എ.എം.എൽ.പി.എസ്. വില്ലൂർ/പ്രവർത്തനങ്ങൾ/2026-27

ആമുഖം

ഒരു വിദ്യാലയം കെട്ടിടങ്ങളോ പാഠപുസ്തകങ്ങളോ മാത്രമല്ല; ഒരു സമൂഹത്തിന്റെ സ്വപ്നങ്ങളും പ്രതീക്ഷകളും ഭാവിയും രൂപപ്പെടുന്ന ഇടമാണ്. ഓരോ കുട്ടിയുടെയും ഉള്ളിലുള്ള സാധ്യതകളെ കണ്ടെത്തി പരിപോഷിപ്പിക്കുകയും നല്ല മനുഷ്യരായി വളരാൻ അവരെ പ്രാപ്തരാക്കുകയും ചെയ്യുന്നതാണ് വിദ്യാഭ്യാസത്തിന്റെ യഥാർത്ഥ ദൗത്യം.

ഇരുപത്തിയൊന്നാം നൂറ്റാണ്ടിന്റെ മൂന്നാം ദശകത്തിലേക്ക് കടന്ന ലോകം വലിയ മാറ്റങ്ങളിലൂടെയാണ് കടന്നുപോകുന്നത്. അറിവിന്റെ വിസ്ഫോടനവും സാങ്കേതികവിദ്യയുടെ കുതിപ്പും മനുഷ്യജീവിതത്തെ പുതിയ ഉയരങ്ങളിലെത്തിക്കുമ്പോൾ, മൂല്യബോധം, സാമൂഹിക പ്രതിബദ്ധത, പരിസ്ഥിതി അവബോധം, ജനാധിപത്യ സംസ്കാരം എന്നിവ സംരക്ഷിക്കേണ്ട ഉത്തരവാദിത്വം വിദ്യാഭ്യാസ മേഖലയ്ക്ക് കൂടുതൽ വർധിച്ചിരിക്കുകയാണ്. പരീക്ഷാഫലങ്ങൾക്കും തൊഴിൽസാധ്യതകൾക്കും അപ്പുറം ജീവിതത്തെ മനസ്സിലാക്കാനും സമൂഹത്തോട് ചേർന്ന് നിൽക്കാനും കഴിയുന്ന തലമുറയെ വാർത്തെടുക്കുക എന്നതാണ് പൊതുവിദ്യാലയങ്ങളുടെ ഏറ്റവും വലിയ വെല്ലുവിളി.

നൂറ്റാണ്ടിന്റെ പാരമ്പര്യമുള്ള എ.എം.എൽ.പി. സ്കൂൾ വില്ലൂർ ഈ വെല്ലുവിളികളെ അവസരങ്ങളാക്കി മാറ്റാനുള്ള പരിശ്രമത്തിലാണ്. അക്കാദമിക മികവിനൊപ്പം കല, സാഹിത്യം, ശാസ്ത്രം, കായികം, പരിസ്ഥിതി സംരക്ഷണം, സാമൂഹിക ഇടപെടലുകൾ എന്നിവയ്ക്ക് തുല്യ പ്രാധാന്യം നൽകിക്കൊണ്ട് കുട്ടികളുടെ സമഗ്രവികസനമാണ് വിദ്യാലയം ലക്ഷ്യമിടുന്നത്. ഓരോ കുട്ടിയും വ്യത്യസ്തരാണെന്നും ഓരോരുത്തർക്കും തിളങ്ങാനുള്ള അവസരം ലഭിക്കണമെന്നും വിശ്വസിക്കുന്ന പഠനസമൂഹമാണ് നമ്മുടെ വിദ്യാലയം.

അധ്യാപകരുടെയും രക്ഷിതാക്കളുടെയും പൂർവവിദ്യാർത്ഥികളുടെയും പ്രാദേശിക സമൂഹത്തിന്റെയും കൂട്ടായ പിന്തുണയോടെ മികച്ച വിദ്യാഭ്യാസം ഓരോ കുട്ടിയിലേക്കും എത്തിക്കാനുള്ള പ്രവർത്തനങ്ങളാണ് ഈ അധ്യയനവർഷത്തിലും വിഭാവനം ചെയ്തിരിക്കുന്നത്. അറിവും കരുണയും സർഗാത്മകതയും സാമൂഹിക ഉത്തരവാദിത്വവും നിറഞ്ഞ ഒരു പുതുതലമുറയെ വളർത്തിയെടുക്കുക എന്ന ലക്ഷ്യത്തോടെ 2026-27 അധ്യയനവർഷത്തിൽ നടപ്പിലാക്കുന്ന വിവിധ പ്രവർത്തനങ്ങളാണ് താഴെ അവതരിപ്പിക്കുന്നത്.

