ഗവൺമെന്റ് വി. എച്ച്. എസ്. എസ്. വീരണകാവ്/വിദ്യാരംഗം
2023-2024 | 2022 വരെ | ചിത്രശാല |
മലയാളദിനാവും ഭാഷാവാരാചരണവും
ഗവ.വി.എച്ച്.എസ്.എസ് വീരണകാവിൽ നവംബർ മാസം ഒന്നാം തീയതി കേരളപ്പിറവിദിനത്തിൽ ആരംഭിച്ചു.സ്കൂൾ ഓഡിറ്റോറിയത്തിൽ നടത്തിയ വിപുലമായ മലയാളദിനാചരണം എല്ലാവർക്കും ഭാഷാസ്നേഹത്തിന്റെ നറുംനിലാവായി പരിണമിച്ചു.അന്നേദിവസം കൃത്യം 9.30 ന് ആരംഭിച്ച അസംബ്ലിയിൽ കുട്ടികളെല്ലാം വളരെ ഉത്സാഹപൂർവം പങ്കെടുത്തു. വിദ്യാരംഗം കൺവീനറും മലയാളം അധ്യാപകനുമായ ശ്രീ.രാഗേഷ് സാറും മലയാളം അധ്യാപകൻ ശ്രീ.ഉദയൻ സാറും പരിപാടികൾക്ക് നേതൃത്വം നൽകി. നിലവിളക്ക് തെളിയിച്ചുകൊണ്ട് ഹെഡ്മിസ്ട്രസ് ശ്രീമതി.സന്ധ്യടീച്ചറും പ്രിൻസിപ്പൽ ശ്രീമതി.രൂപാനായർ ടീച്ചറും സ്റ്റാഫ് സെക്രട്ടറി ശ്രീ.ഡീഗാളും സീനിയർ അസിസറ്റന്റ് ശ്രീമതി.ശ്രീജ ടീച്ചറും ചേർന്ന് മലയാള ദിനത്തിന്റെ ഉദ്ഘാടനം നടത്തി.
തുടർന്ന് നടന്ന ആശംസപ്രസംഗത്തിൽ മലയാളം അധ്യാപികയും കൂടിയായിരുന്ന ശ്രീമതി.സന്ധ്യടീച്ചർ ആലപിച്ച മലയാളത്തിലെ ഭാഷാസ്നേഹം തുളുമ്പുന്ന പാട്ടുകൾ എല്ലാവർക്കും വേറിട്ട ഒരു അനുഭവമായി മാറി.തുടർന്ന് രൂപാനായർ ടീച്ചർ ഭാഷയുടെ പ്രാധാന്യത്തെകുറിച്ച് പ്രസംഗിച്ചു. രൂപാനായർ ടീച്ചർ ഭാഷാപ്രതിജ്ഞ ചൊല്ലിക്കൊടുത്തത് കുട്ടികൾ ഏറ്റു ചൊല്ലി.
വിദ്യാരംഗം ക്ലബ് തയ്യാറാക്കിയ കൈരളിയുടെ കഥ എന്ന കൈയെഴുത്തുമാസിക ബഹു.ഹെഡ്മിസ്ട്രസ് ശ്രീമതി.സന്ധ്യടീച്ചർ പ്രീകെജി കുഞ്ഞുങ്ങൾക്ക് നൽകികൊണ്ട് പ്രകാശനം ചെയ്തുകൊണ്ട് കുഞ്ഞുനാളിലെ വായന ശീലമാക്കുന്നതിന്റെയും ഭാഷാസ്നേഹം വളർത്തുന്നതിന്റെയും പ്രാധാന്യം എല്ലാവരിലും എത്തിച്ചു.
തുടർന്ന് വിദ്യാരംഗം ക്ലബംഗങ്ങൾ ആലപിച്ച കേരളഗാനം എല്ലാവരും ആസ്വദിച്ചു.
മലയാളഭാഷയുടെ പിറവിയുടെ ഉറവിടമായ നമ്മുടെ പ്രിയ കേരളത്തെകുറിച്ച് കുട്ടികൾ ശേഖരിച്ച വിവരങ്ങൾ ഉൾപ്പെടുത്തി തയ്യാറാക്കിയ കേരളപ്പതിപ്പ് ശ്രീമതി സന്ധ്യടീച്ചർ ശ്രീമതി രൂപടീച്ചറിന് നൽകി പ്രകാശനം ചെയ്തു.തുടർന്ന് എല്ലാവർക്കും വായിക്കാനായി പതിപ്പുകൾ ലൈബ്രേറിയൻ ശ്രീമതി റെൻഷിയ്ക്ക് കൈമാറി.
