പി.എം.എസ്.എ.എം.യു.പി.എസ് നെല്ലിപ്പറമ്പ/നാടോടി വിജ്ഞാനകോശം

ഒളിച്ചു കളി

ഒരു കൂട്ടം കുട്ടികൾ ഒരുമിച്ചു കളിക്കുന്ന കളിയാണ്. അതിൽ ഒരാൾ കണ്ണടച്ച് ഒരു സംഖ്യവരെ എണ്ണുന്നു. ഈ സമയത്തിനുള്ളിൽ മറ്റുള്ളവർക്ക് ഒളിക്കാം. എണ്ണിത്തീരുന്നതനുസരിച്ച് എണ്ണിയാൾ മറ്റുള്ളവരെ കണ്ടെത്തണം. ആദ്യം കണ്ടെത്തപ്പെട്ടയാളാണ് തുടർന്ന് എണ്ണേണ്ടത്. എന്നാൽ ആരെയും കണ്ടെത്താനായില്ലങ്കിൽ എണ്ണിയ ആൾ വീണ്ടും എണ്ണണം

അക്കുത്തിക്കുത്താന

കുട്ടികൾ കൂട്ടം കൂടിയിരുന്ന് കൈ കമിഴ്ത്തിവച്ച് അക്കുത്തി..... എന്നു പറയുന്നു.ചൊല്ലി നിർത്തുന്നിടത്തെ കുട്ടി കൈ മലർത്തുന്നു .... അങ്ങനെ കൈയുടെ സ്ഥാനം മാറ്റാൻ കഴിയുന്ന കുട്ടി വിജയിയാകുന്നു ഇത് കൂടുതൽ കളിക്കുന്നത് കൊച്ചുകുട്ടികളാണ്

കൊത്തങ്കല്ല്

കേരളത്തിലെ പെൺകുട്ടികളുടെ ഒരു നാടൻ കളിയാണ് കൊത്തങ്കല്ല് അഥവാ കല്ലുകൊത്തിക്കളി. അഞ്ചോ ഏഴോ മണിക്കല്ല് നിലത്ത് ചിതറി ഇടും.അതിൽ ഒന്നെടുത്ത് മേലോട്ട് എറിയും നിലത്തുള്ള ഒരു കല്ല് മറ്റു കല്ലുകളിൽ തൊടാതെ എടുക്കണം. മുകളിലേക്ക് എറിഞ്ഞ കല്ല് തിരിച്ചുവീഴും മുമ്പ് അതു പിടിക്കുകയും വേണം. ഇതു രണ്ടും തെറ്റുകൂടാതെ ചെയ്യലാണു കളിയുടെ ഒന്നാം നില. കൊത്ത്, കോയിക്കൊത്ത്, കൊത്തലടക്ക, വെച്ചാലടപ്പം, വാരിപ്പിടുത്തം, തപ്പ്, താളം, മേളം എന്നിങ്ങനെ താളത്തിൽ പറഞ്ഞുകൊണ്ടാണു കല്ലു കൊത്തി എടുക്കുക. വിരൽകൊണ്ട് അതിവേഗത്തിലും തന്ത്രപരമായും കല്ല് എടുക്കുന്നതിനാലാണു കൊത്തിയെടുക്കുക എന്നു പറയുന്നത്. ഇപ്രകാരം എല്ലാ കല്ലുകളും കൊത്തിയെടുക്കണം. അതുകൊണ്ട് ഈ കളിയെ കൊത്തൻ കല്ല് കളി എന്നു വിളിക്കുന്നു.

