ഗവ. യു പി എസ് കുമാരപുരം/ചരിത്രം
| സ്കൂൾ | സൗകര്യങ്ങൾ | പ്രവർത്തനങ്ങൾ | ക്ലബ്ബുകൾ | ചരിത്രം | അംഗീകാരം |
ഇപ്പോഴത്തെ മെഡിക്കൽകോളേജ് ഹൈസ്കൂളിന് എതിരെ മൺഭിത്തിയോട് കൂടിയ ഓലക്കെട്ടിടത്തിലായിരുന്നു ഈ സ്കൂൾ പ്രവർത്തനം ആരംഭിച്ചത് .തുടക്കത്തിൽ മുക്കുരു സാർ എന്ന് വിളിക്കപ്പെട്ടിരുന്ന പദ്മനാഭപിള്ള സാർ ആയിരുന്നു പ്രഥമാധ്യാപകൻ .ഒന്നുമുതൽ നാലാംക്ലാസ്സ്‌ വരെ ആയിരുന്നു അന്നുണ്ടായിരുന്നത് .ആ പ്രദേശത്തുള്ള കുട്ടികളൊക്കെ ഈ സ്കൂളിലായിരുന്നു പഠിച്ചിരുന്നത് .കുട്ടികൾക്ക് ഇരുന്നു പഠിക്കുവാനുള്ള സൗകര്യങ്ങൾ കുറവായിരുന്നു .ഒരു ക്ലാസ് തന്നെ മൂന്നും നാലും ഡിവിഷനായി തിരിച്ചിരുന്നു .ഒരിക്കൽ മഴയത്തു സ്കൂൾഭിത്തി തകർന്നുപോയി .ഈ സമയത്തു സ്കൂളിന്റെ പ്രവർത്തനം മുടങ്ങാതിരിക്കുവാൻ ശ്രീ ചിത്തിര തിരുനാൾ മഹാരാജാവ് അന്ന് അന്നദാനം നടത്തി വന്ന കഞ്ഞിപ്പുരയിൽ പ്രവർത്തനം തുടരാൻ അനുമതി നൽകി .അന്ന് മുതൽ ഈ സ്കൂൾ കഞ്ഞിപ്പുരസ്കൂൾ എന്ന് അറിയപ്പെട്ടിരുന്നു .
1955-ൽ മുക്കുരു എന്ന ഉദാരമതി നൽകിയ സ്ഥലത്തു പുതിയ കെട്ടിടത്തിൽ പ്രവർത്തനം ആരംഭിച്ചു .പാലൂർ കുട്ടൻപിള്ള സാർ ആയിരുന്നു ഹെഡ്‌മാസ്റ്റർ .പിന്നീട് നഴ്‌സറിയും ഒന്നുമുതൽ നാലുവരെ ഉള്ള എൽ .പി സ്കൂൾ ആയും ശേഷം ഒന്നുമുതൽ ഏഴുവരെയുള്ള യു .പി സ്കൂൾ ആയും സ്കൂൾ ഉയർന്നു .ഒരു ഘട്ടത്തിൽ സ്കൂളിൽ മുഴുവൻ കുട്ടികളെയും ഇരുത്താൻ സൗകര്യമില്ലാത്തതുകൊണ്ട് മെഡിക്കൽകോളേജ് ഹൈസ്കൂളിന് പിറകിലുള്ള ഒരു കെട്ടിടത്തിലേക്ക് ആറും ഏഴും ക്ലാസുകൾ മാറ്റി.ഇപ്പോൾ സ്കൂളിന്റെ മുന്നിലുള്ള രണ്ടുനില കെട്ടിടത്തിന്റെ കല്ലിടൽ 1976 ജൂലൈ ഏഴിന് അന്നത്തെ പൊതുമരാമത്തു മന്ത്രി ശ്രീ കെ .പങ്കജാക്ഷൻ നടത്തുകയും കെട്ടിടത്തിന്റെ ഉദ്ഘടനം 1977 ജൂൺ പതിനഞ്ചിനു അന്നത്തെ വിദ്യാഭ്യാസ മന്ത്രിയായിരുന്ന സി .എച് മുഹമ്മദ്‌കോയ നിർവഹിക്കുകയും ചെയ്തു .ഈ കെട്ടിടത്തിലാണ് ഇപ്പോൾ സ്കൂളിന്റെ പ്രവർത്തനം നടക്കുന്നത്.