ഏറാമല യു പി എസ്
| ഏറാമല യു പി എസ് | |
|---|---|
| വിലാസം | |
ഏറാമല | |
| വിദ്യാഭ്യാസ ഭരണസംവിധാനം | |
| റവന്യൂ ജില്ല | കോഴിക്കോട് |
| വിദ്യാഭ്യാസ ജില്ല | വടകര |
| സ്കൂൾ ഭരണ വിഭാഗം | |
| മാദ്ധ്യമം | മലയാളം |
| അവസാനം തിരുത്തിയത് | |
| 10-03-2017 | Mayasudheer |
ഏറാമല യു.പി.സ്‌കൂള്‍ എന്ന പേരില്‍ ഔദ്യോഗികമായും നാട്ടുകാരും വിദ്യാര്‍ത്ഥികളുമെല്ലാം അല്പം ഗൃഹാതുരത്തത്തോടെ മേക്കോത്ത് സ്‌കൂള്‍ എന്ന് വിളിക്കുന്ന ഈ വിദ്യാലയത്തിന്റെ ആരംഭം കുറിക്കുന്നത് 1917ലാണ്. ഏറാമല പഞ്ചായത്തിന്റെ വടക്കെ അറ്റത്ത് കാഞ്ഞിരപ്പുഴയ്ക്ക് ഏതാണ്ട് 300 മീറ്റര്‍ അകലത്തില്‍ അക്ഷരാര്‍ത്ഥത്തില്‍ ഒരു ഗ്രാമത്തിലാണ് ഈ വിദ്യാലയം ആരംഭിക്കുന്നത്. അക്കാലത്ത് ഓര്‍ക്കാട്ടേരിയില്‍ നിന്ന് ഏറാമലയിലേക്ക് ഊടുവഴികള്‍ മാത്രമെ ഉണ്ടായിരുന്നുള്ളൂ.
ശ്രീ.പാലയാട്ട് രയരപ്പന്‍ കുറുപ്പിന്റെ മേനേജ്‌മെന്റില്‍ ഒരു ലോവര്‍ പ്രൈമറി സ്‌കൂളായി പ്രവര്‍ത്തനം ആരംഭിച്ച ഈ വിദ്യാലയത്തിന്റെ പേര് ഏറാമല ഹിന്ദു ബോയ്‌സ് സ്‌കൂള്‍ എന്നായിരുന്നു. 1952 വരെ 5ാംതരം വരെയുള്ള എല്‍.പി.സ്‌കൂളായി തുടര്‍ന്നു. 1952ല്‍ ഈ വിദ്യാലയം അപ്‌ഗ്രേഡ് ചെയ്യപ്പെടുകയും ഏറാമല ഹയര്‍ എലിമെന്ററി സ്‌കൂള്‍ എന്ന് പുനര്‍നാമകരണം ചെയ്യപ്പെടുകയും ചെയ്തു. ഏറാമല പഞ്ചായത്തിലെ ആദ്യത്തെ ഹയര്‍ എലിമെന്ററി സ്‌കൂള്‍ എന്ന നിലയില്‍ ഈ സ്ഥാപനം സമീപപ്രദേശങ്ങളിലെയെല്ലാം വിദ്യാര്‍ത്ഥികള്‍ക്ക് ഏക ആശ്രയമായിരുന്നു. അന്ന് വള്ളിക്കാടും അഴിയൂരും, കരിയാടും മാത്രമാണ് ഹയര്‍എലിമെന്ററി സ്‌കൂള്‍ ഉണ്ടായിരുന്നത്. അതുകൊണ്ട് തന്നെ കാര്‍ത്തികപ്പള്ളി, വൈക്കിലശ്ശേരി, ഓര്‍ക്കാട്ടേരി, കുന്നുമ്മക്കര, നെല്ലാച്ചേരി, ഒഞ്ചിയം തുടങ്ങിയ പ്രദേശങ്ങളിലെയെല്ലാം ജനങ്ങള്‍ക്ക് അപ്പര്‍ പ്രൈമറി വിദ്യാഭ്യാസത്തിന് ആശ്രയം ഈ വിദ്യാലയമായിരുന്നു. 1958ല്‍ കേരളത്തില്‍ നടന്ന വിദ്യാഭ്യാസ പരിഷ്‌കരണ ഭാഗമായി 8ാംതരം വരെയുള്ള ഹയര്‍ എലിമെന്ററി സ്‌കൂള്‍ എല്ലാം 7ാംതരം വരെയുള്ള അപ്പര്‍ പ്രൈമറി സ്‌കൂള്‍ ആയി മാറിയ അവസരത്തില്‍ ഈ വിദ്യാലയവും 7ാംതരം വരെയുള്ള യു.പി.സ്‌കൂളായി മാറുകയും അന്നുമുതല്‍ ഔദ്യോഗികമായി ഏറാമല യു.പി.സ്‌കൂള്‍ എന്ന് അറിയപ്പെടുകയും ചെയ്തു.