ഈർക്കിൽ കളി

തെങ്ങിന്റെ ഈർക്കിലുകൾ ഉപയോഗിച്ച് കുട്ടികൾ കളിക്കുന്ന ഒരു നാടൻകളിയാണ് ഈർക്കിൽ കളി. നൂറാംകോൽ, റാണിയും മക്കളും എന്നീ പേരുകളിലും ചില പ്രദേശങ്ങളിൽ ഈ കളി അറിയപ്പെടുന്നു. രണ്ടോ അതിലധികമോ പേർ തറയിൽ ഇരുന്നാണ് കളിക്കുക.വളരെ സൂക്ഷ്മതയും ശ്രദ്ധയും ആവശ്യമായ ഈ കളി കാറ്റടിക്കാത്ത മുറിക്കകത്തും കോലായിലും വച്ചാണ് സാധാരണ കളിക്കുക.

കുട്ടിയും കോലും

നിലത്ത്‌ ഒരു ചെറിയ കുഴിയിൽ പുള്ള്‌/കുട്ടി വെച്ച്‌ കൊട്ടി/കോല് കൊണ്ട്‌ അതിനെ തോണ്ടി തെറുപ്പിച്ചാണ്‌ കളി തുടങ്ങുന്നത്‌. നിലത്തു തട്ടാതെ പുള്ളിനെ പിടിക്കുകയാണെങ്കിൽ കളിക്കാരൻ പുറത്താകും

സുന്ദരിക്ക് പൊട്ടു കുത്ത്

ഭിത്തിയിലോ ബോർഡിലോ ഒരു സുന്ദരിയുടെ ചിത്രം തൂക്കിയ സ്ഥലത്തു നിന്ന് ഒരു നിശ്ചിത അകലത്തിൽ കളിക്കാരനെ മാറ്റി നിർത്തി കണ്ണ് കറുത്ത തുണികൊണ്ട് കെട്ടുക. സ്റ്റിക്കർ പൊട്ട് ഒരു കൈയിൽ കൊടുക്കുക.  ബാക്കിയുള്ള കളിക്കാർ കൈകൊട്ടി പ്രോത്സാഹനം നൽകട്ടെ. യഥാർത്ഥ പൊട്ടിന്റെ സ്ഥാനത്തോ ഏകദേശം അടുത്തോ പൊട്ട് ഒട്ടിക്കുന്ന കളിക്കാരുടെ നമ്പർ വട്ടം വരച്ച് അടയാളപ്പെടുത്താം. അതിൽ ഏറ്റവും കൃത്യമായി പൊട്ട് ഒട്ടിച്ചയാൾ വിജയിയാകും

കോൽക്കളി

കോൽക്കളി കേരളത്തിലെ വിവിധ സമുദായക്കാരുടെ ഇടയിൽ പ്രചാരത്തിലുള്ള ഒരു നാടൻ വിനോദമാണ്. കോൽക്കളി, വന്ദനക്കളി, വട്ടക്കോൽ, ചുറ്റിക്കോൽ, തെറ്റിക്കോൽ, ഇരുന്നുകളി, തടുത്തുകളി, താളക്കളി, ചവിട്ടിച്ചുറ്റൽ, ചുറഞ്ഞു ചുറ്റൽ, ചിന്ത്, ഒളവും പറവും തുടങ്ങി അറുപതോളം ഇനങ്ങൾ കോൽക്കളിയിൽ ഉണ്ട്.

കാളപ്പൂട്ട്

കേരളത്തിൽ നെൽകൃഷിയുമായി ബന്ധപ്പെട്ട് നടക്കുന്നതാണ് കാളപ്പൂട്ട് .  ജനകീയമായ സാംസ്കാരികോത്സവമാണിത്. വിവിധ പ്രദേശങ്ങളിൽ നിന്നെത്തുന്ന കാളകൾ ഇതിൽ പങ്കെടുക്കുന്നു. അതിവിദഗ്ദ്ധരായ കാളക്കാരാണ് കാളകളെ നിയന്ത്രിക്കുന്നത്. ഉഴുതുമറിച്ച വയലുകളിലാണ് കാളപ്പൂട്ട് നടത്തുക. നുകം വച്ചു കെട്ടിയ രണ്ടു കാളകളും അവയെ നിയന്ത്രിക്കുന്ന മൂന്ന് ആളുകളും ചേർന്നതാണ് ഒരു സംഘം. പ്രത്യേകം പരിശീലിപ്പിച്ച കാളകളും വൈദഗ്ദ്ധ്യമുള്ള കാളക്കാരുമാണ് ഈ മത്സരത്തിൽ പങ്കെടുക്കുന്നത്.

