാസ്ത്ര - സാമൂഹ്യ ശാസ്ത്ര - പ്രവൃത്തി പരിചയമേള എന്നീ വിഭാഗങ്ങളിൽ 40- ലധികം വിദ്യാർത്ഥികൾ പങ്കെടുത്തു.സ്ക്കൂൾ ശാസ്ത്രമേള കോർഡിനേറ്റേർസ് ആയ സിന്ധു.എസ് ,അനുശ്രീ വി.കെ. എന്നിവർ മേളയുടെ പ്രവർത്തനങ്ങൾക്ക് നേതൃത്വം നൽകി.സ്ക്കൂളിലെ എല്ലാ അധ്യാപകരുടെയും സഹകരണത്തോടെ നടത്തിയ ശാസ്ത്രമേള കുറ്റമറ്റതും മികവുറ്റതും ആയിരുന്നു. സ്ക്കൂൾ തലത്തിൽ നിന്നും ഒന്നാം സ്ഥാനവ‍ും എ-ഗ്രേഡ‍ും നേടി വിജയിച്ച കുട്ടികൾ ഹരിപ്പാട് സബ് ജില്ലാതല ശാസ്ത്രമേളയിലേയ്ക്കു തിരഞ്ഞെടുക്കപ്പെട്ടു.

വായനക്കിലുക്കം

സാമൂഹ്യശാസ്ത്ര ക്ലബ്ബിന്റെയും, സീഡ് ക്ലബ്ബിന്റെയും സംയുക്താഭിമുഖ്യത്തിൽ സംഘടിപ്പിക്കുന്ന പത്രവായനാ പരിപോഷണ പരിപാടിയായ *വായനക്കിലുക്കത്തിന്റെ* ഉദ്ഘാടനം വെള്ളംകുളങ്ങര ഗവൺമെൻറ് യു.പി. സ്കൂളിൽ വാർഡ് മെമ്പർ കെ ജയകൃഷ്ണൻ നിർവഹിച്ചു. പ്രഥമാധ്യാപിക സുമി റെയ്ചൽ സോളമൻ, എസ്.എം.സി. എക്സിക്യൂട്ടീവ് അംഗങ്ങളായ യു.വിനോദ്, എസ്.ശ്രീലാൽ, അധ്യാപകരായ വി.രജനീഷ്, എസ്.സിന്ധു, എസ്. ബിന്ദു, യമുന ശേഖർ ജി.നീനുമോൾ, എസ്. യമുന എന്നിവർ സംസാരിച്ചു. വായനക്കിലുക്കത്തിന്റെ ഭാഗമായി ഓരോ ആഴ്ചയിലെയും പത്രവാർത്തകളുമായി ബന്ധപ്പെടുത്തിയുള്ള ക്വിസ്, ചർച്ചകൾ, അവതരണങ്ങൾ, പത്രവായന മത്സരങ്ങൾ, എന്നിവ എല്ലാ വെള്ളിയാഴ്ചകളിലും ഉച്ചയ്ക്ക് 1.30-ന് സംഘടിപ്പിക്കും.. വിജയികൾക്ക് സമ്മാനങ്ങളുമൂണ്ട്.


	പത്രവായനാവേള

പ്ലാസ്റ്റിക്കിനെതിരെ പട പൊരുതാം

ബി റൈറ്റ് ബൈ 3 ആർ ( റിഡ്യ‍ൂസ്, റിയ‍ൂസ്, റിസൈക്കിൾ പ്ലാസ്റ്റിക് )

