എ.എൽ.പി.എസ്. തോക്കാംപാറ/പ്രവർത്തനങ്ങൾ/2023-24
2022-23 വരെ | 2023-24 | 2024-25 |
പ്രവേശനോത്സവം
![](/images/thumb/d/de/18405-190.jpg/300px-18405-190.jpg)
2023-24 അക്കാദമിക വർഷത്തിലെ വിദ്യാലയ പ്രവേശനോത്സവം വളരെ നിറപ്പകിട്ടോടെയാണ് ആഘോഷിച്ചത്. വിദ്യാലയത്തിലേക്ക് ആദ്യാക്ഷരത്തിന്റെ മധുരം നുണയാനെത്തിയ എല്ലാ കുരുന്നുകളെയും നിറപകിട്ടാർന്ന പൂന്തോട്ടത്തിലേക്ക് പറന്നെത്തുന്ന പൂമ്പാറ്റകളെപ്പോലെ മധുരപലഹാരങ്ങളും പൂക്കളും സമ്മാനങ്ങളും നൽകി അധ്യാപകരും വിദ്യാർത്ഥികളും ചേർന്ന് സ്വീകരിച്ചു. നയനമനോഹരമായ ആഘോഷ പരിപാടികൾ തന്നെയാണ് ഇതിനായി ഈ അക്കാദമിക വർഷത്തിൽ വിദ്യാലയത്തിൽ ഒരുക്കിയത്.
ലോക പരിസ്ഥിതി ദിനം
ജൂൺ 5 ലോക പരിസ്ഥിതി ദിനത്തോടനുബന്ധിച്ച് എ എൽ പി എസ് തോക്കാംപാറയിൽ കുട്ടികൾക്കായി വിവിധ പ്രവർത്തനങ്ങൾ അധ്യാപകർ ഒരുക്കിയിരുന്നു. കുട്ടികൾ പച്ചക്കറി തൈകൾ വീട്ടിൽ നിന്ന് മുളപ്പിച്ച് കൊണ്ടു വരുകയും സ്കൂൾ അസംബ്ലിയിൽ വെച്ച് അത് ശാസ്ത്ര ക്ലബ് കൺവീനറായ സുധീർ മാഷിന് കൈമാറുകയും ചെയ്തു. അധ്യാപകരുടെ നേതൃത്വത്തിൽ കുട്ടികൾ തന്നെ ഗ്രോബാഗുകളിൽ ഈ പച്ചക്കറി തൈകൾ നടുകയും ഒരു ചെറിയ പച്ചക്കറി തോട്ടം വിദ്യാലയത്തിനായി ഒരുക്കുകയും ചെയ്തു. പ്രധാനാധ്യപകനായ ജയകൃഷ്ണൻ മാസ്റ്റർ നേതൃത്വം നൽകി.
പഠനോപകരണ ശില്പശാല
![](/images/thumb/2/20/18405-192.jpg/300px-18405-192.jpg)
ഒന്നാം ക്ലാസിലെ കുട്ടികളുടെ പഠന പ്രവർത്തനങ്ങളുടെ ഭാഗമായി രക്ഷിതാക്കൾക്കായി ജൂൺ 12 ന് പഠനോപകരണ ശില്പശാല സംഘടിപ്പിച്ചു. ഒന്നാം ക്ലാസിലെ അധ്യാപകരായ ബരീറ ടീച്ചർ, ജിത്യ ടീച്ചർ, ജ്യോത്സന ടീച്ചർ എന്നിവരുടെ നേതൃത്വത്തിലാണ് ശില്പശാല നടന്നത്. രക്ഷിതാക്കൾ എല്ലാവരും വളരെ ഉത്സാഹത്തോടെയും സന്തോഷ ത്തോടെയും ഇതിൽ പങ്കെടുക്കുകയും കുട്ടികൾക്കായി പഠനോപകരണങ്ങൾ നിർമ്മിക്കുകയും ചെയ്തു.
വായനവാരാചാരണം
![](/images/thumb/4/43/18405-189.jpg/300px-18405-189.jpg)
കുട്ടികളിൽ വായനയുടെ പ്രാധാന്യം എന്താണെന്ന് തിരിച്ചറിവുകൾ ഉണ്ടാവാനും വായനാശീലാ വളർത്തുന്നതിന്റെയും ഭാഗമായി ജൂൺ 19 മുതൽ ഒരാഴ്ച കാലം വിദ്യാലയത്തിൽ ധാരാളം പ്രവർത്തനങ്ങൾ വിദ്യാർത്ഥികൾക്കും രക്ഷിതാക്കൾക്കുമായി ഒരുക്കിയിരുന്നു. ക്ലാസ് തല- സ്കൂൾ തല ലൈബ്രറി ശാക്തീകരണം, വായന മത്സരങ്ങൾ, അക്ഷരമര നിർമ്മാണം, ക്ലാസ് തല- സ്കൂൾ തല ക്വിസ് മത്സരങ്ങൾ, വായനകുറിപ്പ് തയ്യാറാക്കൽ, അമ്മമാർക്കായുള്ള വായനദിന ക്വിസ് മത്സരം തുടങ്ങി വ്യത്യസ്തത നിറഞ്ഞ ധാരാളം പ്രവർത്തനങ്ങളിലൂടെയാണ് ഈ വർഷത്തെ വായന വാരാചരണം കടന്ന് പോയത്.