എല്ലാവരിലും അക്ഷരങ്ങളുടെ ഭംഗിയും കൃത്യതയും പകരാനും കുഞ്ഞുങ്ങൾക്ക് അക്ഷരങ്ങൾ മനസ്സിലാക്കാനുമായി അക്ഷരങ്ങൾ കൊണ്ട് അലങ്കരിച്ച അക്ഷരവൃക്ഷത്തിന്റെ ഉദ്ഘാടനം അ എന്ന അക്ഷരം മരത്തിൽ തൂക്കികൊണ്ട് നിർവഹിച്ചത് സവിശേഷശ്രദ്ധയാകർഷിച്ചു.
മലയാളഭാഷാവാരാചരണം
മലയാളഭാഷാവാരാചരണത്തിന് അന്ന് തന്നെ തുടക്കമിട്ടു.പ്രൈമറി വിഭാഗം കുട്ടികൾ അക്ഷരവൃക്ഷം പൂർത്തിയാക്കി.ലൈബ്രറിയിൽ പതിപ്പ് വായിക്കാനായി പ്രോത്സാഹനം നൽകി.തുടർന്ന് ഓരാഴ്ച നീണ്ടു നിന്ന പ്രവർത്തനങ്ങൾക്ക് വിദ്യാരംഗം ക്ലബ് നേതൃത്വം നൽകി.
അതിൽ എല്ലാവരെയും ആകർഷിക്കുകയും പ്രയോജനപ്രദമെന്ന് വിലയിരുത്തപ്പെടുകയും ചെയ്ത ഒരു പ്രവർത്തനം പരകീയ പദങ്ങളുടെ ശേഖരണവും പ്രദർശനവുമായിരുന്നു.നോട്ടീസ് ബോർഡിലെ പരകീയം എന്ന പദം കണ്ട പലരും പ്രത്യേകിച്ചും സ്കൂളിൽ പല ആവശ്യങ്ങൾക്കായി കടന്നുവന്ന നാട്ടുകാരുൾപ്പെടെ ജിജ്ഞാസഭരിതരാകുകയും ഇതെന്താണെന്ന് അന്വേഷിച്ച് മലയാളഭാഷാാവാരാചരണത്തിൽ പരോക്ഷമായി പങ്കുചേരുകയും ചെയ്തു.
നാട്ട് ഭാഷാ പ്രയോഗമത്സരം കുട്ടികൾക്കിടയിൽ വേറിട്ട അനുഭവമായി മാറുക മാത്രമല്ല വീട്ടുകാരും നാട്ടുകാരും കുട്ടികളുടെ അന്വേഷത്തിൽ ഭാഗഭാക്കാവുകയും ചെയ്തത് വഴി സ്കൂളിൽ നിന്നും പുറത്തേയ്ക്ക് വാരാചരണത്തിന്റെ അറിവെത്തിക്കാനും പുതിയ തലമുറയ്ക്ക് നാട്ട് ഭാഷ് പ്രയോഗങ്ങൾ കണ്ടെത്തി രേഖപ്പെടുത്തി സൂക്ഷിക്കാനും സഹായകമായി.
ചരിത്ര-സംസാര പതിപ്പ് തയ്യാറാക്കുക വഴി കുട്ടികളിൽ നമ്മുടെ നാട്ടിന്റെ പൈതൃകം നിലനിർത്താനുള്ള ഒരു പ്രചോദനമുണ്ടായി.എല്ലാ കുട്ടികളിലും കേരളത്തെയും ഭാഷയെയും സംബന്ധിക്കുന്ന വിജ്ഞാനം ഉൾക്കൊള്ളാനും മനസിലാക്കാനും വിദ്യാരംഗം ക്ലബ് നടത്തിയ കേരളചരിത്രപ്രശ്നോത്തരി സഹായകമായി.
