"എസ്.എസ്.യു.പി സ്കൂൾ തൊടുപുഴ/ചരിത്രം" എന്ന താളിന്റെ പതിപ്പുകൾ തമ്മിലുള്ള വ്യത്യാസം

വ്യത്യാസം കാണൽവിക്കിഎഴുത്ത്

09:35, 6 മാർച്ച് 2022-നു നിലവിലുണ്ടായിരുന്ന രൂപം

സ്കൂൾ

സൗകര്യങ്ങൾ

ആമുഖം

ഇടുക്കി ജില്ലയിലെ ഏറ്റവും വലിയ പട്ടണവും വാണിജ്യകേന്ദ്രവുമാണ് തൊടുപുഴ. ഈ പട്ടണത്തെ പുൽകിയൊഴുകുന്ന തൊടുപുഴയാറാണ് ഇതിന്റെ മുഖമുദ്ര. വർഷം മുഴുവൻ നിറഞ്ഞൊഴുകുന്ന കേരളത്തിലെ ചുരുക്കം ചില പുഴകളിൽ ഒന്നാണ് തൊടുപുഴയാർ. ഇടുക്കി ജലവൈദ്യുത പദ്ധതി ഉൽപാദനം കഴിഞ്ഞു വരുന്ന വെള്ളം കാഞ്ഞാർ വഴി എത്തുന്നതിനാൽ വേനലിലും ജല സമൃദ്ധമാണ്. കുടയത്തൂരിൽ നിന്നുത്ഭവിക്കുന്ന തൊടുപുഴയാർ മൂവാറ്റുപുഴയാറിൽ ചേരുന്നു. ഹൈറേഞ്ചിന്റെ പ്രവേശന കവാടമാണ് തൊടുപുഴ. മലങ്കര ജലാശയം, കാഞ്ഞാർ, ഇലവീഴാപൂഞ്ചിറ, തൊമ്മൻകുത്ത് വെള്ളച്ചാട്ടം, കാറ്റാടികടവ്, ഇലപ്പള്ളി വെള്ളച്ചാട്ടം, ഇല്ലിക്കൽ, വാഗമൺ, തുടങ്ങിയവ തൊടുപുഴയുടെ പരിസര പ്രദേശത്തുള്ള പ്രധാന വിനോദസഞ്ചാര കേന്ദ്രങ്ങളാണ്.