ഒരു ലോവര്‍ പ്രൈമറി വിദ്യാലയം എന്ന നിലയില്‍ നിന്ന് ഹയര്‍ എലിമെന്ററി വിദ്യാലയമാക്കി ഈ വിദ്യാലയത്തെ ഉയര്‍ത്തിക്കൊണ്ടു വന്ന പ്രവര്‍ത്തനത്തെ കുറിച്ച് ഏറാമലയിലെ മുതിര്‍ന്ന തലമുറക്കാര്‍ക്ക് പറയാന്‍ ധീരതയുടെയും സാഹസികതയുടെയും കൂട്ടായ്മയുടെയും ഒരു കഥയുണ്ട്. സ്‌കൂള്‍ അപഗ്രേഡ് ചെയ്ത് കൂട്ടാനുള്ള പ്രവര്‍ത്തനത്തിനും അത് നടപ്പിലാക്കാനുള്ള പ്രവര്‍ത്തനത്തിനും നേതൃത്വം വഹിച്ച ഈ വിദ്യാലയത്തിലെ അധ്യാപകനായിരുന്ന, പിന്നീട് വളരെക്കാലം പ്രധാന അധ്യാപക പദവി വഹിക്കുകയും 1981 ല്‍ റിട്ടയര്‍ ചെയ്ത ശേഷം ഏറാമല പഞ്ചായത്ത് പ്രസിഡണ്ട് പദവി അലങ്കരിക്കുകയും സാമൂഹ്യ രാഷ്ട്രീയ രംഗത്ത് സജീവ സാന്നിധ്യ വുമായിരുന്ന ശ്രീ.വി.കെ.കുഞ്ഞികൃഷ്ണന്‍ നമ്പ്യാര്‍ മാസ്റ്ററാണ് ഇതിലെ കഥാപുരുഷന്‍. 1952ല്‍ 5 ക്ലാസുകളും 4 അധ്യാപകരുമായി സ്‌കൂള്‍ നടത്തികൊണ്ടിരുന്ന അവസരത്തില്‍ അന്നത്തെ ജൂനിയര്‍ ഡപ്യൂട്ടി ഇന്‍സ്‌പെക്ടര്‍ ശ്രീ.കുഞ്ഞമ്പു പരിശോധനക്ക് വന്നപ്പോള്‍ കുട്ടികളുടെ എണ്ണത്തിന്റെ അടിസ്ഥാനത്തില്‍ ഹയര്‍ എലിമെന്ററി സ്‌കൂളിന് സാധ്യതകാണുകയും പിന്നീട് അനുവദിക്കപ്പെടുകയും ചെയ്തു പക്ഷേ സ്‌കൂളിനാവശ്യമായ സ്ഥലം കിട്ടിയില്ല. ഈ സ്ഥലത്തോട് ചേര്‍ന്നസ്ഥലം മറ്റൊരാളുടെ കൈവശം ആയിരുന്നു. അപ്‌ഗ്രേഡീംഗ് അനുമതി ലഭിച്ചപ്പോള്‍ തൊട്ടുചേര്‍ന്ന സ്ഥലം വിട്ടുകിട്ടാന്‍ പലരു മുഖേനേ ധാരാളം ശ്രമങ്ങള്‍ നടത്തിയെങ്കിലും ആ ശ്രമങ്ങളൊക്കെ പരാജയപ്പെടുകയായിരുന്നു. ഇക്കാരണം കൊണ്ടുതന്നെ അപ്‌ഗ്രേഡിംഗ് അനുമതി നഷ്ടപ്പെടും എന്ന ഘട്ടം വന്നപ്പോള്‍ ശ്രീ.