ജി.വി.എൽ.പി.എസ് ചിറ്റൂർ/പ്രവർത്തനങ്ങൾ/2018-19
വിദ്യാലയത്തിൽ നടപ്പിലാക്കിയ പ്രവർത്തനങ്ങളും ദിനാചരണങ്ങളും
ജൂൺ
ജൂൺ ഒന്നിന് പ്രവേശനോത്സവം ആഘോഷിച്ചു.കുട്ടികളെ അക്ഷര കിരീടങ്ങൾ അണിയിച്ചു.സമ്മാനക്കിറ്റുകൾ പിടിഎ വിതരണം ചെയ്തു.പ്രവേശനോത്സവഗാനം എല്ലാവരെയും കേൾപ്പിച്ചു. വിദ്യാഭ്യാസമന്ത്രിയുടെ പ്രതിജ്ഞ എല്ലാവരും ഏറ്റുചൊല്ലി.യൂണിഫോം,പുസ്തകം എന്നിവയുടെ വിതരണ ഉദ്ഘാടനം നടന്നു.കുട്ടികളുടെ മികവുത്സവം നടത്തി.കൗൺസിലർ ശ്രീ.ശിവകുമാർ സാർ,പിടിഎ അംഗങ്ങൾ എന്നിവർ പ്രസംഗിച്ചു.കുട്ടികൾക്ക് ലഡു വിതരണം ചെയ്തു.
ലോകപരിസ്ഥിതിദിനത്തിൽ പരിസ്ഥിതി ദിന സന്ദേശവും പ്രതിജ്ഞയും ചൊല്ലി.കുട്ടികൾ പതിപ്പുകൾ പ്രദർശിപ്പിച്ചു.ഹെഡ്മിസ്ട്രസ് ശ്രീമതി ഷൈലജ ടീച്ചർ ലോകപരിസ്ഥിതി ദിനം കൊണ്ടാടുന്നതിൻറെ പ്രത്യേകതയെക്കുറിച്ചും,പ്രാധാന്യത്തെക്കുറിച്ചും കുട്ടികൾക്ക് പറഞ്ഞുകൊടുത്തു.പ്ലാസ്റ്റിക് വസ്തുക്കളുടെ ഉപയോഗം കുറയ്ക്കാൻ എല്ലാവരോടും ആവശ്യപ്പെട്ടു.കുട്ടികൾ പരിസ്ഥിതി ഗാനങ്ങളും,ലേഖനങ്ങളും,പോസ്റ്ററുകളും അവതരിപ്പിച്ചു.പരിസ്ഥിതി ദിന റാലി,പ്ലക്കാർഡ്,ബാഡ്ജ് നിർമ്മാണം എന്നിവ നടന്നു.കൗൺസിലർ ശ്രീ സ്വാമിനാഥൻ ചെടികൾ നട്ട് പരിസ്ഥിതി ദിനം ഉദ്ഘാടനം ചെയ്തു.കുട്ടികൾക്ക് വൃക്ഷത്തൈകൾ വിതരണം ചെയ്തു.
ഉള്ളൂർ ജന്മദിനത്തിൽ ഉള്ളൂർ കവിതകൾ കുട്ടികൾക്ക് പരിചയപ്പെടുത്തി.
ജൂൺ 11ന് പുതിയ കുട്ടികൾക്ക് പ്രീ ടെസ്റ്റ് നടത്തി.
ജൂൺ12 മുതൽ ജൂൺ 20 വരെ ഹലോ ഇംഗ്ലീഷ് ക്ലാസ് 5 ദിവസത്തേക്ക് രണ്ടു മണിക്കൂർ സമയമെടുത്ത് എല്ലാ ക്ലാസുകളിലും നടത്തി.
ജൂൺ 18 അയ്യങ്കാളി ചരമദിനത്തിൽ സാമൂഹ്യ പരിഷ്കർത്താവായ അയ്യങ്കാളിയെ പരിചയപ്പെടുത്തി.അദ്ദേഹത്തിൻറെ സേവനങ്ങൾ വിലയിരുത്തി.
ജൂൺ 19 പി.എൻ പണിക്കർ ചരമദിനം വായനാദിനമായി ആചരിച്ചു.വായനാദിന ക്വിസ് മത്സരം നടത്തി.അസംബ്ലിയിൽ ഹെഡ്മിസ്ട്രസ് ശ്രീമതി ഷൈലജ ടീച്ചറുടെ സാനിധ്യത്തിൽ കുട്ടികൾ കവിതകൾ,കഥകൾ,പി.എന് പണിക്കരെക്കുറിച്ചുള്ള ലേഖനം എന്നിവ അവതരിപ്പിച്ചു.ഹെഡ്മിസ്ട്രസ് എല്ലാവർക്കും വായന ദിനത്തിൻറെ പ്രത്യേകത വിശദീകരിച്ചുകൊടുത്തു.ക്ലാസ് ലൈബ്രറിയും,സ്കൂൾ ലൈബ്രറിയും പ്രയോജനപ്പെടുത്തി വായന പതിപ്പുകൾ എഴുതാൻ കുട്ടികൾക്ക് നിർദ്ദേശം നൽകി.വായന പ്രദർശനം നടത്തി.ഒരാഴ്ച വായനാവാരം ആഘോഷിച്ചു.ക്ലബ് ഉദ്ഘാടനവും വായനാവാര ത്തിൻറെ സമാപനവും ഒരുമിച്ച് നടത്തി.
ജൂൺ 21ന് യോഗാദിനം ആചരിച്ചു.ശ്രീമതി കൃഷ്ണമ്മാൾ ടീച്ചർ യോഗ ക്ലാസ് എടുത്തു വിശ്വ യോഗാദിനം ഉദ്ഘാടനം ചെയ്തു.കുട്ടികൾക്ക് അന്നുമുതൽ യോഗ ക്ലാസ് തുടങ്ങി. ജീവിതത്തിൽ യോഗക്കുള്ളപ്രാധാന്യം ടീച്ചർ എല്ലാവർക്കും പറഞ്ഞു കൊടുത്തു.