സ്കൂൾ പാർലമെന്റ് തിരഞ്ഞെടുപ്പ്
![](/images/thumb/a/aa/18405-191.jpg/300px-18405-191.jpg)
ജനാധിപത്യ ഭരണരീതികൾ കുട്ടികൾക്ക് മനസ്സിലാവാനും തിരഞ്ഞെടുക്കപ്പെടുന്നതിന്റെയും തിരഞ്ഞെടുപ്പിന്റെയും ഘട്ടങ്ങൾ എന്തെല്ലാമാണെന്നും തിരിച്ചറിയാനുമായി ഈ അക്കാദമിക വർഷത്തിലെ സ്കൂൾ പാർലമെന്റ് തിരഞ്ഞെടുപ്പ് ജൂൺ 26 ന് നടത്തി. സ്കൂളിൽ തയ്യാറാക്കിയ പ്രത്യേക ബാലറ്റ് പേപ്പറും ബാലറ്റ് ബോക്സും ഉപയോഗിച്ച് നടത്തിയ തിരഞ്ഞെടുപ്പ് നിയന്ത്രിച്ചതും കുട്ടികളായിരുന്നു.
ലോക ലഹരി വിരുദ്ധ ദിനം
ജൂൺ 26 ലോക ലഹരി വിരുദ്ധ ദിനത്തിൽ കുട്ടികക്കായി പ്രത്യേക അസംബ്ലി ചേരുകയും കുട്ടികൾ ലഹരിവിരുദ്ധ പ്രതിജ്ഞ എടുക്കുകയും ചെയ്തു. ലഹരി വിരുദ്ധ സന്ദേശങ്ങളടങ്ങിയ പോസ്റ്ററുകളും പ്ലകാർഡുകളും കുട്ടികൾ നിർമ്മിച്ച് കൊണ്ടുവരികയും വിദ്യാലയത്തിന്റെ വിവിധ ഇടങ്ങളിൽ പ്രദർശിപ്പിക്കുകയും ചെയ്തു. കുട്ടികൾക്കും രക്ഷിതാക്കൾക്കുമായി ലഹരിവിരുദ്ധ ബോധവൽക്കരണ ക്ലാസ് സംഘടിച്ചു.
പെരുന്നാൾ നിലാവ്
എല്ലാ ആഘോഷങ്ങളും ഉത്സവങ്ങളും നമ്മുടെ നാടിന്റെ സംസ്കാരത്തെയും സൗഹാർദ്ദത്തെയും ഊട്ടി ഉറപ്പിക്കുന്ന മഹത്തായ പാരമ്പര്യത്തിന്റെ നെടും തൂണുകളാണെന്ന തിരിച്ചറിവുകൾ കുട്ടികളിൽ വളർത്താനായി വിദ്യാലയത്തിൽ വിവിധ പരിപാടികൾ സംഘടിപ്പിക്കാറുണ്ട്. ബലി പെരുന്നാളിനോടനുബന്ധിച്ച് 'പെരുന്നാൾ നിലാവ് ' എന്ന പേരിൽ പെരുന്നാൾ ആഘോഷം സംഘടിപ്പിച്ചു. ആഘോഷങ്ങൾക്ക് മാറ്റ് കൂട്ടാനായി അമ്മമാർക്കുള്ള മൈലാഞ്ചി ഇടൽ മത്സരം, കുട്ടികളുടെ മാപ്പിളപ്പാട്ട് മത്സരം, വിവിധ തരം മാപ്പിള കലകളുടെ അവതരണം എന്നിവയും നടന്നു. കുട്ടികൾക്കും രക്ഷിതാക്കൾക്കുമുള്ള പായസവിതരണത്തോടെയാണ് പരിപാടികൾ സമാപിച്ചത്.
ബഷീർ ദിനാചരണം
പ്രശസ്ത സാഹിത്യകാരൻ വൈക്കം മുഹമ്മദ് ബഷീറിന്റെ അനുസ്മരണാർത്ഥം ജൂലൈ 5 ബഷീർ ദിനാചരണം നടത്തി. ബഷീർ കൃതികളുടെ പരിചയപ്പെടുത്തലും പ്രദർശനവും സംഘടിപ്പിച്ചു. ബഷീറിന്റെ തൂലികയിൽ നിന്നും പിറന്ന് അവിസ്മരണീയമായി തീർന്ന പല കഥാപാത്രങ്ങളായി വേഷമണിഞ്ഞും മറ്റും കുട്ടികൾ വിവിധ പരിപാടികളിൽ പങ്കാളികളായി.
വിദ്യാരംഗം കലാസാഹിത്യവേദി ഉദ്ഘാടനം
2023-24 അക്കാദമിക വർഷത്തിലെ വിദ്യാരംഗം കലാസാഹിത്യവേദിയുടെ ഉദ്ഘാടനം ജൂലൈ 5ന് ദേശീയ അധ്യാപക അവാർഡ് ജേതാവും എഴുത്തുകാരനുമായ പി വി മോഹനൻ മണ്ണഴി നിർവ്വഹിച്ചു. കഥകളിലൂടെയും പാട്ടുകളിലൂടെയും കുട്ടികളോടൊപ്പം സംവദിച്ച് കൊണ്ടായിരുന്നു വിദ്യാരംഗം കലാസാഹിത്യ വേദി ഉദ്ഘാടനം ചെയ്തത്.