അനുദിനം വർദ്ധിച്ചുവരുന്ന പ്ലാസ്റ്റിക് മാലിന്യം എന്ന വിപത്തിനെതിരെ പൊരുതുവാൻ വരും തലമുറയെ ബോധവാന്മാരാക്കുക എന്ന ഉദ്ദേശത്തോടെ നടപ്പിലാക്കിയ ബി റൈറ്റ് ബൈ 3 ആർ പദ്ധതി 2024 - 25 വർഷത്തിൽ മികവാർന്ന പ്രവർത്തന ങ്ങളോടെ ജി യു പി എസ് വെള്ളംകുളങ്ങരയിൽ നടത്തുവാൻ സാധിച്ചു.പദ്ധതിയുടെ സ്കൂൾതല ഉദ്ഘാടനം 3 /9/ 2024 ചൊവ്വാഴ്ച നടന്നു. പദ്ധതിയുടെ ഔപചാരിക ഉദ്ഘാടനം പ്രഥമ അധ്യാപിക സുമി റേച്ചൽ സോളമൻ നിർവഹിച്ചു. അധ്യാപിക സിന്ധു. എസ് പദ്ധതി വിശദീകരിക്കുകയും ബോധവൽക്കരണ ക്ലാസ് എടുക്കുകയും ചെയ്തു. അലക്ഷ്യമായി ഉപയോഗിക്കുന്ന ഓരോ തുണ്ട് പ്ലാസ്റ്റിക്കും നമ്മുടെയും മറ്റു ജീവജാലങ്ങളുടെയും എന്തിന് ഭൂമിയുടെ തന്നെയും നിലനിൽപ്പിന് ഭീഷണിയാണെന്ന തിരിച്ചറിവ് എല്ലാവരിലേക്കും എത്തിക്കുന്നതിനും ഒട്ടും വിദൂരമല്ലാത്ത ഒരു മഹാ ദുരന്തത്തിനെതിരെ പട പൊരുതുന്നതിന് ഓരോ കുട്ടിയെയും സജ്ജരാക്കുന്നതിനും ബി റൈറ്റ് ബൈ 3 ആർ പദ്ധതിയുടെ ഭാഗമായി നടപ്പിലാക്കിയ വിവിധ പ്രവർത്തനങ്ങളിലൂടെ ഇക്കോക്ലബ് അംഗങ്ങൾക്ക് സാധിച്ചു.

പ്ലാസ്റ്റിക് മാലിന്യം ശേഖരണവും തരംതിരിക്കലും

പ്ലാസ്റ്റിക് പുനരുപയോഗത്തിലെ ഏറ്റവും പ്രധാനകാര്യം അവ തരംതിരിക്കുക എന്നതാണ്. ഓരോ വിഭാഗത്തിലുംപെട്ട പ്ലാസ്റ്റിക് വസ്തുക്കൾ പ്രത്യേകമായി വേർതിരിച്ചെങ്കിൽ മാത്രമേ അവ പുനരുപയോഗത്തിന് പ്രയോജനപ്പെടുകയുള്ളൂ. ബി റൈറ്റ് ബൈ 3 ആർ പദ്ധതിയുടെ ഭാഗമായി പ്രത്യേക ചാക്കുകളിൽ തീരെ കനം കുറഞ്ഞവ, സാമാന്യം കനമുള്ളവ, കട്ടികൂടിയവ, പെറ്റ് ബോട്ടിലുകൾ മുതലായവ പ്രത്യേകം തരംതിരിച്ച് ശേഖരിച്ചു. കൂടാതെ അജൈവമാലിന്യങ്ങൾ ശേഖരിക്കുന്നതിനായി നൽകിയ നാലുകൂടകളിൽ ഒരെണ്ണത്തിൽ പ്ലാസ്റ്റിക് മാലിന്യങ്ങൾ ശേഖരിച്ചു. ഉപയോഗശൂന്യമായ പ്ലാസ്റ്റിക് പേനകൾ ശേഖരിക്കുന്നതിനായി പ്രത്യേകം പേന കൂടയും ഉണ്ട്.

സ്കൂൾ ക്യാമ്പസിൽ നിന്നും സ്കൂളിന്റെ പരിസരത്തുള്ള കടകളിലും, വീടുകളിലും നിന്നും കുട്ടികൾ പ്ലാസ്റ്റിക് ശേഖരിച്ച് കഴുകി വൃത്തിയാക്കി ഉണക്കി പ്രത്യേകം തരംതിരിച്ച് ഹരിത കർമ്മ സേനയ്ക്ക് കൈമാറുന്നതിനു വേണ്ട ക്രമീകരണങ്ങൾ ചെയ്തു വരുന്നു.

വീഡിയോ പ്രദർശനവും, ബോധവൽക്കരണ റാലിയും

2024 ആഗസ്റ്റ് ആറാം തീയതി പ്ലാസ്റ്റിക് കത്തുമ്പോൾ ഉണ്ടാകുന്ന ആരോഗ്യപ്രശ്നങ്ങളും പരിസര മലിനീകരണവും കുട്ടികളെ മനസ്സിലാക്കുന്നതിനായി വീഡിയോ പ്രദർശനം നടത്തി.

