ജി.വി.എച്.എസ്.എസ് കൊപ്പം/എന്റെ ഗ്രാമം

കൊപ്പത്തിന്റെ പ്രാദേശിക ചരിത്ര കുറിപ്പുകൾ

ജന്മി-കുടിയാൻ ബന്ധത്തിലധിഷ്ഠിതമായ സാമൂഹ്യക്രമം ആയിരുന്നു ഇവിടെ നിലനിന്നിരുന്നത്. ജന്മി കുടുംബങ്ങൾക്ക് പാട്ടംകൊടുത്തുകൊണ്ടും അവരുടെ മേധാവിത്വം അംഗീകരിച്ചുകൊണ്ടും മാത്രമേ ആദ്യകാലത്ത് സാധാരണക്കാരായ കൃഷിക്കാർക്കു ജീവിക്കുവാൻ കഴിയുമായിരുന്നുള്ളു. ആദ്ധ്യാത്മികതയുടെയും മണ്ണിന്റെയും അധിപരായിരുന്ന ജന്മിമാരുടെ മേധാവിത്തം കൃഷിക്കാരന്റെ അവകാശങ്ങളെ ഞെക്കിഞെരുക്കിയിരുന്നു. കാനം പള്ളത്ത് ശങ്കരൻനായർ സ്ഥാപിച്ച പുലാക്കുന്നത്ത് സ്കൂളായിരുന്നു ഈ പഞ്ചായത്തിലെ ആദ്യത്തെ സ്കൂൾ. നാട്ടെഴുത്തശ്ശൻമാർ എഴുത്തു പഠിപ്പിക്കുന്ന രീതിയും ഇവിടെ ഉണ്ടായിരുന്നു. മുസ്ളീങ്ങൾക്കിടയിൽ ഓത്തുപള്ളിക്കൂടങ്ങളും ബ്രാഹ്മണസമുദായത്തിൽ സംസ്കൃത-വേദപഠനങ്ങളും നടന്നുവന്നിരുന്നു. ഈ പഞ്ചായത്തിലും നവോത്ഥാനപ്രസ്ഥാനങ്ങൾ ഉദയം കൊണ്ടിരുന്നു.നമ്പൂതിരിയോഗക്ഷേമസഭയുടെ പ്രവർത്തനം ഇവിടെ എടുത്തു പറയേണ്ടിയിരിക്കുന്നു.വള്ളുവനാട്ടിലാകെ ഈ പ്രസ്ഥാനത്തിനു വേരോട്ടമുണ്ടായിരുന്നു.സാമൂഹ്യപരിഷ്കരണ പ്രസ്ഥാനങ്ങൾ പിന്നീടു വളർന്നുവന്ന ദേശീയ പ്രക്ഷോഭങ്ങൾക്ക് വേണ്ട ഊർജ്ജം പകർന്നു കൊടുത്തു. പരിഷ്കരണ പ്രവർത്തനങ്ങളുമായി ബന്ധപ്പെട്ടവരിൽ പലരും പിൽക്കാലത്ത് സ്വാതന്ത്യസമര സേനാനികളായി മാറി.ഇക്കൂട്ടത്തിൽ പള്ളം,ആര്യപള്ളം എന്നിവർ മുൻപന്തിയിലുണ്ടായിരുന്നു.ഇതിനു മുമ്പുതന്ന എം.പി.ഗോവിന്ദമേനോനിൽ നിന്ന് പ്രചോദനമുൾക്കൊണ്ടുകൊണ്ട് ഇ.പി.ഗോപാലൻ ദേശീയപ്രസ്ഥാനത്തിലേക്ക് കടന്നുവന്നിരുന്നു.അയിത്തോച്ചാടനം, മിശ്രഭോജനം, ക്ഷേത്രപ്രവേശനം, കള്ളുഷാപ്പ് പിക്കറ്റിംഗ്, വിദേശവസ്ത്രബഹിഷ്ക്കരണം, ഉപ്പു കുറുക്കൽ എന്നീ പ്രവർത്തനങ്ങളുമായി ബന്ധപ്പെട്ട് നവോത്ഥാന പ്രവർത്തകർ രാജ്യം മുഴുവൻ സഞ്ചരിക്കുകയായിരുന്നു. പാട്ടക്കുടിയാൻമാരുടെ ദുരിതങ്ങൾക്കറുതി വരുത്താനായി നടത്തപ്പെട്ട ചെറുതും വലുതുമായ ഒട്ടേറെ സമരങ്ങൾ ഉയർന്നുവരുന്ന സാഹചര്യമായിരുന്നു അന്നത്തേത്. കോൺഗ്രസ് സോഷ്യലിസ്റ്റ് പാർട്ടി രൂപാന്തരപ്പെട്ടപ്പോൾ മുതൽ വർഗ്ഗ ബഹുജന സംഘടനാ പ്രവർത്തനങ്ങൾ ആരംഭിച്ചതായി കാണാം. അധ്യാപക പ്രസ്ഥാനം, കർഷക പ്രസ്ഥാനം, കലാസമിതികൾ എന്നിവ ആ കാലത്താണ് ഉയർന്നുവന്നത്. നിർദ്ധന ജനങ്ങൾക്ക് ചികിൽസാസഹായങ്ങൾ നൽകിയിരുന്ന പുലാശ്ശേരിയിലെ കൊക്കോട്ടിൽ കൃഷ്ണൻനമ്പ്യാർ നാടൻ ചികിൽസാ സമ്പ്രദായങ്ങളനുസരിച്ച് ഒടിവ്, ചതവ്, മുറിവ് എന്നിവക്കായി ഉഴിച്ചിൽ നടത്തിയിരുന്നു. പുലാശ്ശേരിയിലെ കരുവാവിൽ കളരിയും, ആമയൂർ പുതിയ റോഡിലെ പണിയങ്ങാട്ടു പണിക്കരുടെ കളരിയും ആയോധന പരിശീലനത്തിനു വഴിയൊരുക്കിയിരുന്നു. ആദിദ്രാവിഡ സ്കൂൾ (1936 മാർച്ച്16) ഇപ്പോൾ പുലാശ്ശേരി ഗവ: വെൽഫയർ സ്കൂൾ ആയിമാറിയിരിക്കുന്നു. പ്രശസ്ത കവിയായിരുന്ന കരുവാൻതൊടി ശങ്കരനെഴുത്തശ്ശനും അദ്ദേഹത്തിന്റെ മരുമകൻ ഡോ കെ.എൻഎഴുത്തശ്ശനും ഈ പഞ്ചായത്തുകാരായിരുന്നുവെന്നത് അഭിമാനകരമാണ്.

