ഇനി എനിക്കറിയുവാൻ ദേശമില്ല
ഇനി എന്റെ ഓർമകളിൽ നാടുമില്ല
പഴമയുടെ കവിതകൾ ഓതുവാനായൊരു
കഥ മെനയുവാനും വരികളില്ല
ഓർമകളിൽ എന്നോ കേട്ടു മറന്നൊരു
പഴമയെന്നൊരു വാക്കു പോയ് മറഞ്ഞു
വയലും പുഴകളും ഒരു നല്ല നെൽപ്പാടം
ഇനി എങ്ങനെ ഞാൻ പകർന്നു നൽകും
കാടും മലകളും ഒഴുകുന്ന നീർച്ചാലും
മലരണി കാടും എന്റെ നാടും
കാലം കടന്നുപോയ്‌ ഇനിയും
വരുന്നൊരു
പുതുയുഗപ്പിറവിക്കു എന്തു നാട്
പ്രളയവും നിപ്പയും നമ്മൾക്ക് മുന്നിൽ
ഇന്നൊരുപാട് സൂചന തന്നിടുന്നു
ഇനിയും പഠിക്കുകിൽ എൻ പൊന്നു സോദരാ
ഈ ഭൂമി നമ്മൾക്കു നഷ്ടമാകും