ജൂൺ 22ന് ഹലോ ഇംഗ്ലീഷ് ഉൽഘാടനം നടത്തി.ഹലോ ഇംഗ്ലീഷിന്റെ ഒരുവർഷത്തെ പരിപാടികളുടെ ഉദ്ഘാടനം ശ്രീമതി ടീച്ചർ നിർവ്വഹിച്ചു.ശ്രീമതി ജീന ടീച്ചർ സന്നിഹിതരായിരുന്നു.ഒന്നാം ക്ലാസ് മുതലുള്ള ഞാൻ കുട്ടികളും ഇംഗ്ലീഷിൽ സ്കിറ്റ്,പാട്ട്,ആക്ഷൻ സോങ്,കഥകൾ,പ്രസംഗം തുടങ്ങിയ വിവിധ പരിപാടികൾ ഗംഭീരമായി അവതരിപ്പിച്ചു.ശ്രീമതി സുപ്രഭ ടീച്ചർ നേതൃത്വം വഹിക്കുന്ന ഇംഗ്ലീഷ് ക്ലബ്ബിൻറെ ഉദ്ഘാടനവും അന്നേ ദിവസം നടന്നു.ഇംഗ്ലീഷ് ക്ലബ്ബ് കാര്യക്ഷമമായി മുന്നോട്ടു കൊണ്ടുപോകാൻ എല്ലാ അധ്യാപകരും തീരുമാനിച്ചു.
ജൂൺ 26 ലോക മയക്കുമരുന്ന് വിരുദ്ധദിനത്തിൽ മയക്കുമരുന്ന് വിരുദ്ധ പ്രതിജ്ഞ എല്ലാവരും എടുത്തു.മയക്കുമരുന്ന് കഴിച്ചാലുള്ള പ്രശ്നങ്ങളെക്കുറിച്ചുള്ള ബോധവൽക്കരണം അസംബ്ലിയിൽ നടന്നു.ഹെഡ്മിസ്ട്രസ് ശ്രീമതി ഷൈലജ ടീച്ചർ കുട്ടികളോട് പരിചയമില്ലാത്തവർ തരുന്ന മിട്ടായികളും,മധുരപലഹാരങ്ങളും വാങ്ങി കഴിക്കരുതെന്ന് മുന്നറിയിപ്പ് നൽകിക്കൊണ്ട് കുട്ടികളെ ബോധവൽക്കരിച്ചു.
ജൂലൈ
ജൂലൈ 1 ഡോക്ടർ ചാന്ദ്ര റോയുടെ ജന്മദിനം ചരമദിനവും ആരോഗ്യം എന്നാൽ ജീവിതശൈലി കൂടിയാണ് എന്ന സന്ദേശം കുട്ടികൾക്ക് നൽകി.സിഡി പ്രദർശനവും നടത്തി.
ജൂലൈ 3ന് ശ്രീ തുഞ്ചൻ ഗുരുമഠം സന്ദർശിച്ചു.നാലാം ക്ലാസ് കുട്ടികളാണ് പോയത്.മഠത്തിലെ സ്വാമിജി കുട്ടികൾക്ക് തുഞ്ചൻ ഗുരുമഠത്തിന്റെ പ്രാധാന്യം പറഞ്ഞുകൊടുത്തു.ഏതാനും കുട്ടികൾ രാമായണം വായിച്ചു.
ജൂലൈ 5ന് ബഷീർ ചരമദിനം അനുസ്മരണവും മലയാളം ക്ലബ് ഉദ്ഘാടനം വായനാ പക്ഷാചരണം സമാപനം എന്നിവയും നടന്നു.ശ്രീ ശേഖരിപുരം മാധവൻ പരിപാടി ഉദ്ഘാടനം ചെയ്തു. ഒന്നാം ക്ലാസിലെ അനസ്തൂപ്,അനർഘയ എന്നീ കുട്ടികളുടെ പിതാവ് ശ്രീ എയിഞ്ചൽ ബാബു വരച്ചു നൽകിയ ബഷീർ ചിത്രം പ്രകാശനം ചെയ്തു.ശ്രീ ശേഖരിപുരം മാധവൻ കുട്ടികൾക്ക് നാടൻപാട്ടുകളും കുട്ടിക്കവിതകളും ചൊല്ലിക്കൊടുത്തു.ശ്രീമതി ഗിരിജ കുട്ടികൾക്ക് നാടൻപാട്ടു് പാടിക്കൊടുത്തു.കുട്ടികൾ ബഷീർ കൃതികളായ ഭൂമിയുടെ അവകാശികൾ,പാത്തുമ്മയുടെ ആട് എന്നിവയുടെ ഭാഗങ്ങൾ സ്കിറ്റായി അവതരിപ്പിച്ചു.ബഷീർ കൃതികൾ അവതരിപ്പിച്ചു. വായനകുറിപ്പുകൾ അവതരിപ്പിച്ചു.എല്ലാ ക്ലാസിലെയും കുട്ടികൾ പതിപ്പുകൾ തയ്യാറാക്കിയിരുന്നു.അവ പ്രദർശിപ്പിച്ചു.രമണൻ നൃത്തശില്പം ആയി അവതരിപ്പിച്ചു.തമിഴ് കട്ടകൾ നാട്ടുപ്പുറ നടനം,തിരുക്കുറൾ,ഗ്രൂപ്പ് സോങ് എന്നിവ അവതരിപ്പിച്ചു.
