ബാപ്പുജി .എച്ച്.എസ്സ്. എസ്സ്. കൂത്താട്ടുകുളം
ബാപ്പുജി ഹയര്‍ സെക്കന്ററി സ്‌കൂള്‍, കൂത്താട്ടുകുളം
തൊഴില്‍രഹിതരായ ഒരു കൂട്ടം ചെറുപ്പക്കാരുടെ ശ്രമഫലമായി 1972-ല്‍ കൂത്താട്ടുകുളം കേന്ദ്രമാക്കി പ്രവര്‍ത്തനം തുടങ്ങിയ ഒരു സംഘടനയാണ്‌ കേരളാ എഡ്യൂക്കേഷണല്‍ സൊസൈറ്റി. 1975-ല്‍ ടി സൊസൈറ്റിയുടെ മാനേജുമെന്റില്‍ ഒരു നേഴ്‌സറി സ്‌കൂളായി പ്രവര്‍ത്തനമാരംഭിച്ച ഈ വിദ്യാലയം ഇന്ന്‌ ഒരു ഹയര്‍ സെക്കന്ററി സ്‌കൂളായിത്തീര്‍ന്നിരിക്കുന്നു. 1987-ല്‍ എസ്‌.എസ്‌.എല്‍.സി. പ്രഥമ ബാച്ച്‌ നൂറുമേനി വിജയം കൈവരിച്ച്‌ പുറത്തിറങ്ങിയതു മുതല്‍ ഈ സ്ഥാപനം പ്രശസ്‌ത വിജയം നിലനിര്‍ത്തിപ്പോരുന്നു. കൂത്താട്ടുകുളത്തെ ആദ്യത്തെ ഇംഗ്ലീഷ്‌ മീഡിയം സ്‌കൂള്‍ എന്ന ബഹുമതിയും ഈ സ്‌കൂളിനുണ്ട്‌. പ്ലസ്‌ ടുവിനും 98% വിജയം കൈവരിക്കുവാന്‍ സ്‌കൂളിനു സാധിച്ചിട്ടുണ്ട്‌. 1987 മുതല്‍ 2008 വരെ എല്ലാവര്‍ഷവും കൂത്താട്ടുകുളം സബ്‌ജില്ലാ യുവജനോത്സവത്തില്‍ ഓവറോള്‍ ചാമ്പ്യന്‍ ഷിപ്പ്‌ ലഭിക്കുന്നത്‌ ഈ സ്‌കൂളിനാണ്‌. കായികമത്സരങ്ങളിലും, വൈജ്ഞാനികമേഖലകളിലും മികച്ച പ്രകടനം കാഴ്‌ചവെയ്‌ക്കുവാന്‍ ഈ കലാലയത്തിലെ പ്രതിഭകള്‍ക്ക്‌ സാധിച്ചിട്ടുണ്ട്‌. സ്‌കൂളിന്റെ സര്‍വ്വതോമുഖമായ വളര്‍ച്ചയില്‍ അര്‍പ്പണമനോഭാവമുള്ള അദ്ധ്യാപകരുടേയും പി.റ്റി.എ യുടെയും പങ്ക്‌ ശ്ലാഘനീയമാണ്‌. ആറായിരത്തിലധികം പുസ്‌തകങ്ങളുള്ള ഗ്രന്ഥശാല, എഡ്യൂസാറ്റ്‌, ഇന്റര്‍നെറ്റ്‌ സൗകര്യങ്ങള്‍, ലാംഗ്വേജ്‌ ലബോറട്ടറി, സയന്‍സ്‌ ലബോറട്ടറി, കമ്പ്യൂട്ടര്‍ ലാബ്‌ എന്നിങ്ങനെ മിക്ക ആധുനിക സൗകര്യങ്ങളും ഇവിടെയുണ്ട്‌. കുട്ടികള്‍ക്ക്‌ സ്‌കൂള്‍ ഡെ എന്നപോലെ രക്ഷാകര്‍ത്താക്കള്‍ക്ക്‌ `സമന്വയം' എന്ന പേരില്‍ എല്ലാവര്‍ഷവും പേരന്റ്‌സ്‌ ഡെ നടത്തപ്പെടുന്നു. ഇതില്‍ രക്ഷാകര്‍ത്താക്കളുടെ കലാ കായിക മത്സരങ്ങളും, ഒടുവില്‍ `സ്‌നേഹവിരുന്നും' സംഘടിപ്പിക്കുന്നു. ഏറ്റവും പ്രായം കൂടിയ ഒരു മുത്തശ്ശനേയും, മുത്തശ്ശിയേയും തിരഞ്ഞെടുത്ത്‌ പൊന്നാട നല്‌കി ആദരിക്കുന്നു. കേരളാ എഡ്യൂക്കേഷണല്‍ സൊസൈറ്റിയുടെ കീഴില്‍ ടി സ്‌കൂള്‍ കൂടാതെ നെഴ്‌സറി സ്‌കൂളുകള്‍, സെന്‍ട്രല്‍ സോഷ്യല്‍ വെല്‍ഫെയര്‍ ബോര്‍ഡിന്റെ ധനസഹായത്താല്‍ നടത്തുന്ന ക്രഷ്‌യൂണിറ്റുകള്‍, എല്‍.പി. സ്‌കൂളുകള്‍. ഹൈസ്‌കൂള്‍ ആന്റ്‌ സീനിയര്‍ സെക്കന്ററി സ്‌കൂള്‍ (സി.ബി.എസ്‌.ഇ) എന്നിവ കേരളത്തിലുടനീളം `ബാപ്പുജി' എന്ന പേരില്‍ നടന്നുവരുന്നു. തൊഴിലാളി മുതലാളി വ്യത്യാസമില്ലാതെ, ജാതിയുടേയോ മതത്തിന്റോയോ ചേരിതിരിവ്‌ ഇല്ലാതെ മെമ്പേഴ്‌സില്‍ നിന്നു മാത്രം തിരഞ്ഞെടുക്കുന്ന ഭരണസമിതി അംഗങ്ങളാല്‍ നയിക്കപ്പെടുന്ന ഇതുപോലുള്ള ഒരു സ്ഥാപനം കേരളത്തിലെന്നല്ല ഇന്ത്യയിലും മറ്റൊന്നില്ല. സൊസൈറ്റിയുടെ സ്ഥാപകനും, ജനറല്‍ മാനേജരുമായ ശ്രീ. കെ.എം. മത്തായിയുടെ കര്‍മ്മകുശലതയും, ദീര്‍ഘവീക്ഷണവുമാണ്‌ ഈ പ്രസ്ഥാനത്തിന്റെ വിജയരഹസ്യം എന്ന്‌ നിസ്സംശയം പറയാം. ഇപ്പോള്‍ ഈ സ്‌കൂളിന്റെ പ്രിന്‍സിപ്പല്‍ ശ്രീമതി. മേരി സാമുവല്‍ ആണ്‌.