ഇക്കോ ക്ലബ് അംഗങ്ങളുടെ നേതൃത്വത്തിൽ പ്ലാസ്റ്റിക് കത്തിക്കുന്നതിനെതിരെ റാലി സംഘടിപ്പിച്ചു. സ്കൂളിലെ എല്ലാ കുട്ടികളും റാലിയിൽ പങ്കെടുത്തു. റാലിയിൽ മുഖരിതമായിരുന്ന ഓരോ മുദ്രാവാക്യങ്ങളും പ്ലാസ്റ്റിക്കിനെതിരെയും, അവ കത്തിക്കുന്നതിനെതിരെയുള്ള ഓരോ ചാട്ടവാറടി ആയിരുന്നു പ്ലാസ്റ്റിക് കത്തിക്കുന്നതിനെതിരെ ജനശ്രദ്ധ ആകർഷിക്കുന്നതിന് സമൂഹത്തിലേക്കിറങ്ങിച്ചെന്ന ഈ റാലിയിലൂടെ സാധിച്ചു.

പ്ലാസ്റ്റിക് വിരുദ്ധ പ്രതിജ്ഞ

ഉപയോഗം കഴിഞ്ഞ പ്ലാസ്റ്റിക്കിന്റെ അളവ് ലോകത്തെല്ലായിടത്തും ദിനംതോറും വർദ്ധിച്ചുവരുന്ന സാഹചര്യത്തിൽ പ്ലാസ്റ്റിക്കിന്റെ ഉപയോഗം പരമാവധി കുറയ്ക്കാനും അതിലുപരി ഉണ്ടാകുന്ന പരിസ്ഥിതി പ്രശ്നങ്ങളും ആരോഗ്യപ്രശ്നങ്ങളും ഒഴിവാക്കാനും വേണ്ടി കുട്ടികളും അധ്യാപകരും ചേർന്ന് പ്ലാസ്റ്റിക് വിരുദ്ധ പ്രതിജ്ഞ ചൊല്ലി.

പോസ്റ്റർ രചന മത്സരം

പ്ലാസ്റ്റിക്കിന്റെ ഉപയോഗം കുറയ്ക്കുക, ഭൂമിയെ സംരക്ഷിക്കുക എന്ന വിഷയത്തെ ആസ്പദമാക്കി കുട്ടികൾക്ക് സ്കൂൾതലത്തിൽ പോസ്റ്റർ രചന മത്സരം നടത്തി. എൽ.പി. വിഭാഗത്തിൽ നിന്നും മൂന്നാം ക്ലാസിലെ അമൽ ദേവിന് ഒന്നാം സ്ഥാനവും, കീർത്തി അനൂപിന് രണ്ടാം സ്ഥാനവും ലഭിച്ചു. യു.പി. വിഭാഗത്തിൽ നിന്നും ഏഴാം ക്ലാസിലെ പാർവതി ഗിരീഷിന് ഒന്നാം സ്ഥാനവും, അഞ്ചാം ക്ലാസിലെ പാർവതി അഭിലാഷിന് രണ്ടാം സ്ഥാനവും ലഭിച്ചു.

പഠനയാത്രകൾ

കാവ് സന്ദർശനം
നമ്മുടെ ചുറ്റുപാടുമുള്ള സസ്യ സമ്പത്ത് മനസ്സിലാക്കുന്നതിനായി പരിസരപ്രദേശത്തെ കാവുകളിൽ കുട്ടികളെ കൊണ്ടുപോയിരുന്നു. അവിടെ വിവിധതരം പക്ഷികളെയും സസ്യങ്ങളെയും കാണുവാൻ സാധിച്ചു. ജൈവവൈവിധ്യങ്ങളെ കാണുന്നതിനും പഠിക്കുന്നതിനും നിരീക്ഷിക്കുന്നതിനുമായി ഈ പഠനയാത്ര ഉപകാരപ്പെട്ടു.