അറബിക് ടാലന്റ് ടെസ്റ്റ്
അറബി ഭാഷ പഠിക്കുന്ന മുഴുവൻ കുട്ടികൾക്കായി അലീഫ് അറബിക് ക്ലബിന്റെ ആഭിമുഖ്യത്തിൽ സ്കൂൾതല അറബിക് ടാലന്റ് ടെസ്റ്റ് പരീക്ഷ നടത്തി. പ്രധാനാധ്യാപകൻ ജയകൃഷ്ണൻ ഇ പരിപാടി ഉദ്ഘാടനം ചെയ്തു.
ചാന്ദ്രദിനം
ജൂലൈ 19 ചന്ദ്രദിനം വൈവിധ്യമാർന്ന പ്രവർത്തനങ്ങളിലൂടെ നടത്തി. 'നമുക്ക് അമ്പിളി മാമനോട് ചോദിക്കാം' എന്ന പരിപാടിയുടെ ഉദ്ഘാടന കർമ്മം എ ശ്രീധരൻ മാഷ് നിർവ്വഹിച്ചു. നിരവധി പരീക്ഷണങ്ങളിലൂടെ അദ്ദേഹം കുട്ടികൾക്ക് മുമ്പിൽ പ്രപഞ്ചാത്ഭുതത്തിന്റെ വർണ്ണ വിസ്മയങ്ങൾ തുറന്ന് കാട്ടി. കുട്ടികൾ ധാരാളം സംശയങ്ങൾ ചോദിക്കുകയും ചെയ്തു. സൗരയുഥത്തിലെ ഗ്രഹങ്ങളായും ബഹിരാകാശ യാത്രികരായും മാറി കുട്ടികൾ പ്രകടനങ്ങൾ കാഴ്ചവെച്ചു.
സ്കൂൾ കലാമേള
കുട്ടികളുടെ സർഗ്ഗാത്മക കഴിവുകൾ അവതരിപ്പിക്കുന്നതിനായും മുനിസിപ്പൽ തലസബ്ജില്ല തല മത്സരങ്ങൾക്കായുള്ള തയ്യാറെടുപ്പുകൾക്കുമായി 2023-24 അധ്യയന വർഷത്തിലെ സ്കൂൾ കലാമേള ജൂലൈ 27 ബുധനാഴ്ച നടന്നു. പി ടി എ പ്രസിഡന്റ് കെ ബിജു കലാമേളയുടെ ഉദ്ഘാടനം നിർവ്വഹിച്ചു. ഹെഡ്മാസ്റ്റർ ജയകൃഷൻ ഇ അധ്യക്ഷത വഹിച്ചു.
എൽ.എസ്.എസ് വിജയികൾക്ക് അഭിനന്ദനം
2022-23 അക്കാദമിക വർഷത്തിലെ എൽ എസ് എസ് പരീക്ഷയിൽ മികച്ച വിജയം കരസ്ഥമാക്കിയ നിരഞ്ജൻ, ആസിഫ് അലി, കേദാർനാഥ്, ഹയ്യാൻ കെ, നഷ നർമിൻ എന്നീ വിദ്യാർത്ഥികളെ അഭിനന്ദിച്ചു. ജയകൃഷ്ണൻ മാസ്റ്ററുടെ നേതൃത്വത്തിൽ ഗൃഹസന്ദർശനം നടത്തുകയും കുട്ടികൾക്ക് സമ്മാനങ്ങളും മധുര പലഹാരങ്ങളും നൽകുകയും ചെയ്തു. അധ്യാപകരായ പ്രവീൺ കെ, സുധീർ കുമാർ, സജിത കുമാരി, പ്രീതി സി എന്നിവർ പങ്കെടുത്തു.
‘വിജയഭേരി-വിജയ സ്പർശം’ ഉദ്ഘാടനം
മലപ്പുറം ജില്ലാ പഞ്ചായത്തിന്റെ തനത് വിദ്യാഭ്യാസ പ്രവർത്തനമായ വിജയഭേരി-വിജയ സ്പർശത്തിന്റെ സ്കൂൾ തല ഉദ്ഘാടനം ഓഗസ്റ്റ് 14 ന് വാർഡ് കൗൺസിലറായ ഹസീന മണ്ടായപ്പുറം നിർവ്വഹിച്ചു. പ്രസ്തുത ചടങ്ങിൽ വിദ്യാലയത്തിലെ മുഴുവൻ രക്ഷിതാക്കളുടെയും പങ്കാളിത്തം ഉണ്ടായിരുന്നു. വിജയസ്പർശത്തിന്റെ മാസ്റ്റർ പ്ലാൻ പ്രകാശനം പി ടി എ പ്രസിഡന്റ് ബിജു കെ നടത്തി. പ്രധാനാധ്യാപകൻ ജയകൃഷ്ണൻ ഇ സംസാരിച്ചു.