വർണ്ണാഭമായ പ്രവേശനോത്സവം

പ്രവേശനോത്സവത്തിൽ പുതിയ കുട്ടികളെ സ്‌കൂളിലേക്ക് സ്വീകരിക്കുന്നു

എ.എം.എൽ.പി. സ്കൂൾ വില്ലൂരിലെ 2026-27 അധ്യയന വർഷത്തെ പ്രവേശനോത്സവം കുട്ടികൾക്ക് മറക്കാനാകാത്ത അനുഭവമായി മാറി. പുതുതായി വിദ്യാലയത്തിലെത്തിയ കുഞ്ഞുമനസ്സുകളിൽ സന്തോഷവും കൗതുകവും നിറച്ച്, "നാളെയും സ്കൂളിലേക്ക് വരണം" എന്ന ആഗ്രഹം വളർത്തുന്ന തരത്തിലായിരുന്നു പ്രവേശനോത്സവ പരിപാടികൾ സംഘടിപ്പിച്ചത്.വർണ്ണാഭമായി അലങ്കരിച്ച വിദ്യാലയ അങ്കണം ഉത്സവ പ്രതീതിയാണ് സൃഷ്ടിച്ചത്. കുട്ടികൾക്കായി ഒരുക്കിയ ഫോം പാർട്ടി ഏറെ ആകർഷകമായി. പ്രവേശനോത്സവ തൊപ്പികൾ, ബലൂണുകൾ, പ്രീ-പ്രൈമറി വിദ്യാർത്ഥികൾക്കായുള്ള പ്രത്യേക പ്രവേശനോത്സവ ടി-ഷർട്ടുകൾ എന്നിവ ആഘോഷത്തിന് കൂടുതൽ മിഴിവേകി. പുതുതായി എത്തിയ ഓരോ കുട്ടിയെയും പ്രത്യേക ബാഡ്ജുകൾ നൽകി സ്നേഹപൂർവം സ്വീകരിച്ചു.

പുതിയ വിദ്യാർത്ഥികൾക്കായി തയ്യാറാക്കിയ പ്രവേശനോത്സവ കിറ്റിൽ വിസിൽ, പെൻസിൽ, ഇറേസർ, സ്റ്റിക്കർ തുടങ്ങിയ പഠനോപകരണങ്ങളും ഉൾപ്പെടുത്തിയിരുന്നു. കുട്ടികൾക്ക് വിദ്യാലയത്തോടുള്ള അടുപ്പവും ആവേശവും വർധിപ്പിക്കാൻ ഈ കിറ്റുകൾ സഹായകമായി.

വാർഡ് കൗൺസിലർ ടി.പി. ഇബ്രാഹിംകുട്ടി പരിപാടി ഉദ്ഘാടനം ചെയ്തു. കൗൺസിലർ സി.കെ. മുഹമ്മദ് ഇർഷാദ് പ്രവേശനോത്സവ കിറ്റുകളുടെ വിതരണം നിർവഹിച്ചു. സ്കൂൾ മാനേജർ അഷ്റഫ് മാസ്റ്റർ, എം.പി.ടി.എ. പ്രസിഡന്റ് ഷീന വിപുൽ എന്നിവർ ആശംസകൾ നേർന്ന് സംസാരിച്ചു. ഹെഡ്മാസ്റ്റർ ടി.സി. സിദിൻ സ്വാഗതവും സുമയ്യ ടീച്ചർ നന്ദിയും രേഖപ്പെടുത്തി.