ഗവ.വി.എച്ച്.എസ്.എസ്,വീരണകാവിൽ നടന്നഭാഷാദിനവും ഭാഷാവാരാചരണവും വിദ്യാർത്ഥികളിലും അധ്യാപക അനധ്യാപകരിലും രക്ഷകർത്താക്കളിലും നാട്ടുകാരിലും ഭാഷാസ്നേഹത്തിന്റെ തിരികൊളുത്താനും സംസ്കാരത്തിന്റെ നന്മ നിലനിർത്താനും സഹായകമായി എന്നതിൽ വിദ്യാരംഗം ക്ലബിനും അതിന് ചുക്കാൻ പിടിക്കുന്ന മലയാളം അധ്യാപകർക്കും അവർക്കു വേണ്ട പ്രോത്സാഹനം നൽകുന്ന ഹെഡ്മിസ്ട്രസ് ശ്രീമതി.സന്ധ്യടീച്ചറിനും അഭിമാനിക്കാം.
വിദ്യാരംഗം കലാസാഹിത്യവേദി ഉദ്ഘാടനം 2022-2023
വായനയുടെ പ്രാധാന്യവും സാഹിത്യത്തിന്റെ സർഗാത്മകതയും ഉൾക്കൊണ്ട് കൊണ്ട് പ്രവർത്തിക്കുന്ന വിദ്യാരംഗം കലാസാഹിത്യവേദി 2022-2023 അധ്യതനവർഷത്തിലും ക്രിയാത്മമായ പ്രവർത്തനങ്ങളുമായി മുന്നേറുകയാണ്.ഈ വർഷത്തെ പ്രവർത്തോനോത്ഘാടനം 2022 ജൂലായ് 11 ന് സ്കൂൾ ഓഡിറ്റോറിയത്തിൽ സംഘടിപ്പിക്കുകയുണ്ടായി.ഈ സ്കൂളിലെ മുൻഅധ്യാപകനും മലയാളഭാഷാധ്യാപകനും മികച്ച വാഗ്മിയുമായ ശ്രീ.സുരേഷ് കുമാർ സാറിന്റെ നർമരസപ്രദവും വിജ്ഞാനപ്രദവുമായ പ്രസംഗം കുട്ടികളെയും അധ്യാപകരെയും ഒന്നുപോലെ രസിപ്പിച്ചു.പാടിയും ആടിയും കുഞ്ഞുങ്ങൾ മലയാളഭാഷയുടെ സൗന്ദര്യം ആസ്വദിച്ചു.
ക്ലബിന്റെ ഉദ്ഘാടനം നിലവിളക്കിൽ തിരിതെളിച്ചുകൊണ്ട് ശ്രീ.സുരേഷ് സാറും ഹെഡ്മിസ്ട്രസ് ശ്രീമതി.സന്ധ്യടീച്ചറും പ്രിൻസിപ്പൽ ശ്രീമതി.സൂസൻ വിൽഫ്രഡും ക്ലബ് കൺവീനറും മലയാളം അധ്യാപകനുമായ ശ്രീ.രാജേഷും ശ്രീ.ഉദയനും ചേർന്ന് നിർവഹിച്ചു.
![](/images/thumb/b/b0/44055_library_reading13.jpeg/300px-44055_library_reading13.jpeg)
എഴുത്തിലൂടെ പ്രബുദ്ധരാകാനും വായനയിലൂടെ ശക്തരാകാനും സാഹിത്യാഭിരുചി വളർത്തുക വഴി ക്രിയാത്മകമായ ഒരു ഭാവി തലമുറയെ വാർത്തെടുക്കാനുമായി വിദ്യാരംഗത്തിന്റെ പ്രവർത്തനങ്ങളിലൂടെ ശ്രമിച്ചു വരുകയാണ്.
എൽ.പി.വിഭാഗം കുഞ്ഞു മക്കൾക്കായി സാഹിത്യത്തിന്റെ യും കലയുടെയും വാതായനങ്ങൾ തുറന്നു കൊണ്ട് വിദ്യാരംഗം കലാ സാഹിത്യവേദിയുടെ ചുമർ പത്രിക ബഹു : എച്ച്.എം. ഉദ്ഘാടനം ചെയ്തു...
പൊതുവിവരങ്ങൾ
- വിദ്യാരംഗം കൺവീനറായി പ്രവർത്തിച്ചിരുന്നത് ശ്രീ.സുരേഷ്കുമാർ സാറാണ്.2022 മെയ് 31 ന് റിട്ടയർ ചെയ്ത ശ്രീ.സുരേഷ് സാറിന്റെ പ്രവർത്തനങ്ങൾ നന്ദിയോടെ സ്മരിക്കുന്നു.നിലവിൽ ശ്രീ.രാജേഷ് സാറാണ് കൺവീനർ.