സ്വാതന്ത്ര്യ ദിനാഘോഷം
തോക്കാംപാറ എ എൽ പി സ്കൂളിൽ സ്വാതന്ത്യദിനം സമുചിതമായി ആഘോഷിച്ചു. അസംബ്ലിയോടെയായിരുന്നു ആഘോഷങ്ങൾ ആരംഭിച്ചത്. പ്രധാനാധ്യാപകനായ ജയകൃഷ്ണൻ മാസ്റ്റർ ദേശീയ പതാക ഉയർത്തി. ഇന്ത്യൻ സ്വാതന്ത്ര്യ ദിനത്തിന്റെ പ്രാധാന്യത്തെകുറിച്ചും രാജ്യത്തിന്റെ വികസനത്തിൽ വ്യക്തികൾ വഹിക്കേണ്ട പങ്കിനെ കുറിച്ചും അദ്ദേഹം സ്വാതന്ത്ര്യദിന സന്ദേശത്തിൽ വ്യക്തമാക്കി. രാഷ്ട്രത്തിന്റെ ഐക്യവും ദേശസ്നേഹവും വളർത്തുന്നതിനായി വിദ്യാർഥികളും അധ്യാപകരും വൈവിധ്യങ്ങളായ ദേശീയോദ്ഗ്രഥന പരിപാടികൾ അവതരിപ്പിച്ചു. രാജ്യത്തിന്റെ പുരോഗതിക്കായി ക്രിയാത്മകമായി സംഭാവന ചെയ്യാൻ കഴിയുന്ന ഉത്തരവാദിത്തമുള്ള പൗരന്മാരെ വളർത്തിയെടുക്കുന്നതിൽ സ്കൂളിന്റെ അർപ്പണ ബോധത്തിന്റെ പ്രതീകമായി സ്വാതന്ത്ര്യ ദിന പരിപാടികൾ മാറി. കുട്ടികൾക്ക് മധുരവിതരണവും നടത്തി.
ഓണാഘോഷം
2023 ഓഗസ്റ്റ് 25 ന് വിദ്യാലയത്തിൽ വിപുലമായി ഓണാഘോഷം ഒരുക്കി. ഒന്നാംപാദ വാർഷിക പരീക്ഷകൾ പൂർത്തിയാക്കി ഓണാവധിക്ക് സ്കൂളുകൾ അടയ്ക്കുന്നതിന് മുമ്പ് നടന്ന ഓണാഘോഷ പരിപാടികൾ വ്യത്യസ്തത കൊണ്ട് ശ്രദ്ധേയമായി. ഓരോ ക്ലാസുകളും മത്സരിച്ച് പൂക്കളം തീർക്കുകയും വിവിധ മത്സരങ്ങൾ നടക്കുകയും ചെയ്തു. മാവേലിയും പൂവിളികളും വിഭവ സമൃദ്ധമായ ഓണസദ്യയും ആഘോഷത്തിന് മാറ്റുകൂട്ടി.
സ്കൂൾ ശാസ്ത്രോത്സവം
2023-24 അക്കാദമിക വർഷത്തിലെ സ്കൂൾ ശാസ്ത്ര- ഗണിതശാസ്ത്ര-പ്രവൃത്തിപരിചയ മേളകൾ സെപ്റ്റംബർ 24 ന് നടത്തി. കഴിവുകൾ കണ്ടെത്തി സബ്ജില്ല ശാസ്ത്രമേളകളിലേക്ക് കുട്ടികളുടെ പങ്കാളിത്തം ഉറപ്പ് വരുത്താനും കൂടുതൽ പരിശീലനം ആവശ്യമായ മേഖലകളിൽ വൈദഗ്ധ്യം ഉറപ്പുവരുത്തുന്നതിനുമായാണ് മേളകൾ സംഘടിപ്പിച്ചത്. സ്കൂൾ ശാസ്ത്രോത്സവത്തിന്റെ ഉദ്ഘാടനം ശാസ്ത്ര ക്ലബ് കൺവീനറായ സുധീർ കുമാർ നിർവ്വഹിച്ചു. പ്രധാനാധ്യാപകനായ ജയ കൃഷ്ണൻ ഇ, സജിതകുമാരി, സജിമോൻ പീറ്റർ, പ്രവീൺ കെ, പ്രീതി സി, ഫസീല കെ എന്നിവർ പ്രവർത്തനങ്ങൾക്ക് നേതൃത്വം നൽകി.
ഗാന്ധിജയന്തി
ഇന്ത്യയുടെ സ്വാതന്ത്യത്തിനും അഹിംസയ്ക്കും വേണ്ടി ജീവിതം സമർപ്പിച്ച മഹാത്മ ഗാന്ധിയുടെ ജന്മദിനമായ ഒക്ടോബർ 2 ന് ഗാന്ധിയുടെ 154-ാം ജന്മവാർഷികം ആഘോഷിച്ചു. ഗാന്ധി അനുസ്മരണവും വിദ്യാലയത്തിലെ ശുചിത്വ ക്ലബിന്റെ നേതൃത്വത്തിൽ വിദ്യാലയവും പരിസരവും വൃത്തിയാക്കുകയും ചെയ്തു. കൺവീനറായ സജിതകുമാരിയും ശുചിത്വ ക്ലബ് അംഗങ്ങളും പങ്കെടുത്തു. പ്രധാനാധ്യാപകൻ ജയകൃഷ്ണൻ ഇ ഉദ്ഘാടനം ചെയ്തു.