മിൽമ സന്ദർശനം
2024 ഡിസംബർ 15 ന് ജി. യു. പി. എസ്. വിദ്യാർത്ഥികൾ ആലപ്പുഴ മിൽമ സന്ദർശിച്ചു. പ്രാദേശിക മിൽമ സന്ദർശനം വിദ്യാർത്ഥികൾക്ക് മികച്ചൊരു അനുഭവമായിരുന്നു. ക്ഷീര കൃഷിയുടെ പ്രാധാന്യത്തെപറ്റിയും അതിലൂടെയുള്ള ജൈവവൈവിധ്യ സംരക്ഷണത്തിൻ്റെ പ്രാധാന്യത്തെക്കുറിച്ചും കുട്ടികൾക്ക് വിലപ്പെട്ട ഉൾക്കാഴ്ചകൾ നൽകാൻ ഈ സന്ദർശനത്തിനായി. സുസ്ഥിര കാർഷിക രീതികൾ പ്രോത്സാഹിപ്പിക്കേണ്ടതിൻ്റെയും നാടൻ കന്നുകാലികളെ സംരക്ഷിക്കേണ്ടതിന്റെയ‍ും പ്രാധാന്യം കുട്ടികൾക്ക് മനസ്സിലായി.

തോന്നയ്ക്കൽ കുമാരനാശാൻ സ്മാരക സന്ദർശനം
2025 ജനുവരി 10-ന് തോന്നയ്‍ക്കൽ കുമാരനാശാൻ സ്മാരകത്തിലേക്ക് പഠനയാത്ര നടത്തി. തോന്നക്കൽ കുമാരനാശാൻ സ്മാരകം, നമ്മുടെ സമ്പന്നമായ സാംസ്കാരിക പൈതൃകവും ജൈവവൈവിധ്യവും പ്രദർശിപ്പിക്കുന്ന ശാന്തമായ മരുപ്പച്ചയാണ്. പച്ചപ്പ് നിറഞ്ഞ സ്മാരകം പരിസരത്ത് തദ്ദേശീയ സസ്യജാലങ്ങളുടെ ഒരു വലിയ നിര തന്നെയുണ്ട്. കുമാരനാശാൻ നട്ടു വളർത്തിയ പനിനീർ ചെമ്പകവും കുട്ടികൾക്ക് കാണാൻ കഴിഞ്ഞു. നാം നടുന്ന വൃക്ഷങ്ങൾ, തലമുറകൾക്കപ്പുറവും നമ്മുടെ ഓർമ്മയായി നിലനിൽക്കുന്നു എന്ന ബോധവും ഈ സന്ദർശനത്തിലൂടെ കുട്ടികൾക്ക് നേടാനായി. തോന്നയ്ക്കൽ കുമാരനാശാൻ സ്മാരക സന്ദർശനം വിദ്യാർത്ഥികൾക്ക് സമ്പന്നമായ അനുഭവമായി

മുകുരം (പഠനോത്സവം)

(കുട്ടികളുടെ പഠന മികവുകളുടെ നേർക്കാഴ്ച)

കണ്ണിമാങ്ങ നുണയുന്ന അവധിദിനങ്ങളെ നെഞ്ചോടു ചേർക്കുവാൻ ഒരധ്യയന വർഷംകൂടി കൊഴിയുകയാണ്. നനുത്ത മഴത്തുള്ളികളുടെ തണുപ്പോടെ ആരംഭിച്ച കഴിഞ്ഞ അധ്യയനവർഷത്തിൽ, കുഞ്ഞു മനസുകൾ ചേർത്തുവച്ച അറിവിന്റെ ചില വെള്ളാരം കല്ലുകൾ പൊതുജനങ്ങൾക്കു മുമ്പിൽ പ്രദർശിപ്പിക്കുന്ന ദിവസമെത്തിയിരിക്കുകയാണ്, ‘പഠനോത്സവം’.

സ്ക്കൂൾതല പഠനോത്സവത്തിനു മുന്നോടി യായി മാർച്ച് ഏഴാം തീയതി രാവിലെ 10 മണിക്ക് ക്ലാസ്‍തല പഠനോത്സവവും, ഉച്ചയ്ക്കു 2 മണിക്ക് ശേഷം കോർണർ തല പഠനോത്സവവും നടത്തി. ഓരോ അദ്ധ്യാപകനും അവരവരുടെ ക്ലാസ്സിലെ കുട്ടികളുടെ അവസ്ഥാ പഠനം നടത്തി ഓരോ കുട്ടിയുടേയും ശേഷിക്ക് അനുസരിച്ചുള്ള പ്രവർത്തനങ്ങൾക്ക് കുട്ടികളെ തയ്യാറാക്കി.