കാർഷിക ചരിത്രം

മാമലകളും കുന്നിൻചെരിവുകളും തെങ്ങിൻതോപ്പുകളും ചന്തം ചാർത്തുന്ന കൊപ്പം പഞ്ചായത്തിലെ സസ്യശ്യാമളമായ നെൽവയലുകൾ കണ്ണിനും കരളിനും കൌതുകമുണർത്തുന്ന അനുഭൂതിയായിരുന്നു. പണ്ടുകാലത്ത് ആര്യൻ, തെക്കൻചീര, കഴമ, പൊന്നാര്യൻ, വെട്ടുകാരി, ചെങ്കഴമ, വട്ടൻ, വെളുത്തവട്ടൻ, മോടൻ, തവളക്കണ്ണൻ, ചിറ്റ്യനി, നവരം, തെക്കൻബീവി, വെള്ളക്കോലി, നെയ്ചീര തുടങ്ങി വൈവിധ്യമുള്ള നെല്ലിനങ്ങളും ചാമ, കോറ, എള്ള്, മുതിര തുടങ്ങിയ മറ്റ് ധാന്യങ്ങളും ധാരാളമായി കൃഷി ചെയ്തിരുന്നു. വാഴ, ഉഴുന്ന് തുടങ്ങിയവയുടെ കൃഷികളുമുണ്ടായിരുന്നു. കാളപൂട്ടുമൽസരം കൃഷിക്കാരന്റെ ജീവിതത്തിന്റെ ഭാഗമായിരുന്നു. പണ്ടത്തെ കൃഷിക്കാർ അധ്വാനശീലരായിരുന്നു. ഗ്രാമത്തിലെ ഭൂരിഭാഗം ആൾക്കാരുടെയും മുഖ്യവരുമാനം കൃഷിയിൽ നിന്നായിരുന്നു. സ്വാതന്ത്യലബ്ധിക്കു മുമ്പുതന്ന പൊതുവിദ്യാഭ്യാസരംഗത്ത് കൊപ്പം പഞ്ചായത്ത് മുന്നേറിയിരുന്നു. 20-ാം നൂറ്റാണ്ടിന്റെ ആദ്യദശകത്തിൽ തന്ന ഇവിടെ സ്കൂൾ നിലവിൽ വന്നിരുന്നു.അതിനുമുമ്പുതന്ന എഴുത്തുപള്ളിക്കൂടങ്ങളും, ഓത്തുപള്ളിക്കൂടങ്ങളും നടത്തപ്പെട്ടിരുന്നു. സംസ്കൃതവിദ്യാഭ്യാസവും ചില നമ്പൂതിരി കുടുംബങ്ങളിൽ നിലവിലുണ്ടായിരുന്നു.ദേശീയപ്രസ്ഥാനവും അതിന്റ ഭാഗമായ സാമൂഹികപരിഷ്കരണ പ്രവർത്തനങ്ങളും കൊപ്പം പഞ്ചായത്തിലെ വിദ്യാഭ്യാസരംഗത്ത് നിർണ്ണായകമായ സ്വാധീനം ചെലുത്തിയിട്ടുണ്ട്.

