ജി യു പി എസ് ബാവലി/ചരിത്രം

സ്കൂൾ

സൗകര്യങ്ങൾ

പ്രവർത്തനങ്ങൾ

ക്ലബ്ബുകൾ

ചരിത്രം

അംഗീകാരം

ബാവലി പ്രദേശത്തെ ഒരേ ഒരു വിദ്യാലയം ആണ് ഗവണ്മെന്റ് യു പി സ്കൂൾ ബാവലി. 1976 ലാണ് ഈ വിദ്യാലയം സ്ഥാപിതമായതു. അതിനു ശേഷം 1980 ൽ അപ്ഗ്രേഡ് ചെയ്യുകയും ചെയ്തു. ഇന്ന് 10 അധ്യാപകർ ഉൾപ്പെടെ 15ഓളം ജീവനക്കാർ ഈ വിദ്യാലയത്തിൽ സേവനമനുഷ്ടിക്കുന്നു.ഇന്ന് 170 ഓളം വിദ്യാർത്ഥികളും ഈ വിദ്യാലയത്തിൽ പഠിക്കുന്നുണ്ട്. ഒന്നാം ക്ലാസ്സ്‌ മുതൽ ഏഴാം ക്ലാസ്സ്‌ വരെ ഈ വിദ്യാലയത്തിൽ അധ്യയനം നടക്കുന്നതു.കൂടാതെ പ്രീ പ്രൈമറിയും സ്കൂളിൽ പ്രവർത്തിക്കുന്നു.ഉൾപ്രദേശത്തു പ്രവർത്തിക്കുന്ന സ്കൂൾ എന്ന നിലയിൽ ഒട്ടേറെ പരിമിധികൾ ഉള്ള ഒരു സ്ഥാപനം ആയിരുന്നു ഇതു. എന്നാൽ ഇന്ന് സ്മാർട്ട്‌ ക്ലാസ്സ്‌ റൂമുകൾ ഉൾപ്പെടെ എല്ലാ സൗകര്യങ്ങളോടും കൂടി ഈ വിദ്യാലയം തല ഉയർത്തി നിൽക്കുന്നു.

വയനാട് ജില്ലയിൽ മാനന്തവാടി താലൂക്കിൽ തിരുനെല്ലി പഞ്ചായത്തിൽ കർണാടക അതിർത്തിയിൽ സ്ഥിതി ചെയ്യുന്ന ഗ്രാമ പ്രദേശമാണ് ബാവലി. മൂന്നു ഭാഗങ്ങളും വനത്താൽ ചുറ്റപെട്ട ഈ പ്രദേശം മാനന്തവാടിയിൽ നിന്നും 16 കിലോമീറ്റർ അകലെയാണ്. ഏകദേശം രണ്ടായിരത്തിൽ പരം ആളുകൾ ഈ ഗ്രാമത്തിൽ അധിവസിക്കുന്നു. ജനവൈവിധ്യം കൊണ്ട് ഏറെ ശ്രദ്ധേയമായ പ്രദേശം കൂടിയാണിത്. വില്ല്യം ലോഗന്റെ മലബാർ മാനുവൽ എന്ന പുസ്തകത്തിൽ ബാവലിയെ കുറിച്ച് പരാമർശിക്കുന്നുണ്ട്. പുഴയ്ക്കു കുറുകെയുള്ള പാലം കടന്നാൽ കർണാടകയാണ്. പരമ്പരാകതമായ കൃഷി രീതികൾ ഇന്നും പിന്തുടരുന്ന വയനാട്ടിലെ വേറിട്ട ഒരു പ്രദേശമാണിത്. രണ്ടു സംസ്ഥാനങ്ങളെ വേർതിരിക്കുന്ന മനോഹരിയായ ബവലിപുഴയും, ഇല പൊഴിയാത്ത ചൊല വനങ്ങളും , നെല്പാടങ്ങളും എല്ലാം ചേർന്ന് പ്രകൃതിഭംഗി കൊണ്ട് ആരെയും ആകർഷിക്കുന്ന മനോഹരമായ ഗ്രാമം കൂടിയാണ് ബാവലി.

ജി യു പി സ്കൂൾ ബാവലി.

