വിമല ഹൃദയ എച്ച്.എസ്. വിരാലി/വിജയാഘോഷം

മികവ് - 2010

ഗവ.ഹയർ സെക്കന്ററി സ്ക്കൂൾ, അഡൂർ
പി.ഒ. ഉർഡൂർ കാസറഗോ‍ഡ് - 671 543.
(വിദ്യാഭ്യാസ ജില്ല : കാസറഗോഡ്)
ഹെഡ്മാസ്റ്റർ : ശ്രീ.കേശവപ്രസാദ്. എസ്.
പി.ടി.എ. പ്രസിഡന്റ് : ശ്രീ. കൃഷ്ണ നായക്ക് ബി.
കുട്ടികളുടെ എണ്ണം LP/UP/HS : 1334 (എൽ.പി.-259, യു.പി.-426, ഹൈസ്ക്കൂൾ-649) HSS : 209

മാധ്യമം : മലയാളം, കന്നഡ

     കർണാടക സംസ്ഥാനവുമായി അതിർത്തി പങ്കിടുന്ന ദേലംപാടി ഗ്രാമപഞ്ചായത്തിന്റെ ഹൃദയ ഭാഗത്തായി സ്ഥിതി ചെയ്യുന്ന ഒരു സർക്കാർ വിദ്യാലയമാണ് ഗവ. ഹയർ 
സെക്കന്ററി സ്ക്കൂൾ , അഡൂർ. മദ്രാസ് ഗവൺമെന്റിന്റെ കീഴിലുണ്ടായിരുന്ന മലബാർ ഡിസ്ട്രിക്ററ് ബോർഡ് ലോവർ എലിമെന്ററി സ്ക്കൂളായി 1929ൽ കന്നഡ പഠന 
മാധ്യമമായി സ്വീകരിച്ചു കൊണ്ട് ഈ വിദ്യാലയം ആരംഭിച്ചു . അതിനും മുമ്പ് ഗുരുകുലസമ്പ്രദായത്തിൽ പഠനം നടന്നിരുന്നു എന്നാണറിവ്.

ചരിത്രത്താളുകളിലൂടെ......... 

1929 :മദ്രാസ് ഗവൺമെന്റിന്റെ കീഴിലുള്ള മലബാർ ഡിസ്ട്രിക്റ്റ് ബോർഡ്, ലോവർ

         എലിമെൻററി സ്ക്കൂളായി വിദ്യാലയം ആരംഭിച്ചു.

1953 : ഹയർ എലിമെന്ററി സ്ക്കൂളായി അപ്ഗ്രേഡ് ചെയ്തു.
1956 : കേരളപിറവിയോടെ സ്ക്കൂൾ കേരള ഗവൺമെന്റിന്റെ കീഴിൽ വന്നു
1962 : ഹൈസ്ക്കൂളായി അപ്ഗ്രേഡ് ചെയ്തു.
1965 : ആദ്യത്തെ എസ്.എസ്.എൽ.സി. ബാച്ച് പരീക്ഷയെഴുതി.
1969 : മലയാളം മീഡിയം ആരംഭിച്ചു.
1980 : ആദ്യത്തെ മലയാളം മീഡിയം എസ്.എസ്.എൽ.സി. ബാച്ച് പരീക്ഷയെഴുതി.
2003 : ഹൈസ്ക്കൂളിൽ കംപ്യൂട്ടർ വിദ്യാഭ്യാസം ആരംഭിച്ചു
2004 : ഹയർ സെക്കന്ററി സ്ക്കൂളായി അപ്ഗ്രേഡ് ചെയ്യുകയും പ്ലസ് വൺ കൊമേഴ്സ്

          ബാച്ച്  ആരംഭിക്കുകയും ചെയ്തു.

2005 : സ്ക്കൂളിന്റെ പ്ലാറ്റിനം ജൂബിലി വിവിധപരിപാടികളോടെ ആഘോഷിച്ചു.
2007 : ഹയർ സെക്കന്ററിയിൽ ഹ്യുമാനിറ്റീസ് ബാച്ച് ആരംഭിച്ചു.
2008 :സ്ക്കൂളിന് ബ്രോഡ്ബാന്റ് ഇന്റർനെറ്റ് കണക്ഷൻ ലഭിച്ചു.
2009 :സ്ക്കൂൾ കുമ്പള ഉപജില്ലാ സ്ക്കൂൾ കലോത്സവത്തിന് ആതിഥേയത്വം വഹിച്ചു.
2010 :പ്രൈമറി വിഭാഗത്തിനായി പ്രത്യേക കമ്പ്യൂട്ടർ ലാബ് പ്രവർത്തനമാരംഭിച്ചു.
അഡൂർ എന്ന പേരിന് പിന്നിലെ ഐതിഹ്യം
അർജുനൻ ശിവനെ തപസ്സ് ചെയ്ത് 'പശുപതാസ്ത്രം' നേടുന്ന സംഭവം മഹാഭാരതത്തിൽ വർണിച്ചിട്ടുണ്ട്. പശുപതാസ്ത്രം എന്ന അമൂല്യവും അപൂർവ്വവുമായ ആയുധം നൽകുന്നതിന് മുമ്പ് അർജുനനെ പരീക്ഷിക്കാനായി ഒരു നാടകം കളിക്കാൻ ശിവൻ തയ്യാറാകുന്നു. 'ശബരശങ്കരവിലാസം' എന്ന പേരിൽ പ്രശസ്തമായ ഈ കഥയിൽ ശിവൻ പല വേഷങ്ങളിലുമെത്തി അർജുനനെ പ്രകോപിപ്പിക്കുന്നുണ്ട്.അവസാനം കാട്ടാളവേഷത്തിലെത്തിയ ശിവനുമായി അർജുനൻ മല്ലയുദ്ധത്തിൽ ഏർപ്പെടുന്നു.ഇവർ പരസ്പരം ഉരുണ്ടുമറിഞ്ഞ സ്ഥലം ഉർഡൂർ എന്നറിയപ്പെട്ടു. (തുളു ഭാഷയിൽ 'ഉരുഡാഡിത ഊരു' എന്നാൽ ഉരുണ്ടുമറിഞ്ഞ സ്ഥലം എന്നർത്ഥം). ഉർഡൂർ പിന്നീട് അഡൂർ ആയിത്തീർന്നു. ഇവിടത്തെ പോസ്റ്റ് ഓഫീസ് ഇപ്പോഴും ഉർഡൂർ തന്നെയാണ്. ഈ ഐതിഹ്യവുമായി ബന്ധപ്പെട്ട് അഡൂരിന് ചുറ്റുപാടുമുള്ള ഒരുപാട് സ്ഥലങ്ങൾക്ക് പേര് വന്നിട്ടുണ്ട്.
സാമൂഹിക ചുറ്റുപാട്
ദേലംപാടി ഗ്രാമപഞ്ചായത്തിന്റെ ആസ്ഥാനവും മറ്റു സർക്കാർ ഓഫീസുകളും സ്ക്കൂളിന്റെ അടുത്തായാണ് നിലകൊള്ളുന്നത്. 'അഡൂർ ശ്രീ മഹാലിംഗേശ്വരക്ഷേത്രം' എന്ന പേരിൽ പ്രശസ്തമായ ഒരു പുണ്യപുരാതന ശിവക്ഷേത്രം അഡൂരിലുണ്ട്. മൂന്ന് ഭാഗങ്ങളിൽ റിസർവ് വനങ്ങളും നാലാമത് ഭാഗത്ത് പയസ്വിനി പുഴയുമുള്ളതാണ് അഡൂർ ഗ്രാമത്തിന്റെ പ്രത്യേകത. ഇവിടെയെത്തുന്ന അന്യജില്ലക്കാരിൽ പലർക്കും വയനാട്ടിലെത്തിയ ഒരു പ്രതീതിയാണ് ഉണ്ടാകുക. പയസ്വിനിപ്പുഴയ്ക്ക് പള്ളങ്കോട് കടവിൽ പാലം യാഥാർത്ഥ്യമാകുന്നത് വരെ അഡൂർ ഗ്രാമം തീർത്തും ഒറ്റപ്പെട്ട അവസ്ഥയിലായിരുന്നു. സ്ഥിരനിയമനം ലഭിച്ച അദ്ധ്യാപകർ പോലും പുഴക്കടവുവരെ വന്ന് തിരിച്ചുപോകുന്ന അവസ്ഥയാണ് ഉണ്ടായിരുന്നത്. പാലം വന്നതോടെ കുറെയധികം മാറ്റങ്ങൾ വന്നുതുടങ്ങി. നല്ലൊരുശതമാനം കുട്ടികൾ തൊട്ടടുത്ത കർണാടകയിൽ താമസിക്കുന്നവരാണ്. അതുകൊണ്ട് തന്നെ ഇവിടത്തെ ജനങ്ങളുടെ ജീവിത രീതികളിൽ വിവിധ സംസ്കാരങ്ങളുടെ സ്വാധീനം കാണാവുന്നതാണ്.

        രക്ഷിതാക്കളിൽ ഭൂരിഭാഗവും കൂലിതൊഴിലാളികൾ, ബീഡിതൊഴിലാളികൽ, കർഷകതൊഴിലാളികൾ തുടങ്ങിയ സാമ്പത്തിക ഭദ്രതയോ സ്ഥിരവരുമാനമോ ഇല്ലാത്ത വിഭാഗങ്ങളിൽ പെട്ടവരാണ്. മറാഠി, തുളു, കന്നട, മലയാളം, കൊങ്കണി എന്നിവ മാതൃഭാഷയായിട്ടുള്ളവർ ഇവിടെയുണ്ട്.മലയാളം സംസാരിക്കുന്നവരിൽ ഏറിയ പങ്കും ഉപയോഗിക്കുന്നത് പ്രാദേശികമായും രൂപപ്പെട്ടിട്ടുള്ള മലയാളമാണ്. ഹയർ സെക്കന്ററി വിഭാഗത്തിലെ കുട്ടികൾ ഉൾപ്പെടെ മൊത്തം 1543 കുട്ടികളാണ് ഈ വിദ്യാലയത്തിൽ പഠിക്കുന്നത്. ഇതിൽ 15% SC/ST വിഭാഗത്തിൽ പെടുന്നവരും 15% മറാഠി വിഭാഗത്തിൽ പെടുന്നവരുമാണ്.40% മുസ്ലീം വിഭാഗവും 28% മറ്റ് പിന്നോക്ക വിഭാഗത്തിൽ പെടുന്നവരുമാണ് . 2% മാത്രമെ മുന്നോക്കവിഭാഗത്തിൽ പെടുന്നവരായിട്ടുള്ളു.

