കണ്ണൂർ ജില്ലയിലെ തളിപ്പറമ്പ് താലൂക്കിൽപ്പെടുന്ന ഇരിക്കൂർ ബ്ലോക്കിലെ പടിയൂർ പഞ്ചായത്തിൽ ആണ് ഈ വിദ്യാലയം നിലകൊള്ളുന്നത് . കണ്ണൂർ ലോകസഭാമണ്ഡലത്തിലും മട്ടന്നൂർ നിയമസഭാമണ്ഡലത്തിലുമാണ് പടിയൂർ . പടിയൂർ എന്ന് കേൾക്കുമ്പോൾ യുവാക്കളുടെയും കുട്ടികളുടെയും മനസ്സിൽ തെളിഞ്ഞുവരിക ഇപ്പോഴത്തെ സ്റ്റേറ്റ് ഹൈവേയുടെ ഇരുഭാഗത്തുമായി കിടക്കുന്ന പ്രദേശമായിരിക്കും. എന്നാൽ പഴയ പടിയൂർ എന്നത് പഴയ റോഡും അതിനോട് ചേർന്നു കിടക്കുന്ന പ്രദേശവും ആണ്. പഴശ്ശി പദ്ധതിക്കുവേണ്ടി സ്ഥലം എറ്റെടുത്തതോടുകൂടി പഴയ പടിയൂർ ഇല്ലാതായി. 1976 ഓടു കൂടിയാണ് പുതിയ പടിയൂർ ഉണ്ടായത്. മുസ്ലിം ഖബർ മുതൽ പൂവം വരെയും മടപ്പുര ഭാഗം, മുച്ചിലോട്ടു കാവ് തുടങ്ങിയ പ്രദേശങ്ങളും ഉൾപെട്ടതാണ് പഴയ പടിയൂർ. അതിനോട് തൊട്ടു കിടക്കുന്ന പ്രദേശങ്ങളാണ് ചാളംവയൽ, പുലിക്കാട്, ഞാലിൽ, വള്ളിത്തല , കൊമ്പൻപാറ, ആര്യങ്കോട്, കായക്കാംചാൽ(സ്കൂൾ തട്ട് ), നിടിയോടിച്ചാൽ, എരങ്കോക്കുന്ന് (ആശ്രമം എസ്റ്റേറ്റ്) തുടങ്ങിയവ. അന്ന് ആൾപ്പാർപ്പുള്ള പ്രദേശങ്ങൾ വളരെ കുറവായിരുന്നു. കുടുംബങ്ങൾ കുറവും സ്ഥലം കൂടുതലും. പഴയ പടിയൂർ വില്ലേജ് വളരെ വലിയ വില്ലേജ് ആയിരുന്നു. പെരുമണ്ണ് തൊട്ടു പേരട്ട വരെ വ്യാപിച്ചു കിടക്കുന്ന ഒരു വലിയ വില്ലേജ്. ഈ പ്രദേശങ്ങളൊക്കെ അന്ന് കല്യാട്ട് ജന്മിമാരുടെ കൈവശത്തിലായിരുന്നു. ഈ സ്ഥലങ്ങളിൽ കൃഷിപ്പണി ചെയ്യാൻ വേണ്ടി മറ്റു സ്ഥലങ്ങളിൽ നിന്നും കൊണ്ടുവന്നവരാണ് പടിയൂർ പ്രദേശത്ത് ഉണ്ടായിരുന്ന ആദിതാമസക്കാർ എന്നാണു പറയപ്പെടുന്നത്.ഏറിയാൽ ഒരു 150 വർഷത്തെ പഴക്കമേ ഇന്നത്തെ പടിയുരിനു അവകാശപ്പെടാൻ കഴിയുകയുള്ളൂ. പടിയൂരിനെപ്പറ്റി പറയുമ്പോൾ ഈ ഗ്രാമത്തിന്റെ തെക്ക് ഭാഗത്തുകൂടി ഒഴുകുന്ന വളപട്ടണം പുഴയെപ്പറ്റി പറയാതെ വയ്യ. ഒരു കാലത്ത് പടിയൂർ ഗ്രാമത്തിന്റെ എല്ലാമെല്ലാമായിരുന്നു പുഴ. മഴക്കാലത്ത് കര കവിഞ്ഞൊഴുകിയ പുഴ. വേനൽക്കാലത്ത് തെളിനീരോടെ ഒഴുകിയ പുഴ. പുഴ ഈ ഗ്രാമത്തിന്റെ ജീവൻ ആയിരുന്നു, ജീവവായുവായിരുന്നു, ജീവജലമായിരുന്നു, ജീവതാളമായിരുന്നു. മഴക്കാലത്ത് മുടിയഴിച്ച് ആർത്തട്ടഹസിച്ചു രൗദ്രഭാവത്തോടെ അതിവേഗം ഓടിപ്പോവുന്ന ഒരു യക്ഷിയെപ്പോലെ ആയിരുന്നുവെങ്കിൽ, വേനൽക്കാലത്ത് ശാന്തസുന്ദരിയായ ഒരു യുവതിയെപ്പോലെ ആയിരുന്നു പുഴ. അതിശക്തമായ കാലവർഷം കഴിഞ്ഞാൽ ഗ്രാമത്തിലെ മുഴുവൻ ആളുകളും പുഴയിലെത്തും കുളിക്കാൻ, നനയ്ക്കാൻ, മീൻ പിടിക്കാൻ.... അന്നൊക്കെ ഒരുപാട് തരത്തിലുള്ള മത്സ്യങ്ങൾ പുഴയിലുണ്ടായിരുന്നു. പ്രാചി, കാക്കമലേരി, ആരൽ, തുടങ്ങിയ സ്വാദിഷ്ടമായ മീനുകളുടെ കലവറയായിരുന്നു നമ്മുടെ പുഴ. വലിയ മഴക്കാലത്ത് വളരെ ആകർഷകമായ ഒരു കാഴ്ചയായിരുന്നു പാണ്ടികൾ അഥവാ ചങ്ങാടങ്ങൾ. പേട്ടയിലെ കൂപ്പിൽ നിന്നും വലിയ മരങ്ങൾ വലിയ വടം കൊണ്ട് കൂട്ടിക്കെട്ടിയതിനെയാണ് പാണ്ടി എന്ന് പറഞ്ഞിരുന്നത്. ശക്തിയായുള്ള മലവെള്ളപ്പാച്ചിലിൽ ഒഴുകുന്ന ഈ പാണ്ടിയിന്മേൽ ചെറിയ തലക്കുടയും ധരിച്ചു ആളുകളും ഉണ്ടായിരുന്നു. ജീവനിൽ ഭയമുള്ള ആരും ഈ സാഹസികമായ യാത്രയ്ക്ക് മുതിരും എന്ന് തോന്നുന്നില്ല. ഈ പാണ്ടിയാത്രകൾ എല്ലാവരിലും വലിയ അത്ഭുതം ഉണ്ടാക്കിയിരുന്നു. മഴക്കാലങ്ങളിലും വേനൽക്കാലങ്ങളിലും ഗ്രാമത്തിലെ പുരുഷന്മാരുടെ ഒരു ഹോബി ആയിരുന്നു പുഴയിലെ മീൻ പിടിക്കൽ. പുഴയോരത്ത് താമസിക്കുന്ന വീട്ടുകാർ കുടിവെള്ളമായി ഉപയോഗിച്ചിരുന്നത് പുഴയിലെ വെള്ളമായിരുന്നു. ഒഴുക്കുവെള്ളത്തിൽ അഴുക്കില്ല എന്നൊരു പഴമൊഴിയുണ്ടല്ലോ! വലിയ വെള്ളപ്പൊക്കം വന്നാൽ ഇതു കാണാനായി ആളുകൾ പുഴയോരത്ത് എത്തിച്ചേരുന്നതും അന്നത്തെ ഒരു കാഴ്ചയായിരുന്നു. കെട്ടിടം നിർമ്മിക്കാനാവശ്യമായ മണൽ പുഴയോരത്തു നിന്നു കോരിയെടുത്താണ് ഗ്രാമത്തിലുള്ളവർ തങ്ങളുടെ ആവശ്യം നിറവേറ്റിയിരുന്നത്. പുഴയെക്കുറിച്ച് ഇനിയും ഏറെ പറയാനുണ്ട്.... (അപൂർണം)
പൊതു സ്ഥാപനങ്ങൾ
ജി എച് എച് എസ് പടിയൂർ
വില്ലജ് ഓഫീസ് ,പടിയൂർ
പടിയൂർ ഗ്രാമപഞ്ചായത്ത് ഓഫീസ്
വി ഇ ഒ ഓഫീസ്,പടിയൂർ
പോസ്റ്റ് ഓഫീസ് പടിയൂർ
പടിയൂർ ഗ്രാമത്തിന് പേര് വന്നത് എങ്ങനെ..?
