Schoolwiki:എഴുത്തുകളരി/Nizar

• പിന്നാലെ വരുന്നവർ ഇനി പിന്നിലാവില്ല ...

തങ്ങൾ പഠിച്ച വിദ്യാലയത്തിലെ, പഠന സൗകര്യമില്ലാത്ത നൂറോളം കുട്ടികൾക്കായി മിനി കമ്പ്യൂട്ടറുകൾ വീടുകളിൽ സ്ഥാപിച്ചു നൽകുകയാണ് എടവനക്കാട് എച്ച്ഐഎച്ച്എസ് സ്കൂളിലെ പൂർവ വിദ്യാർത്ഥികൾ. 100 വർഷ ചരിത്രമുള്ള ഈ സ്കൂളിലെ പൂർവ വിദ്യാർഥി സംഘടനയായ ഹിദായത്തുൽ ഇസ്​ലാം സ്കൂൾ അലൂംനി അസോസിയേഷനാണ് (ഹിസ) ‘ഹിസ ഹബ്ബ്​’ എന്ന പേരിൽ മിനി കമ്പ്യൂട്ടർ സംവിധാനം ഒരുക്കിനൽകി വിദ്യാർഥികൾക്ക്​ താങ്ങാകുന്നത്​. അർഹരായ കുട്ടികകൾക്ക്​ ഓൺലൈൻ പഠനത്തിന്​ ഉപകരിക്കുന്നതിനൊപ്പം ഡിജിറ്റൽ ലോകത്തെ അപകടക്കെണികൾ ഒഴിവാക്കുകയെന്ന ലക്ഷ്യത്തോടെയാണ്​ ഹിസ ഹബ്ബ്​ ഒരുക്കിയത്​. ആന്റ്രോയ്ഡ് ബോക്സ്, 15 ഇഞ്ച്​ മോണിറ്റർ, വെബ്​കാം, മൈക്​, സിം ഇടാവുന്ന ഡോംഗ്​ൾ, മൗസ്​, കീബോർഡ്​ എന്നിവ അടങ്ങിയതാണ്​ ഹിസ ഹബ്ബ്​. സൂം, ഗൂഗ്​ൾ മീറ്റ്​, വാട്​സ്​ആപ്പ്​, ഖാൻ അക്കാഡമി പോലുള്ള ചില പഠന ആപ്പുകൾ എന്നിവ മാത്രമേ ഉപയോഗിക്കാനാകൂ. മറ്റ്​ സൈറ്റുകളിലേക്കോ അപകടകരമായ ആപ്പുകളിലേക്കോ വിദ്യാർഥികളുടെ ശ്രദ്ധ പോകുന്നത്​ തടയാനാകും. ഒരു കുട്ടിക്കുള്ള സംവിധാനത്തിന്​ 11,000 രൂപയോളമാണ്​ ചെലവ്​. ഇത്തരത്തിൽ നൂറോളം കുട്ടികൾക്ക്​ സംവിധാനം ഒരുക്കുകയാണ്​ പൂർവ വിദ്യാർഥി സംഘടനയുടെ ലക്ഷ്യം. ഏറ്റവും അർഹരായ 30 കുട്ടികൾക്ക്​ ആദ്യ ഘട്ടത്തിൽ ലഭ്യമാക്കും. കുട്ടിയുടെ പഠനാവശ്യം കഴിയു​മ്പോൾ ഈ സംവിധാനം സ്​കൂൾ ലാബി​ലേക്ക്​ മാറ്റാനും കഴിയും. പരമാവധി കുട്ടികൾക്ക്​ സൗകര്യം ലഭ്യമാക്കാനുള്ള ശ്രമത്തിലാണെന്നും വിവിധ പൂർവ വിദ്യാർഥി ബാച്ചുകൾ സഹായവുമായി രംഗത്തെത്തിയിട്ടുണ്ടെന്നും ഹിസ ഭാരവാഹികൾ പറഞ്ഞു. പദ്ധതിയുടെ തുടക്കമായി അഞ്ച് വീടുകളിലേക്കുള്ള ഹിസ ഹബ് ഉദ്‌ഘാടനം കെ.എൻ. ഉണ്ണികൃഷ്ണൻ എം.എൽ.എ നിർവഹിച്ചു.ഹിസ പ്രസിഡന്റ്‌ എ യു യൂനുസ് പഞ്ചായത്ത് പ്രസിഡൻറ് അസീന അബ്​ദുൽസലാം, വിദ്യാഭ്യാസ സ്റ്റാന്റിംഗ് കമ്മിറ്റി ചെയർപേഴ്സൺ കൊച്ചുത്രേസ്യ ഡിന്ന വാർഡ് അംഗം ബിസ്നി പ്രതീഷ് സ്കൂൾ മാനേജർ ഡോ. വി.എം. അബ്​ദുല്ല, വൈപ്പിൻ ബ്ലോക്ക് പഞ്ചായത്ത് വൈസ് പ്രസിഡൻറുകൂടിയായ പി.ടി.എ പ്രസിഡൻറ് കെ.എ. സാജിത്ത്, സ്കൂൾ പ്രിൻസിപ്പൽ കെ.ഐ. ആബിദ, വൈസ് പ്രിൻസിപ്പൽ വി.കെ. നിസാർ, ജനറൽ സെക്രട്ടറി മുല്ലക്കര സക്കരിയ, സ്റ്റാഫ് സെക്രട്ടറി എം എം സഫുവാൻ എന്നിവർ സംസാരിച്ചു.