ഒപ്പന

ഒപ്പന സമൂഹത്തിൽ നിലനിൽക്കുന്ന ജനകീയ കലാരൂപമാണ്. വിവാഹാഘോഷങ്ങളുടെ ഭാഗമായുള്ള സംഘനൃത്തമാണിത്. സാധാരണ ഗതിയിൽ സ്ത്രീകളാണ് ഒപ്പന അവതരിപ്പിക്കുന്നത്. എന്നാൽ പുരുഷന്മാരും ഈ നൃത്തം അവതരിപ്പിക്കാറുണ്ട്.  കോഴിക്കോട്, കണ്ണൂർ മലപ്പുറം തുടങ്ങി ഉത്തരകേരളത്തിലെ മുസ്ലീം വീടുകളിലാണ് ഒപ്പന പ്രധാനമായും നിലനിൽക്കുന്നത്.

വടംവലി

രണ്ട് സംഘങ്ങളുടെ ബലപരീക്ഷണം നേരിട്ട് നടത്തപ്പെടുന്ന ഒരു കായികവിനോദമാണ് വടംവലി എന്നറിയപ്പെടുന്നത്. ഈ പദം കൊണ്ട് എതിർകക്ഷികളുടെ മത്സരത്തെ സൂചിപ്പിക്കുന്നതിന് രൂപാലങ്കാരമായും ഉപയോഗിക്കാറുണ്ട്. വടംവലിമത്സരത്തിൽ രണ്ടു സംഘങ്ങൾക്കു പുറമേ വടം എന്നു വിളിക്കുന്ന കട്ടിയുള്ള കയറാണ് ഈ കളിയിലുള്ള മൂന്നാമത്തെ ഘടകം. കേരളത്തിൽ പല സ്ഥലങ്ങളിലും ഒരു വിനോദമായി വടം വലി നടത്താറുണ്ട്. ഓണത്തോടനുബന്ധിച്ച് നടത്തുന്ന മത്സരങ്ങളിൽ ഒരു പ്രധാന ഇനമാണ് ഇത്.

പ്രധാന നാടൻകളികൾ

അണ്ടികളി: രണ്ടിൽ കൂടുതൽ പേർക്ക് കളിക്കാം. ഒരു ചെറിയ കുഴിയിൽ ഓരോരുത്തരും  അണ്ടികളിടുന്നു.ഒരു നിശ്ചിത സ്ഥാനത്തു നിന്ന് ഏറണ്ടി കൊണ്ട് എറിഞ്ഞു കുഴിയിലെ അണ്ടിയെ തെറിപ്പിക്കുന്നു.

ചുള്ളിയും കോലും:രണ്ടിൽ കൂടുതൽ പേർക്ക് കളിക്കാം.ചുള്ളി ഒരു നിശ്ചിത സ്ഥാനത്തു നിന്ന് ദൂരത്തിൽ തട്ടിത്തെറിപ്പിക്കുക. അവിടെ നിന്ന് കോല് കൊണ്ട് അളന്നു എണ്ണം തിട്ടപ്പെടുത്തുക. കൂടുതൽ കോലളവു കിട്ടിയവർ വിജയി.

