ഗവ ഠൗൺ യു പി എസ്സ് കിളിമാനൂർ/അക്ഷരവൃക്ഷം/ശുചിത്വവും രോഗപ്രതിരോധവും

ശുചിത്വവും രോഗപ്രതിരോധവും ഇപ്പോഴത്തെ സാഹചര്യത്തിൽ വളരെയേറെ ചിന്തിക്കേണ്ടതും പ്രസക്തിയേറിയതുമായ ഒരു വിഷയമാണ് "ശുചിത്വവും രോഗപ്രതിരോധവും ". ഇപ്പോൾ നമ്മൾ ദിനംതോറും കേൾക്കുന്ന വാക്കുതന്നെയാണ് രോഗപ്രതിരോധം. എന്താണ് പ്രതിരോധമെന്ന് നാം ആദ്യം മനസ്സിലാക്കേണ്ടതുണ്ട് . കോടാനുകോടി കോശങ്ങളാൽ നിർമ്മിതമാണ് മനുഷ്യശരീരം. ഓരോ ശാരീരിക പ്രവർത്തനങ്ങളും നിർവഹിക്കുന്നത് ഓരോ തരം കോശങ്ങളുടെ സഹായത്താലാണ് . രോഗാണുക്കൾ നമ്മുടെ ദേഹത്ത് പ്രവേശിക്കുമ്പോഴാണ് നമുക്ക് രോഗമുണ്ടാവുന്നത്, നാം രോഗിയാകുന്നതും . ഈ രോഗാണുക്കളെ ശരീരത്തിനുള്ളിലേക്ക് പ്രവേശിക്കാതിരിക്കുന്നതും ഒരുപക്ഷേ രോഗാണുക്കൾ പ്രവേശിച്ചു കഴി‍ഞ്ഞാൽ അവയെ ചെറുത്തുനശിപ്പിക്കുവാനുള്ള ശരീരത്തിന്റെ കഴിവിനെയാണ് നാം പ്രതിരോധം എന്നു പറയുന്നത് . എല്ലാ വ്യക്തികൾക്കും പ്രതിരോധശേഷി ഒരുപോലെ ആയിരിക്കില്ല. നാം കഴിക്കുന്ന ആഹാരവും പ്രതിരോധശേഷി വർധിപ്പിക്കുന്നു. പഴങ്ങളും, പച്ചക്കറികളും , ഇലവർഗങ്ങളും, പയറുവർഗങ്ങളും ആഹാരത്തിൽ ഉൾപ്പെടുത്തിയാൽ രോഗപ്രതിരോധശേഷി വർദ്ധിപ്പിക്കാം. ഇപ്പോൾ നാം നേരിടുന്ന ഒരു പ്രധാന പ്രതിസന്ധിയാണ് കൊറോണ എന്ന മാരക രോഗം. പ്രതിരോധശേഷി കുറഞ്ഞവർക്കാണ് ഈ രോഗം വേഗം പകരുന്നത്. വ്യക്തിശുചിത്വം പാലിക്കുകയും പ്രതിരോധശേഷി നേടിയെടുക്കുകയും ചെയ്യുന്നതിലൂടെ ആരോഗ്യം നേടാനും ഈ രോഗത്തെ പ്രതിരോധിക്കാനും കഴിയും. നിയന്ത്രണാതീതമായിരുന്ന ഈ മഹാമാരിയെ നാം നിയന്ത്രിച്ചുകൊണ്ടുവന്നത് സമൂഹത്തിന്റെയും ആരോഗ്യപ്രവർത്തകരുടെയും തീവ്ര പരിശ്രമത്തിലൂടെയാണ്. ഈ മഹാപ്രതിസന്ധിയിൽ നാം ചെയ്യേണ്ടത് പ്രതിരോധശേഷി വർദ്ധിപ്പിക്കുകയും പരിസ്ഥിതിശുചിത്വം, വ്യക്തിശുചിത്വം എന്നിവ പാലിക്കുകയും ചെയ്യുക എന്നതാണ്. ഇപ്പോൾ 60 വയസ്സിനു മുകളിലുള്ളവരും കുഞ്ഞുങ്ങളും വളരെയേറെ ശ്രദ്ധിക്കേണ്ടിയിരിക്കുന്നു. കാരണം ഇവർക്ക് മറ്റുള്ളവരെ അപേക്ഷിച്ച് രോഗപ്രതിരോധശേഷി കുറവാണ്. കൊറോണ വൈറസിനെ തുരത്താൻ ബാഹ്യമായ മുൻകരുതലുകൾ ആവശ്യമാണ് . അതായത് കൈ കഴുകുക , മാസ്ക് ധരിക്കുക , ആൾക്കൂട്ടത്തിൽ പോകാതിരിക്കുക എന്നിവയാണ്.അപ്പോൾ വൈറസ് നമ്മുടെ ശരീരത്തിൽ പ്രവേശിക്കാതെ തടയുന്നു.അതുപോലെ നമ്മുടെ വീടും പരിസരവും വൃത്തിയായി സൂക്ഷിക്കുക.അങ്ങനെ നമുക്ക് കൊറോണ വൈറസിനെ തുരത്താൻ സാധിക്കുന്നതാണ്.ആരോഗ്യമുള്ള ശരീരമുണ്ടെങ്കിലേ ആരോഗ്യമുളള മനസ്സും ഉള്ളൂ. അഭിരാമി.എസ്.എസ് 5.B ഗവ ഠൗൺ യു.പി.എസ്,കിളിമാനൂർ കിളിമാനൂർ ഉപജില്ല തിരുവനന്തപുരം അക്ഷരവൃക്ഷം പദ്ധതി, 2020 ലേഖനം  സാങ്കേതിക പരിശോധന - sheebasunilraj തീയ്യതി: 25/ 04/ 2020 >> രചനാവിഭാഗം - ലേഖനം