ഗവൺമെന്റ് എൽ. പി. എസ് പ്രാക്കുളം/ചരിത്രം

സ്കൂൾ

സൗകര്യങ്ങൾ

പ്രവർത്തനങ്ങൾ

ക്ലബ്ബുകൾ

ചരിത്രം

അംഗീകാരം

ബാലരാമവിലാസിനി

1901 ൽ ഒൻപതിന്റഴികത്ത് ചാന്നാൻ കൃഷ്ണൻ സ്വന്തം മകൾക്ക് അക്ഷരം പഠിക്കാനായി സ്വന്തം സ്ഥലത്ത് സ്ഥാപിച്ചതാണിത്. സ്കൂളിന്റെ അന്നത്തെ പേര്ബാലരാമവിലാസിനി എന്നായിരുന്നു. പിന്നീട് സർക്കാരിനു കൈമാറി. കൊല്ലം ജില്ലാ കേന്ദ്രത്തിൽ നിന്നും 12 കി.മീ അകലെയാണ് ഈ സ്കൂൾ. കൊല്ലം ജില്ലയിലെ ഏറ്റവും പഴക്കം ചെന്ന പ്രൈമറി സ്കൂളുകളിൽ ഒന്നാണ് പ്രാക്കുളം ഗവ. എൽ.പി സ്കൂൾ. 1901-ൽ ആരംഭിച്ച ഈ വിദ്യാലയം പ്രദേശത്തെ വിദ്യാഭ്യാസ വളർച്ചയ്ക്ക് വലിയ സംഭാവന നൽകിയിട്ടുണ്ട്.

ആദ്യകാലത്ത് ചെറിയ പള്ളിക്കൂടമായാണ് ഇത് ആരംഭിച്ചത്. പിന്നീട് നാട്ടുകാരുടെയും വിദ്യാഭ്യാസ പ്രേമികളുടെയും സഹകരണത്തോടെ സ്കൂൾ വളർന്നു. സർക്കാർ ഏറ്റെടുത്തതോടെ ഇത് ഗവൺമെന്റ് എൽ.പി സ്കൂളായി മാറി.

സ്കൂളിന്റെ സ്ഥാപകരിൽ പ്രദേശത്തെ പ്രമുഖരായ വിദ്യാഭ്യാസ പ്രവർത്തകരും സാമൂഹിക പ്രവർത്തകരും പ്രധാന പങ്കുവഹിച്ചു. നിരവധി തലമുറകളിലെ വിദ്യാർത്ഥികൾക്ക് ഈ വിദ്യാലയം അറിവിന്റെ വഴികാട്ടിയായി നിന്നു.

കാലക്രമേണ സ്കൂളിൽ പുതിയ കെട്ടിടങ്ങളും സൗകര്യങ്ങളും ഒരുക്കപ്പെട്ടു. ഇന്ന് ഈ വിദ്യാലയം പ്രദേശത്തെ കുട്ടികൾക്ക് മികച്ച വിദ്യാഭ്യാസം നൽകുന്ന സ്ഥാപനമായി തുടരുന്നു.

ശതാബ്ദി പിന്നിട്ട് 125-ാം വാർഷികത്തിലേക്ക് കടക്കുന്ന ഈ വിദ്യാലയം പ്രദേശത്തിന്റെ വിദ്യാഭ്യാസ പൈതൃകത്തിന്റെ അഭിമാനചിഹ്നമാണ്. ശ്രീനാരായണഗുരുദേവൻ എസ്. എൻ. ഡി. പി. യോഗം സ്ഥാപിക്കുന്നതിനും രണ്ടുവർഷം മുൻപാണ് ഈ വിദ്യാലയം സ്ഥാപിതമായത്. ഈഴവരാദി അധഃസ്ഥിത സമുദായങ്ങൾക്ക് സഞ്ചാരസ്വാതന്ത്ര്യം പോലും നിഷേധിക്കപ്പെട്ടിരുന്ന അക്കാലത്ത് ഈഴവർ സ്വന്തം സ്ഥലത്ത് സ്ക്കൂൾ സ്ഥാപിച്ചു എന്നത് ഒരു കടംകഥപോലെ തോന്നാം.

