കെ കെ കെ വി എം എൽ പി എസ് പൊത്തപ്പള്ളി/ചരിത്രം

ആലപ്പുഴ ജില്ലയിൽ  കാർത്തികപ്പള്ളി താലൂക്കിൽ കുമാരപുരം ഗ്രാമ പഞ്ചായത്തിൽ സ്ഥിതിചെയ്യുന്ന കേരള കാളിദാസ കേരളവർമ്മ മെമ്മോറിയൽ എൽപി സ്കൂൾ  ഈ പഞ്ചായത്തിലെ പ്രമുഖ വിദ്യാലയമാണ്. മയൂര സന്ദേശത്തിൻ്റെ കർത്താവായ ശ്രീ കേരളവർമ്മ വലിയകോയിത്തമ്പുരാൻ്റെ നാമധേയത്തിൽ അറിയപ്പെടുന്ന  ഈ വിദ്യാലയത്തിൻ്റെ സ്ഥാപകൻ ദിവംഗതനായ ശ്രീമാൻ ജി പി മംഗലത്ത് മഠമാണ്. തൻറെ പ്രദേശത്തിൻ്റെ പിന്നോക്കാവസ്ഥ മനസ്സിലാക്കി  വിദ്യാഭ്യാസത്തിലൂടെ സാമൂഹ്യ പുരോഗതി ആർജ്ജിക്കുവാൻ ഉള്ള അദ്ദേഹത്തിൻ്റെ കർമ്മ ഫലമായാണ് ഈ വിദ്യാലയം  പിറവിയെടുത്തത്.

      കുമാരപുരം പഞ്ചായത്ത് പ്രസിഡൻ്റ്,കേരള നിയമസഭാംഗം, പാർലമെൻറ് അംഗം, ദേവസ്വം ബോർഡ് പ്രസിഡൻ്റ്, കയർ ബോർഡ് ചെയർമാൻ എന്നിങ്ങനെ വ്യത്യസ്ത മേഖലകളിൽ  ശ്രീ ജി പി മംഗലത്ത് മഠം  വ്യക്തിമുദ്ര പതിപ്പിച്ചിട്ടുണ്ട്. 1960 മെയ് മാസത്തിൽ പട്ടം താണുപിള്ള മുഖ്യമന്ത്രിയായിരുന്ന  കാലത്താണ് ഈ വിദ്യാലയം ആരംഭിക്കാനുള്ള അനുമതി ലഭിച്ചത്. 1960 ജൂൺ മാസത്തിൽ പ്രൈമറി വിഭാഗം  പ്രവർത്തനമാരംഭിച്ചു. ആദ്യമായി നിയമിതനായ അധ്യാപകൻ അന്തരിച്ച ശ്രീ പരമേശ്വരൻ നായർ ആയിരുന്നു. 1966 ൽ ഈ വിദ്യാലയം ഹൈസ്കൂളായി ഉയർത്തപ്പെട്ടു.

      1974 - 75 കാലയളവിൽ  ഹൈസ്കൂൾ വിഭാഗത്തിൽ നിന്നും ലോവർ പ്രൈമറി വിഭാഗം വേർപെടുത്തി പ്രവർത്തനമാരംഭിച്ചു. ഇതിൻ്റെ  പ്രഥമ അധ്യാപകൻ ആയി നിയമിതനായത് ഈ വിദ്യാലയത്തിലെ ആദ്യ അധ്യാപകനായ ശ്രീ പരമേശ്വരൻ നായർ ആയിരുന്നു.

    1994 ജൂൺ 16ന് സ്കൂൾ സ്ഥാപകനും  മാനേജരുമായിരുന്ന ശ്രീ ജി പി മംഗലത്ത് മഠത്തിൻ്റെ നിര്യാണത്തെത്തുടർന്ന് അദ്ദേഹത്തിൻ്റെ  മകനായ ഡോക്ടർ ജി. ചന്ദ്രസേനൻ മാനേജർ പദവി വഹിക്കുന്നു. 2008_2009  അധ്യയനവർഷത്തിൽ പ്രീപ്രൈമറി വിഭാഗവും 2014 വർഷം  ഹയർ സെക്കണ്ടറി വിഭാഗവും പ്രവർത്തനമാരംഭിച്ചു. ഈ വിദ്യാലയത്തിൻ്റെ സുവർണജൂബിലി 2010 ൽ ആഘോഷ പൂർവ്വം കൊണ്ടാടി.