ഗവ.ട്രൈബൽ എച്ച്.എസ്. മറ്റത്തുകാട്/Say No To Drugs Campaign

സ്കൂൾ തല ലഹരി വിരുദ്ധ കാമ്പെയ്ൻ - പ്രവർത്തന റിപ്പോർട്ട്

ജി ടി എച്ച് എസ് മട്ടത്തുക്കാട്

ലഹരി വിരുദ്ധ ജാഗ്രതാ സമിതിയുടെ രൂപീകരണം

ലഹരി മുക്ത കേരളം എന്ന ലക്ഷ്യം സാക്ഷാത്കരിക്കുന്നതിനും വിവിധതലത്തിൽ ലഹരി വിരുദ്ധ പ്രവർത്തനങ്ങൾ ഏകോപിപ്പിക്കുന്നതിനും 2022 ഒക്ടോബർ 2 മുതൽ നവംബർ 1 വരെ ഒരു തീവ്രയജ്ഞ പരിപാടി ആവിഷ്കരിച്ചു നടപ്പിലാക്കുന്നതിന് ബഹു. മുഖ്യമന്ത്രിയുടെ അധ്യക്ഷതയിൽ ചേർന്ന യോഗ തീരുമാനത്തിൻറെ അടിസ്ഥാനത്തിൽ ഗവ. ട്രൈബൽ ഹൈസ്കൂൾ മട്ടത്തുക്കാടിൽ 24/9/22ന് രാവിലെ 11 മണിക്ക് ലഹരി വിരുദ്ധ ജാഗ്രതാ സമിതിയുടെ രൂപീകരണം ഉണ്ടായി. ഈശ്വര പ്രാർത്ഥനയോടുകൂടി ആരംഭിച്ച പരിപാടിയിൽ ശ്രീ. കന്തസ്വാമി എൽ. (അധ്യാപകൻ ജി ടി എച്ച് എസ് മട്ടത്തുക്കാട്) സ്വാഗതം പറഞ്ഞു.

അധ്യക്ഷസ്ഥാനം അലങ്കരിച്ച ശ്രീ. സന്തോഷ് ആർ  (Assistant Excise Inspector Janamythri Squad Kottathara) ജാഗ്രതാ സമിതി രൂപീകരണത്തിൻറെ ആവശ്യകതയെക്കുറിച്ച് സൂചിപ്പിക്കുകയുണ്ടായി. ജാഗ്രതാ സമിതിയുടെ ഉദ്ഘാടനകർമ്മം ശ്രീ. നെൽസൺ (Sub Inspector Sholayoor Police Station) നിർവഹിക്കുകയും ലഹരിയുടെ ദൂഷ്യവശങ്ങളും അവ ഇന്നത്തെ സമൂഹത്തിൽ എത്രത്തോളം സ്വാധീനം ചെലുത്തുന്നുണ്ട് എന്നും ചുരുങ്ങിയ വാക്കുകളാൽ പറഞ്ഞു. മുഖ്യാതിഥിയായി എത്തിയ ശ്രീ. രവികുമാർ  (Preventive Officer Janamythri Squad Kottathara) അവർകൾ ലഹരി വിരുദ്ധ ജാഗ്രതാ കമ്മറ്റിയുടെ രൂപീകരണവും, പ്രവർത്തനങ്ങളും, അവയുടെ ലക്ഷ്യത്തെ കുറിച്ചും പറയുകയുണ്ടായി. കൂടാതെ ഒക്ടോബർ 2 മുതൽ നവംബർ 1 വരെ സ്കൂൾതലത്തിൽ നടത്തേണ്ട പ്രവർത്തനങ്ങളെക്കുറിച്ചും, ലഹരിയുടെ ഉപയോഗം, ദൂഷ്യവശങ്ങൾ എന്നിവയെക്കുറിച്ചും എല്ലാം വിശദീകരിച്ച് പറയുകയുണ്ടായി. ലഹരിയുടെ ഉപയോഗത്തെ കുറിച്ച് തന്റെ അനുഭവത്തിൽ അട്ടപ്പാടി മേഖലയിൽ ഉണ്ടായ ഒരു യഥാർത്ഥ സംഭവവും കൂടി അദ്ദേഹം പറയുകയുണ്ടായി. ലഹരിമൂലം ആ കുട്ടിക്കുണ്ടായ മാനസീക സംഘർഷങ്ങളും, ശാരീരിക ബുദ്ധിമുട്ടുകളും വിശദീകരിച്ച് പറഞ്ഞ രീതി വിദ്യാർത്ഥികൾക്കും രക്ഷിതാക്കൾക്കും ഏറെ പ്രചോദനമായി. ശ്രീ രാജേഷ് (Sub inspector Sholayoor police station), ശ്രീ മിഥുൻ (Sub Inspector Sholayur Police Station) എന്നിവർ ആശംസകൾ അർപ്പിക്കുകയും ചെയ്തു.