ഭൗതിക സാഹചര്യങ്ങൾ
അഞ്ചര ഏക്കർ ഭൂമിയിലാണ് വിദ്യാലയം സ്ഥിതി ചെയ്യുന്നത്.പ്രധാന ക്യാമ്പസിൽ നിന്നും അര കിലോമീറ്റർ മാറി നാലു ക്ലാസ് മുറികളുള്ള ഒരു കെട്ടിടത്തിലാണ് 3,4 ക്ലാസുകൾ പ്രവർത്തിക്കുന്നത്. ഹൈസ്കൂളിനു മൊത്തം 34 ക്ലാസ് മുറികളും ഹയർ സെക്കന്ററിക്ക് 5 ക്ലാസ് മുറികളുമുണ്ട്. മുഴുവൻ ക്ലാസ്സ് മുറികളും ഐടി @സ്കൂളിന്റെയും SSA യുടെയും സഹായത്തോടെ വൈദ്യുതീകരിച്ച് ICT അധിഷ്ഠിത പഠന പ്രവർത്തനങ്ങൾക്ക് അനുയോജ്യമാക്കിയിട്ടുണ്ട്.
ലൈബ്രറി
സ്കൂളിലെ പൂർവ്വ വിദ്യാർത്ഥിയും അമേരിക്കയിൽ ഡോക്ട്ടറുമായ ഡോ.അമാനുള്ളയും സഹോദരന്മാരും ചേർന്ന് അവരുടെ പിതാവായ ബി. എസ് .മുഹമ്മദ് ഹാജിയുടെ സ്മരണാർത്ഥം നിർമ്മിച്ചു നൽകിയ പ്ലാറ്റിനം ജൂബിലി കെട്ടിടത്തിലാണ് ലൈബ്രറി പ്രവർത്തിക്കുന്നത്. ആറായിരത്തോളം പുസ്തകങ്ങൾ ലൈബ്രറിയിലുണ്ട് .കന്നഡ, മലയാളം മാധ്യമങ്ങളിൽ നിന്നായി രണ്ട് വീതം അദ്ധ്യാപകർക്കാണ് ലൈബ്രറിയുടെ ചുമതല. പുസ്തകങ്ങളെടുക്കുന്ന മുറക്ക് അതിന്റെ പേരും വിശദവിവരങ്ങളും സ്ക്കൂൾ ഡയറിയിൽ കുറിച്ചുവെക്കുന്നു .ജൂണിൽ തന്നെ സ്ക്കൂളിലെ 1മുതൽ +2വരെയുള്ള മുഴുവൻ കുട്ടികൾക്കും സ്ക്കൂൾ പ്രവർത്തനങ്ങളുമായി ബന്ധപ്പെട്ട രേഖപ്പെടുത്തലുകൾക്കായി 'സ്റ്റുഡന്റ് ഹാന്റ്ബുക്ക് '(സ്ക്കുൾ ഡയറി) വിതരണം ചെയ്യുന്നുണ്ട് . ഓരോ കുട്ടിയുടേയും ലൈബ്രറി ഉപയോഗവും മറ്റ് പാഠ്യ പഠ്യേതര പ്രവർത്തനങ്ങളിലെ മികവും വിലയിരുത്തുന്നതിനുള്ള ഒരു രേഖയായി 'സ്റ്റുഡന്റ് ഹാന്റ്ബുക്ക് 'മാറുന്നു.
സയൻസ് ലാബ്
ശാസ്ത്രവുമായി ബന്ധപെട്ട വിവിധ പഠനപ്രവർത്തനങ്ങളിലേർപ്പെടാൻ കുട്ടികളെ പരമാവധി സഹായിക്കുന്ന രീതിയിലാണ് ലാബ് സജ്ജീകരിച്ചിട്ടുള്ളത് .വസ്തുക്കളെ ചൂടാക്കിയും കത്തിച്ചും നടത്തുന്ന പരീക്ഷണങ്ങൾക്കായി ലാബിലേക്കായി ഗ്യാസ് കണക്ഷൻ എടുത്തിട്ടുണ്ട് .വിവിധ പഠന പ്രവർത്തനങ്ങളുടെ ഭാഗമായുണ്ടാകുന്ന ഉൽപന്നങ്ങൾ ലാബിൽ പ്രദർശിപ്പിക്കുന്നുണ്ട്. ലാബിന്റെ പരിപാലനത്തിൽ സയൻസ് ക്ലബ് അംഗങ്ങളായ കുട്ടികൾ പ്രത്യേക ശ്രദ്ധ പുലർത്തുന്നു.
കമ്പ്യൂട്ടർ ലാബ്
ഹൈസ്ക്കൂളിനും യു. പി. വിഭാഗത്തിനും വെവ്വേറെ കമ്പ്യൂട്ടർ ലാബുകളുണ്ട്. ഹൈസ്ക്കുളിൽ പ്രവർത്തനക്ഷമമായ 17 കമ്പ്യൂട്ടറുകളും യുപിയിൽ 6 കമ്പ്യുട്ടറുകളുമുണ്ട്. ഹൈസ്ക്കൂൾ ലാബിലെ കമ്പ്യൂട്ടറുകളും ഓഫീസ്/ മൾട്ടിമീഡിയ റൂം എന്നിവിടങ്ങളിലെ കമ്പ്യൂട്ടറുകളും ലാൻ വഴി ബന്ധിപ്പിച്ചിട്ടുണ്ട് . എല്ലാത്തിലും ബ്രോഡ്ബാന്റ് ഇന്റർനെറ്റ് സൗകര്യം ലഭ്യമാണ് . ലാബിൽ ഹാർഡ് വെയർ ഘടകങ്ങളുടെ ഒരു പ്രദർശനവും ഒരുക്കിയിട്ടുണ്ട് .എൽ.പി. വിഭാഗത്തിലെ കുട്ടികൾക്ക് ഹൈസ്ക്കൂൾ ലാബിലെ സൗകര്യം പ്രയോജനപ്പെടുത്തി ആഴ്ച്ചയിൽ ഒരിക്കൽ കമ്പ്യൂട്ടറിൽ പരിശീലനം നൽകുന്നു. പ്രധാനമായുംഉബുണ്ടു ഒപ്പറേറ്റിംഗ് സിസ്റ്റത്തിൽ ഉൾപ്പെടുത്തിയിരിക്കുന്ന വി‌ദ്യാഭ്യാസപ്രാധാന്യമുളള സോഫ്റ്റ് വെയറുകൾ ഉപയോഗപ്പെടുത്തിയാണ് ഈ പരിശീലനം.

     മൾട്ടിമീഡിയാ  ക്ലാസ്സ്  റും

                മൾമീഡിയാ  ക്ലാസ്സ്  മുറിയിൽ   ഇൻറർനെറ്റ്  സൗകര്യമുളള  കമ്പൂട്ടർ,  ഡിജിറ്റൽ  പ്രോജക്റ്റർ ,ഡിവിഡി  പ്ലെയർ ,വിക്ടേഴ്സ്   ചാനൽ പ്രോജക്റ്റർ  വഴി  പ്രദർശിപ്പിക്കുവാനുളള  സൗകര്യം  എന്നിവ  ഒരുക്കിയിട്ടുണ്ട്. പഠനവുമായി  ബന്ധപ്പെട്ട  സിഡികളുടെ  ചെറിയൊരു  ശേഖരവുമുണ്ട്.വൈദ്യുതി  ഇല്ലാതാകുന്ന  സമയത്ത്  പ്രവർത്തിപ്പിക്കുന്നതിനായി  ജനറേറ്ററുമുണ്ട്.

      സ്കൂൾ  ഓഡിറ്റോറിയം 

ഗ്രാമ-ജില്ലാപഞ്ചായത്തുകളുടെ  സഹകരണത്തോടെ  15  ലക്ഷം  രൂപയോളം  ചെലവഴിച്ച്   നിർമിച്ച ജില്ലയിലെ തന്നെ മികച്ച  സ്കൂൾ   ഓഡിറ്റോറിയങ്ങളിൽ ഒന്നാണ് സ്കൂളിനുള്ളത്. സ്കൂളുമായും മറ്റ് സർക്കാർ ഏജൻസികളുമായും ബന്ധപ്പെട്ട വിവിധ പരിപാടികൾ ഈ ഓഡിറ്റോറിയത്തിലാണ് സംഘടിപ്പിക്കാറുള്ളത്. സ്കൂൾ അസംബ്ലി ചേരുന്നതും ഇവിടെ വെച്ചാണ്. ഉച്ചക്കഞ്ഞി കഴിക്കുന്നതിനായും കുട്ടികൾ ഇതിനെ ഉപയോഗപ്പെടുത്തുന്നു. 