അറിവ് ആവേശത്തോടെ സ്വീകരിച്ച ഓരോ കുഞ്ഞുങ്ങളുടെയും പ്രയത്നത്തിന്റെ ഫലം, അവർ നേടിയ ശേഷികളും നൈപുണികളും ഒരു കണ്ണാടിയിൽ എന്നതുപോലെ പ്രതിഫലിപ്പിക്കുകയാണ് ഇവിടെ.

അതുകൊണ്ടുതന്നെ കണ്ണാടി എന്ന അർത്ഥം വരുന്ന മുകുരം എന്ന പേരിൽ , 2025 മാർച്ച് 10 ന് ജി. യു. പി. എസ്. വെള്ളംകുളങ്ങരയിലെ സ്കൂൾ ഓഡിറ്റോറിയത്തിൽ വച്ച് കുട്ടികളുടെ പഠന മികവുകളുടെ നേർക്കാഴ്ചയായ ഈ അറിവുത്സവം അരങ്ങേറി. നിരവധി ആൾക്കാർ ഈ പരിപാടിയിൽ പങ്കുകൊണ്ട് കുഞ്ഞുമനസ്സുകളുടെ കഴിവുകളെ ആശിർവദിച്ചു.

സ്ക്കൂൾ എസ്.എം.സി. ചെയർമാൻ ശ്രീ സുരജിത്ത് കുമാർ അദ്ധ്യക്ഷനായ പഠനോൽസവയോഗം വീയപുരം ഗ്രാമപഞ്ചായത്ത് പ്രസിഡൻ്റ് ശ്രീമതി ഷീജസുരേന്ദ്രൻ ഉദ്ഘാടനം ചെയ്തു. സീനിയർ അദ്ധ്യാപകനായ ശ്രീ. വി. രജനീഷ് സ്വാഗതം ആശംസിച്ചു. വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ശ്രീമതി മായാദേവി, വാർഡ് മെമ്പർ ശ്രീ. കെ. ജയകൃ ഷ്ണൻ, മെമ്പർ സ‍ുമതി ബി. ബി. ആർ .സി ക്ലസ്റ്റർ കോർഡിനേറ്റർ സ്മിത എ. സ്റ്റാഫ് സെക്രട്ടറി രഹീന ബീഗം എന്നിവർ ആശംസകൾ അർപ്പിച്ചു. എസ്.ആർ.ജി. കൺവീനർ എസ്. സിന്ധു നന്ദി പ്രകശിപ്പിച്ചു. പഠനോത്സവത്തിൽ പഠനോൽപ്പന്നങ്ങളുടെ പ്രദർശനവും നടത്തി.

ഈ ദിവസം കുട്ടികൾ അവതരിപ്പിച്ച വിവിധ പരിപാടികളുടെ വിശദവിവരങ്ങൾ ചുവടെ നൽകുന്നു.

ഒന്നാം ക്ലാസ്സിന്റെ ഇംഗ്ലീഷ് പാഠപുസ്തത്തിലെ 'ദ ടീം റെയിൻ' എന്ന യൂണിറ്റ് ആയി ബന്ധപ്പെട്ടു ഒന്നാം ക്ലാസ്സിലെ എല്ലാ കുട്ടികളും ചേർന്ന് ഒരു ഇംഗ്ലീഷ്സ്കിറ്റ് ചെയ്തു. മലയാളത്തിൽ പച്ചക്കറി തോണി എന്ന യൂണിറ്റ് ആയി ബന്ധപ്പെട്ടു നാടകം ചെയ്തു. പരിസരപഠനവും ആയി ബന്ധപ്പെട്ടു ഷഡ്പദങ്ങളെ പരിചയപ്പെടുത്തി.

നാടിനെ രക്ഷിച്ച വീരബാഹു എന്ന പാഠഭാഗവുമായി ബന്ധപ്പെട്ട ഭീകരൻ എന്ന പാവ നാടകമാണ് രണ്ടാം ക്ലാസിലെ കുട്ടികൾ പഠനോത്സവത്തിൽ അവതരിപ്പിച്ചത്. പാവ നാടകത്തിൽ തവളയായി നളിനകാന്തിയും ഈച്ചയായി ഋഷിവേണിയും രാജുവായി ആദിലക്ഷ്മി, ശിവഗംഗ മുത്തശ്ശിമാരായി അനുജിത്തും ജിദുഷയും ആയിരുന്നു.

