ജി.യു.പി.സ്കൂൾ കരിങ്ങാപ്പാറ/എന്റെ ഗ്രാമം

കരിങ്കപ്പാറ

മലപ്പുറം ജില്ലയിലെ തിരൂർ താലൂക്കിലെ ഒഴൂർ പഞ്ചായത്തിലെ 8,9,10 എന്നീ വാർഡുകൾ അടങ്ങുന്ന ഒരു ചെറിയ ഗ്രാമമാണ് കരിങ്കപ്പാറ. വെള്ളച്ചാട്ടത്താൽ പ്രസിദ്ധമായ നാട്.

മലപ്പുറം ജില്ലാ ആസ്ഥാനത്ത് നിന്ന് 20 കിലോമീറ്റർ പടിഞ്ഞാറായാണ് കരിങ്കപ്പാറ സ്ഥിതി ചെയ്യുന്നത്. തിരൂർ റെയിൽവേ സ്റ്റേഷനിൽ നിന്നും 8 km അകലെയാണ് ഈ ഗ്രാമം. താനൂരിൽ നിന്ന് 6 കി.മീ. സംസ്ഥാന തലസ്ഥാനമായ തിരുവനന്തപുരത്ത് നിന്ന് 350 കി.മീ.

കരിങ്കപ്പാറ പിൻകോഡ് 676106, ആദൃശ്ശേരി ആണ് പോസ്റ്റ് ഓഫീസ്.

വടക്ക് തിരൂരങ്ങാടി താലൂക്ക്, തെക്ക് തിരൂർ താലൂക്ക്, വടക്ക് വേങ്ങര താലൂക്ക്, കിഴക്ക് മലപ്പുറം താലൂക്ക് എന്നിവയാൽ ചുറ്റപ്പെട്ടതാണ് കരിങ്കപ്പാറ.

തിരൂർ, കോട്ടക്കൽ മലപ്പുറം, പൊന്നാനി, പെരിന്തൽമണ്ണ എന്നിവയാണ് സമീപ നഗരങ്ങൾ

പ്രധാന പൊതു സ്ഥാപനങ്ങൾ

1. ജി. യൂ. പി. എസ്. കരിങ്കപ്പാറ
2. കമ്മ്യൂണിറ്റി ഹെൽത്ത്‌ സെന്റർ പാറമ്മൽ

ഭൂമിശാസ്ത്രം

മലപ്പുറം ജില്ലയിലെ തിരൂരിൽ നിന്നും 12 km അകലെ കരിങ്കപ്പാറ എന്ന ഈ പ്രദേശം കിഴക്ക് പെരുമണ്ണ പഞ്ചായത്തുമായും , പടിഞ്ഞാറ് താനാളൂർ പഞ്ചായത്തുമായും , തെക്ക് പൊന്മുണ്ടം പഞ്ചായത്തുമായും , വടക്ക് നന്നമ്പ്ര പഞ്ചായത്തുമായും അതിർത്തി പങ്കിടുന്ന ഒഴുർ പഞ്ചായത്തിലെ ഗ്രാമ പ്രദേശമാണ്. ഈ പ്രദേശത്തിന്റെ ആസ്ഥാനമായി കണക്കാക്കുന്നത് “പാറ” എന്ന പേരിൽ വിളിക്കുന്ന ഇടമാണ് . ധാരാളമായുള്ള കരിങ്കല്ലുകളുടെ സാനിധ്യം ഈ പ്രദേശത്തിന് പേര് വരാൻ കാരണമായി. സങ്കീർണ്ണമായ ഭൂപ്രദേശമായി കണക്കാക്കപ്പെടുന്ന ഈ പ്രദേശം കയറ്റവും ഇറക്കവും പാടശേഖരവും പാറക്കെട്ടുകളും നീർച്ചാലുകളും തോടുകളും ഉൾക്കൊള്ളുന്നതാണ്. ശരാശരി 25 km ചുറ്റളവാണ്‌ ഈ പ്രദേശത്തിനുള്ളത് .