 സ്റ്റേജ്

സ്കൂളിലെ പൂർവവിദ്യാർത്ഥിയും ഇപ്പോൾ അമേരിക്കയിൽ ഡോക്ടറുമായ ഡോ. അമാനുള്ള അദ്ദേഹത്തിന്റെ അകാലത്തിൽ പൊലിഞ്ഞുപോയ മകൾ നടാഷയുടെ സ്മരണയ്ക്കായി നിർമിച്ചു നൽകിയ സ്റ്റേജ് സ്കൂളിനൊരു മുതൽക്കൂട്ടാണ്.
മഴവെള്ളസംഭരണി
മൂന്നരലക്ഷം ലിറ്റർ സംഭരണശേഷിയുള്ള മഴവെള്ളസംഭരണി ജില്ലാപഞ്ചായത്തിന്റെ സഹകരണത്തോടെ 533000/- രൂപ ചിലവഴിച്ചാണ് നിർമ്മിച്ചത്. സ്ക്കൂളിലെ രണ്ട് പ്രധാന കെട്ടിടങ്ങളുടെ മേൽക്കൂരയിൽ നിന്നുംഒഴുകിവരുന്ന ‌‌ജലം ഒരു ശേഖരണ ചേമ്പറിലെത്തിച്ച് അവിടെ നിന്നും വിവിധ വലിപ്പത്തിലുള്ള മണലും ജല്ലിയും നിറച്ച ഫിൽട്ടറിങ്ക് ചേമ്പറിലേക്ക് കടത്തിവിടുകയും ഇതിലുടെ അരിച്ചിറങ്ങുന്ന വെള്ളം സംഭരണിയിൽ ശേഖരിക്കപ്പെടുകയും ചെയ്യുന്നു. കൂടതൽ ശുചീകരണത്തിനായി നിശ്ചിത ഇടവേളകളിൽ ബ്ലീച്ചിംഗ് പൗഡർ ചേർക്കുന്നുണ്ട്. ടാങ്കിൽ നിന്നും ഫെബ്രവരി / മാർച്ച് മാസങ്ങളിലാണ് പ്രധാനമായും ജലം പമ്പ് ചെയ്ത് ഉപയോഗിക്കുന്നത്.
ടോയ് ലെറ്റ്
പെൺ കുട്ടികൾ, ആൺ കുട്ടികൾ, സ്തീജീവനക്കാർ, പുരുഷജീവനക്കാർ എന്നിവർക്ക് പ്രത്യേകം പ്രത്യേകം ടോയ് ലെറ്റ് സൗകര്യങ്ങളുണ്ട്. പെൺകുട്ടികൾക്കായി നാല് ഗേൾ ഫ്രണ്ട്ലി ടോയ് ലെറ്റുകളുമുണ്ട്.
പഠനപ്രവർത്തനങ്ങൾ
അദ്ധ്യാപക ശാക്തീകരണ പരിപാടി, സ്റ്റാഫ് കൗൺസിൽ, SRG, സബ്ജക് ട് കൗൺസിലുകൾ എന്നിവയിലെ ചർച്ചകളുടെയും നിർദ്ദേശങ്ങളുടെയും തീരുമാനങ്ങളുടെയും അടിസ്ഥാനത്തിൽ‌ സ്കൂളിലെ ഭൗതിക സാഹചര്യങ്ങളെ പരമാവധിപ്രയോജനപ്പെടുത്തി പുതിയ ബോധനരീതിയിലധിഷ്ഠിതമായാണ് ക്ലാസ്സ് റൂം പ്രവർത്തനങ്ങൾ ആസൂത്രണം ചെയ്യുന്നത്. പഠന പ്രവർത്തനങ്ങളുടെ ഫലമായുണ്ടാകുന്ന ഉല്പന്നങ്ങൾ ക്ലാസ്സ് മുറികളിൽ പ്രദർശിപ്പിക്കുന്നു. പ്രൈമറി ക്ലാസ്സുകളിൽ ഓരോ കുട്ടിയുടെയും പോർട്ട്ഫോളിയോ ക്ലാസ്സ് മുറികളിൽ തന്നെ സൂക്ഷിക്കുന്നുണ്ട്. കൃത്യമായ ഇടവേളകളിൽ CPTA യോഗം ചേരുകയും കുട്ടികളുടെ പഠനപുരോഗതി വിലയിരുത്തുകയും പ്രശ്നമേഖലകൾ കണ്ടെത്തി പരിഹാരമാർഗ്ഗങ്ങൾ നിർദ്ദേശിക്കുകയും ചെയ്യുന്നു. പ്രോജക്റ്റ്, അസൈൻമെന്റ്, ശേഖരണം, പരീക്ഷണങ്ങൾ എന്നിവ ഓരോ വിഷയവുമായി ബന്ധപ്പെട്ടും അനുയോജ്യമായ രീതിയിൽ നടക്കുന്നുണ്ട്.

   ലഭ്യമായ ICT ഉപകരണങ്ങളെയും സംവിധാനങ്ങളെയും പരമാവധി പ്രയോജനപ്പെടുത്തുന്നതിനായി മുഴുവൻ ക്ലാസ്സ് മുറികളും വൈദ്യുതീകരിച്ച് ചുമരുകളിൽ സ്ക്രീൻ സംവിധാനം  ഏർപെടുത്തിയിട്ടുണ്ട് .ഇൻർനെറ്റ്, ബ്ലോഗിംഗ്, വിക്ടേഴ്സ് ചാനൽ, വിദ്യാഭ്യാസ സംബന്ധമായ വിവിധ സോഫ്റ്റ് വെയറുകൾ തുടങ്ങിയവ  പഠനപ്രവർത്തനങ്ങളിൽ പരമാവധി പ്രയോജനപ്പെടുത്തുന്നു.

S.S.L.C. റിസൾട്ട് മെച്ചപ്പെടുത്തുവാനുള്ള പ്രവർത്തനങ്ങൾ

               രാവിലെയും വൈകുന്നേരവും ഓരോ മണിക്കൂർ വീതവും അവധി ദിവസങ്ങളിലും പഠനത്തിൽ പിന്നോക്കം നല്കുന്നവരെ ഉദ്ദേശിച്ച് പ്രത്യേക കോച്ചിംഗ് ക്ലാസ്സുകൾ സംഘടിപ്പിക്കുന്നു.വൈകുന്നേരം നാല് മണിക്ക് P.T.A യുടെ ആഭിമുഖ്യത്തിൽ ലഘുഭക്ഷണം നല്കുന്നു. C.P.T.A ചേരുന്നത് കൂടാതെ ഓരോ പ്രദേശങ്ങൾ കേന്ദ്രീകരിച്ച് പ്രാദേശിക P.T.Aകളും ചേരുന്നു. അദ്ധ്യാപകരും P.T.A പ്രതിനിധികളും അടങ്ങുന്ന സംഘങ്ങൾ  ഓരോ കുട്ടിയുടേയും ഗൃഹ സന്ദർശനം നടത്തി ആവശ്യമായ നിർദ്ദേശം നല്കുന്നു. പരീക്ഷയെ അഭിമുഖീകരിക്കേണ്ടതിനെക്കുറിച്ച് വിദഗ്ദരെ കൊണ്ട് വന്ന് ക്ലാസ്സ് സംഘടിപ്പിക്കുന്നു.  വിക്ടേഴ്സ് ചാനലിലെ S.S.L.C. ഒരുക്കം പരിപാടി പ്രയോജനപ്പെടുത്തുന്നു. ജനുവരി ,ഫെബ്രുവരി മാസങ്ങളിൽ ഓരോ അദ്ധ്യായവും അടിസ്ഥാനമാക്കി പ്രത്യേക യൂണിറ്റ് ടെസ്റ്റുകൾ സംഘടിപ്പിക്കുന്നു.

                                 കഴിഞ്ഞ വർഷം 97% ആണ് വിജയം. 9-ൽ നിന്ന് മുഴുവൻ വിദ്യാർത്ഥികളെയും10-ലേക്ക് ക്ലാസ്സ് കയറ്റം നടത്തിയാണ് ഈ വിജയം നേടിയത് എന്നത് വിജയത്തിന്റെ തിളക്കം വർദ്ധിപ്പിക്കുന്ന ഒരു വസ്തുതയാണ്. എന്നാൽ ഉന്നത പഠനത്തിന് അർഹത നേടുന്ന കൂടുതൽ കുട്ടികൾക്കും ഉയർന്ന ഗ്രേഡുകൾ ലഭിക്കുന്നില്ല.

പഠനപിന്നോക്കാവസ്ഥയ്ക്കുള്ള പ്രധാന കാരണങ്ങൾ
കുട്ടിയുടെ അധ്യയന മാധ്യമം മാതൃഭാഷയിലല്ലാതിരിക്കൽ ഉദാ: തുളു മാതൃഭാഷയുള്ള രക്ഷിതാക്കളുടെ കുട്ടികൾ മലയാളത്തിലോ കന്നടയിലോ പഠിക്കുന്ന സാഹചര്യം കുട്ടികളുടെ പഠനകാര്യങ്ങളിൽ വേണ്ടത്ര ശ്രദ്ധിക്കാൻ സാധിക്കാത്ത രക്ഷിതാക്കൾ
സാമൂഹ്യവും സാമ്പത്തികവുമായ പിന്നോക്കാവസ്ഥ
ആരോഗ്യകാരണങ്ങളാലോ മറ്റോ ക്ലാസ്സിൽ ഇടയ്ക്കിടയ്ക്ക് ഹാജരാകാതിരിക്കൽ
പിന്നോക്കാവസ്ഥ പരിഹരിക്കുന്നതിന് നടപ്പിലാക്കുന്ന തനതു പദ്ധതികൾ
2008-09 വർഷം പി.ടി.എ യുടെ നേതൃത്വത്തിൽ നടപ്പിലാക്കിയ പദ്ധതിയാണ് 'വെളിച്ചം'. പിന്നോക്കം നിൽക്കുന്ന കുട്ടികൾക്കായി മധ്യവേനലവധിക്കാലത്ത് കണക്ക്, ഇംഗ്ലീഷ് തുടങ്ങിയ വിഷയങ്ങളിൽ പ്രത്യേക കോച്ചിംഗ് ക്ലാസ്സുകൾ സംഘടിപ്പിച്ചു. ഒന്നാംക്ലാസ്സിലെ കുട്ടികൾക്ക് പ്ലാസ്റ്റിക്ക് ചെയറുകളും സൈക്കിൾ, കളിപ്പാട്ടങ്ങൾ എന്നിവയും നൽകി. 2009-10വർഷം നടപ്പിലാക്കിയ പദ്ധതിയാണ് 'സ്മാർട്ട് സ്ക്കൂൾ' . ഇതിൻറ ഭാഗമായി 1മുതൽ XII വരെയുള്ള മുഴുവൻ കുട്ടികൾക്കും 'സ്റ്റുഡന്റ് ഹാന്റ് ബുക്ക് 'എന്ന പേരിൽ സ്ക്കൂൾ ഡയറി വിതരണം ചെയ്തു.സ്ക്കൂൾ എംബ്ലം ആലേഖനം ചെയ്ത ബാഡ്ജ് തയ്യാറാക്കി നൽകി.ഒന്നാംക്ലാസ്സിൽ ചേർന്ന മുഴുവൻ കുട്ടികൾക്കും യൂണിഫോം,ബാഗ്,സ്ലേറ്റ്,വാട്ടർ ബോട്ടിൽ എന്നിവ സൗജന്യമായി നൽകി.(ഇത് ഈ വർഷവും തുടർന്നു) രണ്ടാം ക്ലാസ്സിലെ കുട്ടികൾക്ക് ഇരിപ്പിടങ്ങളായി പ്ലാസ്റ്റിക്ക് ചെയറുകളും എൽ.പി. വിഭാഗം കുട്ടികൾക്ക് പ്രത്യേക ശ്രദ്ധ നൽകുന്നതിൻറ ഭാഗമായി പ്രത്യേക കളർ യൂണിഫോമും ഏർപ്പെടുത്തി.
2010-11 വർഷം പി.ടി.എ. നടപ്പിലാക്കുന്ന പദ്ധതിയാണ് 'പൂമൊട്ടുകൾ'
SSLC പരീക്ഷയിൽ മുഴുവൻ കുട്ടികളെയും ഉയർന്ന ഗ്രേഡിലെത്തിക്കണമെങ്കിൽ പ്രൈമറി ക്ലാസ്സുകളിൽ നിന്ന് തന്നെ പഠനനിലവാരം ഉയർത്തിക്കൊണ്ട് വരേണ്ടതുണ്ട് എന്നുള്ളതിനാൽ, പ്രൈമറി ക്ലാസ്സുകളിൽ പിന്നോക്കം നിൽക്കുന്ന കുട്ടികളെകണ്ടെത്തി പിന്നോക്കാവസ്ഥവയ്ക്കുളളകാരണങ്ങൾ പല തലങ്ങളിൽ ചർച്ചചെയ്തതിന് ശേഷം രൂപം കൊടുത്തിട്ടുള്ള പദ്ധതിയാണ് 'പൂമൊട്ടുകൾ'.

