ഡബ്ല്യു.ഒ.വി.എച്ച്.എസ്.എസ്. മുട്ടിൽ/ഗ്രന്ഥശാല/2025-26

സ്കൂൾ ലൈബ്രറി പ്രവർത്തനങ്ങൾ 2025-26

2025-26 അക്കാദമിക വർഷത്തിൽ സ്കൂൾ ലൈബ്രറിയുടെ പ്രവർത്തനം കൂടുതൽ കാര്യക്ഷമമാക്കുന്നതിനും വിദ്യാർത്ഥികളിൽ വായനാശീലം വളർത്തുന്നതിനുമായി വൈവിധ്യമാർന്ന പരിപാടികളാണ് സംഘടിപ്പിച്ചത്.

ലൈബ്രറി പുനഃക്രമീകരണവും ക്ലാസ് ലൈബ്രറികളും

പുതിയ അക്കാദമിക വർഷത്തിന്റെ തുടക്കത്തിൽ തന്നെ സ്കൂൾ തല ലൈബ്രറി വിപുലമായ രീതിയിൽ പുനഃക്രമീകരിച്ചു. പുസ്തകങ്ങൾ വിഷയക്രമത്തിൽ അടുക്കി വെക്കുകയും വിദ്യാർത്ഥികൾക്ക് എളുപ്പത്തിൽ കൈകാര്യം ചെയ്യാവുന്ന രീതിയിൽ സംവിധാനങ്ങൾ ഒരുക്കുകയും ചെയ്തു. ഇതിന്റെ ഭാഗമായി ഓരോ ക്ലാസ്സിലും ക്ലാസ്സ് തല ലൈബ്രേറിയന്മാരെ തിരഞ്ഞെടുക്കുകയും അവർക്ക് ആവശ്യമായ നിർദ്ദേശങ്ങൾ നൽകുകയും ചെയ്തു.

വായനാദിനാചരണം (ജൂൺ 19)

പി.എൻ. പണിക്കർ ചരമദിനമായ ജൂൺ 19 വായനാദിനമായി വിപുലമായി ആഘോഷിച്ചു. ഇതിന്റെ ഭാഗമായി താഴെ പറയുന്ന പ്രവർത്തനങ്ങൾ നടന്നു:

• പുസ്തക വിതരണം: വായനാദിനത്തിൽ ഓരോ ക്ലാസ്സുകളിലേക്കും ആവശ്യമായ ലൈബ്രറി പുസ്തകങ്ങൾ വിതരണം ചെയ്തു. വിദ്യാർത്ഥികൾക്ക് ക്ലാസ്സ് മുറികളിൽ തന്നെ പുസ്തകങ്ങൾ ലഭ്യമാക്കുന്നത് വഴി വായന ഒരു ശീലമാക്കാൻ ഈ പദ്ധതി സഹായിക്കുന്നു.
• ക്വിസ് മത്സരം: സ്കൂൾ ലൈബ്രറി കൗൺസിലിന്റെ നേതൃത്വത്തിൽ വായനയുമായി ബന്ധപ്പെട്ട ക്വിസ് മത്സരങ്ങൾ സംഘടിപ്പിച്ചു. വായനാശീലവും അറിവും വർദ്ധിപ്പിക്കുന്നതിനായി നിരവധി വിദ്യാർത്ഥികൾ ഈ മത്സരത്തിൽ സജീവമായി പങ്കെടുത്തു.

നൂറു വിദ്യാർത്ഥികൾ നൂറ് കവിതകൾ

മാണ്ടാട് ഗ്രാമിക ലൈബ്രറിയുമായി സഹകരിച്ച് 'യുദ്ധവും സമാധാനവും' എന്ന പ്രമേയത്തെ മുൻനിർത്തി സംഘടിപ്പിച്ച "നൂറു വിദ്യാർത്ഥികൾ നൂറ് കവിതകൾ" എന്ന പരിപാടിയിൽ സ്കൂളിലെ വിദ്യാർത്ഥികൾ പങ്കാളികളായി. ലോകസമാധാനത്തിന്റെ പ്രാധാന്യം കവിതകളിലൂടെ ആവിഷ്കരിച്ച ഈ സർഗ്ഗാത്മക പരിപാടിയിൽ നൂറോളം വിദ്യാർത്ഥികൾ തങ്ങളുടെ രചനകളുമായി പങ്കുചേർന്നു. സമാധാനത്തിന്റെ സന്ദേശം പുതിയ തലമുറയിലേക്ക് എത്തിക്കുന്നതിനും സർഗ്ഗാത്മക രചന പ്രോത്സാഹിപ്പിക്കുന്നതിനും ഈ സംരംഭം വലിയ പങ്ക് വഹിച്ചു. പരിപാടി മലയാളത്തിന്റെ പ്രിയ കവി കല്പറ്റ നാരായണൻ ഉദ്ഘാടനം ചെയ്തു. പരിപാടിയിൽ വയനാട് ജില്ലയിലെ വിവിധ സാംസ്കാരിക പ്രവർത്തകർ പങ്കെടുത്തു