ജി യു പി എസ് വെള്ളംകുളങ്ങര/ പരിസ്ഥിതി ക്ലബ്ബ്/2024-25

2025-26

ലോക പരിസ്ഥിതി ദിനാഘോഷം : 2024 ജൂൺ -5

എക്കോ കഗവ.യു.പി.എസ്. വെള്ളംകുളങ്ങരയിൽ ലോക പരിസ്ഥിതി ദിനം വിവിധ പരിപാടികളോടെ ആചരിച്ചു. പരിസ്ഥിതി ദിന പ്രത്യേക അസംബ്ലിയിൽ കുട്ടികളും, അധ്യാപകരും പരിസ്ഥിതി ദിന പ്രതിജ്ഞ ചൊല്ലി.സീനിയർ അധ്യാപികയായ വി.എഫ്. രഹീന ബീഗം പ്രതിജ്ഞ ചൊല്ലിക്കൊടുത്തു. സ്ക്കൂൾ അങ്കണത്തിലെ 80 വർഷത്തിലധികം പഴക്കമുള്ള മുത്തശ്ശിമാവിനെ ആദരിച്ചു. കുട്ടികൾ അവരവരുടെ വീടുകളിലും സ്ക്കൂളിലും, പൊതുസ്ഥലങ്ങളിലും വൃക്ഷ തൈകൾ വച്ചുപിടിപ്പിച്ചു. മരമാണ് കാവൽഎന്ന സന്ദേശമാണ് ഈ പരിസ്ഥിതി ദിനത്തിൽ മുദ്രാവാക്യമായി സ്കൂൾ പ്രചരിപ്പിച്ചത്.ജീവിവർഗത്തിന്റെ നിലനിൽപ്പിനാധാരമായ, വായുവും, വെള്ളവും, ഭക്ഷണവും നിസ്വാർത്ഥതയോടെ നൽകുന്ന പ്രിയപ്പെട്ട വൃക്ഷങ്ങളാണ് നമ‍ുക്ക് കാവൽ എന്നതാണ് ഇതില‍ൂടെ ഉദ്ദേശിക്ക‍ുന്നത്. പരിസ്ഥിതി സംരക്ഷണത്തെക്കുറിച്ചും വൃക്ഷ തൈകൾ വച്ചുപിടിപ്പിക്കേണ്ടതിന്റെയ‍ും ,സംരക്ഷിക്കേണ്ടതിന്റെയ‍ും പ്രാധാന്യത്തെക്കുറിച്ച‍ും പരിസ്ഥിതി ക്ലബ്ബ് കോർഡിനേറ്റർ സിന്ധു എസ്., പ്രഥമാധ്യാപിക സുമി റേച്ചൽ സോളമൻ എന്നിവർ സംസാരിച്ചു.


മ‍ുത്തശ്ശിമാവിന‍ൊപ്പം...	പരിസ്ഥിതിദിന പ്രതിജ്ഞ

പ്ലാസ്റ്റിക് വിമുക്ത സമൂഹത്തിനായി കൈകോർക്കാം

പ്ലാസ്റ്റിക് ബഹിഷ്കരണ പ്രവർത്തനങ്ങളുമായി ബന്ധപ്പെട്ടുകൊണ്ട് പ്ലാസ്റ്റിക്കിന്റെ ഉപയോഗം പരമാവധി കുറയ്ക്കുന്നതിന്റെ ഭാഗമായി കുട്ടികൾ തയ്യാറാക്കി കൊണ്ടുവന്ന തുണി സഞ്ചികൾ സ്കൂളിൽ പ്രദർശിപ്പിച്ചപ്പോൾ

മരമില്ലാതെ മന‍ുഷ്യന‍ുണ്ടോ...

