ജി.എൽ.പി.എസ് വാരിക്കൽ/ചരിത്രം
സ്കൂൾ | സൗകര്യങ്ങൾ | പ്രവർത്തനങ്ങൾ | ക്ലബ്ബുകൾ | ചരിത്രം | അംഗീകാരം |
സ്കൂളിൻറെ ആരംഭം
1994ൽ ഡി പി ഇ പി നിലവിൽ വന്നപ്പോൾ മൂന്നു കിലോമീറ്ററിനുള്ളിൽ എൽ പി സ്കൂളുകൾ ഇല്ലാത്ത സ്ഥലങ്ങളിൽ പുതിയ സ്കൂൾ സ്ഥാപിക്കാനുള്ള തീരുമാനമുണ്ടായി.
നാട്ടുകാർ സ്ഥലം സംഭാവന ചെയ്താൽ സ്കൂൾ സ്ഥാപിക്കാനുള്ള അനുമതിയും ഫണ്ടും തരാമെന്ന് അധികൃതർ സമ്മതിച്ചു ഇതിൻപ്രകാരം അന്നത്തെ കരുളായി പഞ്ചായത്ത് പ്രസിഡണ്ടും ചെറുപുഴ നിവാസിയും ആയ എൻ പി ലൂക്കോസ് മുൻകൈയെടുത്ത് സ്കൂൾ സ്ഥാപിക്കാനുള്ള നടപടികളുമായി മുമ്പോട്ട് പോയി ഇതിൻറെ ഭാഗമായി നാട്ടുകാരുടെ യോഗം വിളിച്ചുകൂട്ടുകയും സ്കൂളിന് ആവശ്യമായ സ്ഥലം സംഭാവന ചെയ്യാൻ തീരുമാനിക്കുകയും ചെയ്തു സ്ഥലമെടുപ്പ് പ്രവർത്തനങ്ങൾ അന്നത്തെ പഞ്ചായത്ത് പ്രസിഡൻറ് ശ്രീ. എൻ പി ലൂക്കോസിൻറെയും ശ്രീ . കൂരൻ താഴത്തു പറമ്പിൽ പൗലോസിൻറെയും നേതൃത്വത്തിൽ നടന്നു. കൊളപ്പറ്റ റഷീദ് ,കുലുക്കംപാറ ഹംസ ,പുളിക്കൽവട്ടം ഖാദർ ,കെപി ജമാൽ എന്നിവർ ഒപ്പമുണ്ടായിരുന്നു
ചെറുപുഴ വള്ളിക്കെട്ട് സെൻറ്മേരിസ് ചർച്ച് ഇടവകാംഗങ്ങൾ ഒന്നടങ്കം സ്കൂളിൻറെ പ്രാരംഭ പ്രവർത്തനങ്ങളിൽ സഹകരിക്കുകയും പള്ളി കമ്മിറ്റിയിൽനിന്ന് നാൽപ്പതിനായിരം രൂപ സംഭാവനയായി നൽകുകയും ചെയ്തു. വാരിക്കൽ സ്കൂളിന് സ്ഥലം ലഭ്യമാക്കാനുള്ള മുഖ്യ കാരണങ്ങളിൽ ഒന്ന് പള്ളി കമ്മിറ്റിയുടെ ഈ സഹകരണം ആയിരുന്നു. തുടർന്ന് പി വി അബ്ദുൽ വഹാബ് സ്ഥലമെടുപ്പ് കമ്മറ്റി ആവശ്യപ്പെട്ട ഫണ്ട് തന്ന സഹായിച്ചു . നല്ലവരായ നാട്ടുകാരുടെയും ഉദാരമതികളുടെയും സഹകരണത്തോടുകൂടി സ്ഥലമെടുപ്പിന് ആവശ്യമായ ഫണ്ട് സ്വരൂപിക്കാൻ കഴിഞ്ഞു സ്കൂളിന് ആവശ്യമായ 50 സെൻറ് സ്ഥലം ചുള്ളാലിൽ സി. ഡി . ജോൺ എന്ന അപ്പച്ചൻ തുച്ഛമായ വിലക്ക് തന്നു.