ജൂലൈ 21 ചാന്ദ്രദിനം അവധി ദിവസമായതിനാൽ ചാന്ദ്രദിനവുമായി ബന്ധപ്പെട്ട പരിപാടികൾ ജൂലൈ 20ന് നടത്തി.ശാസ്ത്ര സാഹിത്യ പരിഷത്ത് പ്രവർത്തകൻ ശ്രീ പ്രസാദ് പരിപാടി ഉദ്ഘാടനം ചെയ്തു.ശാസ്ത്ര ക്ലബ്ബിൻറെ ഉദ്ഘാടനവും അന്ന് നടന്നു.ശ്രീ പ്രസാദ് ചന്ദ്രനെ കുറിച്ചും,ഗ്രഹങ്ങളെക്കുറിച്ചും,വേലിയേറ്റം,വേലിയിറക്കം,ചന്ദ്ര ഗ്രഹണം,സൂര്യഗ്രഹണം എന്നിവയെ കുറിച്ചും ലളിതമായ ഭാഷയിൽ കുട്ടികൾക്ക് പറഞ്ഞുകൊടുത്തു.ജൂലൈ 27ന് ദൃശ്യമാകുന്ന ചന്ദ്രഗ്രഹണം കാണാൻ മറക്കരുത് എന്ന് അദ്ദേഹം കുട്ടികളെ ഓർമിപ്പിച്ചു.തുടർന്ന് കുട്ടികൾ തയ്യാറാക്കിയ കൊണ്ടുവന്ന റോക്കറ്റിന്റെ മാതൃക പ്രദർശിപ്പിച്ചു.കുട്ടികൾ ആംസ്ട്രോങ്ങ്,എഡ്വിൻ ആൽഡ്രിൻ,മൈക്കിൾ കോളിൻസ് എന്നിവരായി വേഷം കെട്ടി.മറ്റു കുട്ടികൾ അവരോട് ചന്ദ്ര യാത്രയുടെ വിശേഷങ്ങൾ ചോദിച്ചറിഞ്ഞു.എല്ലാ കുട്ടികളും അവർ തയ്യാറാക്കി വന്ന പതിപ്പുകൾ പ്രദർശിപ്പിച്ചു.രണ്ടാം ക്ലാസുകാർ പപ്പറ്റ്സ് അവതരിപ്പിച്ചു.ഒന്നാം ക്ലാസുകാർ അമ്പിളിമാമന്റെയും നക്ഷത്രങ്ങളുടെയും പാട്ടുപാടി നൃത്തം ചെയ്തു.തമിഴ് ക്ലാസിലെ കുട്ടികൾ ഗ്രഹങ്ങളെക്കുറിച്ചുള്ള ഒരു നൃത്തം അവതരിപ്പിച്ചു.തുടർന്ന് സിഡി പ്രദർശനം നടത്തി.
എപിജെ അബ്ദുൽ കലാമിനെ കുറിച്ചുള്ള ലഘു വിവരണം (ശബ്ദരേഖ)അസംബ്ലിയിൽ കേൾപ്പിച്ചു.ഒന്നാം ക്ലാസിലെ കുട്ടികളായ അനർഘയ,അനസ്തൂപ് എന്നിവരുടെ അച്ഛൻ വരച്ച് നൽകിയ എപിജെ യുടെ ചിത്രം പ്രദർശിപ്പിച്ചു.എപിജെ യുടെ ജീവചരിത്രം ഐസിടി സഹായത്തോടെ ക്ലാസ്സുകളിൽ പ്രദർശിപ്പിച്ചു.
2018 ജൂലൈ 31 ചൊവ്വാഴ്ച ഉച്ചയ്ക്ക് 1:30 ന് ഈ വർഷത്തെ പി ടി എ ജനറൽബോഡി നടന്നു.150 രക്ഷിതാക്കൾ പങ്കെടുത്തു.കൗൺസിലർ ശ്രീമതി പ്രിയ ജനറൽബോഡി ഉദ്ഘാടനം ചെയ്തു.പി ടി എ പ്രസിഡൻറ് അധ്യക്ഷസ്ഥാനം വഹിച്ചു.പ്രധാന അധ്യാപിക ശ്രീമതി ഷൈലജ എൻ.കെ സ്വാഗതം പറഞ്ഞു.റിപ്പോർട്ട് അവതരിപ്പിക്കുകയും ചെയ്തു.വരവ് ചെലവ് കണക്ക് അവതരണത്തിനു ശേഷം ഈ വർഷത്തെ ജനറൽബോഡി തെരഞ്ഞെടുപ്പ് നടന്നു.ശ്രീ.കെ.പി.രഞ്ജിത്ത് പിടിഎ പ്രസിഡണ്ടായും,ശ്രീ സ്വാമിനാഥൻ വൈസ് പ്രസിഡണ്ടായും തെരഞ്ഞെടുക്കപ്പെട്ടു. മദർ പിടിഎ പ്രസിഡണ്ടായി ശ്രീമതി ഷീബയും,വൈസ് പ്രസിഡണ്ടായി ശ്രീമതി രശ്മിയെയും തെരഞ്ഞെടുത്തു.
ഓഗസ്റ്റ്
ഓഗസ്റ്റ് 6 ഹിറോഷിമ ദിനം വിപുലമായി ആചരിച്ചു.യുദ്ധത്തിൻറെ ഭീകരതയെക്കുറിച്ച് കുട്ടികളെ ബോധവാന്മാരാക്കാൻ ശ്രീമതി സുപ്രഭ ടീച്ചർ ഒരു ക്ലാസ് എടുത്തു.വിദ്യാർത്ഥികൾ അവർ തയാറാക്കിയ ബാഡ്ജുകളും ധരിച്ചാണ് എത്തിയത്.പ്ലക്കാർഡുകളും തയ്യാറാക്കിയിരുന്നു.പ്ലക്കാർഡ് പിടിച്ചുകൊണ്ട് എല്ലാ ക്ലാസിലെ കുട്ടികളും ഉൾപ്പെടുന്ന യുദ്ധവിരുദ്ധ റാലി നടത്തി."യുദ്ധം വേണ്ട യുദ്ധം വേണ്ട ഇനിയൊരു യുദ്ധം വേണ്ടേ വേണ്ട" എന്ന മുദ്രാവാക്യവുമായിട്ടാണ് റാലി നടത്തിയത്.പതിപ്പുകളും ചിത്രങ്ങളും തയ്യാറാക്കി.CD പ്രദർശനം നടത്തി യുദ്ധത്തിൻറെ ഭീകരത വിഷ്വലൈസ് ചെയ്തപ്പോൾ കുട്ടികൾക്ക് അത് കൂടുതൽ ഹൃദയസ്പർശിയായിമാറി.ഒരു യുദ്ധമുണ്ടായാൽ അത് വരുത്തിവയ്ക്കുന്ന ദുരിതങ്ങളെക്കുറിച്ച് കുട്ടികൾ ബോധവാന്മാരായി.