തൊടുപുഴയുടെ ഹ്രസ്വ ചരിത്രം

കുലശേഖര സാമ്രാജ്യത്തിന്റെ കാലഘട്ടത്തിൽ കേരളത്തെ ഭരണ സൗകര്യത്തിനുവേണ്ടി വേണാട്, ഓടനാട്, മുഞ്ഞുനാട്, വെമ്പൊലിനാട്, കീഴ്മലൈനാട് എന്നിങ്ങനെ വിവിധ പ്രവിശ്യകളായി വിഭജിച്ചിരുന്നു . ഇതിൽ കീഴ്മലൈ നാട്ടിൽ ഉൾപ്പെട്ട പ്രദേശമായിരുന്നു തൊടുപുഴ. എ ഡി 1600 വരെ കീഴ്മലൈനാട് നിലവിലുണ്ടായിരുന്നു. എ ഡി 1600 ൽ വടക്കും കൂറുമായുള്ള യുദ്ധത്തിൽ പരാജയപ്പെട്ടതിനെ തുടർന്ന് വടക്കും കൂറിന്റെ അധീനതയിൽ ആവുകയും ചെയ്തു. വടക്കുംകൂർ രാജാക്കന്മാരുടെ ആസ്ഥാനം കാരിക്കോട് ആയിരുന്നു. 1750 കളിൽ തിരുവിതാംകൂർ മഹാരാജാവ് മാർത്താണ്ഡവർമ്മ വടക്കുംകൂർ ആക്രമിച്ച് കീഴടക്കി തിരുവിതാംകൂറിന്റെ ഭാഗമാക്കി തീർത്തു. പിന്നീട് വടക്കുംകൂർ അറിയപ്പെട്ടിരുന്നത് വടക്കുംകൂർ ദേശം എന്നായിരുന്നു. ശ്രീ മാർത്താണ്ഡവർമ്മ മഹാരാജാവ് തന്നെയാണ് തന്റെ പ്രതിനിധിയായി ശ്രീ നാരായണ മേനോനെ തൊടുപുഴയുടെ വികസനത്തിനുവേണ്ടി വടക്കുംകൂറിലേക്ക് നിയോഗിച്ചത്. അദ്ദേഹമാണ് തൊടുപുഴയുടെ വികസനത്തിനു തുടക്കം കുറിച്ചത്. മഹാരാജാവിന്റെ നിർദ്ദേശപ്രകാരം തൻറെ മുസ്ലീങ്ങളായ ഭടന്മാർക്ക് വേണ്ടി ഇദ്ദേഹമാണ് കാരിക്കോടുള്ള നൈനാരു പള്ളി പണികഴിപ്പിച്ചത്. മാർത്താണ്ഡവർമ്മയുടെ പടയോട്ടക്കാലത്ത് രൂപംകൊണ്ട വഴിത്താരകളും, വനങ്ങൾ വെട്ടി നശിപ്പിച്ചതിന്റെ ശേഷിപ്പുകളായ കൂപ്പ് റോഡുകളും കാലാന്തരത്തിൽ വികാസം പ്രാപിച്ചുണ്ടായതാണ് ഇന്നത്തെ പല റോഡുകളും. സ്വാതന്ത്ര്യം പ്രാപ്തിക്കു ശേഷം തിരു-കൊച്ചി സംസ്ഥാനം രൂപവത്കരിക്കും വരെ തൊടുപുഴ തിരുവിതാംകൂർ നാട്ടുരാജ്യത്തിന്റെ ഭാഗമായിരുന്നു.

ചരിത്രപ്രാധാന്യമുള്ള പ്രാന്തപ്രദേശങ്ങൾ

കീഴ്മലൈനാടിന്റെ പാണ്ഡകശാലകൾ അഥവാ ധാന്യപുരകൾ നെടിയശാല പ്രദേശത്തായിരുന്നു. നെടിയ പാണ്ഡകശാല ലോപിച്ചാണ് നെടിയശാല ആയത്. കീഴ്മലൈനാടിന്റെ ചുങ്കം അഥവാ കരം പിരിക്കുന്ന ഇടമായതിനാൽ ആണ് ചുങ്കത്തിന് ആ പേര് ലഭിച്ചത് . കീഴ്മലൈനാടുകളിൽ നിന്നുള്ള ചരക്ക് ആലപ്പുഴയ്ക്ക് എത്തിക്കുമ്പോൾ ഈടാക്കുന്ന കരം ഇവിടെ നിന്നും പിരിച്ചിരുന്നു. കീഴ്മലൈ നാടിന്റെ ആസ്ഥാനമായിരുന്നു ഇന്നത്തെ കാരിക്കോട്. പുരാതന കാരിക്കോടിനു സാംസ്കാരികപരമായും വാണിജ്യപരമായും വളരെ പ്രാധാന്യമുണ്ടായിരുന്നു.