ഞാനാണ് താരം എന്ന പാഠഭാഗത്തിൽ പരിസര പഠനവുമായി ബന്ധപ്പെട്ട ജലം ജീവൻ നിലനിർത്താൻ അത്യാവശ്യം ആണ് എന്ന ബോധം ഉളവാക്കാനായി അത് ഒരു വള്ളപ്പാട്ട് രൂപത്തിൽ രംഗത്ത് അവതരിപ്പിക്കുന്നു. വഞ്ചിപ്പാട്ടിൽ പങ്കെടുത്ത കുട്ടികൾ ജിതുഷ, ഋഷിവേണി, ശിവഗംഗ, നളിന കാന്തി, ആദിലക്ഷ്മി, അനുജിത്ത് എന്നിവരായിരുന്നു.

പടയണി, തെയ്യം തുടങ്ങിയ കലാരൂപങ്ങളുടെയെല്ലാം അവതരണത്തോടൊപ്പം പാട്ടുകളും പിന്നണിയിലുണ്ടായിരുന്നു. പാട്ടു പാടി അവതരിപ്പിക്കുന്ന കലാരൂപങ്ങളിലൊന്നാണ് തുള്ളൽ.തുള്ളൽപ്പാട്ടുകൾ നല്ല കവിതകളുമാണ്. പട അഥവാ യുദ്ധം ഉണ്ടായാൽ പലർക്കും പലതും നഷ്‌ടപ്പെടും. എന്തെല്ലാം നഷ്‌ടങ്ങളാണ് പലവിധ മനുഷ്യർക്ക് ഉണ്ടാകുന്നതെന്ന് ഹാസ്യ രൂപണേ പറയുന്ന ഒരു തുള്ളൽപ്പാട്ടാണ് പടയുടെ കെടുതി.

മൂന്നാം ക്ലാസിലെ മലയാളം പാഠപുസ്തകത്തിലെ കനകച്ചിലങ്ക എന്ന യൂണിറ്റിലെ പടയുടെ കെടുതി എന്ന ഓട്ടൻതുള്ളൽ കീർത്തി അനൂപും അമൽദേവും അവതരിപ്പിച്ചു.

അധ്വാനവും, താളവും തമ്മിൽ ബന്ധമുണ്ടെന്ന് വ്യക്ത‌മാക്കുന്ന ധാരാളം നാടൻപാട്ടുകൾ നമ്മുടെ സാഹിത്യത്തിലുണ്ട്. ഞാറു നടുമ്പോഴും, നെല്ലു കൊയ്യുമ്പോഴും, നെല്ലു കുത്തുമ്പോഴുമെല്ലാം അധ്വാനഭാരം അറിയാതിരിക്കാൻ പാട്ടുകൾ പാടിയിരുന്നു. തടിപിടിക്കുന്ന തൊഴിലാളികൾ അധ്വാനത്തിന്റെ ഭാരം അറിയാതിരിക്കാൻ വേണ്ടി പാടുന്ന ഒരു പാട്ടാണ് തടി പിടിപ്പാട്ട്.കുട്ടികളെക്കൊണ്ട് തടി പിടിപ്പാട്ട് അവതരിപ്പിച്ചു.

മൂന്നാം ക്ലാസിലെ മലയാളം പാഠപുസ്തകത്തിലെ മനുഷ്യന്റെ കൈകൾ എന്ന യൂണിറ്റിലെ കാവാലം നാരായണ പണിക്കർ എഴുതിയ തടി പിടി എന്ന പാട്ടിൻറെ തുടർ പ്രവർത്തനമായി മത്സ്യ- ബന്ധനത്തിന് കടലിൽ പോകുന്നവർ പാടിയിരുന്ന കടൽ പാട്ടുകൾ കുട്ടികൾ അവതരിപ്പിച്ചു.

മാനത്തോളം വലുതാകാൻ ഒത്തുപിടിച്ചോളൂ, ഒരുമയോടെ നിന്നോളൂ എന്ന് കുട്ടിക ളോട് പറയുകയാണ് കവി സി. ആർ. ദാസ്.

എല്ലാവരും ഒന്നിച്ചു ചേർന്ന് കൂട്ടായി പ്രവർത്തിച്ചാൽ മാത്രമേ ജീവിതത്തെ മാനത്തോളം വലു താക്കാൻ കഴിയൂ എന്ന ആശയം വിളിച്ചു പറയുന്ന ഒത്തുപിടിച്ചോളിൻ എന്ന കവിതയുടെ നൃത്താവിഷ്കാരം മൂന്നാം ക്ലാസിലെ കുരുന്നുകൾ നടത്തി.