ഗെയിം കളി:ടീം ആയിട്ട് കളിക്കുന്ന കളിയാണിത്. പരന്ന കല്ലുകൾ അട്ടിയിൽ വെക്കുന്നു. ടീമിലെ ഒരാൾ ബോൾ പോലുള്ള വസ്തുകൊണ്ട് എറിഞ്ഞു തെറിപ്പിക്കുന്നു.തെറിച്ച വീണ കല്ല് അട്ടിക്ക് വെക്കുന്ന ടീം അംഗങ്ങളെ എതിർ ടീം അവർ എറിഞ്ഞ ബോൾ എടുത്തു എറിയുന്നു. ഏറു കൊണ്ടാൽ അടുത്ത ടീമിന് കളത്തിൽ ഇറങ്ങാം.

കോട്ടികളി:ആൺ കുട്ടികളാണ് ഇതിലെ പ്രധാനികൾ. വിവിധ തരത്തിൽ ഈ കളി കളിക്കാറുണ്ട്. മഴക്കാലത്താണ് കോട്ടി കളി കൂടുതലും കളിക്കാറുള്ളത്.

വള്ളിച്ചാട്ടം:പെൺകുട്ടികളുടെ ഇഷ്ട വിനോദമാണിത്.ചെടികളുടെ വള്ളി ഉപയോഗിച്ച് ഉയരത്തിൽ ചാടുക.ചാടുന്നതിനിടയിൽ വള്ളി കാലിനിടയിൽ കുടുങ്ങിയാൽ കളിയിൽ നിന്ന് പുറത്താകും.

കൊത്തംകല്ല്കളി :ചുരുങ്ങിയത് രണ്ടാളെങ്കിലും ഈ കളിക്ക് വേണം. ചെറിയകല്ലുകൾ വെച്ച്, കൈ കൊണ്ടുള്ള കളിയാണിത്. പെൺകുട്ടികളാണ് ഈ കളി കളിക്കാറുള്ളത്.

കക്കുകളി:രണ്ടിൽ കൂടുതൽ പേർക്കു കളിക്കാവുന്ന കളിയാണിത്.ഇതിന് ഒരു കളം ആവശ്യമാണ്.കൊക്കിച്ചാടിയാണ് ഈ കളി കളിക്കാറുള്ളത്. പെൺകുട്ടികൾ കളിക്കുന്ന ഒരു കളിയാണിത്.

ഒളിച്ചു കളി:ഗ്രൂപ്പായിട്ട് കളിക്കുന്ന കളിയാണിത്. കൂട്ടത്തിലെ ഒരാൾ കൈ വിരൽ മറ്റുള്ളവർ കാണാതെ പൊട്ടിക്കുന്നു. തുടർന്ന് പൊട്ടിച്ച വിരൽ പിടിച്ച ആൾ നൂറു വരെ എണ്ണണം. ഗ്രൂപ്പിലെ മറ്റുള്ളവർ ഒളിച്ചു നിൽക്കണം.എണ്ണുന്ന ആൾ ഒളിച്ചു നിൽക്കുന്ന വരെ കണ്ടെത്തി sat വിളിക്കുന്നതാണ് കളി.

കള്ളനും പോലീസും:ഗ്രൂപ്പായിട്ടാണ് കള്ളനും പോലീസും കളിക്കുന്നത്. പോലീസ്‌കാരൻ കള്ളൻ മ്മാരെ ഓടിച്ചിട്ട് പിടിക്കുന്നു. അങ്ങനെ ആദ്യം പിടിച്ച ആൾ പോലീസ്‌കാരൻ ആവുന്നു. മറ്റുള്ളവർ ഓടുന്നു.

തൊട്ടുകളി:ഗ്രൂപ്പായിട്ട് കളിക്കുന്ന കളിയാണ്. കൂട്ടത്തിലെ ഒരാളെ തൊടാൻ വേണ്ടി തിരഞ്ഞെടുക്കുന്നു. തൊടാൻ വരുമ്പോൾ മറ്റുള്ളവർ ഇരിക്കുന്നു. ഇരിക്കുന്നതിനു മുൻപ് തൊട്ടാൽ,അവർ തൊടാനാകുന്നു.