Schoolwiki സംരംഭത്തിൽ നിന്ന്
പൂമ്പാറ്റയും ചിറകും
മഴ പെയ്തു തോർന്നിട്ടു ഏതാനും മണിക്കൂറുകളേ ആയിട്ടുള്ളു. ഇലകളിലും ചെടികളിലും ഇപ്പോഴും വെള്ളം തങ്ങി നിൽപ്പുണ്ട്. നീലാകാശത്തിലൂടെ പക്ഷികൾ പറന്നു പൊങ്ങി. മരത്തിൽ ഇരുന്ന കിളികൾ ഒരേ രാഗത്തിൽ പാടി, പുഴ താളത്തിൽ ഒഴുകി. ചെറിയൊരു വീട്, വീടിന്റെ വാതിൽ തുറന്നു ഒരു സ്ത്രീ പുറത്തേക്കിറങ്ങി. അവൾ അമ്മുവിന്റെ അമ്മയാണ്. പേര് തുളസി. അവൾ വീട്ടുമുറ്റത്ത് കളിച്ചുകൊണ്ടിരുന്ന അമ്മുവിനെ വിളിച്ചു.
" അമ്മു..... അമ്മു....."
"ദാ വരുന്നു അമ്മേ" അമ്മു മറുപടി പറഞ്ഞു.
അവർ കുളിക്കടവിലേക്ക് നടന്നു. മേഘങ്ങൾക്കിടയിലൂടെ സൂര്യൻ എത്തിനോക്കി. അമ്മു ഓടരുത്,വീഴുമെന്ന് അമ്മ പിന്നിൽ നിന്ന് വിളിച്ചു പറഞ്ഞു. പക്ഷേ അമ്മു ഉണ്ടോ ഇതൊക്കെ കേൾക്കുന്നു. അവൾ പൂമ്പാറ്റയെ പിടിക്കാനായി പമ്മി പതുങ്ങി ചെന്നു. പെട്ടെന്ന് അവൾ എന്തോ ഓർത്തത് പോലെ നിന്നു, പെട്ടെന്ന് അവൾ അമ്മയുടെ അടുത്തേക്ക് ഓടി. അവൾ അമ്മയോട് ചോദിച്ചു.
അമ്മേ എങ്ങനെയാണ് ഈ പൂമ്പാറ്റയ്ക്ക് പറക്കാൻ സാധിക്കുന്നത്?
അവർ മാജിക് വല്ലതും പഠിച്ചിട്ടുണ്ടോ?
അപ്പോൾ അമ്മ പുഞ്ചിരിച്ചുകൊണ്ട് പറഞ്ഞു, അല്ല അമ്മു അവർക്ക് ചിറകു ഉള്ളതുകൊണ്ടാണ് പറക്കാൻ സാധിക്കുന്നത്. അല്ലാതെ അവർ മാജിക് കൊണ്ടൊന്നുമല്ല പറക്കുന്നത്. അപ്പോൾ ചിറകുണ്ടെങ്കിൽ എനിക്കു പറക്കാൻ പറ്റുമോ അമ്മു ചോദിച്ചു പിന്നെ തീർച്ചയായും ചിറകുണ്ടെങ്കിൽ എന്റെ അമ്മുക്കുട്ടിക്ക് പറക്കാൻ പറ്റും. അമ്മു വേഗം വാ.. നിന്നെ വേഗം കുളിപ്പിച്ചു കയറ്റാം. അമ്മ പറഞ്ഞു. ശരി അമ്മേ.... വീട്ടിലേക്ക് പോകും വഴി അമ്മു ആ ചിറകുകളെ കുറിച്ചാണ് ചിന്തിച്ചത്.
വൈകിട്ട് നാമം ജപിച്ചു കൊണ്ടിരിക്കുകയായിരുന്ന മുത്തശ്ശിയുടെ അടുത്ത് അവൾ ചെന്നു. അവൾക്ക് മുത്തശ്ശിയെ വലിയ ഇഷ്ടമാണ്. അവർക്ക് ഒരുപാട് കഥകൾ മുത്തശ്ശി പറഞ്ഞു കൊടുക്കും.
അവൾ മുത്തശ്ശിയോടു ചോദിച്ചു" മുത്തശ്ശി, ഈ ചിറക്, എവിടെ കിട്ടും?"
"അതിന് എത്ര രൂപയാകും എനിക്ക് വാങ്ങി തരുമോ?"
അതു കേട്ട മുത്തശ്ശി പൊട്ടിച്ചിരിച്ചുപോയി. അമ്മുവിന് ദേഷ്യം വന്നു. ഹും, അവൾ ചോദിച്ചു മുത്തശ്ശി എന്തിനാണ് ചിരിക്കുന്നത്. ഞാനിനി മുത്തശ്ശിയുടെ കൂടെ കൂടില്ല. അതുകേട്ട് മുത്തശ്ശി പറഞ്ഞു, എന്നോട് ക്ഷമിക്ക എന്റെ അമ്മുകുട്ടിയെ. സത്യം പറഞ്ഞാൽ ഈ ചിറക് കടയിൽ പോയി വാങ്ങാൻ പറ്റില്ല. കാരണം അത് ദൈവം നൽകുന്നതാണ്. മുത്തശ്ശി പറയാറില്ലേ ദൈവത്തോട് ചോദിച്ചാൽ നമുക്ക് എന്തുo നല്കും എന്ന്.
"ഞാൻ ദൈവത്തോട് ചിറകു ചോദിച്ചാൽ ദൈവം അതെനിക്ക് തരില്ലേ?"
"ഇല്ല".
മുത്തശ്ശി പറഞ്ഞു. അത് ഒരു വരദാനമാണ്. അതിപ്പോൾ പറഞ്ഞാൽ നിനക്ക് മനസ്സിലാവില്ല. പിന്നെ എപ്പോൾ പറഞ്ഞാല മനസ്സിലാക്കുക അമ്മു ചോദിച്ചു.അതിന് ഇനിയും സമയം കിടക്കുകയല്ലേ. സമയമാകുമ്പോൾ നിനക്ക് എല്ലാം മനസ്സിലാകും. സമയം ഒരുപാടായി എന്റെ പൊന്നു മകൾ പോയി കിടന്നു ഉറങ്ങിക്കോ. ശരി മുത്തശ്ശി എന്നുപറഞ്ഞ് അമ്മു മുറിക്കുള്ളിലേക്ക് ഓടിപ്പോയി. ഉറങ്ങാൻ കിടന്നപ്പോഴും അവൾ ചിറകുകളെ കുറിച്ചാണ് ഓർത്തത്. ഒരു പൂമ്പാറ്റയായി മറ്റു പൂമ്പാറ്റകളുടെ കൂടെ ഒത്തു പറന്നു കളിക്കുന്നതും സ്വപ്നം കണ്ടു അവൾ ആഴമായ നിദ്രയിലേക്ക് കടന്നു.
 സാങ്കേതിക പരിശോധന - pcsupriya തീയ്യതി: 28/ 05/ 2020 >> രചനാവിഭാഗം - കഥ
|