തുടർന്ന് രക്ഷിതാക്കൾക്കും അധ്യാപകർക്കും കുട്ടികൾക്കും അവരവരുടെ അഭിപ്രായം പറയാനുള്ള അവസരവും നൽകി. വിദ്യാർത്ഥികളായ സഫീദ സുൽഫത്ത്, ശബരി എന്നിവർ തങ്ങളാൽ കഴിയും വിധം ലഹരിമുക്ത പ്രവർത്തനത്തിൽ ഏർപ്പെടും എന്ന് ഉറപ്പുനൽകി. രക്ഷിതാക്കളിൽ ചിലർ അവരവരുടെ അനുഭവങ്ങളും പങ്കുവെക്കുകയുണ്ടായി. വീടുകളിൽ രക്ഷിതാക്കൾക്കും കുട്ടികൾക്കുമിടയിൽ കരുതലും സ്നേഹവും വർദ്ധിപ്പിക്കണമെന്നും, സൗഹൃദപരമായ ഒരു അന്തരീക്ഷം ഒരോ വീടുകളിലും ഉണ്ടാക്കിയെടുക്കണമെന്നും രക്ഷിതാക്കൾ അഭിപ്രായപ്പെട്ടു.

തുടർന്ന് ജാഗ്രതാ കമ്മിറ്റി അംഗങ്ങളെ തിരഞ്ഞെടുത്തു. ജാഗ്രതാ സമിതി ചെയർമാൻ, കൺവീനർ, രക്ഷിതാക്കൾ, വാർഡ് മെമ്പർ, ജനപ്രതിനിധികൾ, പോലീസ്, എക്സൈസ് വകുപ്പ്, വിദ്യാർഥികൾ എന്നിവരടങ്ങുന്ന ജാഗ്രതാ സമിതി രൂപീകരിച്ചു. ശ്രീ ആരോഗ്യദാസ് ആർ (അധ്യപകൻ ജി.ടി.എച്ച്.എസ് മട്ടത്തുക്കാട്) അവർകളുടെ നന്ദിയോടുകൂടി പരിപാടിക്ക് സമാപനം കുറിച്ചു.

ബി.ആർ.സി. തല പരിശീലനം

26/9/2022 ൽ വിമുക്തി മിഷൻൻറെ നേതൃത്വത്തിൽ എസ്.സി.ഇ.ആർ.ടി തയ്യാറാക്കിയ മോഡ്യൂൾ പ്രകാരമുള്ള പരിശീലനം ബി.ആർ.സിയിൽ വെച്ച് ലഭിച്ചു. ലഹരിവിമുക്ത ക്യാമ്പസ് രൂപീകരണവും, ലഹരി വസ്തുക്കളുടെ ഉപയോഗം പരിണിത ഫലങ്ങൾ എന്നിവയെക്കുറിച്ചുള്ള ക്ലാസുകളും ഷോർട്ട്ഫിലിം പ്രദർശനവും ഉണ്ടായിരുന്നു. അധ്യാപകർക്ക് മികച്ച ഒരു പരിശീലനമായിരുന്നു ലഭിച്ചത്. ബി.ആർ.സി ട്രൈയിനർമാരായ ശ്രീ നാഗരാജ്, ശ്രീ അനീഷ്  എന്നിവർ പരിശീലനത്തിനു നേതൃത്വം നൽകുകയും ചെയ്തു.