      പ്രധാനപ്രവർത്തനങ്ങൾ

ക്ലാസ്സ്റൂം പഠനപ്രവർത്തനങ്ങൾക്കുപരിയായി പിന്നോക്കംനിൽക്കുന്ന കുട്ടികൾ കൂടുതലായി വരുന്ന പ്രദേശങ്ങൾ കണ്ടെത്തി, അത്തരം പ്രദേശങ്ങളിൽ അവിടെയുള്ള ജനങ്ങളുടെ സഹകരണത്തോടെ അവധിദിവസങ്ങളിൽ പ്രത്യേക ക്ലാസ്സുകൾ സംഘടിപ്പിക്കുന്നു. രക്ഷിതാക്കളുടെ സാന്നിദ്ധ്യത്തിൽ തന്നെക്ലാസ്സുകൾ കൈകാര്യം ചെയ്യുന്നത് വളരെയേറെ ഫലപ്രദമാണെന്ന് മനസ്സിലായിട്ടുണ്ട്. ഇതോടൊപ്പം രക്ഷിതാക്കളെയുൾപ്പെടെ ദുശ്ശീലങ്ങളിൽനിന്നും(പുകയില ഉൽപ്പന്നങ്ങളുടെ ഉപയോഗം,മദ്യപാനം തുടങ്ങിയവ) പടിപടിയായിപിന്തിരിപ്പിക്കുന്നതിനായി അതുമായിബന്ധപ്പെട്ട വീഡിയോ പ്രദർശനം/ബോധവൽക്കരണക്ലാസ്സ് എന്നിവയും സംഘടിപ്പിക്കുന്നു. 1-4വരെയുള്ള മുഴുവൻ കുട്ടികൾക്കും ഹൈസ്ക്കൂൾ കമ്പ്യൂട്ടർ ലാബിലെ സൗകര്യങ്ങൾ പ്രയോജനപ്പെടുത്തി ആഴ്ചയിൽ ഒരു പിരീഡ് കമ്പ്യൂട്ടറിൽ പരിശീലനം നൽകുന്നു. ഐ.ടി.@സ്ക്കൂൾ ഗ്നു ലിനക്സ്/ ഉബുണ്ടു ഓപ്പറേറ്റിംഗ് സിസ്റ്റവുമായി ബന്ധപ്പെട്ട G-Compris, Childsplay, Kanagram തുടങ്ങിയ സോഫ്റ്റ് വെയറുകളാണ് ഇതിനുപയോഗിക്കുന്നത്. വളരെ പിന്നോക്കം നിൽക്കുന്ന കുട്ടികൾ പോലും വലിയ താൽപര്യമാണ് ഇത്തരം പ്രവർത്തനങ്ങളിൽ കാണിക്കുന്നത്. ഇതുമായി ബന്ധപ്പെട്ട് അദ്ധ്യാപകർക്ക് സ്ക്കൂളിൽ തന്നെ പ്രത്യേകപരിശീലനവും നൽകിയിട്ടുണ്ട്.
രക്ഷിതാക്കൾ വേണ്ടത്ര ശ്രദ്ധിക്കാത്ത അവസ്ഥയ്ക്ക് മാറ്റം വരുത്തുന്നതിനായി അവരെ ബോധവൽക്കരിക്കാനുള്ള ഒരു ഡോക്യുമെന്ററി നിർമാണവുമായി ബന്ധപ്പെട്ട പ്രവർത്തനങ്ങൾ നടന്നുവരുന്നു.
വിദഗ്ദരെ സംബന്ധിപ്പിച്ചുകൊണ്ടുള്ള പ്രത്യേക വർക്ക്ഷോപ്പ്, പിന്നോക്കം നിൽക്കുന്ന കുട്ടികൾക്ക് മാത്രമായി സഹവാസക്യാമ്പ്, അവരെ പ്രധാന കഥാപാത്രങ്ങളാക്കിയുള്ള ഷോർട്ട് ഫിലിം എന്നിവ ഈ പദ്ധതിയിൽ തുടർന്ന് നടത്താനുദ്ധേശിക്കുന്ന ചില പ്രധാനപ്രവർത്തനങ്ങളാണ്.
പഠനാനുബന്ധപ്രവർത്തനങ്ങൾ
കലാരംഗം

                     വിവിധ കലകളിൽ താൽപര്യമുള്ള കുട്ടികളെ കണ്ടെത്തി ഫൈൻ ആർട്ട്സ് ക്ലബിന്റെ നേതൃത്വത്തിൽ പ്രത്യേകപരിശീലനം നൽകിവരുന്നു.കാസറഗോ‍ഡിന്റെ തനതായ കലാരൂപം യക്ഷഗാനത്തെ പ്രോത്സാഹിപ്പിക്കുന്നതിനായി പ്രത്യേക യക്ഷഗാന സംഘം തന്നെ പ്രവർത്തിക്കുന്നു. ഉപജില്ലാ-ജില്ലാ കലോത്സവങ്ങളിൽ വർഷങ്ങളായി സജിവ സാന്നിദ്ധ്യമാണ് അഡൂർ സ്ക്കൂൾ.  ഈ വർ‍ഷത്തെ ഉപജില്ലാ കലോത്സവത്തിൽ യു. പി.    വിഭാഗം അറബിക്ക് ചാമ്പ്യന്മാരാണ്  സ്ക്കൂൾ. കഴിഞ്ഞ വർഷത്തെ കുമ്പള ഉപജില്ലാ കലോത്സവത്തിന് ആതിഥ്യമരുളി. നടത്തിപ്പിലെ കാര്യക്ഷമത കൊണ്ടും ജനപങ്കാളിത്തം കൊണ്ടും മേള ഏറെ ശ്രദ്ധിക്കപ്പെട്ടിരുന്നു. 

കായികരംഗം

             കുട്ടികളുടെ കായികക്ഷമത ശാസ്ത്രീയമായി പരിശോധിച്ച് അതിന്റെ അടിസ്ഥാനത്തിൽ വേണ്ട നിർദ്ധേശങ്ങൾ കുട്ടികൾക്ക് നൽകുന്നു.കുട്ടികളുടെ കായികവും മാനസികവുമായുള്ള ഉല്ലാസത്തിനായി ഗോരി, തലപ്പന്തുകളി തുടങ്ങിയ നാടൻ കളികളെ പ്രോത്സാഹിപ്പിക്കുന്നു. സ്കൂൾ ക്രിക്കറ്റ് ടീം ജില്ലാതല മത്സരത്തിൽ സംബന്ധിച്ചിട്ടുണ്ട് . നീന്തലിൽ നൗഷാദ് ഇ. പി. എന്ന വിദ്യാർത്ഥി സംസ്ഥാന സ്കൂൾ നീന്തൽ മത്സരത്തിൽ സംബന്ധിച്ചിട്ടുണ്ട്.ജില്ലാതല ഗുസ്തി മത്സരത്തിൽ കഴിഞ്ഞ വർഷം വിജയികളായി.

ക്ലബ് പ്രവർത്തനങ്ങൾ
1. ഇംഗ്ലീഷ് ക്ലബ്
"ഇംഗ്ലീഷ് ക്ലബ്" വളരെ മികച്ചരീതിയിൽ സ്കൂളിൽ പ്രവർത്തിച്ച് വരുന്നു. LP,UP വിദ്യാർത്ഥികളിൽ ഇംഗ്ലീഷ് ഭാഷസ്നേഹം വളർത്തുന്നതിന് വേണ്ടി ദേലംപാടി ഗ്രാമ പഞ്ചായത്തിന്റെ സഹകരണത്തോടെ LET US LEARN ENGLISH TOGETHER എന്ന പദ്ധതി നടപ്പിലാക്കി . അരണിക്കൂർ ദൈർഘ്യമുള്ള വീഡിയോ സിഡിയിൽ കുട്ടികൾക്ക് ഇംഗ്ലീഷിൽ സ്വയം പരിചയപ്പെടുത്താനും അവരുടെ ചുറ്റുപാടിനെക്കുറിച്ചും അവരെക്കുറിച്ചും ഇംഗ്ലീഷിൽ അനായാസം സംസാരിക്കുവാനും സഹായിക്കുന്നതാണ് ഈ സിഡി. ഈ സ്കൂളിലെ ഇംഗ്ലീഷ് ക്ലബ് അംഗങ്ങളും അധ്യാപകരും അവതരിപ്പിക്കുന്ന ഈ പരിപാടി ദേലംപാടി പഞ്ചായത്തിലെ എല്ലാ സ്കൂളുകളിലും 'പഠനസാമഗ്രിയായി' ഉപയോഗിക്കുന്നു. അതുപോലെതന്നെ വിദ്യാർത്ഥികളിൽ മൂല്യങ്ങൾ വളർത്തിയെടുക്കുന്നതോടൊപ്പം തന്നെ ഇംഗ്ലീഷ് ഭാഷാ സ്നേഹവും ഉണ്ടാക്കുന്നതിന് വേണ്ടി 'The Drizzles' Learning Entertainer' എന്ന മ്യൂസിക്കൽ ആൽബവും നിർമ്മിച്ചു. ആശയവിനിമയശേഷി വർധിപ്പിക്കുന്നതിനു വേണ്ടി എല്ലാ വെള്ളിയാഴ്ചയും 'ESG' എന്ന പേരിൽ കമ്യൂണിക്കേറ്റീവ് ഇംഗ്ലീഷ് ക്ലാസ്സ് സംഘടിപ്പിക്കുന്നു. ഇതിൽ ഇംഗീഷ് സംസാരിക്കാൻ താൽപ്പര്യമുള്ള വിദ്യാർത്ഥികളും അദ്ധ്യാപകരും ഒത്തുച്ചേർന്ന് പരസ്പരം ഇംഗ്ലീഷിൽ ആശയവിനിമയം നടത്തുന്നു. കൂടാതെ എല്ലാ ക്ലാസ്സുകളിലും, ഇംഗ്ലീഷിൽ കുട്ടികളുടെ രചനാപരമായ കഴിവ് വളർത്തുന്നതിന് വേണ്ടി ചുമർപത്രങ്ങളും നിർമ്മിച്ചിരിക്കുന്നു. 'sweet grammar' എന്ന പേരിൽ കുട്ടികൾക്ക് താൽപര്യത്തോടുകൂടി ഇംഗ്ലീഷ് വ്യാകരണം പഠിക്കാൻ പുതിയ പദ്ധതിക്ക് രൂപം നൽകിയിരിക്കുന്നു.
2. ഐ.ടി. ക്ലബ്
സ്ക്കൂൾ ഐ.ടി. ക്ലബ് 'ഡബ്ൾ ക്ലിക്ക് ' എന്ന പേരിൽ 50 സജീവ അംഗങ്ങളുമായി ഐ.ടി. അനുബന്ധപ്രവർത്തനങ്ങൾക്ക് നേതൃത്വം നൽകുന്നു.