വി.കെ കുഞ്ഞികൃഷ്ണന്‍ മാസറ്ററുടെ നേതൃത്വത്തില്‍ നാട്ടുകാര്‍ സ്‌കൂളിനോട് ചേര്‍ന്ന സ്ഥലത്ത് ഒറ്റരാത്രികൊണ്ട് ഒരു കെട്ടിടം നിര്‍മ്മിക്കുകയും നിലം നിരത്തി ചാണകം മെഴുക്കി ബോര്‍ഡും മേശയും, ബഞ്ചും എല്ലാം ഉള്ള രണ്ട് ക്ലസ് മുറികള്‍ ഉണ്ടാക്കുകയും ചെയ്തു. തലേദിവസം വൈകുന്നേരം വരെ കുട്ടികള്‍ കളിച്ച് നടന്ന സ്ഥലത്ത് രാവിലെ ആളുകള്‍ കണ്ടത്ത് ഒരു പുതിയ കെട്ടിടമാണ്. രഹസ്യമായി വളരെയകലെ കെട്ടിടനിര്‍മ്മാണത്തുനും ക്ലാസ് മുറികള്‍ക്കും ആവശ്യമായ സാധനങ്ങളൊക്കെ ഒരുക്കിയാണ് ഒറ്റരാത്രികൊണ്ട് ഈ നിര്‍മ്മാണം നടത്തിയത്.
പിറ്റേന്നുതന്നെ സീനിയര്‍ ഡപ്യൂട്ടി ഇന്‍സ്‌പെക്ടര്‍ ശ്രീ.പി.ആര്‍.പണിക്കരെ കൂട്ടിക്കൊണ്ടുവരികയും ഇന്‍സ്‌പെക്ടര്‍ കെട്ടിടം കണ്ട് തൃപ്തിപ്പെട്ട് തിരിച്ച്‌പോവുകയും ചെയ്തു. ശ്രീ.വി.കെ.കെ നമ്പ്യാരെ ഒന്നാം പ്രതിയും മാനേജരും അധ്യാപകനുമായിരുന്ന ശ്രീ.ഗോപാലന്‍ നമ്പ്യാരെ രണ്ടാം പ്രതിയുമാക്കി സ്ഥലം ഉടമ കേസ് കൊടുത്തു. പക്ഷേ ബന്ധുക്കളും നാട്ടുകാരുമൊക്കെ ഈ അതിക്രമത്തെ മനസ്സ്‌കൊണ്ട് അംഗീകരിക്കു കയാണെന്ന് വന്നപ്പോള്‍ സ്ഥലം ഉടമ മധ്യസ്ഥത്തിന് വഴങ്ങുകയും ഡപ്യൂട്ടി ഇന്‍സ്‌പെക്ടറുടെ സാന്നിധ്യത്തില്‍ നടന്ന ഒത്തുതീര്‍പ്പ് സംഭാഷണത്തിന്റെ ഫലമായി കേസ് പിന്‍വലിക്കുകയാണ് ഉണ്ടായത്.