ആഗസ്റ്റ് 15 സ്വാതന്ത്ര്യ ദിനം എല്ലാ വർഷത്തെയും പോലെ വിപുലമായി ആഘോഷിക്കാൻ ഈ വർഷം കഴിഞ്ഞില്ല.കനത്ത മഴയായതുകൊണ്ട് കുട്ടികൾ വളരെ കുറവായിരുന്നു.എന്നാലും വന്ന കുട്ടികളെക്കൊണ്ട് നല്ല രീതിയിൽ ആഘോഷിച്ചു.നമ്മുടെ പിടിഎ പ്രസിഡണ്ട് ശ്രീ രഞ്ജിത്ത് പതാക ഉയർത്തി.പ്രധാന അധ്യാപികയും മറ്റ് അധ്യാപികമാരും സ്വാതന്ത്ര്യ ദിനത്തെക്കുറിച്ചും,സ്വാതന്ത്ര്യദിന ആശംസകളും കുട്ടികൾക്ക് അറിയിച്ചു.ദേശഭക്തിഗാനം,പ്രച്ഛന്ന വേഷം,പ്രസംഗം എന്നീ കലാപരിപാടികൾ കുട്ടികൾ അവതരിപ്പിച്ചു.അതിനുശേഷം എല്ലാവർക്കും മധുരപലഹാരങ്ങൾ വിതരണം ചെയ്തു.
സെപ്റ്റംബർ
കുട്ടികളിൽ ജനാധിപത്യ മൂല്യം വളർത്തിയെടുക്കാനും,തിരഞ്ഞെടുപ്പ് എങ്ങനെയെന്ന് മനസ്സിലാക്കാനും വേണ്ടിയാണ് സ്കൂൾ പാർലമെൻറ് തെരഞ്ഞെടുപ്പ് ഓരോ വിദ്യാലയത്തിലും നടത്തുന്നത്.എല്ലാവർഷവും പോലെയല്ലാതെ ഈ വർഷം തികച്ചും വ്യത്യസ്തമായ ഐസിടി സാധ്യത യോടെയാണ് ഞങ്ങൾ ഈ പ്രവർത്തനം നടത്തിയത്.ക്ലാസുകളിൽനിന്ന് ആദ്യം ക്ലാസ് ലീഡർമാരെ തെരഞ്ഞെടുത്തു.ഒന്നാം സ്ഥാനം രണ്ടാം സ്ഥാനം നേടിയ രണ്ടുപേർ 4A,4B,4C എന്നീ മൂന്ന് ഡിവിഷനിലെ ലീഡർമാർ നോമിനേഷൻ നൽകി.അവർ തന്നെ അവർക്കിഷ്ടമുള്ള ചിഹ്നം തെരഞ്ഞെടുത്തു.ഇലക്ഷൻ പ്രചരണത്തിന് ഒരാഴ്ച സമയം കൊടുത്തു.
മത്സരാർത്ഥികൾ
| മത്സരാർത്ഥികളുടെ പേര് | ക്ലാസും ഡിവിഷനും | ചിഹ്നങ്ങൾ |
|---|---|---|
| വരിഷ്ട് എസ് | 4 B | ആപ്പിൾ |
| ശരൺജിത്ത് എസ് | 4 A | സ്ട്രോബറി |
| ശ്രീയ എസ് | 4 B | മാങ്ങ |
| മീര എസ് | 4 C | ചക്ക |
| ശിവാഗിനി എസ് | 4 C | പഴം |
| അശ്വതി എസ് | 4 A | പൈനാപ്പിൾ |
സെപ്റ്റംബർ അഞ്ചിന് രാവിലെ 4 പോളിംഗ് ബൂത്തുകൾ നാലു ക്ലാസ്സുകളിലായി സജ്ജീകരിച്ചു.പ്രിസൈഡിങ് ഓഫീസർമാരും പോളിംഗ് ഓഫീസർമാരും കുട്ടികൾ തന്നെയാണ്.രാവിലെ കൃത്യം 10 30 ന് തന്നെ ഇലക്ഷൻ ആരംഭിച്ചു.ഇലക്ട്രോണിക് വോട്ടിംഗ് മെഷീൻ സജ്ജീകരിച്ചത് മൊബൈലുകളിൽ ആയിരുന്നു.കുട്ടികൾക്ക് ഇതൊരു പുതിയ അനുഭവമായിരുന്നു.എല്ലാ കുട്ടികളും വളരെ സന്തോഷത്തോടെയും,അത്ഭുതത്തോടെയും,ആഹ്ലാദത്തോടെയും ഇലക്ട്രോണിക് വോട്ട് രേഖപ്പെടുത്തി.കൈവിരലിൽ മഷി കൂടി വെച്ചത് ഒന്നാം ക്ലാസിലെകുട്ടികൾക്ക് പുതിയൊരു അനുഭവമായിരുന്നു.ഇലക്ട്രോണിക് വോട്ട് ആയതുകൊണ്ട് വോട്ടെണ്ണൽ വളരെ വളരെ എളുപ്പമായിരുന്നു.ഇലക്ഷനു ശേഷം റിസൽട്ട് അന്നുതന്നെ പ്രഖ്യാപിച്ചു.
റിസൽട്ട്
| മത്സരാർത്ഥികളുടെ പേര് | ക്ലാസും ഡിവിഷനും | ലഭിച്ച വോട്ടുകളുടെ എണ്ണം |
|---|---|---|
| ശരൺജിത്ത് എസ് | 4 A | 99 |
| വരിഷ്ട് എസ് | 4 B | 86 |
| അശ്വതി ജെ | 4 A | 38 |
| ശ്രീയ എസ് | 4 B | 35 |
| മീര എസ് | 4 C | 19 |
| ശിവാഗിനി എസ് | 4 C | 13 |
ശരൺജിത്ത് സ്കൂൾ ലീഡറായും, വരിഷ്ട് ഒ എസ് സെക്കൻഡ് ലീഡറായും പ്രഖ്യാപിച്ചു.
* സ്കൂൾ പാർലമെൻറ് തെരഞ്ഞെടുപ്പ്
സെപ്റ്റംബർ 8, ലോക സാക്ഷരതാ ദിനത്തിൽ വിവിധതരം പതിപ്പുകൾ തയ്യാറാക്കൽ വായന, കഥപറയൽ തുടങ്ങിയ പ്രവർത്തനങ്ങൾ നടത്തി. എല്ലാം ക്ലാസ്സിലെ കുട്ടികളും പങ്കെടുത്തു. തുടർന്ന് കുട്ടികൾക്ക് സിഡി പ്രദർശനം നടത്തി. എല്ലാവരും വളരെ ആസ്വദിച്ച് കണ്ടു.
