സെന്റ് സെബാസ്റ്റ്യൻസ് യു പി എസ് പാടിച്ചിറ/എന്റെ ഗ്രാമം
പാടിച്ചിറ
തിരുവിതാംകൂറിന്റെ സുരക്ഷിതത്വത്തിൽ നിന്ന് അതിജീവനാർത്ഥം പുതുമണ്ണ് തേടി മലബാറിൽ എത്തിയ ഒരു ജനതയുടെ
ഐതിഹാസികവും വീരോചിതവുമായ കുടിയേറ്റത്തിന്റെ സാഹസിക സ്മരണകൾ ഉറങ്ങുന്ന മനോഹരമായ ഒരു മലയോര ഗ്രാമമാണ് വയനാട് ജില്ലയിൽ സ്ഥിതിചെയ്യുന്ന പാടിച്ചിറ. 1945 ൽ കുടിയേറ്റം ആരംഭിച്ച ഈ പ്രദേശത്തിന് നാനാവിധമായ വളർച്ചയുടെയും ഉയർച്ചയുടെയും വീരഗാഥ അഭിമാനത്തോടെ പങ്കുവയ്ക്കാനുണ്ട്. ആത്മീയവും ഭൗതികവുമായ ഐശ്വര്യങ്ങളും ദൈവാനുഗ്രഹങ്ങളും നിറഞ്ഞ ഈ നാട്ടിൽ ജീവിക്കുന്നതു ഓരോ പൗരനും അഭിമാനിക്കാവുന്ന ഒന്നാണ്. 1920കളുടെ മദ്യത്തോടെയാണ് മലബാർ കുടിയേറ്റം ഇവിടെ ശക്തിപ്പെടുന്നത്. മധ്യതിരുവിതാംകൂറിന്റെ വിവിധ ഭാഗങ്ങളിൽ നിന്നും മലബാർ പ്രദേശത്തെ കണ്ണൂർ വയനാട് കോഴിക്കോട് മലപ്പുറം പാലക്കാട് ജില്ലകളുടെ വിവിധ ഭാഗങ്ങളിൽ കുടിയേറ്റ ജനത വാസുമുറപ്പിച്ചു. 1951ലാണ് ചിറയിൽ കർഷകന്റെ പാദസ്പർശം പതിയുന്നത്. നാനാ ജാതി മതസ്ഥർ പാർക്കുന്ന ഈ കൊച്ചു ഗ്രാമത്തിൽ. ഒരു കത്തോലിക്കാ ദേവാലയവും ഏതാനും ഹൈന്ദവ ക്ഷേത്രങ്ങളും ഉണ്ട്. നാനാവിധ സൗകര്യങ്ങൾ സമ്പന്നമാണ് ഈ ഗ്രാമത്തിലെ നിവാസികൾ.
നാടിന്റെ പേര് വന്നത് :
പാടിച്ചിറയ്ക്ക് ഈ പേര് വന്നത് എങ്ങനെ എന്നത് കൗതുകകരമാണ്. ഇന്നത്തെ പാടിച്ചിറ അങ്ങാടിയുടെ സമീപത്തായിരുന്നു പനയ്ക്കൽ ജോസഫിന്റെ കൃഷി സ്ഥലം. വർഷം മുഴുവൻ തീർത്തും ചതുപ്പ് നിറഞ്ഞ ഒരു പ്രദേശവും അതിനോട് ചേർന്ന് ഒരു പ്രകൃതിദത്ത ചിറയുമുണ്ടായിരുന്നു. അതിന് സമീപത്തു കൂടി ആളുകൾ നടന്നാൽ മേൽമണ്ണ് മൊത്തമായി ഇളകുന്നത് കാണാമായിരുന്നു പോലും! ഇക്കാരണത്താൽ ഈ പ്രദേശം ആടിച്ചിറ എന്ന പേരിൽ അറിയപ്പെട്ടിരുന്നു. പനയ്ക്കൽ ജോസഫ് ആദ്യമായി തുടങ്ങിവച്ചത് പുൽത്തൈല കൃഷിയായിരുന്നു. തെരുവ് പുല്ല് മാറ്റി തൈലം എടുക്കുവാൻ ധാരാളം ജലം ആവശ്യമായിരുന്നു. അതിലേക്കായി നിലവിലുണ്ടായിരുന്ന ചിറയോട് ചേർന്നായിരുന്നു വാറ്റുപുഴ നിർമ്മിച്ചിരുന്നത്. സമീപത്തായി തന്നെ തൊഴിലാളികൾക്ക് താമസിക്കുവാൻ ഒരു പാടിയും നിർമിച്ചിട്ടുണ്ടായിരുന്നു. പാടിയും ചിറയും ഒത്തുചേർന്നാണ് പാടിച്ചിറ ആയതെന്ന് ഒരു വിഭാഗം ആളുകൾ പറയുന്നു.
വിദ്യാഭ്യാസ സൗകര്യങ്ങൾ:
സെന്റ് സെബാസ്റ്റ്യൻസ് യുപി സ്കൂൾ പാടിച്ചിറ
' പള്ളിയോടൊപ്പം പള്ളിക്കൂടം എന്ന വിശുദ്ധ കുര്യാക്കോസ് ഏലിയാസ് ചാവറ അച്ഛന്റെ ദർശന സാക്ഷാത്കാരമായി പാടിച്ചിറ ഇടവകയുടെ പ്രഥമ വികാരി റവ.ഫാ. ലൂക്കോസ് പൂണ്ടി കുളത്തിന്റെ ദീർഘവീക്ഷണത്തിൽ പ്രഭാത് വിദ്യാലയം എന്ന പേരിൽ 1974 ൽ സ്കൂൾ ആരംഭിച്ചു. 120 കുട്ടികളുമായി പ്രവർത്തനം ആരംഭിച്ച ഈ സ്കൂൾ1982- ൽ അപ്പർ പ്രൈമറി സ്കൂൾ ആയി ഉയർത്തപ്പെട്ടു.2025 ആകുമ്പോൾ 350 ഓളം വിദ്യാർത്ഥികൾ ഉണ്ട്.കൂടാതെ ശ്രീനാരായണ വിദ്യാനികേതൻ എന്ന ഒരു അപ്പർ പ്രൈമറി സ്കൂൾ മേലെ പാടിച്ചിറയിൽ പ്രവർത്തിച്ചുവരുന്നു.. ജോസ്ഗിരി സി.എം.സി കോൺവെന്റിനോട് ചേർന്ന് നഴ്സറി വിദ്യാഭ്യാസ സൗകര്യവും ഈ ഗ്രാമത്തിന്റെ അനുഗ്രഹമാണ്.