പ്രഗല്‍ഭരും അര്‍പ്പണ ബോധമുള്ളവരുമായ അധ്യാപകരുടെ ഒരു വലിയ നിരതന്നെ ഈ വിദ്യാലയത്തിന്റെ വളര്‍ച്ചയ്ക്ക് പിന്നില്‍ പ്രവര്‍ത്തിച്ചിട്ടുണ്ട്. ശ്രീ.മഠത്തില്‍ ചന്തുക്കുറുപ്പ് ഈ വിദ്യാലയത്തില്‍ വളരെക്കാലം പ്രധാനാധ്യാകനായിരുന്നു. സര്‍വ്വശ്രീ.പാലയാട്ട് രയരപ്പക്കുറുപ്പ്, അമ്മൂച്ചീന്റെവിട കണ്ണന്‍ ഗുരുക്കള്‍, ടി.എം.കണാരന്‍ മാസ്റ്റര്‍, പി.ശങ്കരക്കുറുപ്പ്, പി.കേളപ്പക്കുറുപ്പ്, എം.കുങ്കക്കുറുപ്പ്, എം.രാമുണ്ണി നമ്പ്യാര്‍, ടി.എച്ച്. അപ്പുണ്ണിക്കുറുപ്പ്, കെ.പി.കണാരന്‍ മാസ്റ്റര്‍, കെ.ഗോവിന്ദ പ്പണിക്കര്‍, കേളു മുന്നൂറ്റന്‍, കെ.രയിരുക്കുറുപ്പ്, കെ.ഗോപാലന്‍ നമ്പ്യാര്‍, ടി.കൃഷ്ണന്‍ മാസ്റ്റര്‍, ചെമ്പ് ബാലകൃഷ്ണന്‍ നമ്പ്യാര്‍, കാവുതീയ്യന്റ വിട കൃഷ്ണന്‍ മാസ്റ്റര്‍, കേളോത്ത്കണ്ടിക്കുനി കേളപ്പന്‍ മാസ്റ്റര്‍, ദാമോദരന്‍ നായര്‍, (പണ്ഡിറ്റ് മാസ്റ്റര്‍) ഇങ്ങനെ ആദരണീയരായ യശശ്ശരീരനായ അധ്യാപകര്‍ ഈ വിദ്യാലയത്തിന്റെ ഓര്‍മ്മകളില്‍ ഇന്നും ജീവിക്കുന്നു. സര്‍വ്വശ്രീ കണ്ടക്കന്റവിട ഗോവിന്ദക്കുറുപ്പ്, മാവത്ത് കുഞ്ഞിരാമക്കുറുപ്പ്, ഇ.സൂപ്പിമാസ്റ്റര്‍, കെ.ബാലകൃഷ്ണന്‍ മാസ്റ്റര്‍, കെ.ഗോപാല കൃഷ്ണന്‍ മാസ്റ്റര്‍, കെ.രാഘവക്കുറുപ്പ്, കെ.പി.കുഞ്ഞിരാമന്‍ മാസ്റ്റര്‍, കെ.കുഞ്ഞിരാമന്‍ നമ്പ്യാര്‍, വി.വിബാലകൃഷ്ണന്‍ മാസ്റ്റര്‍, വി.വി.പൊക്കന്‍ മാസ്റ്റര്‍, കെ.കെ ഭരതന്‍, എ.പി.കുഞ്ഞിക്കണ്ണന്‍, പി.കെ.നാണു മാസറ്റര്‍, ടി.പുഷ്പവല്ലി, പി.മാധവി, സി.സി.മല്ലിക, പി.പി.കുഞ്ഞിരാമന്‍ മാസ്റ്റര്‍, വി.വി.ഏലിടീച്ചര്‍, പി ചന്ദ്രന്‍, എ.എം.ബാലമണി, എ.കുഞ്ഞമ്മദ് കുട്ടി എന്നീ അധ്യാപകര്‍ ഈ സ്‌കൂളില്‍ പലകാലങ്ങളിലായി പ്രധാന അധ്യാപക പദവി അലങ്കരിച്ചിട്ടുണ്ട്. ഈ വിദ്യാലയത്തിന്റെ സ്ഥാപക മേനേജരായിരുന്ന ശ്രീ.രയരപ്പക്കുറുപ്പിന് ശേഷം അദ്ദേഹത്തിന്റെ മകന്‍ ശ്രീ.കെ.ഗോപാലന്‍ നമ്പ്യാര്‍ മാനേജരാകുകയും 2003 ല്‍ അദ്ദേഹത്തിന്റെ മരണശേഷം ഈ വിദ്യാലത്തിലെ തന്നെ അധ്യാപകനായ ശ്രീ.സി.രാധാകൃഷ്ണന്‍മാസറ്റര്‍ മേനേജ്‌മെന്റിന്റെ ചുമതല ഏറ്റെടുക്കുകയും ചെയ്തു.