ഗതാഗതം

ഭൂമിശാസ്ത്രപരമായി ഒരുപാടു സങ്കീർണതകളും ഗതാഗത പരിമിതികളും നിറഞ്ഞതാണ് ഈ പ്രദേശം. ദേശീയപാതയിൽ നിന്ന് വൈലത്തൂർ-കോഴിച്ചെന റോഡ്‌ വഴി തിരൂരിലേക്കും അത്താണിക്കൽ-തെയ്യാല റോഡ്‌ വഴി താനൂരിലേക്കും, തിരൂർ, താനൂർ റെയിൽവേ സ്റ്റേഷനിലേക്കും കോഴിച്ചെന വഴി, ദേശീയപാതയിലൂടെ കോഴിക്കോട് വിമാനത്താവളത്തിലേക്കും വഴി തുറക്കുന്നു.

ആരാധനാലയങ്ങൾ

കരിങ്കപ്പാറ ജുമാ മസ്ജിദ്, കരിങ്കപ്പാറ ശ്രീവിഷ്ണു ക്ഷേത്രം എന്നിവയാണ് പ്രധാനപ്പെട്ട ആരാധനാലയങ്ങൽൾ. സൗഹാർദ്ദത്തിലും സഹിഷ്ണുതയിലും മറ്റുള്ളവരെ അംഗീകരിച്ചും സ്നേഹിച്ചും കഴിയുന്ന ജനങ്ങളാണ് കരിങ്കപ്പാറയുടെ വിജയം.

• കരിങ്കപ്പാറ ജുമാ മസ്ജിദ്

• കരിങ്കപ്പാറ ശ്രീവിഷ്ണു ക്ഷേത്രം

കൃഷി

തികച്ചും കാർഷികസമ്പന്നമായ ഈ പ്രദേശത്തു തെങ്ങ്, കവുങ്ങ്, വെറ്റില, കുരുമുളക് നെല്ല് എന്നിവ ധാരാളമായി കൃഷി ചെയ്തു വരുന്നു. തിരൂർ പ്രദേശത്തു അന്യമായിരുന്ന റബർ കൃഷിയുടെ കൗതുക ചരിത്രം കൂടി ഉൾക്കൊള്ളുന്നതാണ് കരിങ്കപ്പാറ. വളരെ വർഷങ്ങൾക്ക്മുൻപ് റബ്ബർഎസ്റ്റേറ്റ് ഇവിടെ നിലകൊണ്ടിരുന്നു. ഈ പ്രദേശത്തു നിന്ന് റബ്ബർ ടാപ്പിംഗ് ജോലിക്കു പോയിരുന്ന ഒരുകൂട്ടം ആളുകൾ ചേർന്ന് രൂപപ്പെടുത്തിയ ഈ എസ്റ്റേറ്റ് ഇന്ന് എസ്റ്റേറ്റ് പടി എന്ന കേവല നാമത്തിൽ മാത്രം ഒതുങ്ങിയിക്കുന്നു. തൊട്ടിയിൽ യാവു ഹാജിയെ പോലുള്ള ആ തലമുറയിലെ ഏതാനും വ്യക്തികൾ ഇന്നതിന്റെ ജീവിച്ചിരിക്കുന്ന സ്മാരകങ്ങളായി ഇവിടെയുണ്ട്.

