നാടോടി വിജ്ഞാനകോശം

സംസ്ക്കാരത്തിന്റെ വേരുകളിൽ നിന്ന് തലമുറയുടെ ഞരമ്പുകളിലേയ്ക്ക് നമ്മുടെ ജനത നൂറ്റാണ്ടുകളുടെ അനുഭവങ്ങളിലൂടെ സ്വരുക്കൂട്ടി പറഞ്ഞും കാണിച്ചും കൈമാറിപ്പോന്ന അറിവുകളുടെ ഒരാകാശം നമുക്ക് കുറച്ചു കാലം മുമ്പു വരെ ഉണ്ടായിരുന്നു. പഴഞ്ചനെന്നും അന്ധവിശ്വാസജ‍‍ഡിലമെന്നും യുക്തിഹീനമെന്നും വിളിച്ച് നമ്മിൽ നിന്നും പറിച്ചെറിയപ്പെട്ട അറിവുകൾ നമ്മുടെ സത്വവും സത്യവുമായിരുന്നു എന്ന തിരിച്ചറിവിലേയ്ക്ക് നമ്മൾ പതിയെ നീങ്ങാൻ തുടങ്ങിയിരിക്കുന്നു. അതിലൊരു കണ്ണിയായി മാറാൻ ഞങ്ങൾക്കു കഴിയട്ടെ.

ആമുഖം

അന്താരാഷ്ട്ര തുറമുഖ നഗരമായ വിഴിഞ്ഞം പ്രദേശത്തിനും ചരിത്രമുറങ്ങുന്ന അയ്യൻകാളി സ്മാരകത്തിനും ഇതിഹാസനോവലിന്റെ പശ്ചാത്മികയായ മാർത്താണ്ഡം കുളത്തിനും ഇടയിലായി സ്ഥിതി ചെയ്യുന്ന 136 വർഷം പഴക്കമുള്ള വിദ്യാലയ മുത്തശ്ശിയാണ് ഞങ്ങളുടെ സ്ക്കൂൾ. പ്രശാന്തസുന്ദരമായ ഗ്രാമ പശ്ചാത്തലം, പാരമ്പര്യ കർഷകരുടെ നാടായ ഈ പ്രദേശത്തിന്റെ സവിശേഷതയാണ്. നാടൻ വിനോദ കലകളും, നാടൻ വീട്ടുപകരണങ്ങളും, നാടൻ ഫലങ്ങളും, ഭക്ഷണ വിഭവങ്ങളും , വളർത്തുമൃഗങ്ങളും, ഔഷധ സസ്യങ്ങളും, പഴഞ്ചൊല്ലുകളും, നാടോടിക്കഥകളും, വാമൊഴിത്തനിമയും ഒക്കെ കൊണ്ടു സമൃദ്ധമാണ് ഈ നാട്. അഭിമാനത്തോടെയും സന്തോഷത്തോടെയും ഞങ്ങളുടെയും നാട്ടറിവുകൾ ഇവിടെ പങ്കു വച്ചു കൊള്ളട്ടെ.

നാടൻ വിനോദകലകൾ

നാടൻ വിനോദകലകൾ ഇന്നും നാട്ടിൻ പുറത്തെ സായാഹ്നങ്ങളെയും അവധിക്കാലത്തെയും മുഖരിതമാക്കുന്നു. കൊയ്ത്തു കഴിഞ്ഞ കൃഷിയിടങ്ങളിലും ചെമ്മണ്ണിൽ കാവിയുടുക്കുന്ന മൈതാനങ്ങളിലും നാടൻ വിനോദങ്ങളുമായി യുവജനങ്ങൾ ഒത്തു ചേരുന്നു.

കളരി അഭ്യാസങ്ങൾ,

പന്തു കളി, കുട്ടീം കോലും, പാണ്ടിത്തട്ടു കളി, ചീട്ടു കളി, വട്ടു കളി, പട്ടം പറത്തൽ, കബഡി, കല്ലു കളി, കണ്ണാം പൊത്തിക്കളി, ഗോലി കളി, തലപ്പന്തു കളി, മരം തൊട്ടു കളി.