സാംസ്കാരിക ചരിത്രം

ഹിന്ദുക്കളും മുസ്ളീങ്ങളും ക്രിസ്ത്യൻ കുടുംബങ്ങളും മതസൌഹാർദ്ദത്തോടെ ജീവിക്കുന്ന അവസ്ഥയാണ് പഞ്ചായത്തിലുള്ളത്. വിവിധ മതവിഭാഗങ്ങൾക്ക് അവരുടേതായ ആരാധനാലയങ്ങൾ ഉണ്ട്. പുരാതന കാലം മുതൽ ഇവിടെ തനതുകലകൾ നിലനിന്നിരുന്നു. പാനകളി, പൂതൻ, തിറ, ആണ്ടി, ചപ്പിപൂതം, പറപ്പൂതം, ചവിട്ടുകളികൾ, കൈകൊട്ടിക്കളി, തുമ്പിതുളളൽ, പരിചമുട്ടുകളി, കോൽക്കളി, കളമെഴുത്ത്, പുള്ളുവൻപാട്ട് തുടങ്ങിയ കലകളും പ്രചാരത്തിലുണ്ടായിരുന്നു. പണ്ട് കളരിപ്പയറ്റ്, ഓണത്തല്ല് തുടങ്ങിയ പ്രസിദ്ധമായ കലകൾ അരങ്ങേറിയിരുന്ന പ്രദേശമാണിത്. തലപ്പന്ത് കളിക്കാനും, പകിടകളിക്കാനും, ആട്ടക്കളത്തിനും പ്രചാരമുണ്ടായിരുന്നു. വില്ലുകൊട്ടാൻ താൽപര്യമുള്ളവരും ഉണ്ടായിരുന്നു. വാദ്യകലകൾക്ക് പ്രോൽസാഹനം നൽകുന്ന പ്രദേശമായിരുന്നു കൊപ്പം. പ്രശസ്ത സാമൂഹ്യപ്രവർത്തകരായിരുന്ന പള്ളത്തിന്റെയും, കെ.ജി മാസ്റ്ററുടെയും നേതൃത്വത്തിൽ സഞ്ചരിക്കുന്ന നാടകസംഘവും പ്രവർത്തിച്ചിരുന്നു. മുത്തിരങ്ങോട്ട് ഭവത്രാതൻ നമ്പൂതിരിപ്പാടിന്റെ നേതൃത്വത്തിൽ പ്രശസ്ത സാമൂഹ്യ പരിഷ്കർത്താവായ വി.ടി.യുടെ അടുക്കളയിൽ നിന്ന് അരങ്ങത്തേക്ക് എന്ന നാടകം മണ്ണേങ്ങോട് അരങ്ങേറിയിരുന്നു.അക്കാലത്തുതന്ന കെ.ദാമോദരന്റെ പാട്ടബാക്കി എന്ന നാടകവും, അന്നത്തെ ജന്മിനാടുവാഴിത്തത്തിനെതിരെയും, നമ്പൂതിരി മേധാവിത്വത്തിനെതിരെയും ജനങ്ങളെ സമരരംഗത്തേക്ക് ഇറക്കികൊണ്ടുവരാൻ സഹായിച്ചു. പള്ളം, ഇ.പി. ഗോപാലൻ എന്നിവർ നടൻമാരായിരുന്നു.1952-ൽ സ്ഥാപിക്കപ്പെട്ട് ആമയൂർ കലാസമിതി, പിന്നീട് 1968-ൽ കൊപ്പം കേന്ദ്രീകരിച്ച്, കൊപ്പം കലാനിലയം എന്ന സ്ഥാപനമായി മാറി. കൊപ്പം കലാനിലയത്തോടനുബന്ധിച്ചു പ്രവർത്തിച്ചിരുന്ന വായനശാല 1969-ൽ പള്ളം സ്മാരക വായനശാലയായി രൂപാന്തരപ്പെട്ടു. 1975-ൽ പ്രവർത്തനം നിലച്ച ഈ വായനശാല 85-ൽ പുനരാരംഭിച്ചു. കൊപ്പം ആർട്സ്&സ്പോർസ് ക്ളബ്ബ് ഗ്രന്ഥശാലയുമായി 1987-ൽ സംയോജിപ്പിച്ച പള്ളം സ്മാരക വായനശാലയ്ക്ക് കേരളഗ്രന്ഥശാലാ സംഘത്തിന്റെ അഫിലിയേഷൻ ലഭിച്ചിട്ടുണ്ട്.