സാമൂഹികം

വളരെ സമാധാനപരമായി വിവിധ മതക്കാരും ആശയക്കാരും സൗഹൃദപൂർവം ജീവിക്കുന്ന ഈ ഇടം തനി ഗ്രാമീണ പശ്ചാത്തലമുള്ളതാണ്‌. കരിങ്കപ്പാറ ജുമാമസ്ജിദ് കേന്ദ്രീകരിച്ചു ,മഹല്ല് ദേശമായി ഇസ്ലാം വിശ്വാസികളും, പ്രധാന ക്ഷേത്രമായ കക്കാട്ട് കുന്നത് ഭഗവതി ക്ഷേത്രം കേന്ദ്രമാക്കി ഹൈന്ദവരും ഇടകലർന്നു ജീവിക്കുന്നു, കൂടാതെ നിരവധി കുടുംബ ക്ഷേത്രങ്ങളും സജീവമാണ്.പണ്ഡിതരായിരുന്ന കരിങ്കപ്പാറ മുഹമ്മദ് മുസ്ലിയാരുടെയും മാധവൻ നായരുടെയും മാർഗ നിർദ്ദേശങ്ങൾ ഇവിടുത്തുക്കാർക്കു വെളിച്ചമായി .

സ്ഥാപനങ്ങൾ

വിദ്യാഭ്യാസ മേഖലയിൽ വർഷങ്ങളായി സേവന പാതയിലുള്ള GUPS കരിങ്കപ്പാറ ശ്രദ്ധേയമാണ് .1915 എലിമെന്ററി സ്‌കൂൾ ആയി വളരെ ക്ലേശകരമായ അവസ്ഥയിൽ തുടങ്ങിയ ഈ സ്ഥാപനം പിന്നീട് സർക്കാർ അധീനതയിലായി. പീടികത്തറയിലെ നെടുംപുരയിൽ നിന്നാരംഭിച്ചു കാലക്രമത്തിൽ വാടക കെട്ടിടമായും തുടർന്ന ഈസ്ഥാപനത്തിന് വളരെ വൈകിയാണ് സ്വന്തമായ കെട്ടിടം ലഭ്യമായത്. വിദ്യാർത്ഥിളുടെ കൊഴിഞ്ഞ് പോക്കിനെ അതിജീവിച്ച ഈ വിദ്യാലയം പരിമിതമായ സൗകര്യത്തിലൂടെയാണ് ഇപ്പോഴും മുന്നേറുന്നത്. ഒഴുർ പഞ്ചായത്തു മുൻപ്രസിഡന്റും നാട്ടുകാരനുമായ നൂഹ് കരിങ്കപ്പാറ, സ്കൂൾ പ്രധാന അധ്യാപകർ, PTA പ്രെസിഡന്റുമാർ എന്നിവരെ പ്രത്യേകം സ്മരിക്കേണ്ടതാണ്.

ശതാബ്ദി

ഒഴൂർ പഞ്ചായത്തിലെ ഏക ഗവൺമെന്റ് യു.പി.സ്കൂൾ ആയ ജി. യു.പി .എസ് കരിങ്കപ്പാറ നിലവിൽ വന്നിട്ട് നൂറ് വർഷം പിന്നിട്ടിരിക്കുകയാണ്.നൂറാം വാർഷികം "ശതവർണ്ണങ്ങൾ" എന്ന പേരിൽ വിവിധ പരിപാടികളോടെ ആഘോഷിക്കാൻ തീരുമാനിക്കുകയും,അതിന്റെ ഉദ്ഘാടനം 2024 ഒക്ടോബർ 5 ന് നടക്കുകുയും ചെയ്തു.

"അറിവിന്റെ ആകാശവീഥികളിൽ...

അണയാത്ത ജ്യോതിസ്സിൻ ജ്വാലകളായ്

കുടമ‍‍ണി കെട്ടിയ അരുവികളൊഴുകും

നാടിൻ അക്ഷര പു‍‍‍‍‍‍‍‍‍‍‍‍‍‍‍ണ്യം....

നൂറിൻ നിറവിൽ ആരവമായ്........."