തൊടുപുഴയിലെ ക്രൈസ്തവ പാരമ്പര്യം

നൂറ്റാണ്ടുകൾക്കു മുമ്പേ ക്രൈസ്തവർ തൊടുപുഴയിൽ താമസമാക്കിയിരുന്നു. ചുങ്കം പള്ളിയെയായിരുന്നു അന്നു പൂർവികർ ആധ്യാത്മിക കാര്യങ്ങൾക്കായി ആശ്രയിച്ചിരുന്നത്. തൊടുപുഴയിൽ സ്വന്തമായി ഒരു ദേവാലയം എന്നത് അവരുടെ ചിരകാല സ്വപ്നമായിരുന്നു. 1850 ൽ ചുങ്കം പള്ളിയിൽ സന്ദർശനത്തിനെത്തിയ അഭിവന്ദ്യ വാരാപ്പുഴ മെത്രാപോലിത്തയോട് തൊടുപുഴയിൽ ഒരു ദേവാലയം വേണമെന്ന് അപേക്ഷിക്കുകയും, അതനുസരിച്ച് മിഖായേൽ മാലാഖയുടെ വെഞ്ചരിച്ച രൂപവും പള്ളി പണിയാനുള്ള 350 രൂപയും നൽകി അനുഗ്രഹിക്കുകയും ചെയ്തു. മണക്കാടുള്ള പുരാതന മുണ്ടക്കൽ നായർ തറവാട്ടുകാർ ഇഷ്ടദാനമായി നൽകിയ സ്ഥലത്താണ് മിഖായേൽ മാലാഖയുടെ നാമധേയത്തിൽ 1851 ജനുവരി ഒന്നാം തീയതി ആദ്യ ദേവാലയം സ്ഥാപിച്ചത്. ആ കുടുംബത്തോടുള്ള നന്ദിസൂചകമായി പെരുന്നാൾ ദിനങ്ങളിൽ അഞ്ചേകാലും കോപ്പും നൽകുന്ന ചടങ്ങ് ഇന്നും തുടർന്നുപോരുന്നു.

വിശ്വാസി ഗണത്തിൽ ഉണ്ടായ വർധനവും, തെനംകുന്നിലെ മിഖായേൽ മാലാഖയുടെ പള്ളിയിലെ സ്ഥലപരിമിതിയും മൂലം പുതിയ പള്ളി പണിയുവാനായി തൊടുപുഴ ടൗണിൽ സ്ഥലം വാങ്ങുകയും പള്ളി നിർമാണത്തിന് നേതൃത്വം നൽകുകയും ചെയ്തത് ബഹുമാനപ്പെട്ട പൗലോസ് തരണിയിൽ അച്ചനാണ്. 1964 നവംബർ ആറാം തീയതി സെബസ്ത്യാനോസ് സഹദായുടെ നാമധേയത്തിലുള്ള പള്ളിക്ക് അഭിവന്ദ്യ കോതമംഗലം രൂപതാധ്യക്ഷൻ മാർ മാത്യു പോത്തനാംമുഴി തറക്കല്ലിടുകയും 1971 ഡിസംബർ പന്ത്രണ്ടാം തീയതി പണിപൂർത്തീകരിച്ചു പള്ളിയുടെ കൂദാശകർമ്മം അദ്ദേഹം തന്നെ നിർവഹിക്കുകയും ചെയ്തു. 2005 ജൂൺ നാലാം തീയതി ഈ ദേവാലയം 12 ഇടവകകളുള്ള ഫൊറോനയായി ഉയർത്തപ്പെട്ടു.

മറ്റുള്ള പ്രദേശങ്ങളിൽ നിന്നും തൊടുപുഴയിലേക്ക് പറിച്ചു നടപ്പെടുന്ന ക്രൈസ്തവരുടെ എണ്ണം ദിനംപ്രതി വർദ്ധിച്ചു വന്നു. കുടുംബങ്ങളുടെ എണ്ണത്തിലുണ്ടായ വർധനവ് വീണ്ടും വിശാലമായ ഒരു ദേവാലയം എന്ന ആവശ്യം മുന്നോട്ടുവച്ചു. പ്രൈവറ്റ് ബസ് സ്റ്റാഡിനോടു ചേർന്നു സ്ഥിതിചെയ്യുന്ന സെന്റ് സെബാസ്റ്റ്യൻസ് യു പി സ്കൂളിന്റെ വടക്കു കിഴക്കായി പുതിയ പള്ളിയുടെ ശിലാസ്ഥാപന കർമം 2006 ഡിസംബർ പത്താം തീയതി മാർ ജോർജ് പുന്നക്കോട്ടിൽ പിതാവ് നിർവഹിച്ചു. പുതിയ പള്ളിയുടെ നിർമ്മാണത്തിനു നേതൃത്വം നൽകിയത് ബഹുമാനപ്പെട്ട ജോസ് മോനിപ്പിള്ളി അച്ചനാണ്. 2013 ഫെബ്രുവരി 23 ആം തീയതി പുതിയ പള്ളിയുടെ കൂദാശകർമ്മം അഭിനന്ദ് മാർ ജോർജ് മഠത്തിക്കണ്ടത്തിൽ നിർവഹിച്ചു.