സ്ഥലനാമ ചരിത്രം

ബാവലിയിൽ സ്ഥിതി ചെയ്യുന്ന ഒരു പ്രധാന മുസ്ലിം തീർതഥാടനകേന്ദ്രമാണ് ബാവലി മഖാം ശരീഫ്. 850 ഇൽ പരം വർഷങ്ങൾക്കുമുൻപ് പുരാവസ്തു നാണയങ്ങൾ അന്വേഷിച്ചും മുസ്ലിം മത പ്രബോധനത്തിനുവേണ്ടി വന്ന ഈ പ്രദേശത്തെ വ്യക്തി ആയിരുന്നു ബാവ അലി. അദ്ധേഹം പിന്നീട് ഈ പ്രദേശത്തു താമസിക്കുകയും മരണപ്പെടുകയും ചെയ്തു. അദ്ധേഹത്തെ ഖബർ അടക്കിയ സ്ഥലം പിന്നീട് ബാവലി മഖാം ശരീഫ് എന്നറിയപ്പെട്ടു. ബാവ അലി എന്ന പേരിൽ നിന്നാണ് ബാവലി എന്ന നാമം ഉണ്ടായതെന്ന് കരുതപ്പെടുന്നു.വളരെ അധികം പ്രത്യേകതയുള്ള ഒരു മുസ്ലിം പള്ളി കൂടിയാണ് ബാവലി മഖാം ശരീഫ്.

ചരിത്ര ശേഷിപ്പുകൾ

ബവലിയുടെ ചരിത്രത്തിലേക്ക് നോക്കുമ്പോൾ എടുത്തു പറയേണ്ട ഒന്നാണ് ബാവലി മഖാം ശരീഫ്. ചരിത്രത്തിൽ ഇടം നേടിയ ബാവലി മഖാം ഗ്രാമത്തിൽ തലയുയർത്തി നിൽക്കുന്നു. മറ്റു മുസ്ലിം പള്ളികളിൽ നിന്നും ഏറെ വ്യത്യസ്തമായ ആചാരങ്ങൾ ആണ് ഇവിടെയുള്ളത്.ഇല്ല മതസ്ഥർക്കും സ്ത്രീകൾക്കും ഈ പള്ളിയിൽ പ്രവേശിക്കാം. നിലവിളക്ക് കത്തിക്കുന്നത് ഇവിടുത്തെ പ്രത്യേകതയാണ്. ജാറം മൂടൽ ഇവിടുത്തെ പ്രധാനപെട്ട ഒരു ചടങ്ങാണ്.ബാവ അലിയുടെ മഖ് ബര വണങ്ങാൻ ഇപ്പോഴും തീർതഥാടകർ എത്തികൊണ്ടിരിക്കുന്നു. എല്ലാ വർഷവും നടക്കുന്ന ആണ്ടുനെര്ച്ചയിൽ പങ്കെടുക്കാൻ വയനാട്ടിലെ വിവിധ ഭാഗങ്ങളിൽ നിന്നും ആളുകൾ ഇവിടെ എത്തുന്നു. ഈ പള്ളിയുടെ ഒരു കിലോമീറ്റർ ചുറ്റളവിൽ ഗോവധ നിരോധനം ഉണ്ടെന്നുള്ളതും ഒരു സവിശേഷതയാണ്. ഏറെ കാലം ഈ ഗ്രാമത്തിൽ താമസിച്ച ബാവ അലി ജാതി ഭേദമന്യേ എല്ലാവര്ക്കും പ്രബോധനം നൽകിയെന്നും പറയപ്പെടുന്നു.

ടിപ്പു സുൽത്താന്റെ കാലത്ത് നിര്മിക്കപെട്ട പാലം ഇപ്പോഴും അതുപോലെ ബാക്കി നിൽക്കുന്നു. കേരളത്തെ കർണാടകയുമായി ബന്ധിപ്പിക്കുന്നത് ഈ പാലം ആണ്. 230 വർഷങ്ങൾക്കു മുൻപ് ടിപ്പു സുൽത്താൻ പണിതതാണ് ഈ പാലം എന്ന് പറയപ്പെടുന്നു. കരിങ്കല്ലും സുര്കി മിശ്രിതവും ഉപയോഗിച്ചാണ് ടിപ്പു സുൽത്താൻ കേരളത്തിലേക്കുള്ള പടയോട്ടത്തിനു ആയി ഈ പാലം കേട്ടിപൊക്കിയത്. ഇത്രയും വർഷങ്ങൾ പിന്നിട്ടിട്ടും ഈ പാലത്തിനു കാര്യമായ കേടുപാടുകൾ ഒന്നും സംഭവിച്ചിട്ടില്ല എന്ന് മാത്രമല്ല പുനർ നിർമാണവും നടന്നിട്ടില്ല. കരുത്തുറ്റ നിർമ്മിതികളിൽ ഒന്നായി ഈ പാലം വയനാടൻ ചരിത്രത്തിൽ ഇന്നും നിലകൊള്ളുന്നു. കേരളത്തിലെയും കർണാടകത്തിലെയും സംസ്കാരങ്ങളുടെ സാക്ഷി കൂടിയാണ് ഈ പാലം.

