"ജി.എഫ്.എൽ.പി.എസ്. പുതുപൊന്നാനി" എന്ന താളിന്റെ പതിപ്പുകൾ തമ്മിലുള്ള വ്യത്യാസം

കേരളത്തിലെ അറിയപ്പെടുന്ന ഒരു പുരാതന തുറമുഖ നഗരമാണ് പൊന്നാനി. എ.ഡി. ഒന്നാം നൂറ്റാണ്ടിൽ എഴുതപ്പെട്ട 'എരിത്രിയൻ കടലിലെ പെരിപ്ലസ്' (Periplus of the Erythraean Sea) എന്ന ഗ്രീക്ക് ഗ്രന്ഥത്തിൽ പരാമർശിക്കപ്പെടുന്ന 'തിണ്ടിസ്' എന്ന തുറമുഖ നഗരം പൊന്നാനിയാണെന്നതാണ് പ്രമുഖ ചരിത്രകാരന്മാരുടെ അഭിപ്രായം. മലപ്പുറം ജില്ലയിലെ ഒരേയൊരു തുറമുഖമായ പൊന്നാനി തുറമുഖത്തിന്റെ അത്രതന്നെ കാലപ്പഴക്കമുള്ളതാണ് പുതുപൊന്നാനി പുഴയോട് ചേർന്നുള്ള അഴിമുഖം. അറബ് - പേർഷ്യൻ നാടുകളിൽനിന്ന് ഇന്ത്യ, ശ്രീലങ്ക, ബംഗ്ലാദേശ് തുടങ്ങിയ രാജ്യങ്ങളിലേക്ക് കച്ചവട ആവശ്യത്തിനായി പായക്കപ്പലുകളിൽ യാത്ര ചെയ്യുമ്പോൾ വിദേശികൾ വിശ്രമത്തിനായി തിരഞ്ഞെടുത്തിരുന്നത് അഴിമുഖത്തിനോട് ചേർന്നുള്ള പുതുപൊന്നാനി, വെളിയങ്കോട് പ്രദേശങ്ങളിലായിരുന്നുവെന്ന് ചരിത്ര രേഖകകളിൽ പറയുന്നുണ്ട്. ഇന്ത്യയുടെ സ്വാതന്ത്ര്യസമര ചരിത്രത്തിൽ മലപ്പുറത്തിന്റെ സുവർണ ഏടുകളിൽ എഴുതപ്പെട്ട ഒരുനാടിന്റെ പേരുകൂടിയാണ് പുതുപൊന്നാനി. മലബാറിലെ സ്വാതന്ത്ര്യസമര പോരാട്ടങ്ങൾക്ക് ഊർജ്ജം നൽകിയ ഉലമാ സമ്മേളനത്തിന് വേദിയായത് പുതുപൊന്നാനിയിലാണ്.