ഗവൺമെൻറ്, എച്ച്.എസ്. അവനവൻചേരി/പരിസ്ഥിതി ക്ലബ്ബ്
പരിസ്ഥിതി പഠന ക്യാമ്പ്
കൊല്ലം സോഷ്യൽ ഫോറസ്ട്രി എക്സ്റ്റൻഷൻ സെന്ററിന്റെ നേതൃത്വത്തിൽ അവനവഞ്ചേരി ഗവ.ഹൈസ്കൂളിലെ നല്ല പാഠം പ്രവർത്തകരായ സ്റ്റുഡന്റ് പോലീസ് കേഡറ്റുകൾക്കായി ഏകദിന പരിസ്ഥിതി പഠന ക്യാമ്പ് സംഘടിപ്പിച്ചു. ഡെപ്യൂട്ടി റേഞ്ച് ഓഫീസർ (റിട്ട.) ശ്രീ.ബാബു രാജേന്ദ്രൻ, സെക്ഷൻ ഫോറസ്റ്റ് ഓഫീസർമാരായ ശ്രീ.എം.കെ.ഗോപകുമാർ, ശ്രീ.ബി.സോമശേഖരപിള്ള എന്നിവർ പഠന ക്യാമ്പിന് നേതൃത്വം നൽകി. സ്കൂൾ പി.റ്റി.എ.പ്രസിഡന്റ് അഡ്വ.മധുസൂദനൻ നായർ അധ്യക്ഷത വഹിച്ച യോഗത്തിൽ ഹെഡ്മിസ്ട്രസ് ശ്രീമതി.എം.ആർ.മായ ക്യാമ്പ് ഉദ്ഘാടനം ചെയ്തു. വിവിധ സെഷനുകളിലായി പരിസ്ഥിതി സംരക്ഷണ ബോധവൽക്കരണ ക്ലാസുകൾ, ഡോക്യുമെൻററി പ്രദർശനം എന്നിവ ഉണ്ടായിരുന്നു.
കൊതുക് നിവാരണ പ്രവർത്തനങ്ങൾ
അന്താരാഷ്ട്ര കൊതുക് ദിനത്തിൽ (ആഗസ്റ്റ്‌ 20) കൊതുക് നിവാരണ പ്രവർത്തനങ്ങളുമായി അവനവഞ്ചേരി ഹൈസ്കൂൾ വിദ്യാർഥികൾ. പരിസ്ഥിതി ക്ലബ്ബിലെ കുട്ടികളാണ് പരിപാടി സംഘടിപ്പിച്ചത്. സ്കൂളും പരിസരവും വൃത്തിയാക്കിയ ശേഷം സ്കൂളിനു പരിസരത്തെ വീടുകൾ സന്ദർശിച്ച കുട്ടികൾ കൊതുക് നശീകരണ പ്രവര്ത്തനം നടത്തുകയും വെള്ളം കെട്ടിനിന്ന് കൊതുക് വളരാൻ ഇടയുള്ള സ്ഥലങ്ങളിൽ ലോഷൻ തളിച്ച് വൃത്തിയാക്കുകയും ചെയ്തു. സ്കൂളിൽ കുട്ടികൾ തന്നെ തയ്യാറാക്കിയ ലോഷനാണ് ഇതിനായി ഉപയോഗിച്ചത്. അന്താരാഷ്ട്ര കൊതുക് ദിനത്തിന്റെ പ്രാധാന്യവും കൊതുക് പകർത്തുന്ന രോഗങ്ങളെക്കുറിച്ചും അവർ വീട്ടുകാരെ ബോധ്യപ്പെടുത്തി. വൃത്തിയുടെ പ്രാധാന്യം വിശദീകരിക്കുകയും കൂടുതൽ ഉപയോഗത്തിനായി ലോഷൻ സമ്മാനമായി നല്കുകയും ചെയ്താണ് കുട്ടികൾ പിരിഞ്ഞത്. റൊനാൾഡു റോസ് എന്ന ശാസ്ത്രജ്ഞൻ പെൺ കൊതുകുകളാണ് മലേറിയ രോഗം പരത്തുന്നതെന്നു കണ്ടെത്തിയതിന്റെ ഓർമ്മ യ്ക്കാണ് അന്താരാഷ്ട്ര കൊതുക് ദിനം ആചരിക്കുന്നത്.
അവനവഞ്ചേരി ഗവ. ഹൈസ്കൂളിന്റെ കാർഷിക മികവിന് സംസ്ഥാന തല അംഗീകാരം.