കുട്ടികളെ വിവിധ കൈത്തൊഴിലുകളില്‍ പ്രാവീണരാക്കുന്നതിന്റെ ഭാഗമായി കുട്ട, മുറം, പായ എന്നിവയുടെ നിര്‍മ്മാണം, ചകിരിപിരിക്കല്‍, നെയ്ത്ത് എന്നിവയ്ക്ക് ഇവിടെ അധ്യാപകര്‍ ഉണ്ടായിരുന്നു. വിദ്യാലയത്തിന്റെ പഴയ രേഖകള്‍ പരിശോധിക്കുമ്പോള്‍ മലസ്സിലാകുന്ന ഒരു വസ്തുത എല്ലാം പ്രാദേശിക ക്ഷേത്രോല്‍സവങ്ങല്‍ക്കും നാട്ടിപ്പണി(ഞാറ് നടല്‍) കന്നി-മകരം മാസങ്ങളിലെ കൊയ്ത്ത് എന്നിവ നടക്കുന്ന അവസരങ്ങലിലും വിദ്യാലയത്തിന് അവധി നല്‍കിയിരുന്നു. വേനല്‍ക്കാല അവധി അന്നുണ്ടായിരുന്നില്ല. ഒരണയുടെ റവന്യൂ സ്റ്റാമ്പ് ഒട്ടിച്ച് ആറുരൂപ ശമ്പളം വാങ്ങിയ പഴയ രേഖകള്‍ കണുമ്പോള്‍ അതൊരു രസകരമായ അനുഭവമാണ്.
കഴിഞ്ഞ മുപ്പതു വര്‍ഷക്കാലം കൊണ്ട് സമീപപ്രദേശങ്ങളിലെല്ലാം പുതിയ വിദ്യാലയങ്ങള്‍ ഉയര്‍ന്ന് വന്നപ്പോള്‍ ഈ സ്‌കൂളിന്റെ ആശ്രിത പ്രദേശം രണ്ടു മൂന്നു ചതുരശ്രകിലോമീറ്ററായി ചുരുങ്ങി.മാത്രമല്ല അണ്‍ എയിഡഡ് മേഖലയിലെ വിദ്യാഭ്യാസ സ്ഥാപനങ്ങളുടെ തള്ളിക്കയറ്റവും അധ്യാപകരുടെ നിലനില്‍പ്പിന്റെ ഭാഗമായി സ്‌കൂളുകള്‍ തമ്മില്‍ കുട്ടികള്‍ക്കുവേണ്ടിയുള്ള മത്സരവും കൂടിയായപ്പോള്‍ കുട്ടികളുടെ എണ്ണത്തിന്റെ കാര്യത്തില്‍ സമീപകാലത്ത് അല്പം പിന്നോട്ടടി ഉണ്ടായിട്ടുണ്ട്.