• ഹൈസ്ക്കൂളിലെ മുഴുവൻ കുട്ടികൾക്കും(600-ൽ പരം) ഇ-മെയിൽ വിലാസമുണ്ടാക്കുന്നതിനും അതുപയോഗിക്കുന്നതിനുള്ള പരിശീലനം നൽകുന്നതിനും നേതൃത്വം നല്കി.
• 'സ്ക്കൂൾ വിക്കി' യിൽ കൂടുതൽ പേജുകൾ ചേർത്തുകൊണ്ടിരിക്കുന്നു. നാടോടി വിജ്ഞാനകോശം പ്രോജക്റ്റിൽ പ്രാദേശിക ഭാഷാനിഘണ്ടു, എന്റെ നാടിൽ അഡൂരിന്റെ ചരിത്രം, സ്ക്കൂൾ പത്രത്തിൽ 'The Lens' എന്ന പേരിൽ പത്രം, ഇ-വിദ്യാരംഗത്തിൽ കുട്ടികളുടെ സാഹിത്യസൃഷ്ടികൾ എന്നിവയാണ് വിക്കിയിലെ പ്രധാനപ്രവർത്തനങ്ങൾ.
• സയൻസ് ക്ലബ്ബുമായി സഹകരിച്ച് 'പരലോകത്തേക്ക് ഒരു കുറുക്കുവഴി' എന്ന പേരിൽ പുകയില വിരുദ്ധ ഡോക്യുമെന്ററി തയ്യാറാക്കി സ്ക്കൂൾ ബ്ലോഗിലും വിക്കിയിലും അപ് ലോഡ് ചെയ്തു.
• ഓണാഘോഷത്തോടനുബന്ധിച്ച് 'ഡിജിറ്റൽ ' പൂക്കളമത്സരം നടത്തി.
• സ്വാതന്ത്ര്യദിനാഘോഷത്തോടനുബന്ധിച്ച് ഡിജിറ്റൽ പോസ്റ്റർ മത്സരം നടത്തി.
• സ്ക്കൂൾ ബ്ലോഗ് (www.ghssadoor.blogspot.com)അപ്ഡേറ്റ് ചെയ്യുന്നു.
• വിക്ടേഴ്സ് ചാനലിലെ ഓരോ ദിവസത്തെയും പ്രധാനപരിപാടികൾ വൈറ്റ്ബോർഡിൽ പ്രദർശിപ്പിക്കകയും ഒഴിവുസമയങ്ങളിൽ മൾട്ടിമീഡിയറൂമിലെ സംവിധാനങ്ങൾ ഉപയോഗിച്ച് ചാനൽ കാണുവാനുള്ള അവസരമുണ്ടാക്കുകയും ചെയ്യുന്നു. വിക്ടേഴ്സ് ചാനലിന് കുട്ടികളുടെയും രക്ഷിതാക്കളുടെയും ഇടയിൽ പബ്ലിസിറ്റി നല്കുന്നു.
• ക്ലാസ്സ് മുറികളിൽ ഐസിടി ഉപകരണങ്ങൾ പ്രവർത്തിപ്പിക്കുന്നതിൽ അദ്ധ്യാപകരെ സഹായിക്കുന്നു.
• വിവിധ ഐടി മത്സരങ്ങൾ നടത്തി വിജയികളെ ഉപജില്ലാ ഐടി മേളയിൽ മത്സരിപ്പിച്ചു. ഈ വർഷം ആറിനങ്ങളിൽ മത്സരിക്കുകയും വെബ്പേജ് ഡിസൈനിങ്ങിൽ രണ്ടാം സ്ഥാനവും പ്രോജക്റ്റ് അവതരണം, മലയാളം ടൈപ്പിംഗ് എന്നിവയിൽ മൂന്നാം സ്ഥാനവും ലഭിച്ചു. കഴിഞ്ഞ വർഷം ഉപജില്ലാ റണ്ണേഴ്സ്അപ് ആയിരുന്നു.

3. സോഷ്യൽ സയൻസ് ക്ലബ്
ക്ലബിന്റെ ആഭിമുഖ്യത്തിൽ 'സ്റ്റുഡന്റ്സ് വോയ്സ് ' എന്ന പേരിൽ സ്ക്കൂൾ റേഡിയോ പ്രക്ഷേപണം ആരംഭിച്ചു. എല്ലാ ദിവസവും ഉച്ചയ്ക്ക് ഒന്നര മണിക്ക് വാർത്തയും വിശേഷദിവസങ്ങളിൽ പ്രബന്ധാവതരണവും ഉണ്ടാകും. സാമമൂഹ്യശാസ്ത്രവുമായി ബന്ധപ്പെട്ട ദിനാചരണങ്ങളും ദേശീയദിനാഘോഷങ്ങളും സംഘടിപ്പിക്കുന്നു. മഹാന്മാർ പകർന്നുനൽകിയ സന്ദേശങ്ങളടങ്ങിയ ചാർട്ടുകൾ ദിനാചരണങ്ങളുമായി ബന്ധപ്പെട്ട് പ്രദർശിപ്പിച്ച് വരുന്നു.ലോകപരിസ്ഥിതിദിനത്തിൽ വൃക്ഷത്തൈകൾ നട്ടുപിടിപ്പിക്കുകയും സ്ക്കൂൾ അസംബ്ലിയിൽ പ്രഭാഷണങ്ങളും പ്രബന്ധങ്ങളും അവതരിപ്പിക്കുകയും ചെയ്തു. ലഹരിവിരുദ്ധദിനത്തോടനുബന്ധിച്ച് പോസ്റ്റർ പ്രദർശിപ്പിച്ചു. ജൂലൈ 11 ജനസംഖ്യാദിനത്തിൽ സെമിനാർ സംഘടിപ്പിച്ചു. ജൂലൈ 21 ചാന്ദ്രദിനാചരണത്തിന്റെ ഭാഗമായി കുട്ടികൾ ശേഖരിച്ച ചിത്രങ്ങളും ലേഖനങ്ങളും ഉൾപ്പെടുത്തിക്കൊണ്ടുള്ള പതിപ്പ് തയ്യാറാക്കി. CD, ചിത്രപ്രദർശനങ്ങൾ സംഘടിപ്പിച്ചു. ആഗസ്ത് 6, 9 ഹിരോഷിമ-നാഗസാക്കി ദിനാചരണത്തിന്റെ ഭാഗമായി സ്ക്കൂൾ അസംബ്ലിയിൽ ശാന്തിഗീതാലാപനവും സമാധാനത്തിന്റെ സന്ദേശം പകരുന്ന പോസ്റ്റർ പ്രദർശനവും നടത്തി. സ്വാതന്ത്ര്യദിനാഘോഷത്തിന്റെ ഭാഗമായി ചരിത്രക്വിസ്, ചിത്രപ്രദർശനം, ദേശീയപതാകാനിർമാണം, സ്വാതന്ത്ര്യസമരചരിത്രസംഭവങ്ങളെ അടിസ്ഥാനപ്പെടുത്തിയുള്ള നാടകാവിഷ്ക്കരണം എന്നിവ നടന്നു. സെപ്റ്റംബർ 5 അദ്ധ്യാപകദിനത്തിൽ ഡോ. എസ്. രാധാകൃഷ്ണന്റെ ജീവചരിത്രവുമായി ബന്ധപ്പെട്ട ലേഖനങ്ങളും ചിത്രങ്ങളും ബുള്ളറ്റിൻ ബോർഡിൽ പ്രദർശിപ്പിക്കൽ, കുട്ടികളെക്കൊണ്ട് ക്ലാസ്സെടുപ്പിക്കൽ എന്നിവ നടന്നു. Sep. 16-തീയതി അന്തർദേശീയ ഒസോൺ ദിനത്തിന്റെ ഭാഗമായി സ്ക്കൂൾ അസംബ്ലിയിൽ പ്രബന്ധാവതരണം നടത്തി. നവമ്പർ 1 കേരളപ്പിറവിദിനത്തിലും ഡിസമ്പർ 10 മനുഷ്യാവകാശദിനത്തിലും ബന്ധപ്പെട്ട ചിത്രങ്ങളും വിവരങ്ങളും ബുള്ളറ്റിൻ ബോർഡിൽ പ്രദർശിപ്പിച്ചു. ക്ലബ്ബിന്റെ കീഴിൽ പുരാവസ്തുക്കളുടെ ഒരു ശേഖരവുമുണ്ട്.

