ജി.എച്ച്.എസ്.എസ്. പാങ്ങ്/ചരിത്രം

Schoolwiki സംരംഭത്തിൽ നിന്ന്
സ്കൂളിനെക്കുറിച്ച്സൗകര്യങ്ങൾപ്രവർത്തനങ്ങൾപ്രൈമറിഹൈസ്കൂൾഹയർസെക്കന്ററിചരിത്രംഅംഗീകാരങ്ങൾ

1974 ൽ ബഹുമാന്യനായ ചാക്കീരി അഹമ്മദ് കുട്ടി വിദ്യാഭ്യാസ മന്ത്രിയായിരുന്നപ്പോൾ നാട്ടുകാർ ഒരു ഹൈസ്കൂളിനു വേണ്ടി മുറവിളി കൂട്ടുകയും, ആവശ്യമായ നിവേദനങ്ങൾ സമർപ്പിക്കുകയും ചെയ്തതിന്റെ ഫലമാണ് ഇന്നത്തെ പാങ്ങ് ഗവർമെന്റ് ഹൈസ്കൂൾ. സ്ഥലവും, കെട്ടിടവും നാട്ടുകാർ നൽകിയാൽ സ്കൂൾ അനുവദിക്കാമെന്നായിരുന്നു വ്യവസ്ഥ. വിദ്യാഭ്യാസത്തിന്റെ അനിവാര്യതയും, മഹത്വവും നന്നായറിയുന്ന നാട്ടിലെ പ്രമുഖരായ വ്യക്തികൾ മുന്നിട്ടിറങ്ങി. ( പാങ്ങ് ഗവ: ഹൈസ്കൂളിനു വേണ്ടി 1974 ൽ നടത്തിയ പ്രവർത്തനങ്ങളുടെ സംഗ്രഹം) 1974 മെയ് അന‌വസാന വാരം അനുവദിക്കാവുന്ന സ്കൂളുകളുടെ ലിസ്റ്റ് പത്രത്തിൽ വന്നു. ജൂണിൽതന്നെ നാട്ടുകാർ യോഗം ചേർന്ന് കമ്മിറ്റി രൂപീകരിച്ചു. 5/6/74 ൽ ഡി.ഇ.ഒ.യെ കണ്ട് സ്ഥലം നൽകാമെന്നറിയിച്ചു. 7ന് കമ്മിറ്റി കൂടി സ്ഥലം അമ്പലപ്പറമ്പിൽ തന്നെ നൽകാൻ തീരുമാനമായി. അതിൻ പ്രകാരം ജൂൺ 8 -ാം തിയ്യതി അളന്നു തിട്ടപ്പെടുത്തുകയും 11 -ാം തിയ്യതി ഡി.ഇ.ഒ. ശ്രീ. സുധാമൻ സന്ദർശിച്ചു ബോധ്യപ്പെടുകയും ചെയ്തു. ജൂൺ 28 ന് ഫിനാൻസ് കമ്മിറ്റി രൂപീകരിച്ചു. ആഗസ്റ്റ് ഒന്നിന് അനുവദിക്കപ്പെട്ട 19 സ്കൂളുകളിലേയും പ്രസിഡന്റുമാരുടെ യോഗം ചേരുകയുണ്ടായി. ആഗസ്റ്റ് 9-ാം തിയ്യതി കിഴക്കൻ പാങ്ങുകാരുമായി ഒരു സോൾവൻസി പ്രശ്നം ഉണ്ടായത് ഡി.ഇ.ഒ., കരുവള്ളി മുഹമ്മദ് മൗലവി, മങ്കട എ.ഇ.ഒ. എന്നിവരുടെ അനുരഞ്ജനത്തെത്തുടർന്ന് 15-ാം തിയ്യതി പി. കെ. അബ്ദുള്ളക്കുട്ടി, പി.കുഞ്ഞീതു, പി. കുമാരനെഴുത്തച്ഛൻ, കുട്ടിരാമൻനായർ എന്നിവരുടെ നേത്രത്വത്തിൽ പരിഹരിച്ചു. 24 ന് ഡി.ഇ.ഒ. അമ്പലപ്പറമ്പിൽ സ്ഥലപരിശോധന നടത്തി. 26 ന് പഞ്ചായത്ത് പ്രസിഡന്റ് പി.