ജി.വി.എച്ച്.എസ്.എസ്. പുല്ലാനൂർ/പ്രവർത്തനങ്ങൾ/2025-26

2025-26

സ്ക്കൂൾ പ്രവേശനോത്സവം - 2025 (ജൂൺ 2)

പുല്ലാനൂർ: ജി.വി.എച്ച്.എസ്.എസ് പുല്ലാനൂരിൽ പ്രവേശനോത്സവം വിവിധ കലാപരിപാടികളോടെയും, അനുമോദനചടങ്ങുകളോടെയും ചേർന്ന് ആഘോഷമാക്കി. പുതിയ അധ്യായനത്തിൽ കടക്കുന്ന വിദ്യാർത്ഥികൾക്ക് സന്തോഷവും ആത്മവിശ്വാസവും നല്കുന്ന പരിപാടികൾ അരങ്ങേറി.പരിപാടിയുടെ ഭാഗമായി ഇത്തവണത്തെ എ പ്ലസ് (SSLC) നേടിയ വിദ്യാർത്ഥികൾക്കും, യുഎസ്എസ് (USS) ജേതാക്കൾക്കും, എൽഎസ്എസ് (LSS) വിജയികൾക്കുമുള്ള പ്രത്യേക അനുമോദനങ്ങൾ സ്കൂൾ പി.ടി.എ യും , എസ്.എം.സി യും , അധ്യാപകരും ചേർന്ന് നിർവഹിച്ചു. മികച്ച വിജയം കൈവരിച്ച കുട്ടികൾക്ക് മൊമന്റോകളും സർട്ടിഫിക്കറ്റുകളും നൽകി ആദരിച്ചു.

നവാഗതരായ വിദ്യാർത്ഥികൾക്ക് സ്കൂളിൽ സ്‌നേഹപൂർവമായ സ്വാഗതം നൽകി. സ്‌കൂളിന്റെ അധ്യാപക കൂട്ടായ്മയും മുതിർന്ന വിദ്യാർത്ഥികളും ചേർന്ന് പുതിയ കൂട്ടുകാരെ സ്‌നേഹത്തോടെ സ്വീകരിച്ചു.

വിവിധ കലാപരിപാടികൾ, സമൂഹഗാനം, നൃത്തങ്ങൾ, നാടൻകലാരൂപങ്ങൾ എന്നിവയും പരിപാടിയെ ആകർഷകമാക്കി. കുട്ടികളുടെ പ്രകടനങ്ങൾ പ്രേക്ഷകരെ ചിരിപ്പിക്കുകയും ആഹ്ലാദിപ്പിക്കുകയും ചെയ്തു.

പ്രധാനാധ്യാപകന്റെ അധ്യക്ഷതയിൽ നടന്ന ചടങ്ങിൽ പരിപാടികൾക്ക് നേതൃത്വം നൽകിയ അധ്യാപകരുടെയും രക്ഷിതാക്കളുടെയും സാന്നിധ്യം ഉണർവ്വേറിയതായി.

ലോക പരിസ്ഥിതി ദിനം (ജൂൺ 5)

ഹരിത സേനാംഗങ്ങളെ ആദരിച്ച് പുല്ലാനൂർ ജി.വി.എച്ച്.എസ്.എസ്

പുല്ലാനൂർ: ലോക പരിസ്ഥിതി ദിനത്തിൽ വേറിട്ട അനുഭവമായി പുല്ലാനൂർ ജി.വി.എച്ച്.എസ്.എസ് നടത്തിയ ഹരിത സേനാംഗങ്ങൾക്കുള്ള ആദരം മാറുകയുണ്ടായി. ബീറ്റ് പ്ലാസ്റ്റിക് എന്ന മുദ്രാവാക്യത്തിന്റെ സജീവ കർമയോഗികൾക്കുള്ള ആദരം ഹരിത സേനാംഗങ്ങളുടെ തൊഴിലിന്റെ പ്രാധാന്യവും അവരോട് ക്രിയാത്മകമായി ഇടപെടേണ്ടതിന്റെ ആവശ്യകതയും ബോധ്യപ്പെടുത്തുന്നതായിരുന്നു. പൂക്കോട്ടൂർ ഗ്രാമപഞ്ചായത്ത് കൃഷി ഓഫീസർ ഇർഫാന ഹരിത സേനാംഗങ്ങൾക്ക് കുട്ടികൾ ശേഖരിച്ച സമ്മാനം വിതരണം ചെയ്തു. ശ്രീമതി ലക്ഷ്മി, ശ്രീമതി ജിൻസിഎന്നിവർ ആദരം സ്വീകരിച്ചു. കുട്ടികൾ മുൻകൂട്ടി ശേഖരിച്ച വിത്തുകൾ കൈമാറുന്ന സീഡ് എക്സ്ചേഞ്ച് അബ്ദുറസാഖ് റിയ ജാസ്മിന് നൽകി ഉദ്ഘാടനം ചെയ്തു. പ്രധാനാധ്യാപിക സി.സുനിത ടീച്ചർ പരിസ്ഥിതി ദിന സന്ദേശം നൽകി ഹരിത പ്രതിജ്ഞ ചൊല്ലിക്കൊടുത്തു. ഓർമമരം പദ്ധതി സഫിയ ടീച്ചർ തൈ നട്ടു കൊണ്ട് തുടക്കം കുറിച്ചു. ടി സുബ്രഹ്മണ്യൻ മാസ്റ്റർ, ഹസനുദ്ദീൻ മാസ്റ്റർ, ലിൻസി ടീച്ചർ, ജെ. ആർ. സി അംഗങ്ങൾ എന്നിവർ തൈകൾ നടുന്നതിൽ പങ്കാളികളായി. രാവിലെ നടന്ന വിദ്യാലയ ശുചീകരണ പ്രവർത്തനങ്ങളിൽ സ്റ്റുഡൻ്റ് പോലീസ് കേഡറ്റുകൾ പങ്കാളികളായി. അധ്യാപകരായ ആനി മേരി ജോർജ്, ജിനീഷ് എന്നിവർ നേതൃത്വം നൽകി. സജീഷ് കുമാർ, ഹരിദാസൻ, പി.കെ വിജീഷ്, ഷാഹിദ് ബാവ, അൻവർ അബ്ദുള്ള എന്നിവർ പ്രസംഗിച്ചു.

ഹരിതകർമ സേനാംഗങ്ങൾക്കുള്ള ആദരം