സെൻറ് സെബാസ്റ്റ്യൻസ് സ്കൂളിന്റെ ശുഭാരംഭം

'പള്ളിയോടൊപ്പം പള്ളിക്കൂടം' എന്ന ചാവറയച്ചന്റെ സന്ദേശത്തെ ഉൾക്കൊണ്ടു 1951 ൽ തെനംകുന്ന് പള്ളിയോടു ചേർന്നുള്ള പള്ളിമുറിയിൽ സ്കൂളിന്റെ പ്രവർത്തനമാരംഭിച്ചു. തുടക്കത്തിൽ ഹൈസ്കൂൾ വിഭാഗം മാത്രമായിരുന്നു ഉണ്ടായിരുന്നത്. പിന്നീട് 5 മുതൽ 7 വരെ ക്ലാസ്സുകൾക്കു കൂടി അനുമതി ലഭിക്കുകയും ചെയ്തു. ഇടവകാംഗമായ കണിയാമൂഴിയിൽ ചുമ്മാർ വർഗീസ് സംഭാവന ചെയ്ത സ്ഥലത്തേക്ക് സ്കൂൾ മാറ്റി സ്ഥാപിക്കുകയും ചെയ്തു. ഇന്നു സ്കൂൾ നിലനിൽക്കുന്ന പ്രധാന കെട്ടിടത്തിനു വടക്കു കിഴക്കു വശത്തായി, ഇന്നുകാണുന്ന ഓഡിറ്റോറിയം നിലകൊള്ളുന്ന സ്ഥാനത്ത് തെക്ക് വടക്കായി നീളത്തിൽ ഓടുമേഞ്ഞ കെട്ടിടത്തിൽ യുപി വിഭാഗവും, (പൊതു പരിപാടികൾ നടന്നിരുന്ന പ്രധാന വേദി ഈ കെട്ടിടമായിരുന്നു), ഇന്നു പള്ളി നിലകൊള്ളുന്ന സ്ഥാനത്തു L ആകൃതിയിൽ ഓടു മേഞ്ഞ കെട്ടിടത്തിൽ എൽ പി സ്കൂളും പ്രവർത്തിച്ചിരുന്നു. 1960 ആരംഭിച്ച എൽ പി വിഭാഗം എസ് എസ് എൽ പി എസ് എന്ന പേരിൽ സ്വതന്ത്രമായി പ്രവർത്തിച്ചിരുന്ന എൽ പി സ്കൂളായിരുന്നു. സ്കൂൾ ഗ്രൗണ്ടിന്റെ കിഴക്കുവശത്തു തട്ടുതട്ടായി കിടന്നിരുന്ന സ്ഥലത്തു നിറയെ തെങ്ങുകൾ ഉണ്ടായിരുന്നു. പടിഞ്ഞാറുവശത്തു അതിരിനോടു ചേർന്നു നിന്നിരുന്ന തണൽമരങ്ങൾ കുട്ടികൾക്കു മാത്രമല്ല വഴിയാത്രക്കാർക്കും ആശ്വാസമായിരുന്നു. റോഡിനപ്പുറം അന്നുണ്ടായിരുന്ന പാടശേഖരങ്ങളും ചെറിയ കൈത്തോടുകളും ഉച്ച നേരങ്ങളിൽ പാടവരമ്പിലൂടെ നടന്നതും ആദ്യകാലങ്ങളിലെ കുട്ടികളുടെ മനസിലെ ഇന്നും മായാത്ത ഓർമ്മകളാണ്. തെങ്ങിൻ തോപ്പും, തണൽമരങ്ങളും, പാടശേഖരങ്ങളും വികസനത്തിന്റെ ചൂളം വിളിയിൽ ഇന്നു ഓർമ്മകൾ മാത്രമായി.

