കണ്ടക്കൈ എൽ.പി. സ്ക്കൂൾ/ചരിത്രം

മയ്യിൽ ഗ്രാമപഞ്ചായത്തിൽ കയരളം വില്ലേജിൽ വേളം, കോട്ടയാട് ദോശാതിർത്തിയിൽ കൊളാപ്പറമ്പ എന്ന സ്ഥലത്ത് സ്ഥിതി ചെയ്യുന്ന വിദ്യാലയമാണ് കണ്ടക്കൈ എൽ.പി. സ്ക്കൂൾ 1910-ൽ അന്നത്തെ കണ്ടക്കൈ അധികാരിയായിരുന്ന കുഞ്ഞിക്കണ്ണൻ നമ്പ്യാർ സ്ഥാപിച്ചത് കൊണ്ടായിരിക്കാം കണ്ടക്കൈ എ.എൽ.പി. സ്ക്കൂൾ എന്ന് പേര് വന്നത്. കണ്ടക്കൈ അധികാരിയുടെയും ആശ്രിതന്മാരുടേയും കുട്ടികളെ പഠിപ്പിക്കുന്നതിനായി കോട്ടയാട് സ്ഥാപിച്ച എഴുത്തുപള്ളിക്കുടമാണ് വിദ്യാലയത്തിന്റെ ആദ്യരൂപം. ബ്രിട്ടീഷ് ഗവണ് മെൻറ് മദ്രാസ് ലോക്കൽ ബോർഡ് ആക്ട് അനുസരിച്ച് അധീനപ്രദേശങ്ങളിൽ പ്രാഥമിക വിദ്യാഭ്യാസ സ്ഥാപനങ്ങൾ ആരംഭിക്കുന്നതിനുള്ള പ്രവർത്തനങ്ങള്ക്ക് തുടക്കം കുറിച്ചതോടെ, മലാബാറിൽ പ്രാഥമിക വിദ്യാലയങ്ങള് ഉയർന്നുവന്നതും ഈ പ്രദേശത്ത് മറ്റു വിദ്യാലയങ്ങൾ ഇല്ലാതിരുന്നതും കണ്ടക്കൈ അധികാരിയെ ഒരു വിദ്യാലയം തുടങ്ങുന്നതിന് പ്രേരിപ്പിച്ച ഘടകങ്ങളായിരുന്നു. 1932 വരെ ശ്രീ.കുഞ്ഞിക്കണ്ണൻ നമ്പ്യാർ (അധികാരി) ആയിരുന്നു മാനേജർ. അതിന് ശേഷം 1973 വരെ ശ്രീ,എ.രാഘവൻ നമ്പ്യാർ ആയിരുന്നു മാനേജർ. തുടർന്ന് അദ്ദേഹത്തിന് മകൻ ശ്രീ.എ.കെ.ഗംഗാധരൻ നമ്പ്യാർ മാനേജരായി ചുമതലയേറ്റു. ഇപ്പോൾ സ്ക്കൂൾ സ്ഥിതിചെയ്യുന്ന സ്ഥലവും കെട്ടിടവും ശ്രീ കെ.വി.സുരേന്ദ്രൻ എന്നയാള്ക്ക് കൈമാറ്റം ചെയ്തിരിക്കുകയാണ്. വേങ്ങയിൽ നായനാർ നൽകിയ ഒരേക്ര സ്ഥലത്ത് ഒരു ഷെഡ്ഡ് കെട്ടിയാണ് വിദ്യാലയം ആരംഭിച്ചത്. കുട്ടികൾ വർദ്ധിച്ചതനുസരിച്ച് ഓലമേൽക്കുരയുള്ള മണ്ണ് കൊണ്ടുള്ള ഒരു കെട്ടിടം കൂടി പണിതു. ഇവ രണ്ടു പ്രാവശ്യം കാട്ടുതീയിൽ നശിച്ചുപോയി. ഇന്നുള്ള പ്രീ.കെ.ഇ.ആർ.കെട്ടിടം നിർമ്മിച്ചത് 1940-ലാണ്. ഓഫീസ് മുറിയോടുകൂടിയ 5 ക്ലാസ് മുറികളുള്ള ഒടുമേഞ്ഞ വിദ്യാലയം നാട്ടിലെ അക്കാലത്തെ വലിയ കെട്ടിടങ്ങളിലൊന്നായിരുന്നു. 1996-ലാണ് ക്ലാസ് റൂം സൌകര്യത്തോടെ മറ്റൊരു കെട്ടിടം കൂടി പണിഞ്ഞത്. 1910 മുതൽ 1930 വരെയുള്ള ആദ്യഘട്ടത്തിൽ നിരവധി അധ്യാപകർ ഇവിടെ സേവനം അനുഷ്ഠിച്ചിട്ടുണ്ട്. അധ്യാപനം ഉപജീവനമാർഗ്ഗമായി കരുതാൻ തക്ക വേതനം ലഭ്യമല്ലാത്ത അക്കാലത്ത് സേവനം എന്ന നിലയിലായിരിക്കാം അൽപകാലം മാത്രം ജോലി ചെയ്ത് പലരും പിരിഞ്ഞു പോയത്.അധ്യാപകരെ മാനേജറുടെ ഇഷ്ടപ്രകാരം ചേർക്കുകയും വിടുകയും ചെയ്യാമായിരുന്ന അക്കാലത്ത് എം.ചാത്തു നമ്പ്യാർ, കെ.