കോടാലി പുഴയിൽ നഷ്ടപ്പെട്ട മരംവെട്ടുകാരൻ്റെ സത്യസന്ധതയിൽ സന്തുഷ്ടയായ വനദേവത സ്വർണ കോടാലി സമ്മാനമായി നൽകിയ കഥ നിങ്ങൾക്ക് ഓർമ്മ യില്ലേ. അതേപോലെ താൻ അധ്വാനിച്ച് നേടിയ ഒരു സ്വർണ നാണയത്തിന് വേണ്ടി രാജാവ് വച്ച് നീട്ടിയ രാജ്യം പോലും വേണ്ട എന്ന് വെച്ച സത്യസന്ധനായ കർഷകന്റെ കഥ യാണ് ഹോണസ്റ്റി പേയ്‍സ് അഥവാ സത്യസന്ധതയുടെ പ്രതിഫലം എന്ന കഥ. മൂന്നാം ക്ലാസിലെ കുട്ടികൾ ഹോണസ്റ്റി പേയ്‍സ് എന്ന യൂണിറ്റ് ഇംഗ്ലീഷ് ഡ്രാമയായ് അവതരിപ്പിച്ചു.

നാലാം ക്ലാസ്സിലെ ഇംഗ്ലീഷ് പാഠപുസ്തകത്തിലെ അവസാനത്തെ യൂണിറ്റ് ആയ 'എൽവ്സ് ആന്റ് ഷ‍ൂമേക്കർ' ആയി ബന്ധപ്പെട്ട് നൃത്താവിഷ്ക്കാരം നടത്തി.

നാലാം ക്ലാസിലെ മലയാളം പാഠപുസ്തകത്തിലെ വെണ്ണക്കണ്ണൻ എന്ന കവിതയുടെ ദൃശ്യാവിഷ്ക്കാരം സിയ സജി , അദ്രീജ സന്തോഷ് എന്നിവർ ചേർന്ന് ചെയ്തു.

അഞ്ചാം ക്ലാസിലെ അടിസ്ഥാന ശാസ്ത്രത്തിലെ ഒന്നാമത്തെ യൂണിറ്റായ ഒറ്റയല്ലൊരു ജീവിയും ആറാം ക്ലാസിലെ ആറാമത്തെ യൂണിറ്റായ ഒന്നിച്ചു നിലനിൽക്കാം എന്ന പാഠഭാഗത്തിലെ ആഹാര ശ്യംഖലയിലയിലെ ഓരോ ജീവിയുടെയും നിലനിൽപ്പ് ആവാസ വ്യവസ്ഥയുടെ നിലനിൽപ്പിന് അത്യന്താപേക്ഷിതമാണ് എന്ന പഠനാശയവുമായി ബന്ധപ്പെട്ട ശാസ്ത്ര നാടകം കുട്ടികൾ അവതരിപ്പിച്ചു.

അഞ്ചാം ക്ലാസി ലെ ഹിന്ദി പാഠപുസ്തകത്തിലെ 'ധ‍ൂപ് ആ ഗയാ' എന്ന പാഠത്തിൻറെ ദൃശ്യാവിഷ്കാരം, കുട്ടികൾ ചെയ്തു. അഞ്ചാം ക്ലാസിലെ ദോ സംതരാ എന്ന പാഠത്തിലെ ഒരു സംഭാഷണം മൂന്ന് കുട്ടികളെ കൊണ്ട് ചെയ്യി പ്പിച്ചു.

ആറാം ക്ലാസ്സിലെയും ഏഴാം ക്ലാസിലേയും ഗണിത പാഠപുസ്തകത്തിലെ കോണുകളുമായി ബന്ധപ്പെട്ട ഗണിതാശയങ്ങളെ കുട്ടികൾ വഞ്ചിപ്പാട്ടിലൂടെ അവതരിപ്പിച്ചു.ഏഴാം ക്ലാസിലെ ഗണിത പാഠപുസ്തകത്തിലെ സമചതുരങ്ങളും മട്ടത്രികോണങ്ങളും എന്ന പാഠഭാഗത്തിലെ പഠനാശയങ്ങളെ ഉൾപ്പെടുത്തി കുട്ടികൾ ഗണിത തിരുവാതിര അവതരിപ്പിച്ചു