കാലാവസ്ഥാ വ്യതിയാനം വൃക്ഷങ്ങളിൽ ചെലുത്തുന്ന സ്വാധീനം തിരിച്ചറിയുന്ന പദ്ധതിയായ *മാതൃഭൂമി സീസൺ വാച്ച്* പ്രവർത്തനങ്ങളുമായി ബന്ധപ്പെട്ട കുട്ടികൾക്കായുള്ള ക്ലാസ് സംഘടിപ്പിച്ചു. ക്ലാസ്സ് നയിച്ചത് സീസൺ വാച്ച് സംസ്ഥാന കോഡിനേറ്റർ ശ്രീ. മ‍ുഹമ്മദ് നിസാർ ആയിര‍ുന്ന‍ു.. ഒരു വർഷം നീണ്ട നിരീക്ഷണത്തിലൂടെയും, പഠനത്തിലൂടെയും, രേഖപ്പെടുത്തലുകളിലൂടെയും വൃക്ഷങ്ങളിൽ ഉണ്ടാകുന്ന മാറ്റങ്ങള‍ും, കാലാവസ്ഥാ വ്യതിയാനങ്ങള‍ും ക‍ുട്ടികൾ മനസ്സിലാക്കിയെട‍‍ുക്ക‍ുന്ന പ്രവർത്തനമാണിത്.

പ്ലാസ്റ്റിക് ബോധവത്ക്കരണ നാടകം

പ്ലാസ്റ്റിക് മാലിന്യം ഉണ്ടാക്കുന്ന അപകടങ്ങളെക്കുറിച്ച് കുട്ടികൾക്കും പൊതുജനങ്ങൾക്കും അവബോധം നൽകുന്നതിനായി സീഡ് ക്ലബ് അംഗങ്ങളുടെ നേതൃത്വത്തിൽ 'പേടിക്കണം മരണമില്ലാത്തവരെ'! എന്ന നാടകം അവതരിപ്പിച്ചു. നാടകത്തിൽ ഭൂമിയും, പ്ലാസ്റ്റിക്കും കഥാപാത്രങ്ങളായി എത്തി. നാടകത്തിലൂടെ ഭൂമിയിൽ പ്ലാസ്റ്റിക് കൊണ്ടുണ്ടാകുന്ന ദോഷങ്ങളും അവയുടെ പരിഹാരമാർഗ്ഗങ്ങളും പൊതുജനങ്ങളുമായി ലളിതമായി സംവേദിക്കുവാൻ കഴിഞ്ഞു. പ്ലാസ്റ്റിക് വിപത്തിന്റെ ഭീകരത നാടകത്തിലൂടെ അവതരിപ്പിക്കപ്പെട്ടപ്പോൾ കുട്ടികൾക്ക് വലിയൊരു തിരിച്ചറിവായിരുന്നു അത്. പ്ലാസ്റ്റിക്കിനെതിരെ ഗവൺമെന്റ് യു.പി. സ്കൂൾ വെള്ളംകുളങ്ങരയിലെ അധ്യാപികയായ വി.കെ. അനുശ്രീ എഴുതിയ കവിത സ്കൂളിലെ അഞ്ചാം ക്ലാസ് വിദ്യാർത്ഥിനിയായ പാർവതി അഭിലാഷ് ആലപിച്ചു.

ജലമലിനീകരണം - ബോധവത്ക്കരണ പ്രവർത്തനങ്ങൾ

പരിസ്ഥിതി ക്ലബ്ബിന്റെ ആഭിമുഖ്യത്തിൽ നിത്യജീവിതത്തിൽ ജലത്തിന്റെ ആവശ്യകതയെക്കുറിച്ചും, ജലസംരക്ഷണ മാർഗങ്ങളെക്കുറിച്ചും ജലമലിനീകരണം തടയുന്നതിന് ആവശ്യമായ പ്രവർത്തനങ്ങളെക്കുറിച്ചും സ്കൂളിലെ സീനിയർ അധ്യാപകനായ രജനീഷ്.വി കുട്ടികൾക്കായി ബോധവത്ക്കരണ ക്ലാസ് നടത്തി.

ജലശുചീകരണ ബോധവൽക്കരണത്തിന്റെ ഭാഗമായി കുട്ടികൾ മുച്ചട്ടിയരിപ്പ നിർമ്മിച്ചു പ്രദർശിപ്പിച്ച‍ു.