ഒരു വലിയ പ്രദേശത്തെ ഗ്രാമീണ ജനതക്ക് അക്ഷരത്തിന്റെയും, വിദ്യയുടെ, ലോകത്തേക്ക് പറക്കാന്‍ ചിറകുകള്‍ നല്‍കുകയും ഔദ്യോഗിക രംഗത്തും, സാമൂഹ്യരംഗത്തും എത്രയോ പ്രഗല്‍ഭ മതികള്‍ക്ക് ജന്മം നല്‍കുകയും ചെയ്ത ഈ 'മേക്കോത്ത്' സ്‌കൂളിന്റെ സമകാലീനപ്രവര്‍ത്തകര്‍ ഈ വിദ്യാലയത്തിന്റെ ഇന്നലെകളിലെ പാരമ്പര്യവും പ്രൗഡിയും ഉയര്‍ത്തിപ്പിടിക്കുവാനും കാത്തു സൂക്ഷിക്കാനും പ്രതിജ്ഞാ ബദ്ധരാണ്. സമൂഹം ഈ സ്ഥാപനത്തോടപ്പം എന്നും നിലകൊള്ളുമെന്ന് അഗ്രഹിക്കാം. അതിനു വേണ്ടി പ്രയത്‌നിക്കാം
ഭൗതികസൗകര്യങ്ങള്‍
അടച്ചുറപ്പുള്ളതും വൈദ്യുതീകരിച്ചതുമായ 10 ക്ലാസ്സ് മുറികള്‍,
5 കമ്പ്യൂട്ടറുകള്‍ സജ്ജീകരിച്ച ആധുനിക ലാബും സ്മാര്‍ട്ട് റൂമും
ഏറ്റവു കൂടുതല്‍ പുസ്തകങ്ങള്‍ ഉള്ള ലൈബ്രറിക്കുള്ള പുരസ്കാരം ലഭിച്ച ലൈബ്രറി
കളിസ്ഥലം, സ്കൂള്‍ബസ്സ്, ഷീ ടോയ്‌ലറ്റ്
നവീകരിച്ച പാചകപ്പുര( ഓരോ വിദ്യാര്‍ത്ഥിക്കും പ്രത്യേകം പ്രത്യേകം ഭക്ഷണപാത്രം)
വാട്ടര്‍ പ്യൂരിഫയര്‍ ഉള്‍പ്പെടെയുള്ള ശുദ്ധജലവിതരണ സംവിധാനം.
പാഠ്യേതര പ്രവര്‍ത്തനങ്ങള്‍
- സ്കൗട്ട് & ഗൈഡ്സ്
- സയന്‍‌സ് ക്ലബ്ബ്
- ഐ.ടി. ക്ലബ്ബ്
- ഫിലിം ക്ലബ്ബ്
- ബാലശാസ്ത്ര കോണ്‍ഗ്രസ്സ്.
- വിദ്യാരംഗം കലാ സാഹിത്യ വേദി.
- ഗണിത ക്ലബ്ബ്.
- സാമൂഹ്യശാസ്‌ത്ര ക്ലബ്ബ്.
- പരിസ്ഥിതി ക്ലബ്ബ്.
മുന്‍ സാരഥികള്‍
സ്കൂളിലെ മുന്‍ അദ്ധ്യാപകര്‍ :
- വി കെ കുഞ്ഞികൃഷ്ണന്‍ നമ്പ്യാര്‍
- കുങ്കക്കുറുപ്പ്
- രയരപ്പക്കുറുപ്പ്
നേട്ടങ്ങള്‍
എല്‍ എസ് എസ് / യു എസ് എസ് വിജയികള്‍
മുനീര്‍ ആര്‍
ഇ ഷംസീര്‍
സന്ധ്യ ഇ കെ
അരുണ്‍ എം
പ്രവൃത്തിപരിചയമേളയില്‍ സംസ്ഥാനതലത്തില്‍ സമ്മാനാര്‍ഹരായവര്‍
ശില്‍പ എം, ശ്രീരാഗ് സി (കുട നിര്‍മ്മാണം)
ഗായത്രി എന്‍ ആര്‍ (ലോഹത്തകിടില്‍ കൊത്തുപണി)
പ്രശസ്തരായ പൂര്‍വവിദ്യാര്‍ത്ഥികള്‍
- പാറക്കല്‍ അബ്ദുള്ള എം എല്‍ എ
- പി ബാലകൃഷ്ണക്കുറുപ്പ് ( ദേശീയ അധ്യാപക അവാര്‍ഡ് ജേതാവ്)
വഴികാട്ടി
വിദ്യാലയത്തിലേക്ക് എത്തുന്നതിനുള്ള മാര്‍ഗ്ഗങ്ങള്‍
|
{{#multimaps:11.6821472,75.5853934 |zoom=13}}