ആധുനിക രീതിയിലുള്ള ഹൈസ്കൂൾ വിദ്യാഭ്യാസത്തിനു ആവശ്യമായ അടിസ്ഥാന സൗകര്യങ്ങളോടുകൂടിയ ക്ലാസ് മുറികൾ ആവശ്യമായി വന്നപ്പോൾ ഹൈ സ്കൂളിനു വേണ്ടി മാത്രമായി തെനം കുന്നിൽ എല്ലാവിധ സൗകര്യങ്ങളോടും കൂടിയ കെട്ടിടം നിർമ്മിക്കുകയും, 2001 ൽ ഹൈസ്കൂൾ വിഭാഗം മാത്രമായി പുതിയ കെട്ടിടത്തിലേക്ക് മാറ്റുകയും ചെയ്തു. അന്നുവരെ ഹൈസ്കൂളിന്റെ ഭാഗമായിരുന്ന യുപി സെക്ഷൻ ഇവിടെ തന്നെ തുടരുകയും ചെയ്തു.

എൽപി യുപി ലയനം

1960 ൽ ആരംഭിച്ച സെന്റ് സെബാസ്റ്റ്യൻസ് എൽ പി സ്കൂൾ നാൽപ്പതു വർഷത്തെ പ്രവർത്തനത്തിനു ശേഷം 31/03/2001 നു പൊതു വിദ്യാഭ്യാസ വകുപ്പിൽ നിന്നും ലഭിച്ച അനുമതിപ്രകാരം ൦6/06/2021 നു അന്നുവരെ ഹൈസ്കൂളിന്റെ ഭാഗമായിരുന്ന യു പി വിഭാഗത്തോട് ചേർക്കപ്പെടുകയും, 17/07/2001 ൽ ഹൈസ്കൂൾ പ്രവർത്തിച്ചിരുന്ന പ്രധാന കെട്ടിടത്തിലേക്കു മാറുകയും, സെന്റ് സെബാസ്റ്റ്യൻസ് യു പി സ്കൂൾ എന്ന പേരിൽ പ്രവർത്തനമാരംഭിക്കുകയും ചെയ്തു. 400 കുട്ടികളും 17 അധ്യാപകരുമായി Sr ഡാൻസി പി ജെ യുടെ നേതൃത്വത്തിൽ എസ് യു പി എസ്സിന്റെ ജൈത്രയാത്ര തുടങ്ങി. ലയനത്തെ തുടർന്നു എൽപി, യു പി സ്കൂളുകൾ ഒന്നായപ്പോൾ നിലവിലുള്ള ക്ലാസ് മുറികൾ തികയാതെ വന്ന സാഹചര്യത്തിൽ ഓഫീസ് മുറിയും കമ്പ്യൂട്ടർ ലാബും ക്ലാസ് മുറികളും ഉൾപ്പെടുന്ന പുതിയ ബ്ലോക്കിന്റെ നിർമ്മാണം പ്രധാന കെട്ടിടത്തിന്റെ പടിഞ്ഞാറുവശത്തോടു ചേർന്നു നടത്തുകയും അതിന്റെ വെഞ്ചിരിപ്പ് കർമ്മം 06/09/2002 ൽ കോതമംഗലം രൂപത അധ്യക്ഷൻ മാർ ജോർജ്ജ് പുന്നക്കോട്ടിൽ നിർവഹിക്കുകയും ചെയ്തു.