വി.നാരായണൻ നമ്പ്യാർ, കെ.എം.നാരായണൻ നമ്പ്യാർ,കെ.കുഞ്ഞിരാമൻ നമ്പ്യാർ,കെ.വി.കൃഷ്ണമാരാർ എന്നിവർ ആദ്യകാല അധ്യാപകരായി ജോലി ചെയ്തിട്ടുണ്ട്. ദേശീയ സ്വാതന്ത്ര്യസമരവും, കർഷക പ്രസ്ഥാനവും ശക്തിപ്പെട്ടുകൊണ്ടിരുന്ന കാലത്ത് കെ.കേളുമാസ്റ്റർ സമരങ്ങളിൽ പങ്കെടുത്ത് പോലീസ് റിമാൻറിലായതിനാൽ സ്കൂളിൽ നിന്ന് പുറത്തായതായി രേഖയിലുണ്ട്. വേളം, കോട്ടയാട് കണ്ടക്കൈ, പെരുവങ്ങൂർ തുടങ്ങിയ സ്ഥലങ്ങളിൽ നിന്നുള്ളവരായിരുന്നു ആദ്യകാല പഠിതാക്കൾ 1912 മുതൽ തന്നെ പെണ്കുട്ടികൾ വിദ്യായലത്തിലെത്തിയതായി രേഖയിൽ കാണുന്നു. നാടൻ കലാരൂപങ്ങളായ കോൽക്കളി, കുമ്മി, ചരടുകുത്തിക്കളി എന്നിവ വളരെ ഉയർന്ന നിലാവാരത്തിൽ ഇവിടെ പരിശീലിപ്പിച്ചതായി പരിശോധനകുറിപ്പിൽ രേഖപ്പെടുത്തിയിട്ടുണ്ട്. വൈകുന്നേരങ്ങളിൽ പച്ചക്കറി കൃഷി, പൂന്തോട്ട നിർമ്മാണം എന്നിവയും അഭ്യസിച്ചിരുന്നു. സ്കൂൾ സ്ഥാപകനായിരുന്ന കുഞ്ഞിക്കണ്ണൻ നമ്പ്യാർ 1929-ൽ ഹെഡ്മാസ്റ്ററും മാനേജരുമായി ചുമതയേൽക്കുകയും ചെയ്തു. അതിനുശേഷമാണ് സ്ഥിര അധ്യാപകരുള്ള സ്ഥിതിവിശേഷവും ചിട്ടയായ പ്രവർത്തനവും ആരംഭിച്ചത്. 2.3.1954 മുതൽ സ്ഥിരാധ്യാപകനായി ചേർന്ന എ.കെ.ശ്രീധരൻ നമ്പ്യാർ 25.4.58 നു പ്രധാനാധ്യപകനായി ചുമതലയേറ്റു. വരെ അദ്ദേഹം ആ സ്ഥാനത്തു തുടർന്നു. എ.കെ.സതി, കെ.ഒ.ചന്ദ്രമതി, കെ.ശ്രീധരൻ എന്നിവർ ദീർഘകാലം സേവനം അനുഷ്ഠിച്ച അധ്യാപകരായിരുന്നു. 1.4.1986 മുതൽ 31.03.2007 വരെ ശ്രീ.കെ.ശ്രീധരൻ ഹെഡ്മാസ്റ്ററായി 1.4.2007 മുതൽ ഹെഡ്ടീച്ചറായി തുടർന്നു വരുന്ന ശ്രീമതി.എ.കെ.ശ്രീലതയ്ക്കു പുറമെ സി.വിനോദ്, സി.കബീർ, എം.വിനോദിനി, വി.മിനി എന്നിവർ നിലവിൽ അധ്യാപകരായി സേവനം അനുഷ്ഠിച്ചു വരുന്നു. 1986 മുതൽ ഉച്ചഭക്ഷണതൊഴിലാളിയായി തുടരുന്ന കെ.കെ.കമലയും സ്കൂളിലെ ഒരംഗത്തെപ്പോലെ സേവനം ചെയ്യുന്നു. 1992 മുതൽ അറബിക് പഠനം ആരംഭിച്ചു. 2015-2016 വർഷം മുതൽ സ്കൂളിൽ പുതിയ കെട്ടിട

സൌകര്യത്തോടു കൂടി എൽ.കെ.ജി ക്ലാസുകൾ ആരംഭിച്ചു. 2016-17 വർഷം യു.കെ.ജി ക്ലാസുകൾ ആരംഭിച്ചു. ഈ വിഭാഗത്തില് ജോലി ചെയ്യുന്ന 3 പേർ ഉൾപ്പടെ എൽ.കെ.ജി.മുതൽ നാലാം ക്ലാസുവരെയായി 8 പേർ ഈ വിദ്യാലയത്തിൽ സേവനമനുഷ്ഠിക്കുന്നു.2010-11 വർഷം നടന്ന സ്കൂളിന്റെ ശതവാർഷിക ആഘോഷം 1 വർഷം നീണ്ടു നിൽക്കുന്ന ഒരു  ഗ്രാമോത്സവമായി മാറിയിരുന്നു.

സ്കൂൾ

സൗകര്യങ്ങൾ

പ്രവർത്തനങ്ങൾ

ക്ലബ്ബുകൾ

ചരിത്രം

അംഗീകാരം