പി. മൂസ്സക്കുട്ടി, വി.എം.പത്മനാഭൻ മാസ്റ്റർ, പി.കെ.കുഞ്ഞു, കെ.കെ. കോയിമർ മാസ്റ്റർ പി. കുമാരനെഴുത്തച്ഛൻ മാസ്റ്റർ, എന്നിവർ തിരുവനന്തപുരത്ത് പോയി മന്ത്രിയെക്കണ്ടു സ്കുളിന്റെ ആവശ്യകത അറിയിച്ചു. എന്നാൽ സെപ്തംബർ 18-ാം തിയ്യതി വന്ന പത്രവാർത്തയിൽ മറ്റു 18 സ്കുളുകളും തുറന്നതായികണ്ടു. പാങ്ങിന്റെ പേര് മാത്രം ഇല്ലായിരുന്നു. എങ്കിലും ഒക്ടോബർ നാലാം തിയ്യതി മനോരമ പത്രത്തിൽ സ്കുൾ അമ്പലപ്പറമ്പിൽ അനുവദിച്ചതായി കാണാൻ കഴിഞ്ഞു. ഒക്ടോബർ അഞ്ചാം തിയ്യതി ഡി.ഇ.ഒ.യെ സന്ദർശിച്ചു ചർച്ച ചെയ്ത ശേഷം 7-ാം തിയ്യതി സ്ഥലം അളന്ന് ആധാരം എഴുതുന്നതിനുള്ള ഏർപ്പാടാക്കി. 9 ന് വി.എം.ദേവകി അമ്മ 48 സെന്റും, പി. കുഞ്ഞുക്കുട്ടി ടീച്ചർ 24 സെന്റും സൗജന്യമായി രജിസ്റ്റർ ചെയ്തു. ബാക്കി 2 ഏക്കർ 28 സെന്റ് സ്ഥലം (സ്കുൾ നിൽക്കുന്നിടം) എം. പി. കുട്ടികൃഷ്ണമേനോനോട് വിലയാധാരമായി വാങ്ങി. ഒക്ടോബർ 10 -ാം തിയ്യതിയോടെ എല്ലാ ഓർഡറുകളും ലഭിച്ചു. മാട്ടാത്ത കുളംബ മദ്രസ്സ എഞ്ചിനീയർ പരിശോധിച്ചു. തൊട്ടടുത്ത ദിവസം തന്നെ മങ്കട ഗവ : എച്ച്. എസിലെ അധ്യാപകനായ ശ്രീ. പി. ഗോപാലകൃഷ്ണനെ ഹെഡ് മാസ്റ്ററായി നിയമിച്ചു കൊണ്ട് ഉത്തരവായി. അന്നു രാത്രി തന്നെ വി.എം. പത്മനാഭൻ മാസ്റ്റർ പോയി അദ്ദേഹത്തെ കൂട്ടിക്കൊണ്ട് വരുകയും ആദ്യ വിദ്യാർത്ഥിയായി സി.കെ. ചന്ദ്രനെ ചേർത്ത് കൊണ്ട് സ്കുൾ പ്രവർത്തനം ആരംഭിക്കുകയും ചെയ്തു.

1974 ഒക്ടോബർ മാസം 14-ാം തിയ്യതി ശ്രീ. കരുവള്ളി മുഹമ്മദ് മൗലവിയുടെ അധ്യക്ഷതയിൽ, ഡി.ഇ.ഒ. ശ്രീ. കെ. സുധാമന്റെയും, പഞ്ചായത്ത് പ്രസിഡന്റ് ശ്രീ. പി. പി. മൂസ്സക്കുട്ടി, കമ്മിറ്റി അംഗങ്ങൾ, നാട്ടുകാർ മുതലായവരുടെ സാന്നിധ്യത്തിൽ ഉത്തരമേഘലാ വിദ്യാഭ്യാസ ഉപഡയറക്ടറായിരുന്ന ശ്രീ. ചിതൻ നമ്പൂതിരിപ്പായിരുന്നു മാട്ടാത്ത കുളംബ മദ്രസ്സയിൽ സ്കുളിന്റെ ഉദ്ഘാടനകർമ്മം നിർവഹിച്ചത്.