4. സയൻസ് ക്ലബ്

ഈ സ്ക്കൂളിൽ വളരെ കാര്യക്ഷമമായി പ്രവർത്തിക്കുന്ന ക്ലബാണ് സയൻസ് ക്ലബ്. Dr. CV Raman-ന്റെ ജന്മദിനത്തിന്റെ ഭാഗമായി സയൻസ് ക്ലബ്ബ് ക്വിസ് മൽസരം സംഘടിപ്പിച്ചൂ. Sep. 16-തീയതി അന്തർദേശീയ ഒസോൺ ദിനത്തിന്റെ ഭാഗമായിവിദ്യാർത്ഥികൾക്കായി സെമിനാർ,ചിത്രപ്രദർശനം,ക്വിസ് മൽസരം,തുടങ്ങിയ പരിപാടികൾ സംഘടിപ്പിച്ചു. ജൂലൈ 21-തീയതി ചാന്ദ്രദിനം ആഘോഷിച്ചു. അന്ന് സയൻസ് ക്ലബ്ബിന്റെ കീഴിൽ CD പ്രദർശനം നടത്തി. കൂടാതെ ചന്ദ്രനിൽ ആദ്യമായി കാലുകുത്തിയ നീൽ ആംസ്ട്രോങ്, മൈക്കൽ കോളിൻസ്,എഡ്വിൻ ആൽഡ്രിൻ തുടങ്ങിയ ബഹിരാകാശ സഞ്ചാരികളുടെ സ്മരണാർത്ഥം അവരുടെ വേഷമണിഞ്ഞ് കുട്ടികൾ അവരുടെ അനുഭവങ്ങൾ കൂട്ടുകാരോടും അധ്യാപകന്മാരോടും പങ്ക് വെച്ചു.

                      ജൂൺ 5 ന് ലോകപരിസ്ഥിതിദിനത്തിൽ കുട്ടികൾക്ക് വൃക്ഷത്തൈകൾ വിതരണം ചെയ്തു. പ്രത്യേക പോസ്റ്റർരചനാ മത്സരം സംഘടിപ്പിച്ചു. പുകയിലവിരുദ്ധദിനം പ്രമാണിച്ച് പ്രത്യേകം വിളിച്ചുകൂട്ടിയ അസംബ്ലിയിൽ വെച്ച്  ലഹരിവിരുദ്ധ പ്രതിജ്ഞയെടുത്തു. പോസ്റ്റർ പതിപ്പിച്ചു. ഐ.ടി. ക്ലബിന്റെ സഹകരണത്തോടെ സ്ക്കൂളിൽ തന്നെ തയ്യാറാക്കിയ 'പുകയില വിരുദ്ധ ഡോക്യുമെന്ററി' പ്രദർശിപ്പിച്ചു. സ്ക്കൂളിൽ പാൻ മസാല ഉൽപന്നങ്ങൾ ഉപയോഗിക്കുന്ന കുട്ടികളെ കണ്ടെത്തുന്നതിനായി ആന്റി ഡ്രഗ് ഫോഴ്സ് (ADF) രൂപീകരിച്ചു. ഇവർ രഹസ്യമായി നൽകുന്ന വിവരത്തിന്റെ അടിസ്ഥാനത്തിൽ, അത്തരം കുട്ടികളെ പുകയില വിരുദ്ധ ഡോക്യുമെന്ററി കാണിക്കുകയും കൗൺസലിംഗ് നൽകുകയും ചെയ്യുന്നു. ഈ പ്രവർത്തനം വഴി കുറെയധികം കുട്ടികൾ ഈ ദുശ്ശീലത്തിൽ നിന്നും പിന്മാറിയിട്ടുണ്ട്. 

5.പരിസ്ഥിതി ക്ലബ്
ജൈവവൈവിധ്യ വർഷാചരണത്തിന്റെ ഭാഗമായി ഔഷധ സസ്യത്തോട്ടം നിർമ്മിച്ച് പരിപാലിച്ചുവരുന്നു. സ്ക്കൂൾ ക്യാമ്പസ് ഹരിതാഭമാക്കി നിലനിർത്തുന്നതിൽ പ്രധാനപങ്കുവഹിക്കുന്നു. ജലം ദുരുപയോഗം ചെയ്യുന്നത് തടയുന്നതിനും ജലസംരക്ഷണത്തിന്റെ പ്രാധാന്യം കുട്ടികളിലെത്തിക്കുന്നതിനുമായി 'Save Water-Guards' എന്ന പേരിൽ കുട്ടികളുടെ ഒരു സംഘം പരിസ്ഥിതി ക്ലബ്ബിന് കീഴിൽ പ്രവർത്തിക്കുന്നു
6. മാത്സ് ക്ലബ്

ഗണിതശാസ്ത്രവുമായി ബന്ധപ്പെട്ട ദിനാചരണങ്ങൾ സംഘടിപ്പിക്കുന്നു. എല്ലാ മാസവും ഗണിതശാസ്ത്ര ക്വിസ് മത്സരവും സംഘടിപ്പിക്കുന്നു. ഗണിതശാസ്ത്ര പ്രതിഭകളെ പരിചയപ്പെടുത്തുന്ന  ചാർട്ട് പ്രദർശനം നടത്തുന്നു. ഗണിതശാസ്ത്ര ക്ലബ്ബിന്റെ ആഭിമുഖ്യത്തിൽ ഒരു puzzle competition നടത്തുന്നു. ആഴ്ചയിലെ എല്ലാ ദിവസവും ഒരു ചോദ്യം മാത്സ് ബുള്ളറ്റിൻ ബോർഡിൽ ഇടുന്നു. കുട്ടികൾ ആ ചോദ്യത്തിന് ഉത്തരം കണ്ടെത്തി പെട്ടിയിൽ നിക്ഷേപിക്കുന്നു. വിജയികളുടെ പേര് ബുള്ളറ്റിൻ ബോഡിൽ ഇടുന്നു. ആഴ്ചയിൽ ഏറ്റവും    കൂടുതൽ ശരിയുത്തരം കണ്ടെത്തുന്ന കുട്ടിക്ക് സ്ക്കൂൾ അസംബ്ലിയിൽ വെച്ച് സമ്മാനം നൽകുന്നു. ഒന്നിലധികം പേർ ശരിയുത്തരം നൽകിയിട്ടുണ്ടെങ്കിൽ വിജയികളെ നറുക്കെടുപ്പിലുടെ കണ്ടെത്തുന്നു. സ്കൂൾതലത്തിൽ വിവിധ മൽസരങ്ങൾ സങ്കടിപ്പിക്കുകയും വിജയികളെ സബ് ജില്ലാ, ജില്ലാതലമത്സരങ്ങൾക്ക്  പങ്കെടുപ്പിക്കുകയും ചെയ്യുന്നു.

7. വിദ്യാരംഗം കലാസാഹിത്യവേദി
ജൂൺ 19 പി. എൻ. പണിക്കരുടെ ജന്മദിനത്തോടനുബന്ധിച്ച് വിവിധ സാഹിത്യമത്സരങ്ങൾ നടത്തി. കഥാരചന, കവിതാരചന, ഉപന്യാസരചന, സാഹിത്യക്വിസ് എന്നീ മത്സരങ്ങളാണ് നടത്തിയത്. കന്നഡ/മലയാളം വിഭാഗങ്ങളിൽ വെവ്വേറെ മത്സരങ്ങൾ നടത്തി. ആഴ്ചയിലൊരിക്കൽ 'സാഹിത്യസഭ' നടത്തുന്നു. യു.പി./ഹൈസ്ക്കൂൾ വിഭാഗങ്ങളിലായി കവിതാ ആലാപനമത്സരങ്ങൾ നടത്തുകയും സമ്മാനം നൽകുകയും ചെയ്യുന്നു. അദ്ധ്യാപകദിനത്തോടനുബന്ധിച്ച് തെരെഞ്ഞെടുക്കപ്പെട്ട കുട്ടികൾ ക്ലാസ്സെടുത്തു. സാഹിത്യരചനയിൽ താൽപര്യമുള്ള കുട്ടികൾക്കായി വർഷംതോറും 'എഴുത്തുകൂട്ടം ' നടത്തുകയും മികച്ച വിദ്യാർത്ഥികളെ കണ്ടെത്തുകയും ചെയ്യുന്നു. വിദ്യാർത്ഥികളുടെ സൃഷ്ടികൾ സമാഹരിച്ചുകൊണ്ട് കയ്യെഴുത്ത് മാസിക തയ്യാറാക്കുന്നു. പ്രത്യേകവിഷയങ്ങളെ അധികരിച്ച്കൊണ്ടും വിവിധകയ്യെഴുത്ത് മാസികകൾ തയ്യാറാക്കിവരുന്നു. ഉപജില്ലാ വിദ്യാരംഗം കലോത്സവത്തിൽ കുറെ കുട്ടികൾ വിജയികളായിട്ടുണ്ട്. ഒഴിവുസമയങ്ങൾ പലപ്രദമായി വിനിയോഗിക്കാനായി വിദ്യാരംഗത്തിന്റെ ആഭിമുഖ്യത്തിൽ 'വായനാമൂല' ഒരുക്കിയിട്ടുണ്ട്.
പ്രധാനപ്പെട്ട പ്രസിദ്ധീകരണങ്ങൾ
(മലയാളം)
മഴമേഘങ്ങൾ

     മഴ പ്രമേയമാക്കി കുട്ടികൾ രചിച്ച കഥകൾ, കവിതകൾ, അനുഭവങ്ങൾ, ചിത്രങ്ങൾ എന്നിവയും മലയാളസാഹിത്യത്തിൽ മഴ പ്രമേയമായി വന്ന ചില കവിതകളും ലേഖനങ്ങളും അനുഭവങ്ങളും ഉൾപ്പെടുത്തിക്കൊണ്ട് തയ്യാറാക്കിയ മഴപ്പതിപ്പ്

ഇതൾ (കവിതാ സമാഹാരം)
വിദ്യാർത്ഥികൾ എഴുതിയ കവിതകൾ ഉൾപ്പെടുത്തിക്കൊണ്ട് തയ്യാറാക്കിയ കവിതാസമാഹാരം
അക്ഷരക്കൂട്ടുകൾ

       വിദ്യാരംഗം പുസ്തകാസ്വാദനക്കുറിപ്പ് മത്സരത്തിലേക്ക്(ജില്ലാതലം) തെരെഞ്ഞെടുത്ത ആസ്വാദനക്കുറിപ്പുകൾ

ശേഷിപ്പുകൾ
എൻഡോസൾഫാൻ ദുരന്തത്തിന്റെ പത്രവാർത്തകളും ചിത്രങ്ങളും ഉൾപ്പെടുത്തിക്കൊണ്ട് തയ്യാറാക്കിയ പതിപ്പ്
(കന്നഡ)
ചിഗുറു (കവിതാസമാഹാരം)
പയോനിധി(കവിതാസമാഹാരം)
ഹനിബരഹ(ലേഖനം, കവിത, കഥ എന്നിവ ഉൾപ്പെടുത്തിക്കൊണ്ട് തയ്യാറാക്കിയ പതിപ്പ്)