എല്ലാവർഷവും നമ്മുടെ സ്കൂളിൽ ഓണസദ്യ വളരെ വിപുലമായി ഒരുക്കാറുണ്ട്. പ്രളയം കാരണം ഇത്തവണ ഓണസദ്യ വേണ്ടെന്നുവച്ചു. കുട്ടികളുടെ താൽപര്യമനുസരിച്ചും നാലാം ക്ലാസ്സിലെ മലയാള പാഠഭാഗവുമായി ബന്ധപ്പെട്ടും സെപ്റ്റംബർ 26ന് ഒരു ചെറിയ സദ്യ സംഘടിപ്പിച്ചു. എല്ലാ വിദ്യാർത്ഥികളുടെ പങ്കാളിത്തത്തോടെയാണ് ഇത് നടന്നത്. എല്ലാ കുട്ടികളും ഓരോ വിഭവങ്ങൾ വീട്ടിൽ നിന്നും ഉണ്ടാക്കി കൊണ്ടുവന്നു. അധ്യാപകരും ഇതിൽ പങ്കു ചേർന്നു. അങ്ങനെ സമൃദ്ധമായ ഒരു സദ്യ തന്നെ ഒരുക്കി. കൂട്ടുകറി, അവിയൽ, മസാൽ, പച്ചടി, കിച്ചടി, തോരൻ, ഇഞ്ചിപ്പുളി, അച്ചാർ, കാളൻ, ഓലൻ, രസം, സാമ്പാർ, മോര്, പപ്പടം, പഴം, അടപ്രഥമൻ, പാൽപ്പായസം തുടങ്ങിയ നിരവധി വിഭവങ്ങൾ സദ്യയെ വളരെ ആഘോഷപൂർണമാക്കി മാറ്റി. വളരെ സന്തോഷത്തോടുകൂടിയാണ് കുട്ടികൾ ഇതിൽ പൂർണമായും പങ്കാളികളായത്. എല്ലാ കുട്ടികളുടെ ഒത്തൊരുമയും, സഹകരണ മനോഭാവവും കൊണ്ട് മാത്രമാണ് ഈ ചെറിയ സദ്യയെ ഇത്രയും വിജയകരമാക്കാൻ സാധിച്ചത്.
സെപ്റ്റംബർ 27ന് ക്ലാസ് പി.ടി.എ നടത്തി. ക്ലാസ് പരീക്ഷയുടെ അവലോകനവും, കുട്ടികളുടെ നിലവാരവും ചർച്ചചെയ്തു. കുട്ടികളുടെ പ്രശ്നങ്ങൾ, ശുചിത്വം, നല്ലശീലങ്ങൾ ഇവയെക്കുറിച്ച് ബോധവൽക്കരണം നടത്തി. രക്ഷിതാക്കളിൽനിന്ന് ഒരു ലീഡറെ തെരഞ്ഞെടുത്തു. തുടർന്ന് കുട്ടികളെ എങ്ങനെ പഠനപ്രവർത്തനങ്ങളിൽ വീട്ടിൽ സഹായിക്കാം എന്നുള്ളതും ചർച്ചയായി. ഈ അധ്യയന വർഷത്തിൽ എന്തെല്ലാം പ്രവർത്തനങ്ങൾ ചെയ്യാമെന്നതും ആലോചിച്ചു. ശാസ്ത്രമേള, കലോത്സവം, കായികം എന്നിവ ഇപ്രാവശ്യം ജില്ലാതലം ഇല്ലാത്തതുകൊണ്ട് സ്കൂളിൽ എപ്പോൾ നടത്തും എന്നുള്ളതും വിഷയമായി. കലോത്സവം ഒക്ടോബർ 26ന് നടത്താൻ തീരുമാനമായി.
ഒക്ടോബർ
ഒക്ടോബർ 1, ലോക വൃദ്ധദിനമായി ആചരിച്ചു. ഇന്ന് കുട്ടികൾക്ക് അവരവരുടെ മുത്തശ്ശൻ മുത്തശ്ശിമാരെ കുറിച്ച് പറയാൻ അവസരം നൽകി. അവരുടെ നന്മകളെക്കുറിച്ചും കുട്ടികൾ സംസാരിച്ചു. വൃദ്ധരായ നമ്മുടെ മുത്തച്ഛനെയും മുത്തശ്ശിയെയും സംരക്ഷിക്കുന്നത് നമ്മുടെ കടമയാണ് എന്ന് അവർക്ക് വ്യക്തമാക്കിക്കൊടുത്തു.
അധ്യാപകരും, കുട്ടികളും ഒക്ടോബർ 2ന് വിദ്യാലയത്തിൽ ഗാന്ധി ജയന്തി ആഘോഷിക്കാൻ ഹാജരായി. കുട്ടികൾ ഗാന്ധിജിയെക്കുറിച്ച് കവിതകൾ ആലപിച്ചു. കുട്ടികളുടെ പതിപ്പ് പ്രകാശനവും ഗാന്ധിജിയുടെ ജീവചരിത്ര പ്രകാശനവും ഉണ്ടായിരുന്നു. കുട്ടികളുടെ കലാപരിപാടികൾ വളരെ ഭംഗിയായിത്തന്നെ നടത്തി. ഗാന്ധിജയന്തി ഗാന്ധിജയന്തി ദിനമായ ഇന്ന് ലോകം അഹിംസാദിനമായി ആചരിക്കുന്നു എന്നതിനെ കുട്ടികൾക്ക് പറഞ്ഞുകൊടുത്തു. ഗാന്ധിജിയുടെ ജീവചരിത്രം കുട്ടികൾക്ക് പ്രൊജക്ടർ ഉപയോഗിച്ച് കാണിച്ചുകൊടുത്തു. ഗാന്ധിജിയെ കുറിച്ചുള്ള ശബ്ദരേഖ കുട്ടികളെ കേൾപ്പിച്ചു.
