ഗവൺമെൻറ്, മോഡൽ ഗേൾസ് എച്ച്.എസ്.എസ് പട്ടം/അക്ഷരവൃക്ഷം/ഓർമ്മയിലെ പുഞ്ചിരി

ഓർമ്മയിലെ പുഞ്ചിരി പടിഞ്ഞാറു തേ‍‍ടിപ്പോകും കതിരോൻ തലയ്ക്കുമീതെ കരുണയില്ലാതെ വാഴുമൊരുച്ചനേരം ദേവദൂതർ തൂവെള്ളത്തേരോടി വന്നൂ മുറ്റത്തപ്പോൾ സ്വർഗ്ഗരാജ്യവാതിൽ കൊട്ടിയടയ്ക്കുവാനായ്. വിജനവീഥികൾ താണ്ടിയെത്തീ ആശുപത്രിയൊന്നിൽ ഭയാശങ്കകൾ തണുപ്പിന്മേലേറിവന്നു സ്വപ്നജാലകത്തിലൂടെ വർത്തമാനം വീക്ഷിച്ചുകൊ- ണ്ടർദ്ധബോധാവസ്ഥയിൽ ‍‍ഞാനെങ്ങോ പായുന്നൂ. ഐസൊലേഷൻ വാർഡിലൊന്നിൽ കിടന്നുകൊണ്ടെൻ കണ്ണുകൾ അർദ്ധരാത്രി ബാല്യകാലം തേടിപ്പറന്നൂ. പനിച്ചു പൊരിയുമെന്റെ തിരുനെറ്റി തണുപ്പിക്കു- മമ്മതൻ പു‍ഞ്ചിരി തന്റെ സുഖമറിഞ്ഞു. ജാലകത്തിലൂടെൻ മേലേയ്ക്കലിവിൻ നൂലെറിഞ്ഞുകൊ- ണ്ടാദിത്യൻ വരവായ്... നേരം പുലരുകയായ്... ക്ഷീണിതനാമെന്നെ നോക്കിക്കളിയാക്കും കാറ്റിനെ ഞാ- നൊറ്റയ്ക്കിരുന്നുള്ളിന്നുള്ളിൽ പഴിപറഞ്ഞു. മൂടിപ്പുതച്ചെന്റെ മുറിയ്ക്കുള്ളിലെത്തും മനുഷ്യർതൻ കണ്ണുകളിലെൻ ഭാവി ഞാൻ വായിച്ചെടുത്തു. പേടിവേണ്ടെന്നോതുംനേരം കൂരിരുട്ടിൻ കാട്ടിൽ വഴികാട്ടികളെ കണ്ടെത്തുന്നൊരുവനെപ്പോൽ ഞാൻ സൂചിമുന കുത്തിമടങ്ങുമ്പോൾ മൊഴിയുന്ന കൊച്ചു- വാക്കുകളിൽ പോലും ഞാനാശ്വാസം കണ്ടെത്തി. സുഖം തേടിയലയുമ്പോൾ,ആഴികളിലുഴലുമ്പോൾ കൺമുന്നിലെ സ്വർഗ്ഗം കാണാമൂഢർ നാമെല്ലാം. രോഗശാന്തി നേടി ഞാനെൻ വീ‍‍‍‍ട്ടിലേയ്ക്കു മടങ്ങുമ്പോൾ യാത്രയയ്ക്കാനായവർ അണിനിരന്നു. മന്നിലെ മാലാഖമാർതൻ കനിവിൻ വദനങ്ങളിൽ അമ്മതൻ പുഞ്ചിരി ഇന്നു വീണ്ടും കണ്ടൂ ഞാൻ.                      ------------------------------------- വിസ്മയ.വി.എസ് 9 C ഗവ. മോഡൽ ഗേൾസ് എച്ച് എസ് എസ് പട്ടം തിരുവനന്തപുരം നോർത്ത് ഉപജില്ല തിരുവനന്തപുരം അക്ഷരവൃക്ഷം പദ്ധതി, 2020 കവിത  സാങ്കേതിക പരിശോധന - Sai K shanmugam തീയ്യതി: 23/ 04/ 2020 >> രചനാവിഭാഗം - കവിത