എച്ച്.എസ്. എസ് ഫോർ ഗേൾസ് വെങ്ങാനൂർ/പ്രവർത്തനങ്ങൾ/2025-26

പ്രവേശനോത്സവം 2025-26

2025 -26 അധ്യയന വർഷത്തിലെ സ്കൂൾ പ്രവേശനോത്സവം മുൻ വർഷത്തെപോലെ സമുചിതമായി ആഘോഷിച്ചു. തലേദിവസം തന്നെ സ്കൂൾ അംഗനവും ഓഡിറ്റോറിയവും മുത്തുക്കുടകളും വർണ്ണാഭമായ തോരണങ്ങളും കൊണ്ട് അലങ്കരിച്ചു. 2-6-2025നു രാവിലെ 9.30 ന് മുമ്പ് എത്തിയ രക്ഷകർത്താക്കൾക്ക് സ്കൂളിന്റെ ഡോക്യുമെൻററി പ്രദർശിപ്പിച്ചു. തുടർന്ന് വിദ്യാർത്ഥിനികളുടെ ഈശ്വര പ്രാർത്ഥനയോടുകൂടി യോഗം ആരംഭിച്ചു. സ്വാഗതം ആശംസിച്ചത് പ്രിൻസിപ്പാൾ ശ്രീ.പ്രേമജ് കുമാർ സാർ ആണ്. ഈ വിദ്യാലയത്തിൽ വിദ്യാർത്ഥിനികൾക്ക് പഠിക്കാൻ അവസരം കിട്ടിയത് ഭാഗ്യമാണെന്നും വിദ്യാലയത്തിന്റെ പുരോഗതിയെ കുറിച്ചും സാർ സംസാരിച്ചു. അധ്യക്ഷ സ്ഥാനം അലങ്കരിച്ചത് വിദ്യാലയത്തിന്റെ ബഹുമാനപ്പെട്ട മാനേജർ ശ്രീമതി ദീപ്തി ഗിരീഷ് അവർകളാണ്.

പ്രവേശനോത്സവം ഉദ്ഘാടനം ചെയ്തത് ബഹുമാനപ്പെട്ട കോവളം എം എൽ എ ശ്രീ.അഡ്വക്കേറ്റ് എം.വിൻസൻറ് അവർകളാണ്. അദ്ദേഹം സ്കൂളിന്റെ മികവിനെ കുറിച്ച് സംസാരിച്ചു. മുഖ്യാതിഥിയായി തിരുവനന്തപുരം സെൻട്രൽ ജയിൽ സൂപ്രണ്ട് ശ്രീ. എസ് സജീവ് സാർ പങ്കെടുത്തു. അദ്ദേഹം അച്ചടക്കത്തെ കുറിച്ചും ജീവിതത്തിൽ പാലിക്കേണ്ട മൂല്യങ്ങളെ കുറിച്ചും മുഖ്യ പ്രഭാഷണം നടത്തി. തുടർന്ന് പ്ലസ്ടുവിൽ ഉന്നത വിജയം നേടിയ വിദ്യാർഥിനികളെ മാനേജരും എം.എൽ.എ ശ്രീ. എം. വിൻസൻ്റ് അവർകളും ഹയർസെക്കൻഡറി അധ്യാപകരും ചേർന്ന് ക്യാഷ് അവാർഡും പാരിതോഷികവും നൽകി ആദരിച്ചു. അതോടൊപ്പം ആറാം ക്ലാസിലെ കൊച്ചു മിടുക്കികൾ പ്രവേശനോത്സവ ഗാനം ആലപിച്ച് സദസിനെ ധന്യമാക്കി. നമ്മുടെ വിദ്യാലയത്തിന്റെ പി.ടി.എ. പ്രസിഡൻറ് ശ്രീ. വി. എസ്. സന്തോഷ് കുമാർ വൈസ് പ്രസിഡൻറ് ശ്രീ. സക്കീർ ഹുസൈൻ എന്നിവർ വിദ്യാർത്ഥിനികൾക്ക് ആശംസകൾ നേർന്നു.നന്ദി രേഖപ്പെടുത്തിയത് നമ്മുടെ വിദ്യാലയത്തിന്റെ പ്രഥമ അധ്യാപകൻ ശ്രീ. ബി.വി. രഞ്ജിത് കുമാർ സാർ ആണ്. അദ്ദേഹം നമ്മുടെ സ്കൂൾ അച്ചടക്കത്തെയും അകത്തും പുറത്തും കുട്ടികൾ പാലിക്കേണ്ട നിയമങ്ങളെയും കുറിച്ച് സംസാരിച്ച് നന്ദി രേഖപ്പെടുത്തി.

വിദ്യാലയത്തിൽ എത്തിച്ചേർന്ന മുഴുവൻ വിദ്യാർഥിനികൾക്കും രക്ഷിതാക്കൾക്കും മധുരപലഹാരങ്ങളും പായസവും വിഭവസമൃദ്ധമായ ഉച്ചഭക്ഷണവും നൽകി.