ഒക്ടോബർ 23 ന് വിദ്യാരംഗത്തിന്റെ കവിത, കഥ, നാടകം, നാടൻപാട്ട്, വര എന്നീ കൂട്ടങ്ങളുടെ ആദ്യ ദിനമായി ആചരിച്ച് രൂപീകരിച്ചു. എല്ലാ കൂട്ടങ്ങളുടെ ചാർജ് ഓരോ ടീച്ചർമാർ ഏറ്റെടുത്തു. കുട്ടികൾ മികവ് കാണിക്കുന്നത് ഏത് ഇനത്തിലാണ് എന്ന് കണ്ടുപിടിക്കാൻ ഈ പ്രവർത്തനം ഏറെ ഉപകരിച്ചു.
നവംബർ 1 കേരളപ്പിറവി യോടനുബന്ധിച്ച് നടത്തേണ്ട പരിപാടികളെക്കുറിച്ച് മീറ്റിംഗ് കൂടി തീരുമാനിച്ചു. കുട്ടികളുടെ പരിപാടികൾ എപ്പോൾ നടത്തണമെന്നും, എവിടെവച്ച് നടത്തണമെന്നും കൂടി തീരുമാനിച്ചു.
നവംബർ
നവംബർ 1 കേരളപിറവി ദിനത്തിൽ ചെയ്യേണ്ട പരിപാടികൾ ക്ലാസ് തലത്തിൽ ആസൂത്രണം ചെയ്തു. അന്ന് അസംബ്ലിയിൽ കേരളപ്പിറവി ദിനത്തിന്റെ പ്രത്യേകതയെക്കുറിച്ച് പ്രധാന അധ്യാപിക സംസാരിച്ചു. കുട്ടികൾക്ക് എല്ലാവർക്കും കേരളപ്പിറവി ആശംസകൾ നേർന്നു. തുടർന്ന് ഓരോ ക്ലാസ്സുകാരും വിവിധ പരിപാടികൾ അവതരിപ്പിച്ചു. ദേശഭക്തിഗാനം, തിരുവാതിരക്കളി, പ്രസംഗം, കഥ, കവിത, പതിപ്പ് പ്രകാശനം എന്നിവയായിരുന്നു പ്രധാന പരിപാടികൾ. കേരളത്തിൻറെ പ്രാധാന്യത്തെ മനസ്സിലാക്കാനും ചരിത്രം അറിയാനും വേണ്ടി കുട്ടികൾക്ക് CD പ്രദർശനം നടത്തി. ഇത് വളരെ പ്രയോജനമായിരുന്നു. വായിച്ച് മനസ്സിലാക്കുന്നതിനേക്കാൾ കണ്ടു മനസ്സിലാക്കാൻ എളുപ്പത്തിൽ സാധിച്ചു. ഒന്നാം ക്ലാസിലെ കുട്ടികൾ മുതൽ നാലാം ക്ലാസ് കുട്ടികൾവരെ പതിപ്പ് തയ്യാറാക്കി കൊണ്ടുവന്നു.
നവംബർ 14 ശിശുദിനം വളരെ ഭംഗിയായിത്തന്നെ ആഘോഷിച്ചു. അസംബ്ലിയിൽ ചാച്ചാജി വേഷം ധരിച്ചെത്തിയ കുഞ്ഞുകുട്ടികൾ കണ്ണിനു കുളിർമയേകി. നഴ്സറി കുട്ടികളുടെ പാട്ട് അവതരണം വളരെ മനോഹരമായിരുന്നു. ചാച്ചാജിയെ കുറിച്ച് പ്രധാന അധ്യാപിക കുട്ടികൾക്ക് പറഞ്ഞുകൊടുത്തു. കുട്ടികളുടെ പ്രസംഗം ഉണ്ടായിരുന്നു. വിവിധ ക്ലാസുകളിൽ നിന്ന് ചാച്ചാജിയുടെ പാട്ടും, കഥകളും അവതരിപ്പിച്ചു. എല്ലാ ക്ലാസുകാരും പതിപ്പ് തയ്യാറാക്കി. ഇത് അസംബ്ലിയിൽ പ്രകാശിപ്പിച്ചു. ജവഹർലാൽ നെഹ്റുവിൻറെ ഓഡിയോ കേൾപ്പിച്ചു. ചാച്ചാജിയുടെ ജീവചരിത്രം ആയിരുന്നു അത്. അങ്ങനെ ശിശുദിനാഘോഷം വളരെ ഭംഗിയായി ആഘോഷിച്ചു.
നവംബർ 27 മുതൽ ഡിസംബർ 4 വരെ നടത്തുന്ന ഭിന്നശേഷി വാരാഘോഷത്തിൽ എന്തെല്ലാം കാര്യങ്ങൾ ചെയ്യണമെന്ന് എസ് ആർ ജി യിൽ ചർച്ചചെയ്തു. സമൂഹത്തിൽ വളരെയധികം അവഗണിക്കപ്പെടുന്ന ഭിന്നശേഷി വിഭാഗക്കാരെ അംഗീകരിക്കാൻ ഉതകുന്നവിധം പ്രവർത്തനങ്ങൾ ആസൂത്രണം ചെയ്യാനും അവരെ ഉയർത്തി കൊണ്ടുവരാനും വേണ്ടിയാണ് ഭിന്നശേഷി വാരാഘോഷം. ഇതിന്റ ലക്ഷ്യം ഓരോ കുട്ടികളിലും എത്തിക്കാൻ ഒന്നു മുതൽ നാല് വരെയുള്ള എല്ലാ കുട്ടികൾക്കും ചിത്രരചനാമത്സരം നടത്തി. 3, 4 ക്ലാസ്സുകളിലെ കുട്ടികൾക്ക് പോസ്റ്റർ രചനാ മത്സരവും നടത്തി. ഇതിൽ ഒന്നാംസ്ഥാനം നേടിയ കുട്ടികളുടെ ചിത്രങ്ങൾ BRC ലേക്ക് അയച്ചുകൊടുത്തു. അസംബ്ലിയിൽ അവർക്ക് പ്രാധാന്യം കൊടുത്തുകൊണ്ട് അവരുടെ പരിപാടികൾ ഉൾക്കൊള്ളിച്ച് വളരെ ഭംഗിയായി തന്നെ നടത്തി.