സോളാർ പ്രചരണ ബോധവൽക്കരണ ക്ലാസ്

പുനരുൽപ്പാദിപ്പിക്കാവുന്ന ഊർജ്ജ സ്രോതസ്സ് എന്ന നിലയിൽ സോളാർ പാനലുകൾ വളരെ പ്രയോജനകരമാണെന്നും, അവ ഫോസിൽ ഇന്ധനങ്ങളെ ആശ്രയിക്കുന്നത് കുറയ്ക്കുകയും, പാരിസ്ഥിതിക ആഘാതം ലഘൂകരിക്കുകയും ചെയ്യുന്നുവെന്നും കുട്ടികളെ മനസ്സിലാക്കുന്നതിനായി പരിസ്ഥിതിക്ലബ്ബ് കൺവീനർ എസ്.സിന്ധ‍ുവിന്റെ നേതൃത്വത്തിൽ ബോധവത്ക്കരണ ക്ലാസ്സ‍ും സംഘടിപ്പിച്ചു. സോളാർ പ്ലാന്റ‍ുകൾ ഘടിപ്പിച്ചിട്ട‍ുള്ള സ്ഥലങ്ങൾ സന്ദർശിക്ക‍ുകയ‍ും, അതിന്റെ പ്രവർത്തനങ്ങള‍ും, ഗ‍ുണങ്ങള‍ും മനസ്സിലാക്ക‍ുകയ‍ും ചെയ്‍ത‍ു.

സ്കൂളുകളിലും വീടുകളിലും ഉള്ള ജൈവകൃഷി

സീഡ് ക്ലബ്ബിന്റെ നേതൃത്വത്തിൽ ഞങ്ങളുടെ സ്കൂളിൽ വിപുലമായ രീതിയിൽ ജൈവ പച്ചക്കറിത്തോട്ടം ഒരുക്കിയിട്ടുണ്ട്. സീഡിൽ നിന്നും ലഭിച്ച പച്ചക്കറി വിത്തുകൾ എല്ലാ കുട്ടികൾക്കും നൽകിയിട്ടുണ്ട്. കുട്ടികൾ ഇവ ഉപയോഗിച്ച വീടുകളിൽ മികച്ച ജൈവ കൃഷിത്തോട്ടം നിർമ്മിച്ചിട്ടുണ്ട്. സ്കൂളിൽ ചീര, പയർ, വെണ്ട, തക്കാളി, നിത്യവഴുതന, കപ്പ, പച്ചമുളക്, വാഴ, പപ്പായ മുതലായവ കൃഷി ചെയ്യുന്നുണ്ട്. സ്കൂളിലെയും വീടുകളിലെയും പച്ചക്കറിത്തോട്ടങ്ങളിൽ ജൈവ വളങ്ങളും ജൈവ കീടനാശിനികളും മാത്രമാണ് ഉപയോഗിക്കുന്നത്.സ്കൂളിലെ ജൈവ പച്ചക്കറിത്തോട്ടത്തിൽ നിന്നും ലഭിക്കുന്ന പച്ചക്കറികൾ സ്കൂൾ ഉച്ചഭക്ഷണ പരിപാടിയിലേയ്ക്ക് നൽകുന്നുണ്ട്. വിഷമില്ലാത്ത പച്ചക്കറികൾ സ്കൂൾ അടുക്കളയിൽ എത്തിക്കാൻ സാധിച്ചു എന്നത് അഭിമാനകരമായ പ്രവർത്തനമായിരുന്നു.

പ്ലാസ്റ്റിക്കിനെതിരെ പട പൊരുതാം

ബി റൈറ്റ് ബൈ 3 ആർ ( റിഡ്യ‍ൂസ്, റിയ‍ൂസ്, റിസൈക്കിൾ പ്ലാസ്റ്റിക് )