അനധികൃതമായി സ്ക്കൂൾ സ്ഥാപിച്ചതിന്റെ ശിക്ഷയിൽനിന്നും മോചനം ലഭിക്കണമെങ്കിൽ സ്ക്കൂൾ സർക്കാരിന് വിട്ടുകൊടുക്കണമെന്ന് ഹജൂർ ഉത്തരവുണ്ടായി. 1906-ൽ പള്ളിക്കൂടം ഇൻസ്പെക്ടർ ആഫീസിൽ നിന്നും ലഭിച്ച ഉത്തരവനുസരിച്ച് 2100 കലിപ്പണം മതിപ്പുവിലയുള്ള സ്ക്കൂളും ഉപകരണങ്ങളും സർക്കാരിന് വിട്ടുകൊടുത്തു. വിടുതൽ പത്രത്തിൽ ഇങ്ങനെ കാണുന്നു. 1081-ാമാണ്ട് കുംഭമാസം 13-ാം തീയതി തിരുവതാംകൂർ സംസ്ഥാനത്തിലേക്ക് കൊല്ലം താലൂക്കിൽ പെരിനാട് പ്രവർത്തിയിൽ തെക്കേചേരിയിൽ കോയിപ്പുറത്ത് ഈഴംമാതേവന്റെ മകൻ കച്ചവടം 63 വയസ്സുള്ള ചാന്ദാൻ കൃഷ്ണനും ടി ചേരിയിൽ പടിഞ്ഞാറ്റേ പലകശ്ശേരിയിൽ ടി ജാതി കുഞ്ചന്റെ മകൻ കച്ചവടം 30 വയസ്സുമുള്ള ചാന്ദാൻ കുഞ്ഞിരാമനും കൂടി എഴുതികൊടുത്ത വിടുതൽ പത്രം ഞങ്ങളിൽ ഒന്നാം പേരുകാരന്റെ വകയും ടിയാന് പട്ടയം കിട്ടി അനുഭവിച്ചു കരംതീർത്ത് തുടർന്നു വരുന്നതുമായ താഴെപ്പറയുന്ന സ്ഥലത്ത് പള്ളിക്കൂടം തീർപ്പിച്ച് രണ്ടാം പേരുകാരൻ മാനേജരായി നടത്തിവരുന്നതും ടി പള്ളിക്കൂടം മുതലായതുകളെ ഗവൺമെന്റ് അധീനതയിലേക്ക് വിട്ടുകൊ ടുക്കണമെന്ന് ഹജൂർ ഉത്തരവുണ്ടായിട്ടുള്ളതനുസരിച്ച് പള്ളിക്കൂടം ഇൻസ്പെക്ടർ ആഫീസിൽനിന്നും ഉത്തരവുണ്ടായിട്ടുള്ളതുപോലെ താഴെപ്പറയുന്ന പള്ളിക്കൂടം മുതലായതുകളെ ഞങ്ങൾ സകല ബാദ്ധ്യതകളും ഒഴിഞ്ഞ് ഈ പ്രമാണസഹിതം വിട്ടിരിക്കുന്നു. ഇങ്ങനെ സർക്കാർ ഉത്തരവനുസരിച്ച് വിട്ടുകൊടുക്കേണ്ടി വന്ന വിദ്യാലയമാണിത്.

1952 മാർച്ച് മാസം 12-ാം തീയതി മുതൽ ഇതൊരു സർക്കാർ സ്ക്കൂളായാണ് പ്രവർത്തിച്ചുവരുന്നത്. 2409-ാം നമ്പർ വിടുതൽ പത്രപ്രകാര മാണ് സ്ക്കൂൾ തിരുവിതാംകൂർ - കൊച്ചി സർക്കാരിന് വിട്ടുകൊടുത്തത്. കൊല്ലം ജില്ലയിലെ ഏറ്റവും പഴക്കം ചെന്ന വിദ്യാലയങ്ങളിലൊന്നാണ് പ്രാക്കുളം എൽ. പി. എസ്.

ശതാബ്ദി ആഘോഷം

• ശതാബ്ദി ആഘോഷ സ്മരണിക - സാഫല്യം 2003