ഡിസംബർ
ഈവർഷത്തെ ക്രിസ്തുമസ് ആഘോഷം വളരെ വ്യത്യസ്തമായിരുന്നു. 21.12.2018 വെള്ളിയാഴ്ചയാണ് സ്കൂളിൽ ക്രിസ്തുമസ് ആഘോഷം നടത്തിയത്. കുട്ടികൾ എല്ലാവരും വളരെ ഉത്സാഹത്തോടെയാണ് പങ്കാളികളായത്. എല്ലാ ക്ലാസുകാരും അവരവരുടെ ക്ലാസ്സുകളിൽ പുൽക്കൂടുകൾ നിർമ്മിച്ചു. വളരെ വ്യത്യസ്തവും, സന്തോഷവും നിറഞ്ഞ ഒരു അനുഭവമായിരുന്നു. തുടർന്ന് കുട്ടികൾ ക്രിസ്തുമസ് അപ്പൂപ്പൻറെ വേഷം ധരിച്ച് ആഘോഷത്തെ കൂടുതൽ ഉത്സാഹഭരിതമാക്കി. കുട്ടികൾ അപ്പൂപ്പന്റെ കൂടെ ക്രിസ്തുമസ് പാട്ടുകൾ പാടി എല്ലാ ക്ലാസ്സുകളിലൂടെയും അനുഗമിച്ചു. ക്രിസ്തുമസ് അപ്പൂപ്പനെ കണ്ടപ്പോഴുള്ള കുരുന്നുകളുടെ സന്തോഷം ആഘോഷത്തെ കൂടുതൽ ഉത്സാഹഭരിതമാക്കിത്തീർത്തു. തുടർന്ന് സ്കൂളിലെ അധ്യാപികയായ ശ്രീമതി ലില്ലി ടീച്ചറുടെ വകയായി എല്ലാവർക്കും കേക്ക് നൽകി. ക്രിസ്തുമസ് അപ്പൂപ്പനൊപ്പം വിദ്യാലയത്തിനും ചുറ്റും കുട്ടികൾ ആടിയും പാടിയും ക്രിസ്തുമസ്സിനെ വരവേറ്റത് എല്ലാവർക്കും സന്തോഷം നിറഞ്ഞ അനുഭവമായിരുന്നു.
ജനുവരി
ഈവർഷത്തെ റിപ്പബ്ലിക് ദിന ആഘോഷം വളരെ വിപുലമായി തന്നെ ആഘോഷിച്ചു. വിദ്യാലയത്തിലെ മിക്ക വിദ്യാർത്ഥികളും ആഘോഷത്തിൽ പങ്കാളികളായി എന്നുള്ളത് എടുത്തു പറയേണ്ടതാണ്. കൃത്യം 9 മണിക്ക് പ്രധാനാധ്യാപിക ശ്രീമതി ശൈലജ ടീച്ചർ പതാക ഉയർത്തി. തുടർന്ന് പതാക ഗാനം കുട്ടികൾ ആലപിച്ചു. ഓരോ കുരുന്നുകളും ഇന്ത്യയുടെ സംസ്കാരത്തെ സംരക്ഷിക്കണമെന്നുള്ള മുൻകരുതൽ നൽകിക്കൊണ്ടാണ് ശ്രീമതി.ശൈലജ ടീച്ചർ കുട്ടികൾക്കുള്ള റിപ്പബ്ലിക് ദിന സന്ദേശം നൽകിയത്. എല്ലാ ക്ലാസ്സുകാരും ദേശഭക്തിഗാനങ്ങൾ അവതരിപ്പിച്ചു. ഗാന്ധിജി, ജവഹർലാൽ നെഹ്റു, സുഭാഷ് ചന്ദ്ര ബോസ് എന്നിങ്ങനെ അനേകം സ്വാതന്ത്ര്യസമരസേനാനികളുടെ കഠിന പ്രയത്നത്തിന്റെ ഫലമായാണ് ഇന്ത്യയ്ക്ക് സ്വാതന്ത്ര്യം ലഭിച്ചത് എന്ന് അധ്യാപികയായ ശ്രീമതി.സുപ്രഭ ടീച്ചർ കുട്ടികൾക്ക് പറഞ്ഞുകൊടുത്തു. പിന്നീട് റിപ്പബ്ലിക് ദിന ആഘോഷവുമായി ബന്ധപ്പെട്ട് കുട്ടികൾ ഉണ്ടാക്കി കൊണ്ടുവന്ന പതിപ്പുകളുടെ പ്രകാശനവും അസംബ്ലിയിൽ വച്ച് നടന്നു. വാർഡ് കൗൺസിലറായ ശ്രീ.മണികണ്ഠൻ അവർകൾ കുട്ടികൾക്ക് റിപ്പബ്ലിക് ദിനസന്ദേശം പറഞ്ഞു കൊടുത്തു. തുടർന്ന് എല്ലാ കുട്ടികൾക്കും മധുരപലഹാരം വിതരണം ചെയ്തു.
