വിദ്യാധിരാജ ഇ.എം.എച്ച്.എസ് ആറ്റിങ്ങൽ/അക്ഷരവൃക്ഷം / ജീവാമൃതം പരിസ്ഥിതി

ജീവാമൃതം പരിസ്ഥിതി  പരിസ്ഥിതി എന്നാൽ ജീവന്റെ ഉറവിടം. ഭൂമിയിലെ ചെറുതും വലുതുമായ ഓരോ വസ്തുവും പ്രകൃതിയുമായി ബന്ധപ്പെട്ടിരിക്കുന്നു. നാം കാണുന്ന കല്ലും മണ്ണും പക്ഷിമൃഗാതികളും മരങ്ങളും ചെടികളും നഗ്നനേത്രങ്ങളാൽ കാണാൻ കഴിയാത്ത സൂഷ്മാണുക്കൾ പോലും പ്രകൃതിയുടെ വരദാനമാണ്. അതിന് മനുഷ്യനെന്നോ മരങ്ങളെന്നോ ഉള്ള വേർതിരിവില്ല. നാം കാണുന്നതും അനുഭവിക്കുന്നതുമായ എല്ലാ കാര്യങ്ങളും പരിസ്ഥിതിയുമായി സംബന്ധിച്ചതാണ്. വിദ്യാലയങ്ങളിൽനിന്നും പഠിക്കാൻ കഴിയാത്ത പല കാര്യങ്ങളും പരിസ്ഥിതി നമുക്ക് പകർന്നുനല്കുന്നു. എന്നാൽ ആധുനികമനുഷ്യർ ഇത് മനസിലാക്കാൻ ശ്രമിക്കുന്നില്ല. തന്റെ കാര്യപ്രാപ്തിക്കുവേണ്ടി അവർ നിഷ്കരുണം അതിനെ ഇല്ലാതാക്കിക്കൊണ്ടിരിക്കുന്നു. എന്നാൽ ഇത് തന്റെതന്നെ നാശത്തിലേക്കുനയിക്കും എന്നവർ മനസ്സിലാക്കേണ്ടിയിരിക്കുന്നു. കേരളത്തിന്റെ പരിസ്ഥിതി തന്നെ ഇതിനു ഉദാഹരണമാണ്. പണ്ട് പ്രകൃതിയോടിണങ്ങി അതിനെ പരിപാലിച്ച് ജീവിച്ചിരുന്നവരായിരുന്നു കേരളീയർ. മണ്ണിൽ കൃഷിചെയ്ത് ജീവിതമാർഗംതെളിച്ച് മിച്ചംവരുന്നത് മണ്ണിനുതന്നെ നൽകി അവർ ജീവിച്ചു. അന്നത്തെ പ്രകൃതിരമണീയമായ കാഴ്ചകൾ വാർണിക്കാൻ കഴിയുന്നതിലും അപ്പുറമായിരുന്നു. പച്ചപരവതാനി വിരിച്ചതുപോലെയുള്ള വയലേലകളും വ്യത്യസ്ത നിറങ്ങളിലുള്ള പുഷ്പങ്ങളും മലകളും തെളിഞ്ഞൊഴുകുന്ന ജലസ്രോതസുകളുമെല്ലാം നമ്മുടെ കണ്ണുകളെ കുളിരണിയിപ്പിച്ചിരുന്നു. എന്നാലിന്ന് കാലം മാറി. പ്രകൃതിരമണീയമായ കാഴ്ചകളെല്ലാംതന്നെ കെട്ടുകഥകളായി മാറിക്കൊണ്ടിരിക്കുന്ന കാലമാണിത്. എന്തിനേക്കാളും വലുതായി പണത്തെ ആരാധിക്കുന്ന ഈ ലോകത്ത് പരിസ്ഥിതിയുടെ പ്രാധാന്യം നിസാരമായി കണക്കാക്കപ്പെടുന്നു. എങ്ങും അതിനെ നശിപ്പിക്കുന്ന കാഴ്ചമാത്രമേ കാണാൻ കഴിയുന്നുള്ളു. നിസാരം എന്ന് നാം കരുതുന്ന പ്രകൃതി പ്രളയമായും കൊടുങ്കാറ്റായും മറ്റു ദുരന്തങ്ങളായും നമുക്ക് മറുപടി നൽകുന്നു. ജീവന്റെ ഉറവിടമായ പരിസ്ഥിതിയെ നമുക്ക് സംരക്ഷിക്കാം. പഴയ തലമുറയിലേക്കു തിരിച്ചുപോകാം. ജീവാമൃതമായ പരിസ്ഥിതിയെ വീണ്ടും ഉയർത്തിക്കൊണ്ടുവരാൻ നമുക്ക് കഴിയും. അത് പ്രാവർത്തികമാക്കാൻ നാമോരോരുത്തരും ശ്രമിക്കേണ്ടിയിരിക്കുന്നു. ദ്രൗപ 9 എ വിദ്യാധിരാജ ഇ എം എച്ച് എസ് എസ്, ആറ്റിങ്ങൽ ആറ്റിങ്ങൽ ഉപജില്ല തിരുവനന്തപുരം അക്ഷരവൃക്ഷം പദ്ധതി, 2020 ലേഖനം  സാങ്കേതിക പരിശോധന - sheelukumards തീയ്യതി: 27/ 04/ 2020 >> രചനാവിഭാഗം - ലേഖനം