പടിയൂർ എന്ന സ്ഥലപേരിന് ശ്രീ കൊട്ടിയൂർ ശിവക്ഷേത്രവുമായി ബന്ധമുണ്ട്. ക്ഷേത്രത്തിലെ ഉത്സവത്തിന് ഇളനീർ സമർപ്പിക്കുന്ന ഭക്തന്മാർ വ്രതം എടുത്ത് താമസിക്കുന്ന സങ്കേതത്തിന് "പടി" എന്നാണ് വിശേഷിപ്പിച്ചിരുന്നത്. മുൻകാലങ്ങളിൽ ഇത്തരത്തിലുള്ള ധാരാളം "പടികൾ" ഉണ്ടായിരുന്ന ഊര് എന്ന അർത്ഥത്തിൽ "പടിഊര്" എന്ന പേര് വരുകയും പിന്നീട് അത് ലോപിച്ച് "പടിയൂർ" എന്ന പേരായി തീരുകയും ചെയ്തു.
ചിറക്കൽ രാജവംശത്തിന്റെ അധീനതയിലുള്ള കല്യാട് എന്ന നാട്ടുരാജ്യത്തിന്റെ ഒരു ഭാഗമായിരുന്ന പടിയൂർ പ്രദേശം കല്യാട് താഴത്ത് വീട് എന്നറിയപ്പെടുന്ന ജന്മികുടുംബമായിരുന്നു. ഇവിടത്തെ നാടുവാഴികൾ കിഴക്ക് കർണാടക സംസ്ഥാനവും, വടക്ക് നൂച്യാട് പുഴയും, പടിഞ്ഞാറ് മലപ്പട്ടം മുനമ്പ്കടവ്, തെക്ക് വളപട്ടണം പുഴ എന്നിവ ആയിരുന്നു ഈ നാട്ടുരാജ്യത്തിന്റെ അതിർത്തി. നാട്ടുരാജ്യത്തിന്റെ ആസ്ഥാനം കല്യാട് എന്ന സ്ഥലത്ത് ആയിരുന്നുവെങ്കിലും ജന്മിമാരുടെ സമ്പത്ത് സൂക്ഷിച്ചിരുന്ന പത്തായ പുരകളും, കളപ്പുരകളും, എടുപ്പുകളും സ്ഥാപിച്ചിരുന്നത് പടിയൂരിൽ ആയിരുന്നു. ഇതിനെല്ലാം കാരണം പടിയൂർ പ്രദേശത്തിൻറെ കാർഷിക സമൃദ്ധി ആയിരുന്നു.