ഫെബ്രുവരി
പഠനയാത്ര എന്ന് പറയുമ്പോൾ തന്നെ കുട്ടികൾക്ക് വളരെ ഉത്സാഹമാണ്. ഓരോ വർഷവും പഠനയാത്രക്കുള്ള സ്ഥലങ്ങൾ തീരുമാനിക്കുന്നത് കുട്ടികളുടെ ആനന്ദത്തിനും, വിനോദത്തിനും മുൻതൂക്കം നൽകി കൊണ്ടാണ്. ഈ വർഷത്തെ പഠനയാത്ര ഫെബ്രുവരി രണ്ടാം തീയതിയാണ് പോയത്. തൃശൂരിലെ പീച്ചി ഡാം, കാഴ്ച്ബംഗ്ലാവ്, മ്യൂസിയം, സ്നേഹതീരം ബീച്ച് തുടങ്ങിയ സ്ഥലങ്ങളിലേക്കാണ് പോയത്. രാവിലെ കൃത്യം ഏഴു മണിക്ക് 75 വിദ്യാർത്ഥികളും, അധ്യാപകരും, പിടിഎ ഭാരവാഹികളും പഠനയാത്രക്ക് പുറപ്പെട്ട്. ആദ്യം ചെന്നത് പീച്ചി ഡാമിലേക്ക് ആയിരുന്നു. ഡാമിൽ കയറുന്നതിനുമുമ്പ് പ്ലാസ്റ്റിക് സാധനങ്ങൾ നിരോധിച്ചുകൊണ്ടുള്ള നിർദ്ദേശങ്ങൾ പാലിക്കണം എന്ന് കുട്ടികളോട് ആവശ്യപ്പെട്ടു. ശ്രീമതി.സുപ്രഭ ടീച്ചർ ജലവും, ഡാമുകളും പ്രകൃതിയുടെ വരദാനമാണ് എന്നും, അവ മനുഷ്യന്റെ പ്രവർത്തികൾ മൂലം ഇല്ലാതായിക്കൊണ്ടിരിക്കുകയാണ് എന്നും, അവയെ സംരക്ഷിക്കേണ്ടത് നാം ഓരോരുത്തരുടെയും കടമയാണ് എന്നും കുട്ടികൾക്ക് പറഞ്ഞു കൊടുത്തു. അതുകൊണ്ടാണ് ഡാം സന്ദർശിക്കുമ്പോൾ പ്ലാസ്റ്റിക് സാധനങ്ങൾ കൊണ്ടു വരാൻ പാടില്ല എന്ന് നിർദ്ദേശിച്ചതിന്റെ ഉദ്ദേശം. കുട്ടികളെല്ലാം വളരെ ഉത്സാഹത്തോടെ കൂടിയാണ് ഡാം സന്ദർശനം നടത്തിയത്. പീച്ചി ഡാമിന് അകത്തുള്ള പാർക്കിൽ കയറിയപ്പോൾ കുരുന്നു മനസ്സുകളുടെ കളിയോടുള്ള വാസന അവിടെനിന്ന് ഞങ്ങൾക്ക് നേരിട്ട് മനസ്സിലാക്കാൻ സാധിച്ചു. വളരെ അച്ചടക്കത്തോടെയുള്ള കുട്ടികളുടെ പെരുമാറ്റം മറ്റുള്ള വിനോദയാത്രക്കാരെക്കൂടി അത്ഭുതപ്പെടുത്തി.
അടുത്തതായി ഞങ്ങൾ തൃശൂർ കാഴ്ച്ബംഗ്ലാവിലേക്ക് എത്തിച്ചേർന്നു. കുട്ടികൾക്ക് അത് വളരെ സന്തോഷം നിറഞ്ഞ ഒരു അനുഭവമായിരുന്നു. മുത്തശ്ശി കഥകളിലൂടെയും, പാഠപുസ്തകങ്ങളിലെ കഥകളിലൂടെയും, കേട്ടും, വായിച്ചും മനസ്സിലാക്കിയ മൃഗങ്ങളെയും, പക്ഷികളെയും നേരിൽ കണ്ടപ്പോഴുള്ള അവരുടെ സന്തോഷം അളക്കുന്നതിനപ്പുറമായിരുന്നു. ഓരോ പക്ഷികളെയും, മൃഗങ്ങളെയും കാണുമ്പോൾ കുട്ടികൾ അവയുടെ പേരും, പ്രത്യേകതകളും അധ്യാപകരോട് ചോദിച്ചു മനസ്സിലാക്കി. പിന്നീട് പ്രാചീനകാലത്തിന്റെ ശേഷിപ്പുകളെ ഓർമ്മപ്പെടുത്തുന്ന മ്യൂസിയത്തിലേക്കായിരുന്നു യാത്ര. കുട്ടികൾക്ക് വളരെ രസകരമായ ഒരു കാഴ്ചയായിരുന്നു മ്യൂസിയം സന്ദർശനം നടത്തിയപ്പോൾ ഉണ്ടായത്. വിവിധതരം കല്ലുകൾ, പഴയ കാലത്ത് ഉപയോഗിച്ചിരുന്ന ആയുധങ്ങൾ, മൃഗങ്ങളുടെ അസ്ഥികൂടങ്ങൾ തുടങ്ങിയ കൗതുകം നിറഞ്ഞ ആനന്ദകരമായ കാഴ്ചകൾ കുട്ടികൾക്ക് പുതിയ ഒരു അനുഭവം തന്നെയായിരുന്നു.
തുടർന്ന് സ്നേഹതീരം ബീച്ചിലേക്ക് ആയിരുന്നു യാത്ര. ബീച്ച് എന്ന് കേൾക്കുമ്പോൾ തന്നെ കുരുന്നുകളുടെ മനസ്സിൽ ഓടിയെത്തുന്നത് ആനന്ദ നിർഭരമായ ഒരു അനുഭൂതിയാണ്. വളരെ സന്തോഷത്തോടെയാണ് സ്നേഹതീരം കടപ്പുറത്ത് കുട്ടികൾ വിനോദത്തിലേർപ്പെട്ടത്. ഏകദേശം സന്ധ്യയായപ്പോൾ ഇനിയും കുറെ നേരം ഇവിടെ കളിക്കാം എന്നവർ കൂട്ടത്തോടെ ഏറ്റുപറഞ്ഞത് പഠനയാത്രയുടെ മാധുര്യമുള്ള ഒരു ഓർമ്മയാണ്. അങ്ങനെ കൃത്യം ആറുമണിക്ക് യാത്ര തിരിച്ചു. പഠന യാത്രയിൽ പങ്കെടുത്ത മുഴുവൻ കുരുന്നുകളുടെയും ഊർജ്ജസ്വലത അധ്യാപകരെ അത്ഭുതപ്പെടുത്തി. ഓരോ വർഷവും പഠനയാത്ര പോകുമ്പോൾ അത് ഭാവിയിലെ ഒരു മാധുര്യമുള്ള ഓർമ്മകളായി മാറ്റുക എന്നത് ജീ.വി.എൽ.പി സ്കൂളിലെ അധ്യാപകരുടെയും, കുട്ടികളുടെയും പിടിഎ ഭാരവാഹികളുടെയും സഹകരണത്തിന്റേയും ഒരുമയുടെയും ഉത്തമമായ തെളിവാണ് എന്ന് നമുക്ക് മനസ്സിലാക്കാൻ സാധിക്കും.