പരിപാടിയുടെ ഭാഗമായി കുട്ടികൾക്കും രക്ഷിതാക്കൾക്കും പായസ വിതരണവും നടത്തി. കൂടാതെ വാർഡ് കൗൺസിലർ ടി പി ഇബ്രാഹിം കുട്ടിയുടെ നേതൃത്വത്തിൽ മിഠായി വിതരണവും സംഘടിപ്പിച്ചു. അധ്യാപകർ, രക്ഷിതാക്കൾ, പി.ടി.എ., എം.പി.ടി.എ. അംഗങ്ങൾ എന്നിവരുടെ കൂട്ടായ പ്രവർത്തനഫലമായി ഈ വർഷത്തെ പ്രവേശനോത്സവം വിദ്യാലയ ചരിത്രത്തിലെ ഏറ്റവും മനോഹരവും ഹൃദ്യവുമായ ആഘോഷങ്ങളിലൊന്നായി മാറി.

പ്രവേശനോത്സവത്തിൽ പുതിയ കുട്ടികൾക്ക് നൽകിയ സമ്മാനവുമായി കുട്ടികൾ

സ്കൂൾ പ്രവേശനോത്സവം വാർഡ് കൗൺസിലർ ടി പി ഇബ്രാഹിം കുട്ടി ഉദ്ഘാടനം ചെയ്യുന്നു

പരിസ്ഥിതി സംരക്ഷണത്തിന് നൂറ് പ്രവർത്തനങ്ങളുമായി വിദ്യാലയം

പരിസ്ഥിതി ദിനം കേവലം ഒരു ദിവസത്തിൽ മാത്രം ആചരിക്കേണ്ടതല്ല, വർഷത്തിലെ 365 ദിവസവും പരിസ്ഥിതി സംരക്ഷണ പ്രവർത്തനങ്ങൾ നടക്കേണ്ടതാണെന്ന കാഴ്ചപ്പാടോടെ ഈ അധ്യയന വർഷത്തിൽ നൂറ് പരിസ്ഥിതി സംരക്ഷണ പ്രവർത്തനങ്ങൾ സംഘടിപ്പിക്കാൻ വിദ്യാലയം തീരുമാനിച്ചു. ഇതിന്റെ ഔപചാരിക തുടക്കം ജൂൺ 5-ന് ലോക പരിസ്ഥിതി ദിനാചരണത്തോടനുബന്ധിച്ച് നടന്നു.

പരിപാടി വാർഡ് കൗൺസിലർ ശ്രീ. ഇബ്രാഹിംകുട്ടി ഉദ്ഘാടനം ചെയ്തു. മുണ്ടുപറമ്പ് യു.പി. സ്കൂളിലെ മുൻ പ്രധാനാധ്യാപകനും ദേശീയ അധ്യാപക അവാർഡ് ജേതാവുമായ ഹാരിസ് മാസ്റ്റർ മുഖ്യാതിഥിയായി പങ്കെടുത്തു. ചടങ്ങിൽ ഹരിത കർമസേന അംഗങ്ങളായ ശ്രീമതി വിനീതയും ശ്രീമതി രഞ്ജുവും ആദരിക്കപ്പെട്ടു.

തുടർന്ന് ശ്രീമതി രഞ്ജു ഹരിത കർമസേനയുടെ പ്രവർത്തനങ്ങളെക്കുറിച്ച് വിദ്യാർഥികൾക്ക് വിശദീകരണം നൽകി. പരിസ്ഥിതി സംരക്ഷണത്തിന്റെ പ്രാധാന്യം കുട്ടികളിൽ ബോധ്യപ്പെടുത്തുന്ന തരത്തിൽ വൃക്ഷത്തൈ നടൽ പ്രവർത്തനവും സംഘടിപ്പിച്ചു. കൂടാതെ വലിച്ചെറിയുന്ന വസ്തുക്കൾ പുനരുപയോഗിച്ച് നിർമ്മിക്കാവുന്ന വിവിധ ഉൽപ്പന്നങ്ങളുടെ പ്രദർശനവും നടന്നു.

ശാസ്ത്ര ക്ലബ്ബിന്റെ നേതൃത്വത്തിൽ വരും ദിവസങ്ങളിൽ പരിസ്ഥിതി സംരക്ഷണം, ജൈവവൈവിധ്യ സംരക്ഷണം, മാലിന്യ നിർമാർജനം, ജലസംരക്ഷണം തുടങ്ങിയ മേഖലകളെ കേന്ദ്രീകരിച്ച് വ്യത്യസ്തമായ നൂറോളം പ്രവർത്തനങ്ങൾ വിദ്യാലയത്തിൽ സംഘടിപ്പിക്കും