പി.എസ്.വി.പി.എം.എച്ച്.എസ്.എസ്.ഐരവൺ, കോന്നി/അക്ഷരവൃക്ഷം/കൊറോണ എന്ന മഹാമാരി

കൊറോണ എന്ന മഹാമാരി ലോകമാകെ കോവി‍ഡ്19 എന്ന മഹാമാരിവ്യാപിച്ച് , വർഗ്ഗ ,വർണ്ണ വ്യത്യാസമില്ലാതെ മനുഷ്യകുലത്തെ ഒന്നാകെ കൊന്നൊടുക്കുന്ന ഒരു അവസ്ഥയിൽ എത്തി നിൽക്കുകയാണല്ലോ . വികസിത രാജ്യ‍ങ്ങളെന്നഹങ്കരിക്കുന്ന ലോക ഭൂപടത്തിലെ മുൻനിരക്കാരെന്ന് അവകാശപ്പെടുന്ന രാജ്യങ്ങളൊക്കെ തന്നെ ഈ രോഗത്തിനു മുന്നിൽ കീഴടങ്ങുന്ന കാഴ്ച്ചയാണ് നാം കാണുന്നത് . ഈ സാഹചര്യത്തിലാണ് നമ്മുടെ രാജ്യം വൈറസ്സിനെ നിതാന്ത ജാഗ്രതയോടെ നേരിട്ടു കൊണ്ടിരിക്കുന്നത് . രോഗ വ്യാപനത്തിൽ മറ്റു രാഷ്ട്രങ്ങളെക്കാൾ വളരെ പിന്നിലായിട്ടാണ് ഇന്ത്യ പോകുന്നത് . ലോകത്തിന്റെ ഭൂപടത്തിൽ സൂഷ്മ ദർശിനി കൊണ്ടുപോലും കണ്ടുപിടിക്കാനാവാത്ത നമ്മുടെ കൊച്ചു കേരളം കോവിഡിനെ പ്രതിരോധിക്കുന്നതിൽ ലോകത്തിനു മാതൃകയായി നിൽക്കുകയാണ് . “BREAK THE CHAIN” എന്ന ആശയത്തിലൂടെ നിരവധി മാർഗ്ഗങ്ങളാണ് നമ്മൾ സ്വീകരിച്ചുവരുന്നത് . അതുകൊണ്ടാണ് മരണങ്ങളും രോഗവ്യാപനവും ഏറ്റവും കുറവുള്ള സംസ്ഥാനമായി കേരളം മാറാനിടയായത് . ഒരു രാജ്യം ഏറ്റവും വലിയ പ്രതിസന്ധി നേരിടുമ്പോൾ മാത്രം ഏർപ്പെടുത്താറുള്ള ലോക്ഡൗൺ പോലെയുള്ള കർശനനിയന്ത്രണങ്ങൾ വലിയ അളവിൽ രോഗപ്രതിരോധത്തെ സഹായിച്ചുകൊണ്ടിരിക്കുകയാണ് . രാജ്യത്തെ ജനങ്ങൾ വല്ലാത്ത പ്രയാസങ്ങൾ അനുഭവിക്കുന്നുണ്ട് . പൊതുസമൂഹത്തിന്റെ മുഴുവനായ രക്ഷയ്ക്കുവേണ്ടിയുള്ള ത്യാഗമായി ഇതിനെ കണ്ടാൽ മതി. സംസ്ഥാനത്തു തന്നെ ഏറ്റവും മികച്ച പ്രതിരോധപ്രവർത്തനങ്ങളാണ് പത്തനംതിട്ട ജില്ലയിൽ നടക്കുന്നത്. സംസ്ഥാനത്ത് ഒന്നിലധികം ആളുകൾക്ക് കോവിഡ് ബാധിച്ചത് ഈ ജില്ലയിലായിരുന്നു . ഇറ്റലിയിൽ നിന്നു വന്ന ഒരു കുടുംബത്തിലെ 5 പേർക്കായിരുന്നു ജില്ലയിൽ ആദ്യമായി രോഗം സ്ഥിരികരിച്ചത് . കൂടുതൽ ആളുകൾക്ക് രോഗം പകരാതിരിക്കുന്നതിന് പത്തനംതിട്ട ജില്ലാ കളക്ടർ ശ്രീ.പി.ബി.നൂഹ് സാറിന്റെ നേതൃത്ത്വത്തിലുള്ള പ്രതിരോധ പ്രവർത്തനങ്ങൾ തുടർന്നുകൊണ്ടിരിക്കുന്നു . അതിൽ പ്രധാനപ്പെട്ട ഒന്നായിരുന്നു രോഗ ബാധിതരുടെ യാത്രാവഴി കണ്ടെത്തിയുള്ള കർശന നിരീക്ഷണം (റൂട്ട് മാപ്പ് തയ്യാറാക്കൽ ) . ജില്ലയിലെ കോവിഡ് പ്രതിരോധ പ്രവർത്തനങ്ങളെ വിദേശ മാധ്യമങ്ങൾ വരെ അഭിനന്ദിക്കുകയാണ്. ഈ മഹാമാരിയിൽ നിന്നും നമ്മുടെ നാടിനെ രക്ഷിക്കുന്നതിനു വേണ്ടി വിശ്രമരഹിതമായി പണിയെടുക്കുന്ന ആരോഗ്യപ്രവർത്തകരേയും , പോലീസുകാരേയും പ്രവർത്തനങ്ങൾ കൃത്യമായി ഏകോപിപ്പിക്കുന്ന ബഹു. മുഖ്യമന്ത്രിയേയും , ആരോഗ്യമന്ത്രിയേയും , മറ്റു മന്ത്രിമാരേയും കളക്ട‍ർമാരേയും , മറ്റു ഉദ്യോഗസ്ഥരേയും ഒക്കെ അനുമോദിക്കാൻ കൂടി ഈ അവസരം വിനിയോഗിക്കുകയാണ് . എത്രയും വേഗം ഈ മഹാമാരിയിൽ നിന്നും ലോകം മുക്തമാവട്ടെ എന്ന് ആത്മാർത്ഥമായി ഈശ്വരനോട് പ്രാർത്ഥിച്ചുകൊള്ളുന്നു . ദേവനന്ദന ടി 9 B പി.എസ്.വി.പി.എം.എച്ച്.എസ്.എസ്.ഐരവൺ, കോന്നി,പത്തനംതിട്ട കോന്നി ഉപജില്ല പത്തനംതിട്ട അക്ഷരവൃക്ഷം പദ്ധതി, 2020 ലേഖനം  സാങ്കേതിക പരിശോധന - pcsupriya തീയ്യതി: 17/ 04/ 2020 >> രചനാവിഭാഗം - കവിത