പിന്നീട് ഏതാനും മാസങ്ങൾക്ക് ശേഷം നാട്ടുകാർ നിർമ്മിച്ച സ്വന്തം കെട്ടിടത്തിലേക്ക് മാറ്റി പ്രവർത്തനമാരംഭിക്കുകയും ചെയ്തു. (ഈ മഹത് സംരംഭത്തിൽ ഗവൺമെന്റുമായി എഗ്രിമെന്റ് ഒപ്പുവച്ചവരിൽ പൂഴിത്തറ ശ്രീ. കുഞ്ഞീതു മാത്രമാണ് ഇന്നും ജീവിച്ചിരിക്കുന്നത്. കമ്മിറ്റിയംഗങ്ങളിൽ പലരും കാലയവനികക്കുള്ളിൽ മറഞ്ഞു. കമ്മിറ്റിയുടെ പ്രസിഡന്റ് പി. കെ. അഹമ്മദ് കുട്ടി ഹാജി, അംഗങ്ങളായ പി. കുമാരനെഴുത്തച്ഛൻ , പി. കെ. അബ്ദുള്ളക്കുട്ടി, പി. കെ. മമ്മുഹാജി, പി. കെ. കുഞ്ഞു, വി. ടി. ശങ്കരൻ നായർ, വി. ടി. കുട്ടിരാമൻനായർ, പി. കെ. അഹമ്മദ് കുട്ടി ഹാജി, പി. പി. മൂസ്സക്കുട്ടി, വാഴേങ്ങൽ ബാപ്പുട്ടി, മഞ്ഞക്കൽ കൃഷ്ണലൻ നായർ, വി. എം. പത്മനാഭൻ മാസ്റ്റർ, കെ. കെ. കോയിമർ മാസ്റ്റർ, പി. പി. അബ്ദുറഹിമാൻ കുട്ടി ഹാജി (ഇതിൽ ഇന്നു ജീവിച്ചിരിക്കുന്ന – കെ. എം. ഗംഗാധരൻ) എന്നിവരേയും, സ്ഥലം ദാനം ചെയ്ത വി. എം. ദേവകി അമ്മ, പി. കുഞ്ഞുകുട്ടി ടീച്ചർ, മുതലായവരേയും, തടി ഉരുപ്പടികളും, മറ്റു സാമഗ്രികളും നൽകിയവരേയും, സൗജന്യമായി കായികാധ്വാനം ചെയ്തവരേയും വരും തലമുറ എന്നും ഓർക്കേണ്ടതാണ്) ഇന്ന് സ്ഥിതി ആകെ മാറിയിട്ടുണ്ട് 2000 -ൽ പാങ്ങ് ഗവ : ഹൈസ്കൂൾ ഹയർ സെക്കന്ററിയായി ഉയർത്തപ്പെട്ടു. മറ്റു സ്ഥലങ്ങളിൽ നിന്ന് പോലും വിദ്യാർത്ഥികൾ ഇവിടേക്ക് വിദ്യാഭ്യാസത്തിനു വേണ്ടി എത്തിക്കൊണ്ടിരിക്കുന്നു. കമ്പ്യൂട്ടർ സാക്ഷരതയായി. സ്കൂളിൽ ഇന്റർനെറ്റ് കണക്ഷൻ ആയിക്കൊണ്ടിരിക്കുന്നു. വിജയശതമാനം മുൻ വർഷങ്ങളേക്കാൾ മെച്ചപ്പെട്ടു. പഴയ സ്കീമിലെയും, ഗ്രേഡിങ്ങ് സ്കീമിലെയും ഉന്നത വിജയികൾക്ക് പി.ടി.