8. പ്രവൃത്തിപരിചയ ക്ലബ്
കുട്ടികൾക്ക് കരകൗശലവസ്തുക്കളുടെ നിർമാണവുമായി ബന്ധപ്പെട്ട് പ്രായോഗികപരിശീലനം നല്കുന്നതിനും അവരിലുള്ള പ്രതിഭ കണ്ടെത്തുന്നതിനും പരിപോഷിപ്പിക്കുന്നതിനുമായി ഈവർഷം മുതൽ പുതുതായി പ്രവർത്തനമാരംഭിച്ച ക്ലബ്ബാണ് 'പ്രവൃത്തിപരിചയ ക്ലബ് '. സ്വാതന്ത്ര്യദിനാഘോഷത്തിന്റെ ഭാഗമായി 'പതാകനിർമാണവും' പ്രദർശനവും സംഘടിപ്പിച്ചു. ഫാബ്രിക്ക് പെയിന്റിംഗിൽ താൽപര്യമുള്ള കുട്ടികളെ കണ്ടെത്തി പരിശീലനം നൽകി.
9. രാഷ്ട്രഭാഷാ സമിതി
കുട്ടികളെ ഹിന്ദി ഭാഷ സംസാരിക്കാൻ പ്രാപ്തരാക്കുക, ഹിന്ദി പഠിക്കാനുള്ള അഭിരുചി വർദ്ധിപ്പിക്കുക എന്നീ ലക്ഷ്യങ്ങളോടെ ആഴ്ചയിൽ ഒരു ദിവസം 'വ്യവഹാരിക് ഹിന്ദി' ക്ലാസ്സ് സംഘടിപ്പിക്കന്നു. കുട്ടികളും അദ്ധ്യാപകരും ഒത്തുചേർന്ന് വിവിധസന്ദർഭങ്ങളുണ്ടാക്കി ഹിന്ദിയിൽ തന്നെ ആശയവിനിമയം നടത്തുന്നു. കൂടാതെ കവിതാലാപനം, ലേഖനമത്സരങ്ങൾ, ഹിന്ദി ക്വിസ് മത്സരങ്ങൾ എന്നിവയും നടത്തുന്നു. കുട്ടികളുടെ ഒരു നാടക ട്രൂപ്പും ആരംഭിച്ചിട്ടുണ്ട്.

10. ഹെൽത്ത് ക്ലബ്
ഹെൽത്ത്ക്ലബിന്റെ കീഴിൽ പ്രവർത്തിക്കുന്ന ശുചിത്വസേനയുടെ നേതൃത്വത്തിൽ മുഴുവൻ വിദ്യാർത്ഥികളുടെയും വീടുകളിൽ കൊതുകിന്റെ ഉറവിടനശീകരണം നടത്തി. കൂടാതെ, ഓരോ വിദ്യാർത്ഥിയും സ്വന്തം വീടും പരിസരവും വൃത്തിയാക്കുകയും തൊട്ടടുത്ത വീടുകളിൽ ശുചിത്വസന്ദേശം എത്തിക്കുകയും ചെയ്തു. അഡൂർ പ്രാഥമികാരോഗ്യകേന്ദ്രത്തിലെ ജീവനക്കാർ കുട്ടികളുടെ ഭവനസന്ദർശനം നടത്തി ശുചിത്വം ഉറപ്പുവരുത്തുകയും ചെയ്തു. എല്ലാ വെള്ളിയാഴ്ചകളിലും 'ഡ്രൈ ഡേ' ആചരിക്കുകയും ചപ്പുചവറുകൾ കത്തിക്കുകയും പ്ലാസ്റ്റിക്ക് വസ്തുക്കൾ ഒരു പ്രത്യേക കുഴിയിൽ നിക്ഷേപിക്കുകയും ചെയ്യുന്നു. കൊതുകിന്റെ ഉറവിടനശീകരണത്തിന്റെ ഭാഗമായി പഞ്ചായത്ത് തലത്തിൽ നടന്ന റാലിയിലും പൊതുസമ്മേളനത്തിലും വിദ്യാർത്ഥികളുടെ സജീവപങ്കാളിത്തം ഉണ്ടായിരുന്നു. ഉറവിടനശീകരണത്തിന്റെ ഭാഗമായി ക്വിസ് മത്സരം, ചിത്രരചനാ മത്സരം എന്നിവ സംഘടിപ്പിച്ചു. എല്ലാ കുട്ടികളും നഖം മുറിക്കാറുണ്ടെന്നുള്ളത് ശുചിത്വസേനയിലെ അംഗങ്ങൾ ഉറപ്പുവരുത്തുന്നു. കൈ കഴുകുന്നതും ശ്രദ്ധിക്കുന്നു. ഉച്ചക്കഞ്ഞി പാഴാക്കിക്കളയുന്നത് ശ്രദ്ധിക്കാനായി 'Noon Feeding Vigilance Team' പ്രവർത്തിക്കുന്നു. ഹെൽത്ത് ക്ലബ്ബിലെ കുട്ടികൾക്കാവശ്യമായ നിർദ്ദേശങ്ങൾ നൽകുന്നത് സ്ക്കൂളിലെ ആരോഗ്യപ്രവർത്തകയാണ്. കുട്ടികൾക്ക് അപകടങ്ങൾ ഉണ്ടാകുമ്പോൾ പ്രവർത്തിക്കുന്നതിനായി ഒരു 'Accident Rescue Team' ഹെൽത്ത് ക്ലബ്ബിന്റെ കീഴിൽ പ്രവർത്തിക്കുന്നു.

11. ഫൈനാർട്ട്സ് ക്ലബ്
കുട്ടികളെ വർഷ, ഗ്രീഷ്മ, ഹേമന്ത, ശിശിര എന്നീ നാല് ഗ്രൂപ്പുകളായി തിരിച്ച് എല്ലാ തിങ്കളാഴ്ചയും വൈകുന്നേരം നാല് മണിക്ക് ശേഷം ഓരോ ഗ്രൂപ്പുകൾക്കായി ചിത്രകലയിൽ പ്രത്യേകപരിശീലനം നൽകുന്നു. കൂടാതെ, ചിത്രകാരന്മാരെയും അവരുടെ പ്രധാനപ്പെട്ട സംഭാവനകളെയും ഉൾക്കൊള്ളിച്ചുകൊണ്ട് ഒരു ആൽബം തയ്യാറാക്കുന്ന പ്രവർത്തനം നടന്നുവരുന്നു. പ്രശസ്ത ചിത്രകാരന്മാരായ ശ്രീ. പി.എസ്. പുണിഞ്ചിത്തായ, ഹരീഷ് ചെന്നങ്കോട് എന്നിവരെ പങ്കെടുപ്പിച്ചുകൊണ്ട് 'Play with Colours' എന്ന പേരിൽ രണ്ട് ദിവസത്തെ പെയിന്റിംഗ് വർക്ക്ഷോപ്പ് നടത്തി.

      സംഗീതവാസനയുള്ള കുട്ടികൾക്കായിഎല്ലാ വെള്ളിയാഴ്ചയും നാല് മണി മുതൽ അഞ്ച് മണി വരെ പ്രത്യേക സംഗീത പരിശീലനക്ലാസ്സ് നടത്തുന്നു. മാപ്പിളകലകളിൽ പരിശീലനം നൽകുന്നതിന്റെ ഭാഗമായി പ്രശസ്ത മാപ്പിളകലാകാരനായ ഇസ്മായിൽ മാസ്റ്ററെ (കണ്ണൂർ) സംബന്ധിപ്പിച്ചുകൊണ്ട് വിവിധ മാപ്പിളകലാരൂപങ്ങളെക്കുറിച്ച് ശില്പശാല സംഘടിപ്പിച്ചു. കുട്ടികൾക്ക് അവരുടെ പെയിന്റിംഗ്സും ചിത്രങ്ങളും പ്രദർശിപ്പിക്കുന്നതിനായി പ്രത്യേക ബുള്ളറ്റിൻ ബോർഡ് സ്ഥാപിച്ചിരിക്കുന്നു.

പ്രതിഭാനിർണയ പരീക്ഷകൾ
2008-09 വർഷം 6 കുട്ടികൾക്ക് നാഷണൽ മീൻസ് കം മെറിറ്റ് സ്കോളർഷിപ്പ് ലഭിച്ചു. ഈ വർഷം 36 കുട്ടികൾ നാഷണൽ ടാലന്റ് സെർച്ച് പരീക്ഷ എഴുതിയിട്ടുണ്ട്. LSS, USS പരീക്ഷകൾക്കും ഓരോ വർഷവും കുട്ടികളെ പങ്കെടുപ്പിക്കുന്നുണ്ട്.
സാങ്കേതിക മികവ്