എൽ.പി. തല ജാഗ്രതാ സന്ദേശ പരിപാടി

എൽപി തലത്തിലുള്ള ജാഗ്രതാ സന്ദേശ പരിപാടി 30/9/22 ന് 11 മണിക്ക് സ്കൂളിൽ വച്ച് നടത്തുകയുണ്ടായി. പ്രാർത്ഥനയോടുകൂടിയ ചടങ്ങിൽ ശ്രീമതി നിർമ്മല എൻ (അധ്യാപിക ജി ടി എച്ച്എസ് മട്ടത്തുക്കാട് ) സ്വാഗതം പറഞ്ഞു. അധ്യക്ഷസ്ഥാനം അലങ്കരിച്ച ശ്രീ മതിവാനൻ എസ് (എച്ച്.എം. ജി.ടി.എച്ച്.എസ് മുട്ടത്തുകാട്) ലഹരി വിരുദ്ധ പ്രവർത്തനത്തിൻറെ ആവശ്യകതയെക്കുറിച്ചും അധ്യാപകരുടെ ഇടപെടലുകളെക്കുറിച്ചും പറയുകയുണ്ടായി. അധ്യാപകനായ ശ്രീ കന്തസ്വാമി എൽ (അധ്യാപകൻ ജി.ടി.എച്ച്.എസ് മട്ടത്തുക്കാട്)  പരിപാടിക്ക് ആശംസകൾ അർപ്പിച്ചു.  പരിശീലനത്തിൻറെ മൊഡ്യൂൾ പ്രകാരമുള്ള ക്ലാസുകൾ വിദ്യാർഥികൾക്കും, രക്ഷിതാക്കൾക്കും അധ്യാപികമാരായ ശ്രീമതി നിർമ്മല എൻ, ശ്രീമതി സോണിയ മേരി റുബീന, അഖില പി.എം, രാധാമണി എന്നിവർ നൽകുകയുണ്ടായി. നല്ല ശീലങ്ങളെ കുറിച്ചുള്ള കഥ അധ്യാപിക സോണിയ പറയുകയുണ്ടായി. ലഹരിവിരുദ്ധ മനോഹരമായ പാട്ട് അദ്ധ്യാപികമാർ ഒന്നിച്ച്  പാടുകയും വിദ്യാർഥികളെ പാടിപ്പിക്കുകയും ചെയ്തു. തുടർന്ന് രക്ഷിതാക്കൾ വിദ്യാർത്ഥികളുമായി ചർച്ചകൾ നടത്തി. രക്ഷിതാവായ ശ്രീമതി മഹേഷ് തൻറെ അഭിപ്രായം പങ്കുവയ്ക്കുകയും ചെയ്തു. ഇതുപോലുള്ള ബോധവൽകരണ ക്ലാസുകൾ വിദ്യാർത്ഥികൾക്കും രക്ഷിതാക്കൾക്കും പ്രയോജനകരമാണെന്നും തുടർന്നും ഇത്തരം ക്ലാസുകൾ സ്കൂൾതലത്തിൽ സംഘടിപ്പിക്കണമെന്നും അഭിപ്രായപ്പെട്ടു. ശ്രീ ആരോഗ്യ ദാസ് ആർ (അദ്ധ്യാപകൻ ജി.ടി.എച്ച്.എസ് മടത്തുക്കാട്) നന്ദിയോട് കൂടി പരിപാടി അവസാനിച്ചു.

ബോധവൽകരണ റാലി

1-10-2022 ന് ഷോളയൂർ പഞ്ചായത്തിൻറെ ആഭിമുഖ്യത്തിൽ സ്വച്ഛത ഹി സേവ ശുചിത്വ റാലിയും, ലഹരിവിമുക്ത റാലിയും സംഘടിപ്പിച്ചു. ശ്രീ ജിതേഷ് എം.ആർ (ആരോഗ്യ വിദ്യാഭ്യാസ സ്റ്റാൻറിംഗ് കമ്മിറ്റി ചെയർമാൻ) അവർകളുടെ സ്വാഗതത്തോടുകൂടി തുടങ്ങിയ ചടങ്ങിൽ ശ്രീ രാമൻ (ശുചിത്വ മിഷൻ ബ്ലോക്ക് കോ-ഓർഡിനേറ്റർ) അധ്യക്ഷത വഹിച്ചു. ശ്രീ രാമമൂർത്തി പി (പ്രസിഡൻറ് ഷോളയൂർ ഗ്രാമ പഞ്ചായത്ത്) ഉത്ഘാടനം നിർവഹിക്കുകയും ചെയ്തു. ജി.യു.പി.എസ് കോട്ടത്തറയിൽ നിന്നും ആരംഭിച്ച റാലിയിൽ ഷോളയൂർ പഞ്ചായത്ത് പരിധിയിൽ വരുന്ന സ്കൂൾ അധ്യാപകരും വിദ്യാർത്ഥികളും, ഐ.ടി.ഐ വിദ്യാർത്ഥികളും, തൃശ്ശൂർ ക്രയിസ്റ്റ് കോളേജ് വിദ്യാർത്ഥികളും, സാമൂഹിക പ്രവർത്തകരും പൊതുജനങ്ങളും പങ്കെടുത്തു. ആരോഗ്യമാതാ ജംഗഷനിൽ സമാപനം കുറിച്ച റാലിയിൽ ശ്രീ പ്രസീത് (വില്ലേജ് എക്സടെൻഷൻ ഓഫീസർ ഷോളയൂർ ഗ്രാമ പഞ്ചായത്ത്) നന്ദി പറഞ്ഞു.