സബ്ജില്ലാ ശാസ്ത്രമേള-വിജയികൾക്ക് അഭിനന്ദനം
ഈ വർഷത്തെ മലപ്പുറം സബ്ജില്ല ശാസ്ത്രമേള ഒക്ടോബർ 30, 31 തീയതികളിലായി മലപ്പുറം ഗവൺമെന്റ് ബോയ്സ് ഗേൾസ് സ്കൂളുകളിലായി നടന്നു. മേളയിൽ ശാസ്ത്രം, ഗണിത ശാസ്ത്രം സാമൂഹ്യശാസ്ത്രം, പ്രവൃത്തിപരിചയം തുടങ്ങിയ വിവിധ വിഷയങ്ങളിലായി തോക്കാംപാറ എ എൽ പി വിദ്യാലയത്തിൽ നിന്നും 25 ഓളം കുട്ടികൾ പങ്കെടുക്കുകയും മികച്ച വിജയം കൈവരിക്കുകയും ചെയ്തു. അതുകൊണ്ട് തന്നെ സബ്ജില്ല തലത്തിൽ വിദ്യാലയത്തിന് ശ്രേദ്ധേയമായ നേട്ടം കൈവരിക്കാൻ കഴിയുകയും ചെയ്തു. മത്സരിച്ച എല്ലാ വിദ്യാർത്ഥികളും വിവിധ ഗ്രേഡുകൾ നേടി കൊണ്ട് വിദ്യയത്തിന്റെ അഭിമാന നക്ഷത്രങ്ങളായി മാറി. എല്ലാ കുട്ടികളെയും മാനേജ്മെന്റ്, PTA അംഗങ്ങൾ ചേർന്ന് അഭിനന്ദിക്കുകയും സമ്മാനങ്ങൾ നൽകുകയും ചെയ്തു.
കേരള പിറവി
എല്ലാ മലയാളികൾക്കും അഭിമാനിക്കാവുന്ന കേരളപ്പിറവി ദിനമായ നവംബർ ഒന്നിന് കുട്ടികൾക്കായി വിവിധ ക്ലാസ്തല-സ്കൂൾ തല പ്രവർത്തനങ്ങൾ ഒരുക്കി. കേരള സംസ്ഥാനത്തെ കുറിച്ച് കൂടുതൽ അറിയുന്നതിനും സംസ്ഥാന രൂപീകരണത്തെ കുറിച് മനസ്സിലാക്കുന്നതിനുമായി കേരള പതിപ്പ് നിർമ്മാനം, ക്വിസ് മത്സരം, ചരിത്ര രചന, കളറിംഗ് മത്സരം, കേരള ഗാനാലാപനം എന്നിവ നടത്തി. വിജയികൾക്ക് സമ്മാനങ്ങൾ വിതരണം ചെയ്തു.
മുനിസിപ്പൽ കലാമേള ചാമ്പ്യൻമാരായി
കോട്ടക്കൽ മുനിസിപ്പൽ കലാമേള നവംബർ 6, 7 തീയതികളിലായി മരവട്ടം എ എൽ പി സ്കൂളിൽ നടന്നു. അറബി കലാമേളയിൽ ഓവറോൾ ഒന്നാം സ്ഥാനത്തോടെയും ജനറൽ വിഭാഗത്തിൽ ഓവറോൾ മൂന്നാം സ്ഥാനവും നേടി മികച്ച പ്രകടനം കാഴ്ചവെക്കാൻ കുട്ടികൾക്ക് സാധിച്ചു. ഇതേ തുടർന്ന് പി ടി എ യുടെ നേതൃത്വത്തിൽ കുട്ടികൾക്ക് സ്വീകരണം നൽകുകയും വിജയാഹ്ലാദ പ്രകടനം നടത്തുകയും ചെയ്തു. പ്രധാനാധ്യാപകനായ ജയകൃഷ്ണൻ ഇ, സജിമോൻ പീറ്റർ, പ്രവീൺ കെ, പ്രീതി സി, ബരീറ പി, ഫൗസിയ സിപി എന്നിവർ നേതൃത്വം നൽകി.
ഉത്സവമേളം
'ഒരുമയുടെ ആഘോഷം' എന്ന പാഠഭാഗവുമായി ബന്ധപ്പെട്ട് ഒന്നാം ക്ലാസിലെ കുട്ടികൾ ഒരുക്കിയ ഉത്സവമേളം എന്ന പഠന പ്രവർത്തനം വളരെ ശ്രദ്ധേയമായി. ഉത്സവത്തിന് മാറ്റ് കൂട്ടാൻ നെറ്റിപ്പട്ടം കെട്ടിയ ഗജവീരന്റെ രൂപത്തിന്റെ അകമ്പടിയും ഒരുക്കിയത് കുട്ടികൾക്ക് പുതുമയേറിയ അനുഭവമായി മാറി. കുട്ടികൾ വിവിധ മൃഗങ്ങളുടെ മുഖംമൂടികൾ അണിഞ്ഞ് കൊണ്ട് കളിചെണ്ടകളുമായി അണിനിരന്നു. മേളത്തിന്റെ മുറുക്കത്തിനൊപ്പം തന്നെ കുട്ടികളുടെ ആരവങ്ങളും ഉയർന്നു. ഒന്നാം ക്ലാസിലെ അധ്യാപകരായ ബരീറ പി, ജിത്യ കെ, ജ്യോത്സ്ന എന്നിവരുടെ നേതൃത്വത്തിലാണ് പഠന പ്രവർത്തനം നടത്തിയത്.
പഠനയാത്ര
2023-24 അധ്യയന വർഷത്തിലെ പഠനയാത്ര പാലക്കാട് ജില്ലയിലെക്കായിരുന്നു. പാലക്കാട് കോട്ട, മലമ്പുഴ ഡാം, ഫാന്റസി പാർക്ക് എന്നീ സ്ഥലങ്ങളാണ് 'ബോൺ വോയേജ് ' എന്ന പേരിൽ നടത്തിയ പഠനയാത്രയിൽ സന്ദർശിച്ചത്. ഒന്ന് മുതൽ 4 വരെയുള്ള ക്ലാസുകളിൽ നിന്നായി നൂറോളം കുട്ടികൾ പഠനയാത്രയിൽ പങ്കെടുത്തു. അധ്യാപകനായ സജി മോൻ പീറ്ററുടെ നേതൃത്വത്തിൽ രണ്ടു ബസുകളിലായി രാവിലെ 6 മണിയോടെയാണ് പഠന യാത്രയ്ക്കായി വിദ്യാലയത്തിൽ നിന്ന് പുറപ്പെട്ടത്. പത്തോളം അധ്യാപകരും പി ടി എ , എം പി ടി എ അംഗങ്ങളും കുട്ടികളുടെ കൂടെ പഠന യാത്രയിൽ പങ്കെടുത്തു.