കലയും സാഹിത്യവും
കലയിലും സാഹിത്യത്തിലും ഉന്നതമായ സ്ഥാനം നൽകിയ ഒരു നാടായിരുന്നു പടിയൂർ. ഓരോ കൊയ്ത്ത് ഉത്സവത്തിന് ശേഷവും വയലുകളിൽ പച്ചക്കറി നടും, അതിൻറെ വിളവെടുപ്പോടെ ആ വയലുകളിൽ കലയുടെ അരങ്ങേറ്റമാണ്. വെള്ളേരി നാടകം എന്ന പേരിൽ അറിയപ്പെട്ടിരുന്ന ഈ കലാപ്രകടനത്തിൽ നാട്ടിലെ മിക്കവരും പങ്കെടുത്തിരുന്നു. കോൽക്കളി അറിയാത്ത ഒരു പുരുഷ പ്രജ പോലും അക്കാലത്ത് നാട്ടിൽ ഉണ്ടായിരുന്നില്ല. ഭാഗവതത്തിലെയും ശിലപാട്ടുകളുടെയും വരികൾ കാണാപാഠം പഠിച്ച സ്ത്രീകൾ ഈ വേദികളെ ധന്യമാക്കിയിരുന്നു. ജന്മിയുടെ പടിയൂരിലെ ആസ്ഥാനമായ എടുപ്പ് എന്നറിയപ്പെടുന്ന കെട്ടിടത്തിന്റെ അവശിഷ്ടങ്ങൾ ഇന്നും ഇവിടെ നിലനിൽക്കുന്നുണ്ട്. ഈ കെട്ടിടത്തിന്റെ തെക്ക് കിഴക്ക് ഭാഗത്തായി കഥകളി നടത്താനായി ഒരു തറ ഉണ്ടായിരുന്നു. ഇവിടെ ഓരോ വർഷവും ദിവസങ്ങളോളം കഥകളി അരങ്ങേറ്റം നടന്നതായി ചരിത്രരേഖകൾ പറയുന്നു. കോൽക്കളിപ്പാട്ടുകാരും പരിശീലകരുമായ ചിറമ്മൽ കണ്ണൻ, കണ്ണൻ ആശാരി, തുടങ്ങിയവരുടെ പേരുകൾ ഇപ്പോഴും പഴമക്കാർ പറയാറുണ്ട്. ഇപ്പോൾ നൂറ് വയസ്സു തികഞ്ഞ മലയൻചാലിൽ നാണിയമ്മയ്ക്ക് കോൽക്കളിപ്പാട്ടുകളും ഭാഗവതഗീതകളും ഹൃദിസ്ഥമാണ്. ഇത്തരത്തിൽ ചിന്തിക്കുമ്പോൾ അവരുടെതായ എഴുത്തുകൾ അന്നത്തെ സമൂഹത്തിന് ലഭ്യമായിട്ടുണ്ടാവാം. എന്നാൽ അതെല്ലാം മൺ മറഞ്ഞു പോയി.
കലാസാഹിത്യ മേഖലകളിൽ ഇന്നും വലിയ മുന്നേറ്റം തന്നെയാണ് പടിയൂർ ഗ്രാമത്തിനുള്ളത് നാടകം, നൃത്തം, സംഗീതം, എഴുത്തുകാർ, ചിത്രരചന തുടങ്ങിയ മേഖലകളിൽ ഒരുപാട് ആളുകൾ, ഉപജീവനുമായും, വായനശാല, ക്ലബ്ബുകൾ തുടങ്ങിയ സാംസ്കാരിക വേദികളിൽ വരും തലമുറക്കും അറിവു പകരുന്നതിനായി നല്ല രീതിയിൽ പ്രവർത്തനം നടത്തിവരുന്നു. കായിക പരമായി നല്ല രീതിയിൽ മുന്നേറ്റം നടത്തിക്കൊണ്ടുവരുന്ന നാടു കൂടിയാണ് പടിയൂർ.
പടിയൂർ ക്ഷേത്രം : പടിയൂർ ശ്രീകൃഷ്ണ ക്ഷേത്രം എന്നറിയപ്പെടുന്നത്, കേരളത്തിലെ ഇരിട്ടിയിലെ മനോഹരമായ പടിയൂർ ഗ്രാമത്തിൽ സ്ഥിതിചെയ്യുന്ന പ്രശസ്തമായ ക്ഷേത്രമാണ്.