അനുദിനം വർദ്ധിച്ചുവരുന്ന പ്ലാസ്റ്റിക് മാലിന്യം എന്ന വിപത്തിനെതിരെ പൊരുതുവാൻ വരും തലമുറയെ ബോധവാന്മാരാക്കുക എന്ന ഉദ്ദേശത്തോടെ നടപ്പിലാക്കിയ ബി റൈറ്റ് ബൈ 3 ആർ പദ്ധതി 2024 - 25 വർഷത്തിൽ മികവാർന്ന പ്രവർത്തന ങ്ങളോടെ ജി യു. പി. എസ്. വെള്ളംകുളങ്ങരയിൽ നടത്തുവാൻ സാധിച്ചു.പദ്ധതിയുടെ സ്കൂൾതല ഉദ്ഘാടനം 3 /9/ 2024 ചൊവ്വാഴ്ച നടന്നു. പദ്ധതിയുടെ ഔപചാരിക ഉദ്ഘാടനം പ്രഥമ അധ്യാപിക സുമി റേച്ചൽ സോളമൻ നിർവഹിച്ചു. അധ്യാപിക സിന്ധു. എസ് പദ്ധതി വിശദീകരിക്കുകയും ബോധവൽക്കരണ ക്ലാസ് എടുക്കുകയും ചെയ്തു. അലക്ഷ്യമായി ഉപയോഗിക്കുന്ന ഓരോ തുണ്ട് പ്ലാസ്റ്റിക്കും നമ്മുടെയും മറ്റു ജീവജാലങ്ങളുടെയും എന്തിന് ഭൂമിയുടെ തന്നെയും നിലനിൽപ്പിന് ഭീഷണിയാണെന്ന തിരിച്ചറിവ് എല്ലാവരിലേക്കും എത്തിക്കുന്നതിനും ഒട്ടും വിദൂരമല്ലാത്ത ഒരു മഹാ ദുരന്തത്തിനെതിരെ പട പൊരുതുന്നതിന് ഓരോ കുട്ടിയെയും സജ്ജരാക്കുന്നതിനും ബി റൈറ്റ് ബൈ 3 ആർ പദ്ധതിയുടെ ഭാഗമായി നടപ്പിലാക്കിയ വിവിധ പ്രവർത്തനങ്ങളിലൂടെ ഇക്കോക്ലബ് അംഗങ്ങൾക്ക് സാധിച്ചു.

പേപ്പർ കവർ നിർമ്മാണ ശില്പശാല

01/ 01/ 2025 ബുധനാഴ്ച എക്കോ ക്ലബ്ബ് അംഗങ്ങളുടെ നേതൃത്വത്തിൽ പേപ്പർ കവർ നിർമ്മാണ ശില്പശാല നടത്തി. സ്കൂൾ പ്രഥമാധ്യാപിക സുമി റേച്ചൽ സോളമൻ പേപ്പർ കവർ നിർമ്മാണ ശില്പശാല ഉദ്ഘാടനം ചെയ്തു. പി. ടി. എ. പ്രസിഡണ്ട് സുരജിത്ത് കുമാർ, വൈസ് പ്രസിഡണ്ട് ഗീതു എന്നിവർ ചടങ്ങിൽ പങ്കെടുത്തു. ക്ലാസ്സ് നയിച്ചത് സീഡ് ക്ലബ്ബ് അംഗങ്ങളായ പൂജാ സി, തീർത്ഥ പ്രദീപ്, പാർവതി ഗിരീഷ് എന്നിവരായിരുന്നു. നിർമ്മിച്ച കവറുകൾ അടുത്തുള്ള കടകളിൽ വിതരണം ചെയ്തു.

തുണി സഞ്ചി നിർമ്മാണവും വിതരണവും

പ്ലാസ്റ്റിക് ബാഗുകളുടെ ഉപയോഗം കുറയ്ക്കുന്നതിന്റെ ഭാഗമായി എക്കോ ക്ലബ്ബിന്റെ നേതൃത്വത്തിൽ കുട്ടികൾ നിർമ്മിച്ച 50 തുണി സഞ്ചികൾ കടകളിലേക്ക് കൈമാറിയിട്ടുണ്ട്.മാതൃഭൂമിയുടെ പ്ലാസ്റ്റിക് വിരുദ്ധ ക്യാമ്പയിനിലേക്ക് 100 തുണിസഞ്ചികൾ നിർമ്മിച്ചു നൽകി.

സൈക്കിൾ ഉപയോഗം പ്രോത്സാഹിപ്പിക്കൽ

സൈക്കിളിൽ യാത്ര ചെയ്യുന്നതിന്റെ ഗുണങ്ങൾ മനസ്സിലാക്കുന്നതിനായ് ബോധവൽക്കരണ ക്ലാസ് സംഘടിപ്പിച്ചു. സൈക്കിളിന്റെ ഉപയോഗം വർദ്ധിപ്പിക്കുന്നത് വഴി ഇന്ധനം ലാഭിക്കാൻ കഴിയുമെന്നും, ആരോഗ്യമുള്ള ഒരു തലമുറയെ സൃഷ്ടിക്കാൻ കഴിയുമെന്നുമുളള സന്ദേശം പ്രചരിപ്പിക്ക‍ുന്നതിനായി സൈക്കിൾ റാലിയ‍ും സംഘടിപ്പിച്ച‍ു.