ഗെയിം ഓൺ-പ്രീ-പ്രൈമറി സ്പോർട്സ് ഫെസ്റ്റ്
തോക്കാംപാറ എ എൽ പി സ്കൂളിലെ പ്രീപ്രൈമറി കുട്ടികളും വിദ്യാലയ പരിസരത്തുള്ള പത്തോളം അംഗനവാടിയിലെ കുട്ടികളും പങ്കെടുത്ത 'ഗെയിം ഓൺ ' എന്ന പേരിൽ നടത്തിയ കായികമേള വളരെ ആവേശകരമായി നടന്നു. കുട്ടികൾക്കായി മത്സര ഇനങ്ങളായി നടത്തിയത് കസേരകളി, മിഠായി പെറുക്കൽ, പൊട്ടാറ്റോ ഗാതറിങ്, ഓട്ടമത്സരം എന്നിവയാണ്. അധ്യാപകരും പി ടി എ കമ്മിറ്റിയും ചേർന്ന് കുട്ടികൾക്കും രക്ഷിതാക്കൾക്കുമായി ഉച്ചഭക്ഷണത്തിന് സ്വാദിഷ്ഠമായ ഭക്ഷണം നൽകുകയും ചെയ്തു. മത്സരത്തിൽ പങ്കെടുത്ത കുട്ടികൾക്കും മത്സര ഇനങ്ങളിൽ ഒന്ന്, രണ്ട്, മൂന്ന് സ്ഥാനങ്ങൾ നേടിയ കുട്ടികൾക്കുമുള്ള സമ്മാന വിതരണം പ്രധാനാധ്യാപകനായ ജയകൃഷ്ണൻ മാസ്റ്ററും അധ്യാപകരായ സജിത കുമാരി, പ്രീതി സി, പ്രവീൺ കെ, ഫസീല കെ എന്നിവർ ചേർന്ന് നൽകുകയും ചെയ്തു.
പലഹാര മേള
ഒന്നാം ക്ലാസിലെ 'നന്നായി വളരാൻ' എന്ന പാഠഭാഗവുമായി ബന്ധപ്പെട്ട് കുട്ടികൾക്ക് നാടൻ പലഹാരങ്ങളെ തിരിച്ചറിയാനും നാടൻ പലഹാരങ്ങളുടെ ഗുണവും ബേക്കറി പലഹാരങ്ങളുടെ ഉപയോഗങ്ങൾ മൂലമുണ്ടാകുന്ന ഗുരുതര ആരോഗ്യ പ്രശ്നങ്ങളെക്കുറിച്ചുള്ള തിരിച്ചറിവുകൾ ഉണ്ടാവാനും വേണ്ടി നവംബർ 30 ന് നടത്തിയ നാടൻ പലഹാര മേള ശ്രദ്ധേയമായ പ്രവർത്തനമായി മാറി. ഒന്നാം ക്ലാസിലെ അധ്യാപകരുടെ നേതൃത്വത്തിൽ കുട്ടികൾ വിവിധതരം നാടൻ പലഹാരങ്ങൾ വീട്ടിൽ നിന്ന് തയ്യാറാക്കി കൊണ്ടുവരികയും ക്ലാസ് മുറികളിൽ പ്രദർശനം നടത്തുകയും ചെയ്തു. നാടൻ പലഹാരങ്ങളുടെ ഉപയോഗങ്ങളുടെ ഗുണമേന്മ വിശദീകരിക്കുകയും പലഹാരങ്ങൾ പരസ്പരം രുചിച്ച് നോക്കുകയും ചെയ്തു. പ്രധാനാധ്യാപകനായ ജയകൃഷ്ണൻ ഇ ഒന്നാം ക്ലാസിലെ ഭിന്ന ശേഷി വിദ്യാർത്ഥിയായ നാഫിഹിന് അവന്റെ ഇഷ്ട്ട പലഹാരം നൽകി കൊണ്ട് പലഹാര മേളയുടെ ഉദ്ഘാടന കർമ്മം നിർവ്വഹിച്ചു. വിദ്യാലയത്തിലെ മുഴുവൻ അധ്യാപകരും പരിപാടിയിൽ പങ്കാളികളാവുകയും ചെയ്തു.
ക്രിസ്മസ് ആഘോഷം
തോക്കാംപാറ എ എൽ പി സ്കൂളിൽ നടന്ന ക്രിസ്മസ് ആഘോഷം പ്രധാനാധ്യാപകൻ ഇ ജയകൃഷ്ണൻ ഉദ്ഘാടനം ചെയ്തു. ‘ദേ ക്രിസ്മസ് അപ്പൂപ്പൻ’ എന്ന പേരിൽ സംഘടിപ്പിച്ച ആഘോഷത്തിൽ കുരുന്നുകളും കുട്ടി അപ്പൂപ്പൻമാരും കരോൾ ഗാനങ്ങൾ പാടിയും നൃത്തം ചെയ്തും പങ്കുചേർന്നു. സ്കൂളിൽ കുട്ടികൾ ഒരുക്കിയ പ്രകൃതി സൗഹൃദ പുൽക്കൂട് ശ്രദ്ധേയമായി. എം സജിതകുമാരി, സജിമോൻ പീറ്റർ, കെ പ്രവീൺ, സി പ്രീതി, പി ബരീറ, ടി വി സുധീർകുമാർ, കെ ഫസീല എന്നിവർ പരിപാടികൾക്ക് നേതൃത്വം നൽകി.