![](/images/thumb/6/69/48447_4.jpg/300px-48447_4.jpg)
നിലമ്പൂർ എം എൽ എ ആര്യാടൻ മുഹമ്മദ് ,ടി കെ ഹംസ , ടി കെ അബ്ദുള്ളക്കുട്ടി മാസ്റ്റർ ,എന്നിവരുടെ പ്രോത്സാഹനവും സഹകരണവും കമ്മിറ്റിക്ക് ലഭിച്ചു .സ്ഥലം വാങ്ങി സർക്കാറിലേക്ക് നൽകിയെങ്കിലും വർഷങ്ങൾ കഴിഞ്ഞാണ് സ്കൂൾ അനുവദിച്ച കിട്ടിയത്. 1998 ജൂൺ പതിനെട്ടിന് ടി കെ ഹംസ സ്കൂളിൻറെ ഔപചാരിക ഉദ്ഘാടന കർമ്മം നിർവഹിച്ചു .പഞ്ചായത്ത് പ്രസിഡണ്ട് ശ്രീമതി. കെ ഖദീജ അധ്യക്ഷയായിരുന്നു .ആദ്യവർഷം 55 കുട്ടികൾ സ്കൂളിൽ ചേർന്നു. ബാബു ജോസഫ് മാസ്റ്ററായിരുന്നു ആദ്യത്തെ ടീച്ചർ ഇൻ ചാർജ്. സ്കൂൾ നടത്താൻ സ്ഥലം ഇല്ലാതിരുന്നതിനാൽ വാരിക്കൽ മദ്രസാ കമ്മിറ്റിയെ സമീപിക്കുകയും അവർ മദ്രസയിൽ സ്കൂൾ തുടങ്ങാനുള്ള അനുവാദം തരുകയും ചെയ്തു
3 മാസം സ്കൂൾ മദ്രസയിൽ പ്രവർത്തിച്ചു . തുടർന്ന് സ്കൂളിനു വേണ്ടി വാങ്ങിയ സ്ഥലത്ത് ഷെഡ് കെട്ടി സ്കൂൾ പ്രവർത്തനം അങ്ങോട്ടു മാറ്റി. 1998 ഡിസംബറിൽ ബാബു ജോസഫ് മാസ്റ്റർ സ്ഥലം മാറി പോവുകയും പകരം പി കെ ശ്രീകുമാർ മാസ്റ്റർ ചാർജ് എടുക്കുകയും ചെയ്തു . ഡി പി ഇ പി അനുവദിച്ച 6.5 ലക്ഷം രൂപ ഉപയോഗിച്ച് സ്കൂളിൻറെ കെട്ടിടം പണി ഇതിനകം ആരംഭിച്ചിരുന്നു .1999 ൽ കെട്ടിടത്തിന് പണി പൂർത്തിയാവുകയും 2000 ഫെബ്രുവരി 5ന് അന്നത്തെ ഡി പി എസ് സി ആയിരുന്ന ശ്രീ. വി. പി രവീന്ദ്രൻ കെട്ടിടത്തിന് ഉദ്ഘാടനം നിർവഹിക്കുകയും ചെയ്തു ശ്രീ .എൻ. പി .ലൂക്കോസ് പ്രസിഡൻറും ശ്രീ പി കെ ശ്രീകുമാർ സെക്രട്ടറിയും കെഎം അഹമ്മദ് കുട്ടി മുസ്ലിയാർ , കുട്ടശ്ശേരി അബു, സി ടി കരീം ,വി കെ ചന്ദ്രൻ, കെ പി .നാരായണൻ ,കെ സുബൈദ, പി .ഫാത്തിമ എന്നിവർ അംഗങ്ങളുമായ കമ്മിറ്റിയാണ് പ്രവർത്തനങ്ങൾക്ക് നേതൃത്വം നൽകിയിരുന്നത്. തുടർന്ന് രണ്ടായിരത്തി ഒന്നിൽ സ്കൂളിന് എ ജി യുടെ അംഗീകാരം ലഭിക്കുകയും പുതിയ ഹെഡ്മിസ്ട്രസ് ആയി ശ്രീമതി ഏലിയാമ്മ ജോൺ ചാർജ് എടുക്കുകയും ചെയ്തു 2005 വരെ ശ്രീമതി ഏലിയാമ്മ ജോൺ സ്കൂളിൽ സേവനമനുഷ്ടിച്ചു. ഈ ഘട്ടത്തിൽ എല്ലാം സ്കൂൾ വികസനത്തിൻറെ പാതയിലായിരുന്നു . 2005ൽ ശ്രീമതി ഏലിയാമ്മ ജോൺ വിരമിക്കുകയും ശ്രീ പി എസ് രഘുറാം ഹെഡ്മാസ്റ്ററായി ചാർജ് എടുക്കുകയും ചെയ്തു.
വാരിക്കൽ ജി എൽ പി സ്കൂൾ ഉദ്ഘാടനം
1998 ജൂൺ 18 വ്യാഴം ഡിപി പദ്ധതിപ്രകാരം വാരികയിൽ അനുവദിച്ച എൽപി സ്കൂളിൻറെ ഉദ്ഘാടനം ടി കെ ഹംസ നിർവഹിച്ചു, കരുളായി ഗ്രാമപഞ്ചായത്ത് പ്രസിഡൻറ് ഖദീജ അധ്യക്ഷയായിരുന്നു .ടി കെ അബ്ദുള്ളക്കുട്ടി മാസ്റ്റർ . എൻ പി ലൂക്കോസ് . വി വേലായുധൻ , ബാബു ജോസഫ്,ഫാദർ ഫ്രാൻസിസ് , കോയക്കുട്ടി എന്നിവർ പ്രസംഗിച്ചു.
വാരിക്കൽ അങ്ങാടിയിൽ നടന്ന ചടങ്ങിൽ കാപ്പിൽ ഹംസ എന്നയാളുടെ മകൻ നിഷാദലി എന്ന കുട്ടിയെ ചേർത്തുകൊണ്ടാണ് സ്കൂളിൻറെ പ്രവർത്തനം ഉദ്ഘാടനം ചെയ്തത്.