ബാവലി പ്രദേശം

ജന വൈവിധ്യം

സാമ്പത്തികമായിപിന്നോക്ക അവസ്ഥയിൽഉള്ള വിവിധ വിഭാഗത്തിൽപെട്ട ജനങ്ങൾ ബാവലി എന്ന പ്രദേശത്തു താമസിക്കുന്നു. ഗൌഡ, അടിയ, പണിയ, കുറിച്ച്യ, തേൻകുറുമർ, ചെട്ടിമാർ, മുസ്ലിം, ഈഴവ, ക്രിസ്ത്യൻ തുടങ്ങിയ ജന വൈവിധ്യം കൊണ്ട്ശ്രദ്ധേയമാണ് ബാവലി. തേൻകുറുമർ, കാട്ടുനയ്കർ എന്നി വിഭാഗങ്ങൾ ആയിരുന്നു ഒരു കാലത്ത്ഈ നാടിന്റെ അവകാശികൾ. വാല്മീകിയുടെ പിന്മുറക്കാരായാണ് ഗൌടന്മാരെ കരുതപ്പെടുന്നത്. ടിപ്പുസുൽത്താന്റെ ആക്രമണം ഭയന്നു ചിത്രദുർഗയിൽ നിന്ന് വളർത്തു മൃഗങ്ങളുടെ പുറത്തുകയറി രക്ഷപെട്ടു വന്നവരാണ് ഇവർ. ഓട് ഗൌഡ എന്നും ഇവർ അറിയപ്പെടുന്നു. ഉള്ളതെല്ലാം ഉപേക്ഷിച്ചു ജീവനും കൊണ്ട് ഓടി വന്നു ഇവർ ബാവലിയിൽ താമസിക്കുകയും കൃഷി കന്നുകാലി വളർത്തൽ എന്നിവ ഉപജീവനം ആയി സ്വീകരിക്കുകയും ചെയ്തു. എച്.ഡി. കോട്ടെ,തിരുനെല്ലി പഞ്ചായത്തിലെ കൊട്ടിയൂർ,മരക്കടവ്,പനവല്ലി, തുടങ്ങിയ മറ്റു പ്രദേശങ്ങളിലും താമസിക്കുന്നു. ബവളിയിലെ ശാണമംഗലം ആണ് ഇവരുടെ പ്രധാന ആവാസ സ്ഥലം. കന്നഡ കലർന്ന മലയാളം ആണ് ഇവരുടെ ഭാഷ.

കേരള കർണാടക അതിർത്തി പ്രദേശം ആയതുകൊണ്ടുതന്നെ ഒട്ടേറെ ഗുണങ്ങളും അതുപോലെ ദോഷങ്ങളും ഉണ്ട്.കാർഷിക വിളകളുടെ വിപണനത്തിലും ലഭ്യതക്കും ഏറെ അനുയോജ്യമായ സ്ഥലമാണ്.വയനാട്ടിൽ തന്നെ ഏറ്റവും കുറഞ്ഞ വിലക്ക് പച്ചക്കറികളും മറ്റും ലഭിക്കുന്ന സ്ഥലം കൂടിയാണിത്.റേഷൻ ലഭ്യത ഉൾപ്പെടെ പല അടിസ്ഥാന ആവശ്യങ്ങൾക്ക് പോലും കാട്ടിക്കുളം ടൌണിനെ ആശ്രയിക്കേണ്ടി വരുന്നു എന്നുള്ളത് ഇവിടുത്തെ വലിയ പരിമിധിയാണ്.ബാവലി പ്രദേശത്ത് താമസിക്കുന്ന നല്ലൊരു ശതമാനം ആളുകളും തൊഴിലിനായി ആശ്രയിക്കുന്നത് കർണാടകയിലെ കുടഗ് മേഖലെയാണ്.അതിർത്തി പ്രദേശം ആയതുകൊണ്ട് തന്നെ മദ്യം , മയക്കു മരുന്ന്, ലൈംഗിക ചൂഷണം,എന്നിവ വളരെ കൂടുതലുള്ള പ്രദേശം കൂടിയാണിത്.അതുകൊണ്ട് തന്നെ ഈ പ്രദേശത്ത് ഇത്രയേറെ വെല്ലുവിളികൾ നേരിട്ടു ജി യു പി സ്കൂൾ ബാവലി ഇന്നും തലയെടുപ്പോടെ നിലകൊള്ളുന്നു.