കുട്ടി കൈത്താങ്ങ്
ജനുവരി 15 പാലിയേറ്റീവ് ദിനത്തോടനുബന്ധിച്ച് നിരാലംബരും അശരണരുമായ രോഗികൾക്കായുള്ള ധനസഹായ പദ്ധതിയുടെ ഭാഗമായി തോക്കാംപാറ എ എൽ പി സ്കൂളിലെ കുട്ടികളുടെ വിഹിതം സ്കൂൾ ലീഡർ റിജുൽ കനിവ് ഭാരവാഹികൾക്ക് നൽകി. പ്രസ്തുത ചടങ്ങിൽ കുട്ടികളെ അനുമോദിച്ച് കൊണ്ട് പ്രധാനാധ്യാപകൻ ജയകൃഷ്ണൻ മാസ്റ്റർ സംസാരിച്ചു.
അറബിക് സി.എച്ച് സ്കോളർഷിപ്പ് വിജയികൾ
മലപ്പുറം റവന്യുജില്ല സി.എച്ച് സ്കോളർഷിപ്പ് പരീക്ഷയിൽ നാലാം ക്ലാസിലെ വിദ്യാർത്ഥികളായ ഹിന റഹ്മാൻ, ഫാത്തിമ നിഹ, കെൻസ ഫാത്തിമ , ഫാത്തിമ സഫ , ഫാത്തിമ മിൻഹ എന്നീ കുട്ടികൾ മികവാർന്ന വിജയം നേടി. അറബിക് ക്ലബിന്റെ നേതൃത്വത്തിൽ നടന്ന പരിപാടിയിൽ കുട്ടികൾക്കായുള്ള ക്യാഷ് അവാർഡും സർട്ടിഫിക്കറ്റുകളും പി.ടി.എ പ്രസിഡന്റ് ബിജു കെ, സജിതകുമാരി എം, പ്രീതി സി, പ്രവീൺ കെ എന്നിവർ ചേർന്ന് നൽകി. അധ്യാപകരായ സൈഫുദ്ദീൻ.കെ, ഫൗസിയ സി പി എന്നിവർ നേതൃത്വം നൽകി. ചടങ്ങിൽ പ്രധാനാധ്യാപകനായ ജയകൃഷ്ണൻ മാസ്റ്റർ കുട്ടികളെ അഭിനന്ദിച്ച് കൊണ്ട് സംസാരിച്ചു.
റിപ്പബ്ലിക് ദിനാഘോഷം
ജനുവരി 26 ന് റിപ്പബ്ലിക് ദിനം ആഘോഷിച്ചു. രാവിലെ പ്രധാന അധ്യാപകന്റെ നേതൃത്വത്തിൽ സ്കൂൾ അങ്കണത്തിൽ ദേശീയ പതാക ഉയർത്തുകയും ദേശീയ ഗാനം, ദേശീയ ഗീതം എന്നിവ ആലപിക്കുകയും ചെയ്തു. കുട്ടികളുടെ വിവിധ കലാപരിപാടികളും മധുര പലഹാര വിതരണവും ഉണ്ടായിരുന്നു. കബ്ബ്, ബുൾബുൾ കുട്ടികളുടെ റിപ്പബ്ലിക് പരേഡ്, റിപ്പബ്ലിക് ദിന ക്വിസ് മത്സരം, പ്രസംഗ മത്സരം എന്നിവ സംഘടിപ്പിച്ചു. കൂടാതെ റിപ്പബ്ലിക് ദിന പോസ്റ്ററുകൾ നിർമ്മിക്കുകയും ചെയ്തു.
ഫെസ്റ്റോസില്ല- പ്രീ-പ്രൈമറി കലോത്സവം
തോക്കാംപാറ എ എൽ പി സ്കൂളിലെ പ്രീപ്രൈമറി ക്ലാസുകളിലെ കുട്ടികളുടെ കലാമേള ‘ഫെസ്റ്റോസില്ല’ ജനുവരി 29 ന് സ്കൂൾ ഓഡിറ്റോറിയത്തിൽ വെച്ച് നടന്നു. മേളയുടെ ഔദ്യോഗിക ഉദ്ഘാടനം പി ടി എ പ്രസിഡന്റ് കെ ബിജു നടത്തി. പ്രീപ്രൈമറി ക്ലാസുകളിലെ കുഞ്ഞുമക്കൾ അവരുടെ മികച്ച കലാപ്രകനങ്ങൾ കാഴ്ചവെച്ചു. രക്ഷിതാക്കളുടെ നിറഞ്ഞ സാന്നിധ്യം ശ്രദ്ധേയമായിരുന്നു. മത്സരത്തിൽ ആദ്യത്തെ മൂന്ന് സ്ഥാനത്ത് എത്തിച്ചേർന്ന മത്സരാർത്ഥികൾക്ക് സമ്മാനം നൽകുകയും പങ്കെടുത്ത എല്ലാ കുട്ടികൾക്കും പ്രോത്സാഹന സമ്മാനങ്ങളും നൽകി.