സ്കൂളിലെ അധ്യാപികയായ ആരിഫ ടീച്ചർ എഴുതിയ ഈ "തീം സോങ് " പരിപാടിയിൽ പ്രകാശനം ചെയ്തു.അന്നേ ദിവസം തന്നെ കിലയുടെയും കിഫ്ബിയുടെയും ഫണ്ടിനാൽ നിർമ്മിച്ച സ്കൂളിന്റെ പുതിയ കെട്ടിട ഉദ്ഘാടനം ബഹുമാനപ്പെട്ട കായിക മന്ത്രി വി.അബ്ദുറഹ്മാൻ നിർവ്വഹിച്ചു.മലപ്പുറം ഡി.ഡി.ഇ, താനൂർ എ.ഇ.ഒ തുടങ്ങിയവർ പങ്കെടുത്തു. നാട്ടുകാരുടെയും PTA യുടെയും സഹകരണത്തോടെ 950 ഓളം കുട്ടികളുള്ള ഈ സ്കൂൾ നല്ല രീതിയിൽ പ്രവർത്തിച്ചുവരുന്നു.

സംഗ്രഹം

സമൂഹത്തിന്റെ താഴെ തട്ടിലുള്ളവർ ധാരാളമായി അധിവസിക്കുന്ന ഈ പ്രദേശത്ത് വിദ്യാഭ്യാസനിലവാരം, വരുമാന സ്രോതസ്സ്, ജീവിത സാഹചര്യം എന്നിവ പരിമിതമാണ്.ഗതാഗത രംഗത്ത് രണ്ട് പ്രധാന നിരത്തുകൾ സജീവമാണെങ്കിലും ഉൾവഴികൾ ശുഷ്‌കിച്ചതും ദയനീയവുമാണ്. കൃഷി മുഖ്യ ജീവനോപാധിയാണെങ്കിലും ജല ലഭ്യതയും ജല സേചനവും പ്രയാസകരമാണ്. വിനോദ സഞ്ചാര വകുപ്പിന്റെ പരിഗണനയിലുള്ള കരിങ്കപ്പാറ  വെള്ളച്ചാട്ടം മാസങ്ങളോളം ജലരഹിതമാണ്. വ്യവസായം, നിർമ്മാണം, മറ്റ് വരുമാന മാർഗ്ഗങ്ങൾ എന്നിവയിൽ ഈ ഗ്രാമം ശരാശരിക്കും താഴെയാണ്. എന്നിരുന്നാലും മാനസിക-ശാരീരിക-ആരോഗ്യ നിലവാരത്തിൽ ഈ പ്രദേശത്തുകാർ മികവിലാണ്. ഒത്തൊരുമയിലും സൗഹാർദ്ദത്തിലും ദയാവായ്പ്പിലും ഒന്നിച്ചു ചേരുന്ന ഈ ഗ്രാമീണജനത നയനമനോഹരവും സന്തോഷദായകവുമാണ്.

ചിത്ര ശാല

• 
  കരിങ്കപ്പാറ തോടിലെ പാറകളുടെ സാന്നിദ്ധ്യം
• 
  കരിങ്കപ്പാറ അങ്ങാടി
• 
  കരിങ്കപ്പാറ ജി യു പി സ്കൂൾ മൈതാനം
• 
  കരിങ്കപ്പാറ ജി യു പി സ്കൂൾ പഴയ കെട്ടിടം
• 
  തരിശായ നെൽപ്പാടം
• 
  തെങ്ങ് - കവുങ്ങ് തോട്ടം
• 
  വായനശാല
• 
  കരിങ്കപ്പാറ വെള്ളച്ചാട്ടം മേഖല
• 
  കരിങ്കപ്പാറ - കോഴിച്ചെന റോഡ്
• 
  കരിങ്കപ്പാറ ജി യു പി സ്കൂൾ കെട്ടിടം
• 
  കരിങ്കപ്പാറ ദിശാ സൂചക ഫലകം
• 
  കരിങ്കപ്പാറ പള്ളി
• 
  കരിങ്കപ്പാറ വൈലത്തൂർ റോഡ്