ഹിന്ദുമതത്തിലെ ഏറ്റവും ആരാധിക്കപ്പെടുന്ന ദേവനായി കണക്കാക്കപ്പെടുന്ന ശ്രീകൃഷ്ണനു സമർപ്പിച്ചിട്ടുള്ള ഈ പുരാതന ക്ഷേത്രം അതിന്റെ ദൃശ്യശോഭയുള്ള ശില്പകല, സമ്പന്നമായ ചരിത്രം, വർണ്ണശബളമായ സാംസ്കാരിക പൈതൃകം എന്നിവയ്ക്കായി പ്രശസ്തമാണ്.
പടിയൂർ ക്ഷേത്രത്തിന്റെ ചില പ്രധാന ആകർഷണങ്ങളും പ്രത്യേകതകളും ചുവടെ നൽകിയിരിക്കുന്നു:
1. ശില്പസൗന്ദര്യം: ക്ഷേത്രത്തിന്റെ ശില്പകല കേരളത്തിന്റെ പരമ്പരാഗത ശൈലിയും ആധുനിക ഘടകങ്ങളും കലര്ന്നതാണ്, സുനിശിതമായ കൊത്തുപണികൾ, ദൃശ്യശോഭയുള്ള മരംശില്പങ്ങൾ, മനോഹരമായ അലങ്കാരങ്ങൾ എന്നിവകൊണ്ട് ശോഭിക്കുന്നു.
2. കൃഷ്ണവിഗ്രഹം: ക്ഷേത്രത്തിന്റെ ഗർഭഗൃഹത്തിൽ ദിവ്യശക്തിയുള്ളതായി വിശ്വസിക്കുന്ന ശ്രീകൃഷ്ണന്റെ മനോഹരമായ വിഗ്രഹം പ്രതിഷ്ഠിച്ചിരിക്കുന്നു.
3. ഉത്സവങ്ങളും ആഘോഷങ്ങൾ: പടിയൂർ ക്ഷേത്രത്തിൽ വർഷംതോറും വിവിധ ഉത്സവങ്ങൾ ആഘോഷിക്കുന്നു, അതിൽ പ്രധാനമാണ് പ്രതിവർഷം നടക്കുന്ന പടിയൂർ ക്ഷേത്ര മഹോത്സവം, ഇത് ദൂരെ നിന്ന് തന്നെ ഭക്തരും സഞ്ചാരികളുമായി വലിയ ജനസാന്ദ്രത ആകർഷിക്കുന്നു.
4. സാംസ്കാരിക പ്രാധാന്യം: സംഗീതം, നൃത്തം, കലാ മേഖലകൾ എന്നിവയിൽ കേരളത്തിന്റെ സാംസ്കാരിക പൈതൃകം സംരക്ഷിക്കുകയും പ്രോത്സാഹിപ്പിക്കുകയും ചെയ്യുന്നതിൽ ഈ ക്ഷേത്രം വലിയ പങ്കു വഹിക്കുന്നു.
5. പ്രകൃതിസൗന്ദര്യം: സമാധാനവും ശാന്തവും നിറഞ്ഞ പ്രകൃതിദൃശ്യങ്ങൾ, പച്ചപ്പുള്ള പർവ്വതങ്ങൾ, സമാശ്വസകരമായ നദികൾ എന്നിവകൊണ്ട് ചുറ്റപ്പെട്ടിരിക്കുന്ന ഈ ക്ഷേത്രം മനോഹരമായ അന്തരീക്ഷത്തിലാണ് സ്ഥിതി ചെയ്യുന്നത്.
ഇരിട്ടിയിലേക്ക് യാത്ര ചെയ്യുന്നവർ നിർബന്ധമായും സന്ദർശിക്കേണ്ട തൃശൂർപൂർവമായ സ്മാരകമാണ് പടിയൂർ ക്ഷേത്രം. സമ്പന്നമായ ചരിത്രം, അദ്വിതീയ ശില്പകല, വർണ്ണശബള സാംസ്കാരിക പൈതൃകം എന്നിവ ഈ ക്ഷേത്രത്തെ മറക്കാനാവാത്ത അനുഭവമാക്കുന്നു.