പ്രാദേശിക വീട്ടുപകരണങ്ങളും കൃഷി ആയുധങ്ങളും

പഴയ കാല വീട്ടുപകരണങ്ങളിൽ പലതും ഇന്ന് നഷ്ടപ്രായങ്ങളാണ്. പക്ഷേ വെങ്ങാനൂർ ഗ്രാമത്തിന്റെ ഉൾനാടൻ‍ സ്ഥലങ്ങളിൽ ഇന്നും ഇവയിൽ ചിലതൊക്കെ കാണപ്പെടുന്നുണ്ട്. അമ്മിക്കല്ല്, ആട്ടുകല്ല്, കാൽപ്പെട്ടി, കിണ്ടി, കിണ്ണം, ഉറി, റാന്തൽ വിളക്ക്, മണ്ണെണ്ണ വിളക്ക്, വല്ലം, വട്ടി, നാഴി, കപ്പി, കലപ്പ.

നാടൻ ഫലങ്ങൾ

നല്ല നാട്ടുഫലങ്ങൾ ധാരാളമായി വിളയുന്ന പ്രദേശമാണിത്. ചക്ക, മാങ്ങ, പപ്പായ, ശീമ നെല്ലിക്ക, പേരയ്ക്ക, നേന്ത്രപ്പഴം, കശുമാങ്ങ, സപ്പോട്ട, ഞാറപ്പഴം, ആത്തച്ചക്ക, സീതപ്പഴം, ആനമുന്തിരി, പുളിച്ചിക്ക, ലവലോലിക്ക.

പ്രാദേശിക കലകൾ

മുടിയേറ്റ്

പ്രദേശത്തെ പ്രസിദ്ധമായ ക്ഷേത്രമാണ് നീലകേശി മുടിപ്പുര. അഞ്ചു വർഷം കൂടുമ്പോൾ ഇവിടെ പ്രസിദ്ധമായ മുടിയേറ്റ് നടത്താറുണ്ട്. കളമെഴുത്ത്, ദീപാരാധന, തിരിയുഴിച്ചിൽ എന്നിവയ്ക്കു ശേഷം താലപ്പൊലിയുമായി ദേവിയെ എതിരേല്ക്കുന്നു. ദാരികനും കാളിയുമായുള്ള ഏറ്റുമുട്ടലാണ് ഇതിന്റെ ഇതിവൃത്തം. കാളി, ദാരികൻ, ശിവൻ, ദാനവൻ, കോയിമ്പടനായര്, വേതാളം, കൂളി എന്നിവരാണ് കഥാപാത്രങ്ങൾ. രണ്ടു ദിവസം നീണ്ടു നില്ക്കുന്ന പറണേറ്റിനും നിലത്തിൽപോരിനും ഗ്രാമീണർ ഒന്നടങ്കം പങ്കുചേരുന്നു.

കാക്കാരശ്ശി നാടകം

ക്ഷേത്രോത്സവങ്ങളോടനുബന്ധിച്ച് ഈ പ്രദേശങ്ങളിൽ കാക്കാരിശ്ശി നാടകം നടത്താറുണ്ട്. താളം ചവിട്ടിയെത്തുന്ന കാക്കാലൻ തമ്പുരാന്റെ ചോദ്യങ്ങൾക്ക് മറുപടി പറയുന്നതിലൂടെയാണ് കഥ ആവിഷ്ക്കരിക്കുന്നത്. നർമ്മ പ്രധാനമാണ് ഇതിന്റെ രീതി.

സർപ്പപ്പാട്ടുകൾ

നിരവധി നാഗക്ഷേത്രങ്ങളും കാവുകളും കൊണ്ട് സമ്പന്നമാണ് ഈ നാട്ടിൻ പുറം. സർപ്പപ്രീതിക്കു വേണ്ടി നാഗപൂജയും പുള്ളുവൻ പാട്ടും ഇപ്പോഴും ഇവിടങ്ങളിൽ നടത്തുന്നുണ്ട്.