സെൻറർ ഫോർ ഇന്നവേഷൻ ഇൻ സയൻസ് ആൻറ് സോഷ്യൽ ആക്ഷൻ (CISSA) കേരള പൊതുവിദ്യാഭ്യാസ വകുപ്പിന്റെ സഹകരണത്തോടെ സംസ്ഥാന തലത്തിൽ സംഘടിപ്പിച്ച കേരള സ്കൂൾ അഗ്രി ഫെസ്റ്റിൽ അവനവഞ്ചേരി ഗവ.ഹൈസ്കൂളിലെ കാർഷിക പ്രവർത്തനങ്ങൾക്ക് അംഗീകാരം. കാർഷിക മേഖലയിൽ മികവാർന്ന പ്രവർത്തനങ്ങൾ നടത്തുന്ന സംസ്ഥാനത്തെ 136 സ്കൂളുകൾ പങ്കെടുത്ത മത്സരത്തിൽ ഓവറോൾ പ്രകടനത്തിനാണ് സ്കൂളിന് അംഗീകാരം ലഭിച്ചത്. സ്കൂളിൽ നടക്കുന്ന നെൽക്കൃഷി ഉൾപ്പെടെയുള്ള കാർഷിക പ്രവർത്തനങ്ങൾ വിലയിരുത്തിയതിനു പുറമേ 'എന്റെ സ്കൂൾ എന്റെ കൃഷിത്തോട്ടം' എന്നയിനത്തിൽ പ്രോജക്ട് അവതരണത്തിനും നാടൻപാട്ടിന്റെ വ്യക്തിഗത - ഗ്രൂപ്പ് മൽസരങ്ങളിലും സമ്മാനങ്ങൾ നേടിയാണ് സ്കൂളിന് സംസ്ഥാനത്തെ മികച്ച എട്ടു സ്കൂളുകളിൽ ഒന്നാവാൻ കഴിഞ്ഞത്. ഇരുപതിനായിരം രൂപയുടെ ക്യാഷ് അവാർഡും ട്രോഫിയുമാണ് പുരസ്കാരം. സ്കൂളിനെ പ്രതിനിധീകരിച്ച് പങ്കെടുത്ത കുട്ടികൾക്ക് മെഡലുകളും ലഭിച്ചു. സ്കൂളിൽ നടന്നുവരുന്ന കാർഷിക പ്രവർത്തനങ്ങൾക്ക് ഹരിത വിദ്യാലയ പുരസ്കാരം, മലിനീകരണ നിയന്ത്രണ ബോർഡിന്റെ പുരസ്കാരം, അഗ്രി ഫ്രണ്ട്സ് കൃഷി സാംസ്കാരിക വേദിയുടെ വിതുര ബേബിി സ്മാരക പുരസ്കാരം, കൃഷിഭവന്റെ പുരസ്കാരം എന്നിവ നേരത്തേ സ്കൂൾ നേടിയിട്ടുണ്ട്. സ്കൂളിലെ നല്ല പാഠം പ്രവർത്തകരായ സ്റ്റുഡൻറ് പോലീസ് കേഡറ്റുകളാണ് കാർഷിക പ്രവർത്തനങ്ങൾക്ക് നേതൃത്വം നൽകുന്നത്. പാലക്കാട് പട്ടാമ്പി മറിയുമ്മ മെമ്മോറിയൽ പബ്ലിക് സ്കൂളിൽ നടന്ന കേരള സ്കൂൾ അഗ്രി ഫെസ്റ്റിന്റെ സമാപനയോഗത്തിൽ കേരള ജലവിഭവ വകുപ്പ് മന്ത്രി കെ.കൃഷ്ണൻകുട്ടി ഉപഹാരങ്ങൾ സമ്മാനിച്ചു. മുഹമ്മദ് മുഹസ്സിൻ എം.എൽ.എ., സിസ്സ ഡയറക്ടർ ഡോ.പീതാംബരൻ, ഇറാം ഗ്രൂപ്പിന്റെ സി.ഇ.ഒ. മനോഹർ, സ്കൂൾ മാനേജർ ഡോ.സിദ്ദിക്ക് അഹമ്മദ് എന്നിവർ സംബന്ധിച്ചു. കേരള സ്കൂൾ അഗ്രി ഫെസ്റ്റിൽ പുരസ്കാരം നേടുന്ന തിരുവനന്തപുരം ജില്ലയിലെ ഏക സർക്കാർ വിദ്യാലയമാണ് അവനവഞ്ചേരി ഗവ.ഹൈസ്കൂൾ.
ഞങ്ങളുടെ പച്ചക്കറിത്തോട്ടം...
ചേന വിളവെടുപ്പ്
അവനവഞ്ചേരി ഗവ.ഹൈസ്കൂൾ പച്ചക്കറിത്തോട്ടത്തിലെ ചേന വിളവെടുപ്പ്...
മനോരമ -നല്ലപാഠം പുരസ്കാരം
മികച്ച പ്രവർത്തനങ്ങൾക്കുള്ള മലയാള മനോരമ - നല്ലപാഠം പുരസ്കാരം അവനവഞ്ചേരി ഗവ.ഹൈസ്കൂളിന് വേണ്ടി പൊതുവിദ്യാഭ്യാസ വകുപ്പ് സെക്രട്ടറി ശ്രീ.എ.ഷാജഹാൻ ഐ.എ.എസ്. ന്റെ സാന്നിധ്യത്തിൽ ശ്രീ. ഗോപിനാഥ് മുതുകാടിൽ നിന്ന് ഏറ്റുവാങ്ങുന്നു.