എ. ഉചിതമായ സമ്മാനങ്ങൾ നൽകി പ്രോത്സാഹിപ്പിച്ചു. മുൻ ഹെഡ്മിസ്ട്രായിരുന്ന ശ്രീമതി. കല്യാണിക്കുട്ടി ടീച്ചറുടെ എൻഡോവ്മെന്റ് എല്ലാ വർഷവും കൊടുത്തു വരുന്നു. പാങ്ങ് സർവീസ് സഹകരണ ബാങ്ക് സമ്മാനങ്ങളേർപ്പെടുത്തി. സമീപത്ത് ആകെ ഒരു ഗവ : അപ്പർ പ്രൈമറി സ്കൂൾ മാത്രമേ ഉള്ളൂ എന്നത് ആ തലത്തിൽ അപര്യാപ്തതയായി കാണാനുണ്ട്. ദൂരെ നിന്നും ചെറിയ കുട്ടികൾ വരാൻ മടിക്കുകയോ, ഇടക്ക് വെച്ച് പഠനം നടത്തുകയോ ചെയ്യുന്നുണ്ട്. ഏതാണ്ട് 35 വർഷം മുമ്പുള്ള സെക്കന്ററി വിദ്യാഭ്യാസത്തിന്റെ അവസ്ഥ പോലെയാണിത്. കഴിഞ്ഞ അഞ്ചാറു വർഷമായി എസ്.എസ്.എൽ.സി. തലത്തിൽ നടത്തുന്ന വിജയഭേരി ക്യാംപ് വിനോദത്തിന്റെയും, വികൃതിത്തരങ്ങളുടെയും കൂട്ടായ്മയായി - കൂടെ വിജ്ഞാന സമ്പാദനത്തിന് ആക്കം കൂട്ടിയെന്ന് പറയാതെ വയ്യ. ഹയർ സെക്കന്ററിയിൽ ബാലാരിഷ്ടതകൾ വിട്ടുമാറുന്നില്ല. സ്ഥിരം അദ്ധ്യാപകരോ, താൽക്കാലിക അദ്ധ്യാപകരോ വർഷം തികക്കാറില്ല. 1998 നവംബറിൽ മങ്കട ഉപജില്ലയുടെ 11 -ാമതു പാങ്ങ് ഗവ : ഹൈസ്കൂളിൽ പ്രശസ്തമായ വിധം നടത്തപ്പെട്ടു. നാട്ടുകാരുടെയും, തൊട്ടടുത്ത ക്ളബ്ബുകൾ, സർവീസ് സഹകരണ ബാങ്ക്, പാങ്ങ് പ്രാഥമികാരോഗ്യ കേന്ദ്രം, ഗ്രാമപഞ്ചായത്ത്, കൊളത്തൂർ പോലീസ് സ്റ്റേഷൻ എന്നിവിടങ്ങളിലെ, പ്രതിനിധികളും, ഉദ്യോഗസ്ഥരും, സമീപത്തുള്ള വിദ്യാഭ്യാസ സ്ഥാപനങ്ങളിലെ അദ്ധ്യാപകരും, മറ്റ് സ്റ്റാഫംഗങ്ങളും എല്ലാം അകമഴിഞ്ഞു സഹകരിച്ചു. 2000 മാർച്ചിൽ സ്കുളിന്റെ രജത ജൂബിലിയും, ദീർഘകാലം ഹെഡ്മിസ്ട്രായി സേവനമനുഷ്ടിച്ച ശ്രീമതി. പി. കല്യാണിക്കുട്ടി ടീച്ചറുടെ യാത്രയയപ്പും രണ്ടു ദിവസം നീണ്ട വിപുലമായ പരിപാടികളോടെ നടത്തുകയുണ്ടായി. പ്രശസ്ത കലാകാരന്മാർ, സാസ്കാരിക നേതാക്കന്മാർ, ജനനായകന്മാർ, തുടങ്ങിയവർ പങ്കെടുത്തു. കവിയരങ്ങ്, സാഹിത്യ സമ്മേളനം, വിവിധ കലാപരിപാടികൾ എന്നിവ നടത്തപ്പെട്ടു. സ്കുളിനു വേണ്ടി പ്രവർത്തിച്ചവരേയും, മുൻ പ്രധാനാദ്ധ്യാപകരേയും പൊന്നാടയണിയിച്ച് ആദരിച്ചു, പ്രശസ്ഥ വിജയം നേടിയ വിദ്ധ്യാർത്ഥികളെ സമ്മാനങ്ങൾ നൽകി അനുമോദിച്ചു.