തുള്ളൽ

ജനകീയ കലയായ തുള്ളലിന് ഇന്നും ക്ഷേത്രോത്സവങ്ങളിൽ പ്രമുഖ സ്ഥാനം തന്നെയാണ്.

വടംവലി

ഓണാഘോഷവേളകളിലും അല്ലാതെയും നാട്ടിലെ യുവജനങ്ങൾ വടംവലി മത്സരം സംഘടിപ്പിക്കുന്നു.

ചെണ്ടമേളം

എല്ലാ വിശേഷ ദിവസങ്ങളിലും ചെണ്ടമേളം നടത്തുന്നതാണ്. പാരമ്പര്യമായിട്ടും അല്ലാതെയും നിരവധി കുട്ടികൾ ചെണ്ട പഠിച്ചു വരുന്നു.

വള്ളം കളി

വെങ്ങാനൂർ പ്രദേശത്തിന്റെ പല ഭാഗങ്ങളിലൂടെയും ഒഴുകിയിറങ്ങുന്ന വെള്ളായണിക്കായൽ വള്ളംകളിക്കും പ്രസിദ്ധമാണ്. വളരെ വലിയ ആഘോഷമായാണ് നാട്ടിൽ വള്ളം കളി നടത്തുന്നത്.

പ്രാദേശിക വാർത്താവിനിമയ രീതികൾ

എന്തര് ,-എന്താ
എന്തര് കെടന്ന് പൊളപൊളക്കണത്-എന്താ ഉറക്കെ വിളിക്കുന്നത്
ഐത്തിങ്ങള് പോയാ-അവർ പോയോ,-
കെളവി പോയാ-മുത്തശ്ശി പോയോ,
ചണ്ടപിടിക്കണ്-വഴക്കു പറയുന്നു
,മൂപ്പിലാൻ വന്നാ- അപ്പൂപ്പൻ വന്നോ,
പു‍തുക്കങ്ങള് കണ്ടാ.- മാറ്റങ്ങൾ കണ്ടോ
അവന്റെ പെണ്ണുമ്പിള്ള- അവന്റെ ഭാര്യ
ആ പെങ്കൊച്ച്- ആ പെൺകുട്ടി

നാട്ടുപെരുമ

മഹാത്മാ അയ്യങ്കാളിയുടെ ജന്മദേശമായ വെങ്ങാനൂർ ഭാരതചരിത്രത്തിന്റെ ഭാഗമാണ്.കാർഷികവൃത്തിയെ ആശ്രയിച്ച്ജീവിതം നയിക്കുന്ന ഈ നാട് കായലും പുഴകളും തോടുകളും വയലേലകളും കൊണ്ട് സമ്പന്നമാണ്.രാജ്യത്തിനുവേണ്ടി വീരചരമം പ്രാപിച്ച ജെറി പ്രേംരാജ് വെങ്ങാനൂരിന്റെ അഭിമാനമാണ്.കൂടാതെ നിരവധി ക്ഷേത്രങ്ങളും വൈവിധ്യമുള്ള ആചാരാനുഷ്ഠാനങ്ങളും നിറഞ്ഞ നാടാണിത്.

മഹാത്മാ അയ്യങ്കാളി

അവർണ്ണരുടെ അവകാശസമരങ്ങൾക്ക് ശക്തമായ നേതൃത്വം നൽകിയ അയ്യങ്കാളി വെങ്ങാനൂരിന്റെ അഭിമാനമാണ്.അദ്ദേഹത്തിന്റെ സ്മാരകവും അതിനോടുചേർന്ന് വിദ്യാലയവും ഇവിടെ സ്ഥിതി ചെയ്യുന്നു.സവർണ്ണ മേധാവിത്വത്തിനെതിരെ അദ്ദേഹം നടത്തിയ വില്ലുവണ്ടി യാത്ര പ്രസിദ്ധമാണല്ലോ

ക്യാപ്റ്റൻ ജെറി പ്രേം രാജ്

രാജ്യത്തിനു വേണ്ടി വീരമൃത്യു വരിച്ച ധീരയോദ്ധാവാണ് ക്യാപ്റ്റൻ ജെറി പ്രേം രാജ്.അദ്ദേഹത്തിന്റെ സ്മൃതി മണ്ഡപം വെങ്ങാനൂരിൽ സ്ഥിതി ചെയ്യുന്നു.രാജ്യത്തിന്റെ നിരവധി ഭാഗത്തുനിന്നും ധാരാളം പേർ ഇവിടം സന്ദർശിച്ചു വരുന്നു