സംസ്ഥാന തല ഉദ്ഘാടനം

ലഹരിവിരുദ്ധ കാമ്പെയ്ൻ സംസ്ഥാന തല ഉദ്ഘാടനം ഒക്ടോബർ 6രാവിലെ 10 മണിക് ബഹുഃ മുഖ്യമന്ത്രി ശ്രീ.പിണറായി വിജയൻ ഉദ്ഘാടനം ചെയ്തു. പ്രസ്തുത പരിപാടി കൈറ്റ് വിക്‌ടേഴ്‌സ് ചാനലിലൂടെയുള്ള തൽസമയ സംപ്രേക്ഷണം ഗവ. ട്രൈബൽ ഹൈസ്കൂൾ മട്ടത്തുക്കാടിൽ രക്ഷിതാക്കൾക്കും, വിദ്യാർത്ഥികൾക്കും, അധ്യാപകർക്കും വീക്ഷിക്കാനുള്ള അവസരമൊരുക്കി. ഉദ്ഘാടന കർമ്മം നിർവഹിക്കുന്നതിനോടൊപ്പം അദ്ദേഹം അധികാരത്തിന്റെ ഭാഷയിലല്ല മനുഷ്യത്വത്തിന്റെ ഭാഷയിലാണ് പറയുന്നത് എന്ന് പറഞ്ഞു കൊണ്ട് തുടക്കം കുറിചു. ലഹരി മുക്ത കേരളം സാക്ഷത്കരിക്കുക എന്നതാണ് ഈ കംപെയ്‌നിന്റെ ലക്ഷ്യം. ഓരോ കുടുംബവും ഓരോ വ്യക്തിയും “SAY NO TO DRUGS" എന്ന ക്യാമ്പെയ്‌നിൽ പങ്ക് ചേരണമെന്ന് അഭ്യർത്ഥിച്ചു. ഈ പദ്ധതിയുടെ അധ്യക്ഷൻ മുഖ്യമന്ത്രിയും ഉപാധ്യക്ഷൻ എക്‌സൈസ് വകുപ്പ് മന്ത്രിയും ആയിരിക്കുമെന്നും ഇവരുടെ നേതൃത്വത്തിൽ ക്യാമ്പെയിനിറെ പ്രവർത്തനം മികച് രീതി യിലാക്കുമെന്നും മുഖ്യമന്ത്രി കൂട്ടിച്ചേർത്തു.

ബോധവൽകരണ ക്ലാസ്

തത്സമയ സംപ്രേഷണത്തിന് ശേഷം ശ്രീ.കന്തസ്വാമി എൽ (അധ്യാപകൻ,GTHS മട്ടത്തുക്കാട്) പുതിയ തലമുറയ്ക് ലഹരിയോടുള്ള താല്പര്യത്തെക്കുറിച്ചും എത്രത്തോളം അവരുടെ ജീവിതത്തിൽ ബാധിക്കുന്നു എന്നതിനെക്കുറിച്ചും വിശദീകരിച്ചു. അധ്യാപകരും ആന്റി നാർക്കോട്ടിക് ക്ലബ് വിദ്യാർത്ഥികളും രക്ഷിതാക്കളും ഒത്തുചേർന്ന് സ്കൂൾ ക്യാമ്പസ് സൂചികരിക്കുകയും ലഹരിവിരുദ്ധ പ്രവർത്തനങ്ങളിൽ പങ്കാളികൾ ആവുകയും ചെയ്തു. സ്കൂൾ തലത്തിലുള്ള ഇത്തരം പ്രവർത്തനങ്ങൾ രക്ഷിതാക്കൾകും, വിദ്യാർത്ഥികൾക്കും പ്രയോജനകരമായി.