          ഹൈസ്ക്കൂളിനും പ്രൈമറിക്കും വെവ്വേറെ കമ്പ്യൂട്ടർലാബുകളുണ്ട്. ഹൈസ്ക്കൂൾ ലാബിൽ പ്രവർത്തനക്ഷമമായ 17 കമ്പ്യൂട്ടറുകളും പ്രൈമറി ലാബിൽ 6 കമ്പ്യൂട്ടറുകളുമുണ്ട്. രണ്ട് വിഭാഗങ്ങൾക്കും ഓരോ ലാപ്ടോപ്പും ഡിജിറ്റൽ പ്രോജക്റ്ററുമുണ്ട്. സ്ക്കൂൾ ഓഫീസിൽ കമ്പ്യൂട്ടർ, പ്രിന്റർ, സ്ക്കാനർ എന്നിവയുമുണ്ട്. മൾട്ടിമീഡിയ റൂമിൽ ഇൻറർനെറ്റ്  സൗകര്യമുളള  കമ്പ്യൂട്ടർ,  ഡിജിറ്റൽ  പ്രോജക്റ്റർ ,ഡിവിഡി  പ്ലെയർ ,വിക്ടേഴ്സ്   ചാനൽ പ്രോജക്റ്റർ  വഴി  പ്രദർശിപ്പിക്കുവാനുളള  സൗകര്യം  എന്നിവ  ഒരുക്കിയിട്ടുണ്ട്. പഠനവുമായി  ബന്ധപ്പെട്ട  സിഡികളുടെ  ചെറിയൊരു  ശേഖരവുമുണ്ട്. വൈദ്യുതി  ഇല്ലാതാകുന്ന  സമയത്ത്  പ്രവർത്തിപ്പിക്കുന്നതിനായി  ജനറേറ്ററുമുണ്ട്. ഹൈസ്ക്കൂൾ ലാബിലെ കമ്പ്യൂട്ടറുകളും ഓഫീസ്/ മൾട്ടിമീഡിയ റൂം എന്നിവിടങ്ങളിലെ കമ്പ്യൂട്ടറുകളും ലാൻ വഴി ബന്ധിപ്പിച്ചിട്ടുണ്ട് . എല്ലാത്തിലും ബ്രോഡ്ബാന്റ് ഇന്റർനെറ്റ് സൗകര്യം ലഭ്യമാണ് . ലാബിൽ ഹാർഡ് വെയർ ഘടകങ്ങളുടെ	ഒരു പ്രദർശനവും ഒരുക്കിയിട്ടുണ്ട് .എൽ.പി. വിഭാഗത്തിലെ കുട്ടികൾക്ക് ഹൈസ്ക്കൂൾ ലാബിലെ സൗകര്യം പ്രയോജനപ്പെടുത്തി ആഴ്ച്ചയിൽ ഒരിക്കൽ കമ്പ്യൂട്ടറിൽ പരിശീലനം നൽകുന്നു. പ്രധാനമായും ഉബുണ്ടു  ഒപ്പറേറ്റിംഗ് സിസ്റ്റത്തിൽ ഉൾപ്പെടുത്തിയിരിക്കുന്ന  വി‌ദ്യാഭ്യാസപ്രാധാന്യമുളള  സോഫ്റ്റ് വെയറുകൾ ഉപയോഗപ്പെടുത്തിയാണ്  ഈ  പരിശീലനം. സ്ക്കൂളുമായി ബന്ധപ്പെട്ട വിവിധപ്രവർത്തനങ്ങളുടെ ഡോക്യുമെന്റേഷൻ നടത്തുന്നതിനായി വീഡിയോ ക്യാമറ ലഭ്യമാണ്. 2010 മാർച്ച് മുതൽ SPARK വഴിയാണ് ശമ്പളം ലഭ്യമാക്കുന്നത്. സമീപത്തുള്ള മറ്റു വിദ്യാലയങ്ങളും  SPARK സംബന്ധമായ ജോലികൾക്ക് ഈ സ്ക്കൂളിനെയാണ് ആശ്രയിക്കുന്നത്. കത്തിടപാടുകൾ നടത്തുന്നതും സർട്ടിഫിക്കറ്റുകൾ വിതരണം ചെയ്യുന്നതുമൊക്കെ ഇന്റർനെറ്റ്/കമ്പ്യൂട്ടറിന്റെ സഹായത്താലാണ്. 

           ഹൈസ്ക്കൂളിലെ മുഴുവൻ കുട്ടികൾക്കും മുഴുവൻ അദ്ധ്യാപകർക്കും ഇ-മെയിൽ വിലാസമുണ്ട്. PTA/CPTA മീറ്റിംഗുകൾക്കുള്ള അറിയിപ്പുകൾ നൽകുന്നതിന് ഇന്റർനെറ്റിലെ ഗ്രൂപ്പ് മെസ്സേജിങ്  സർവീസ് പ്രയോജനപ്പെടുത്തുന്നു. സ്ക്കൂൾ ബ്ലോഗ് , സ്ക്കൂൾ വിക്കി എന്നിവ പരസ്പരം ലിങ്ക് ചെയ്ത്  ഐ.ടി. ക്ലബിന്റെ നേതൃത്വത്തിൽ നിരന്തരം പ്രവർത്തനങ്ങൾ നടത്തിവരുന്നു.(ഐ.ടി. ക്ലബിന്റെ    പ്രവർത്തനങ്ങൾ ക്ലബ് പ്രവർത്തനങ്ങളിൽ വിശദമായി നൽകിയിട്ടുണ്ട്) ലഭ്യമായ ICT ഉപകരണങ്ങളെയും സംവിധാനങ്ങളെയും പരമാവധി പ്രയോജനപ്പെടുത്തുന്നതിനായി മുഴുവൻ ക്ലാസ്സ് മുറികളും വൈദ്യുതീകരിച്ച് ചുമരുകളിൽ സ്ക്രീൻ സംവിധാനം  ഏർപെടുത്തിയിട്ടുണ്ട് . സ്ക്കൂളിന്റെ സാങ്കേതിക മികവ് സമൂഹത്തിനുംകൂടി പ്രയോജനപ്പെടുത്തുന്നതിന്റെ ഭാഗമായി ഓരോ പ്രദേശങ്ങൾ കേന്ദ്രീകരിച്ച് ,ഡിജിറ്റൽ പ്രോജക്റ്റർ  ഉപയോഗിച്ച് ഡോക്യുമെന്ററി പ്രദർശനങ്ങൾ സംഘടിപ്പിക്കാറുണ്ട്.

പ്രശസ്തരായ പൂർവവിദ്യാർത്ഥികൾ
ഡോ. അമാനുള്ള. യു.എസ്.എ.
ഇബ്രാഹിം ബളക്കില, കർണാടക അഡ്മിനിസ്ട്രേറ്റീവ് സർവ്വീസ്
കെ. പുണ്ഡരീകാക്ഷ ആചാര്യ- കാസറഗോഡ് എ.ഇ.ഒ.
ലക്ഷ്മീനാരായണ-ശാസ്ത്രജ്ഞൻ
അഡൂർ ശ്രീധര റാവു-പ്രശസ്ത യക്ഷഗാനകലാകാരൻ
ഗംഗാധരൻ. എം - ഹെഡ്മാസ്റ്റർ, ജി.എച്ച്.എസ്.എസ്. പാണ്ടി
കീർത്തിനാരായണ-സോഫ്റ്റ് വെയർ എഞ്ചിനിയർ, ലണ്ടൻ
പദ്മ. എച്ച്. (സീനിയർ അസിസ്റ്റന്റ്, ജി.എച്ച്.എസ്.എസ്. അഡൂർ)
ഈ സ്ക്കൂളിൽ പൂർവ്വവിദ്യാർത്ഥികളായി ഇപ്പോൾ ഇതേ സ്ക്കൂളിൽ തന്നെ ജോലി ചെയ്യുന്നവർ
പദ്മ. എച്ച്. (സീനിയർ അസിസ്റ്റന്റ്)
അബ്ദുൽ സലാം. എ.എം (എച്ച്.എസ്.എ. ഫിസിക്കൽ സയൻസ്)
രാജാറാം. എ (എച്ച്.എസ്.എ. നാച്ചുറൽ സയൻസ്)
കൃഷ്ണപ്പ. ബി. (എൽ.പി.എസ്.എ. കന്നഡ)
ചെനിയ നായ്ക്ക് (എൽ.പി.എസ്.എ. കന്നഡ)
ഗംഗാധരൻ (എൽ.പി.എസ്.എ. കന്നഡ)
സെമി അലി (എൽ.ഡി.സി.)
മീനാക്ഷി. ടി (എച്ച്.എസ്.എ. ഹിന്ദി - താൽക്കാലികം)
ഫാത്തിമത്ത് സമീറ. ബി. എം (എച്ച്.എസ്.എ. ഹിന്ദി - താൽക്കാലികം)
പദ്മാവതി. സി.ജെ (എച്ച്.എസ്.എ. ഫിസിക്കൽ സയൻസ് - താൽക്കാലികം)
അഹമ്മദ് സനദ് (ജൂനിയർ ലാംഗ്വേജ് ടീച്ചർ അറബിക്ക് - താൽക്കാലികം)

ആവശ്യങ്ങൾ

പത്ത് കിലോമീറ്റർ വരെ അകലെ നിന്ന് കുട്ടികൾ വരുന്നുണ്ട്. ബസ് സർവ്വീസ് വേണ്ടത്രയില്ലാത്തതിനാൽ കുട്ടികൾക്ക് കൃത്യ സമയത്ത് ക്ലാസ്സിൽ ഹാജരാകാൻ പ്രയാസം നേരിടുന്നുണ്ട്. സ്ക്കൂളിന് സ്വന്തമായി വാഹനം വേണം
ഹൈസ്ക്കൂളിൽ കൂടുതലായി നാല് ഡിവിഷനുകൾക്കുള്ള കുട്ടികളുണ്ട്. ഡിവിഷനുകൾ അനുവദിക്കണം
ഡിവിഷനുകൾ അനുവദിക്കുമ്പോൾ ക്ലാസ്സ് മുറികളും ആവശ്യമാണ്.
സയൻസ് ലാബ്, കമ്പ്യൂട്ടർ ലാബ്, മൾട്ടിമീഡിയ , സ്ക്കൂൾ ഓഫീസ് എന്നിവ സാധാരണ ക്ലാസ്സ് മുറികളിൽ തന്നെയാണ് പ്രവർത്തിക്കുന്നത്. ഓരോന്നിനും അനുയോജ്യമായ ഘടനകളിലുള്ള കെട്ടിടങ്ങൾ വേണം.
കുടിവെള്ളസൗകര്യം കുറച്ചുകൂടി മെച്ചപ്പെടുത്തണം
വൈകല്യമുള്ള കുട്ടികൾക്ക് പ്രത്യേക അദ്ധ്യാപിക/അദ്ധ്യാപകൻ വേണം
മുഴുവൻ ക്ലാസ്സ് മുറികളും പൊടിവിമുക്തമാക്കണം
ക്ലാസ്സ് മുറികളുടെ ചുമരുകൾ കൂടുതൽ ആകർഷകമാക്കണം
പ്രൈമറി ക്ലാസ്സിലെ കുട്ടികൾക്ക് കളിക്കാനും ഉല്ലസിക്കാനുമായി പ്രത്യേക പാർക്ക് വേണം
പഠനാനുബന്ധപ്രവർത്തനങ്ങൾക്ക് പ്രത്യേക മുറികൾ ആവശ്യമാണ്
കളിസ്ഥലം കൂടുതൽ മെച്ചപ്പെടുത്തണം
സയൻസ് ലാബ് ആധുനികവൽക്കരിക്കണം (ശാസ്ത്രപോഷിണി ലാബിനായി അപേക്ഷ സമർപ്പിച്ചിട്ടുണ്ട്.)
കൂടുതൽ ICT ഉപകരണങ്ങൾ ആവശ്യമാണ്.
നിലവിലുള്ള പാചകപ്പുരയുടെ വലിപ്പം വർദ്ധിപ്പിക്കണം.