മാർത്താണ്ഡംകുളം

ചരിത്രപ്രസിദ്ധരായ എട്ടുവീട്ടിൽ പിള്ളമാരിൽ മാർത്താണ്ഡം പിള്ളയുടെ വാസസ്ഥലമായിരുന്ന ഈ സ്ഥലം പിന്നീട് രാജ്യദ്രോഹക്കുറ്റം ചുമത്തി കുളം കോരുകയുണ്ടായി .ആ കുളം ഇന്നും ഈ പ്രദേശത്ത് സംരക്ഷിക്കപ്പെടുന്നു.

നീലകേശി

വെങ്ങാനൂരിലെ പ്രസിദ്ധ ക്ഷേത്രമാണ് നീലകേശി.ഇവിടെ അഞ്ചു വർഷത്തിലൊരിക്കൽ പറണേറ്റ് നടത്തുന്നു.ഭദ്രകാളിയെയാണ് ഇവിടെ ആരാധിക്കുന്നത്.

സ്ഥലനാമ ചരിത്രം

മാർത്താണ്ഡവർമ്മയുടെ 'കണ്ടെഴുത്തുപിള്ളമാരാണ്'(വില്ലേജ് ഓഫീസർ) അക്കാലത്ത് സ്ഥലങ്ങൾക്ക് പേര് നല്കിയിരുന്നത് എന്നു പറയപ്പെടുന്നു. ഓരോ പ്രദേശത്തിന്റെയും പ്രത്യേകതകൾ കണക്കിലെടുത്തുകൊണ്ടാണ് പേരുകൾ നൽകിയിരുന്നത്.ആയ് രാജാക്കന്മാർ ഭരണസൗകര്യത്തിനായി രാജ്യത്തെ 'ഊരുകളും' 'കോടുകളും' 'പുരങ്ങളും' ആയി വിഭജിച്ചിരുന്നു എന്നും ഊരിന് 'ഊർന്നുകിടക്കുന്നിടം' അല്ലെങ്കിൽ 'ദേശം' എന്ന അർത്ഥം നൽകിയിരുന്നതായി ചരിത്രം പറയുന്നു.
വെൺ- കാവ്-ഊര്-വെങ്ങാനൂർ ആയി എന്നും 'വേങ്ങ ഉള്ള ഊര്' വെങ്ങാനൂർ ആയി എന്നും കണക്കാക്കപ്പെടുന്നു.
വില്ലേജ് ഓഫീസുകൾ അക്കാലത്ത് ചാവടി എന്ന പേരിൽ അറിയപ്പെട്ടിരുന്നു.അങ്ങനെ ചാവടി ഉണ്ടായിരുന്ന പ്രദേശം ചാവടിനട ആയി.'
വെൺ-നീർ-ഊര് '--- വെണ്ണിയൂർ -വെള്ളായണിക്കായലിലെ വെള്ളത്തിന്റെ പ്രത്യേകത ഇവിടെ സൂചിപ്പിക്കപ്പെടുന്നു.
'കട്ട-ചാൽ-കുഴി'--- കട്ടച്ചൽക്കുഴി-വെള്ളം ചാലുകീറി ഒഴുകിയിരുന്ന സ്ഥലം
'വെള്ളാർ'---സമുദ്രത്തിലേയ്ക്ക് ഒരു ചെറിയ ആറ് ആ ഭാഗത്തുക്കൂടി കടന്നു പോകുന്നുണ്ട്.
'മുട്ടൻ കാടുള്ള പ്രദേശം'--- മുട്ടയ്ക്കാട് ആയി
'സിസിലിപുരം' എന്ന സ്ഥലം പണ്ട് 'തെമ്മാടി മുക്ക് ' എന്നാണ് അറിയപ്പെട്ടിരുന്നത്.