- കുട്ടികളിലെ സാഹിത്യാഭിരുചി വളർത്താനായുള്ള പ്രവർത്തനങ്ങൾ
പ്രധാന പ്രവർത്തനങ്ങൾ
സ്വാതന്ത്ര്യത്തിന്റെ ചുവരെഴുത്ത്
ഗവ: വി.എച്ച്.എസ് എസ് വീരണകാവ് ൽ വിദ്യാരംഗം കലാസാഹിത്യ വേദി ഒരുക്കിയ സ്വാതന്ത്ര്യത്തിന്റെ ചുവരെഴുത്ത് സ്വാതന്ത്ര്യത്തെക്കുറിച്ചുള്ള അവരവരുടെ കാഴ്ചപ്പാട്, സ്വാതന്ത്യദിനസന്ദേശം, സ്വാതന്ത്ര്യ പ്രതീക്ഷകൾ എന്നിവ തുറന്നെഴുതാനുള്ള വേദിയായ ഈ പരിപാടിയിൽ നാട്ടുകാർ, ജനപ്രതിനിധികൾ, രക്ഷിതാക്കൾ, പൂർവ്വവിദ്യാർത്ഥികൾ, നമ്മുടെ സ്കൂൾ വിദ്യാർത്ഥികൾ എന്നിവർ സന്ദേശങ്ങൾ കോറിയിട്ടു.
കർഷകദിനാഘോഷം
കർഷകദിനവുമായി ബന്ധപ്പെട്ട് വിദ്യാരംഗം കുട്ടികൾ കാർഷിക വിശേഷങ്ങൾ കോർത്തിണക്കി ഒരു കർഷകദിനപതിപ്പ് തയ്യാറാക്കി.മാത്രമല്ല കുട്ടികൾ കർഷകദിന പോസ്റ്റർ പ്രദർശനവും നടത്തി.
ലൈബ്രറി വീടുകളിലേയ്ക്ക്
ലോൿഡൗണിൽ കുഞ്ഞുങ്ങളിലുണ്ടായ വിരസതയും നൈരാശ്യവും തിരിച്ചറിഞ്ഞുകൊണ്ട് അവരെ വായനയുടെ മാസ്മരികലോകത്തെത്തിക്കാനും വായനയിലൂടെ അതിജീവനം നൽകാനുമായി ഏറ്റെടുത്ത പ്രവർത്തനമാണിത്.കുട്ടികൾക്ക് വീടുകളിൽ പുസ്തകം എത്തിക്കുന്നു.കൂടുതലറിയാനായി ക്ലിക്ക് ചെയ്യുക
സർഗം
കുഞ്ഞുങ്ങളുടെസർഗാത്മകകഴിവുകൾ പരിപോഷിപ്പിക്കുന്നതാനായുള്ള വേദി.കാവ്യാലാപനം,കഥ,കവിത,അഭിനയം ഇവ പരിപോഷിപ്പിക്കുന്നു.
രചനാശില്പശാല
ശ്രീ.ബിജു ബാലകൃഷ്ണൻ ഉദ്ഘാടനം ചെയ്ത രചനാശില്പശാല കുട്ടികൾക്ക് പുത്തൻ അനുഭവം പകർന്നു നൽകി.കുട്ടികളുടെ രചനകൾക്കായി എഴുത്താണി സന്ദർശിക്കാൻ മറക്കല്ലേ!!
ഒരു കുട്ടി ഒരു പുസ്തകം
ഈ വർഷം ലക്ഷ്യം വച്ചിരിക്കുന്ന ഒരു പ്രവർത്തനമാണിത്.കൂടുതൽ പുസ്തകങ്ങൾ കൂടുതൽ കുട്ടികളിൽ നിന്നും ലൈബ്രറിയിലേയ്ക്ക് എത്തിക്കുക,അങ്ങനെ ഒരു വായനയുടെ ലോകം പടുത്തുയർത്തുക എന്നതാണ് ലക്ഷ്യം.
-
ദേവിക വായനാദിനമത്സരത്തിലെ സമ്മാനം ഏറ്റുവാങ്ങുന്നു
-
നസിയ സമ്മാനം ഏറ്റുവാങ്ങുന്നു
-
കാർഷികമേള -നാടൻപാട്ട്