2002 - 2003 അധ്യായന വർഷത്തിൽ പാരലൽ ഇംഗ്ലീഷ് മീഡിയം ക്ലാസ്സുകൾ തുടങ്ങുവാനായി സ്കൂൾ മാനേജർ സക്കറിയാസ് തുടിയംപ്ലാക്കൽ അച്ചനും ഹെഡ്മിസ്ട്രസ് Sr ഡാൻസി പി ജെ യും മറ്റു അധ്യാപകരും കാണിച്ച ആത്മാർത്ഥത പ്രശംസനീയമാണ്. അഞ്ചാം ക്ലാസിലാണ് പാരലൽ ഇംഗ്ലീഷ് മീഡിയം ആദ്യമായി തുടങ്ങിയത്. സ്കൂളിന്റെ വളർച്ചയെ ത്വരിതപ്പെടുത്തിയ മഹത്തായ ഒരു ചുവടു വയ്പ്പായിരുന്നു ഇത്.

തൊടുപുഴയിലേയും സമീപപ്രദേശങ്ങളിലേയും കുട്ടികൾക്കു പ്രാഥമിക വിദ്യാഭ്യാസ സൗകര്യം ഏർപ്പെടുത്തുന്നതിന് ലക്ഷ്യമിട്ട് 1952 ൽ പ്രവർത്തനമാരംഭിച്ചതാണ് സെൻ്റ് സെബാസ്റ്റ്യൻസ് യു പി സ്കൂൾ. കോതമംഗലം രൂപത വിദ്യാഭ്യാസ ഏജൻസിയുടെ കീഴിൽ പ്രവർത്തിക്കുന്ന ഈ വിദ്യാലയം ശ്രദ്ധേയമായ ഒട്ടേറെ നേട്ടങ്ങൾ പോയ വർഷങ്ങളിൽ നേടിയിട്ടുണ്ട്.

2001 ൽ ഈ വിദ്യാലയം സമ്പൂർണ്ണ യുപി സ്കൂളായി ഉയർത്തി. മലയാളം ഇംഗ്ലീഷ് മീഡിയങ്ങളിലായി ഏഴു ക്ലാസുകളിലെ 21 ഡിവിഷനുകളിലായി എഴുന്നൂറോളം കുട്ടികൾ പഠിക്കുന്നു.. വിപുലമായ ഭൗതിക സാഹചര്യങ്ങളും, സൗകര്യങ്ങളും, പശ്ചാത്തല സൗകര്യങ്ങളും വിദ്യാലയത്തിൽ ഏർപ്പെടുത്തിയിരിക്കുന്നു. കമ്പ്യൂട്ടർ, സ്പോക്കൺ ഇംഗ്ലീഷ് , മ്യൂസിക് , ഡാൻസ്, ഓർഗൻ, തബല, കരാട്ടെ, ഡ്രോയിങ്, വർക്ക് എക്സ്പീരിയൻസ് എന്നിവയ്ക്ക് വിദഗ്ധരുടെ നേതൃത്വത്തിൽ പ്രത്യേക കോച്ചിംഗ് ക്ലാസ്സുകൾ, സ്കൂൾ ഹെൽത്ത് നേഴ്സിൻ്റെ സേവനം, വിപുലമായ ലാബ്, ലൈബ്രറി സൗകര്യങ്ങൾ, കുട്ടികൾക്ക് കൗൺസിലിംഗ് എന്നിവ സെൻ്റ്റ് സെബാസ്റ്റ്യൻസിൻ്റെ പ്രത്യേകതകളാണ്.

യു പി ക്ലാസ്സുകളിൽ മലയാളത്തിനു പുറമേ സംസ്കൃതവും, എൽപി ക്ലാസ്സുകളിൽ അറബിയും ഒന്നാം ഭാഷയായും പഠിപ്പിക്കുന്നു

ഫോട്ടോകളിലെ ഇന്നലകൾ