സ്പോർഡ്സ് ഡേ
2023 ജനുവരി 31 ന് തോക്കാംപാറ എ എൽ പി സ്കൂളിൽ ഒന്നു മുതൽ 4 വരെയുള്ള ക്ലാസുകളിലെ കുട്ടികൾക്കായി വാർഷിക സ്പോർഡ് ഡേ നടത്തി. വിദ്യാലയത്തിലെ മുഴുവൻ കുട്ടികളെയും പങ്കെടുപ്പിച്ചുകൊണ്ടുള്ള വാർഷിക കായിക മേളയുടെ ഉദ്ഘാടനം ഗവ: രാജാസ് ഹൈസ്കൂൾ പ്രധാനാധ്യാപകൻ രാജൻ മാസ്റ്റർ നിർവ്വഹിച്ചു. കായിക ഇനങ്ങളിൽ വ്യക്തിഗത നേട്ടം കൈവരിച്ച കുട്ടികൾക്കും കൂടുതൽ പോയിന്റ് നേടിയ ഗ്രൂപ്പിനും കൂടുതൽ ഇനങ്ങളിൽ ഒന്നാം സ്ഥാനം ലഭിച്ച കുട്ടികൾക്കുമെല്ലാം വാർഡ് കൗൺസിലറായ ഹസീന മണ്ടായപ്പുറം, പി ടി എ പ്രസിഡന്റ് കെ ബിജു, പ്രധാനാധ്യാപകൻ ജയകൃഷ്ണൻ ഇ എന്നിവർ സംബന്ധിച്ചു.
പാനീയകളരി
രണ്ടാം ക്ലാസിലെ 'ഞാനാണ് താരം' എന്ന പാഠഭാഗവുമായി ബന്ധപ്പെടുത്തി 2023 ജനുവരി 19 ന് 'പാനീയകളരി' നടത്തി. രണ്ടാം ക്ലാസിലെ കുട്ടികൾ വീടുകളിൽ നിന്ന് നാടൻ പാനീയങ്ങൾ നിർമ്മിച്ച് കൊണ്ടുവന്നു. കൊണ്ടുവന്ന പാനീയത്തിന്റെ നിർമ്മാണ രീതികളും പോഷണ മൂല്യവും കുട്ടികൾ തന്നെ വിശദമാക്കുകയും ചെയ്തു. നാടൻ പാനീയങ്ങൾ ഒരു ശീലമാക്കി മാറ്റേണ്ടതിന്റെ പ്രസക്തിയെ കുറിച്ച് കുട്ടികളിൽ അവബോധം സൃഷ്ടിക്കുന്നതിന് ഇത്തരം പ്രവർത്തനങ്ങൾ കൂടുതൽ പാഠഭാഗവുമായി ബന്ധിപ്പിച്ച് നടത്തേണ്ടതിന്റെ ആവശ്യകത പ്രധാനാധ്യാപകൻ ഉദ്ഘാടന പ്രസംഗത്തിൽ പറഞ്ഞു. രണ്ടാം ക്ലാസിലെ അധ്യാപകരായ സജിത കുമാരി, പ്രീതി സി, സജിമോൻ പീറ്റർ എന്നിവരുടെ നേതൃത്വത്തിലാണ് പാനീയ കളരി നടത്തിയത്.
കോൺവക്കേഷൻ സെറിമണി
പ്രീ-പ്രൈമറി ‘കോൺവക്കേഷൻ സെറിമണി’ വളരെ വിപുലമായി ആഘോഷിച്ചു. പ്രീപ്രൈമറി ക്ലാസുകളിൽ നിന്നും ഒന്നാം ക്ലാസിലേക്ക് അഡ്മിഷൻ നേടുന്ന കുട്ടികൾക്കായാണ് കോൺവക്കേഷൻ ഡേ നടത്തിയത്. പി ടി എ പ്രസിഡന്റ് ബിജു കെ അധ്യക്ഷനായ ചടങ്ങിൻ പ്രധാനാധ്യാപകൻ ജയകൃഷ്ണൻ മാസ്റ്റർ സ്വാഗത പ്രസംഗം നടത്തി. വാർഡ് കൗൺസിലർ ഹസീന മണ്ടായപ്പുറം ഉദ്ഘാടന കർമ്മം നിർവ്വഹിച്ചു. മുഖ്യാതിഥി ആയി എത്തിചേർന്ന മുൻ മലപ്പുറം ബിപിസിയും പരപ്പനങ്ങാടി ജി എൽ പി സ്കൂളിലെ പ്രധാനാധ്യാപകനുമായ ടോമി മാഷ് കുട്ടികൾക്കായി രസകരമായ ക്ലാസ് നടത്തി. ശേഷം കുട്ടികൾക്കായ് മധുരപലഹാര വിതരണവും വിവിധ പരിപാടികളും നടന്നു. പ്രീ-പ്രൈമറി കുട്ടികൾക്കായി നടത്തിയ ചടങ്ങിൽ അവതാരകരായി സ്കൂളിലെ വിവിധ ക്ലാസുകളിലെ കുട്ടികൾ തന്നെ എത്തിയത് ശ്രദ്ധേയമായി. ചടങ്ങിൽ അധ്യാപകരായ എം സജിതകുമാരി, പ്രീതി സി, പ്രവീൺ കെ, സുധീർകുമാർ ടി വി, ഫസീല കെ, ഷബ്ന, സുമയ്യ, ഷീബ, മുബഷിറ എന്നിവർ പങ്കെടുത്തു.