എ.എം.എൽ.പി.എസ് തിരുവാലി/ചരിത്രം

അജ്ഞതയുടെ അഭിശപ്തമായ ഇന്നലെകളിലേക്ക് തിരിഞ്ഞ് നോക്കി നെടുവീർപ്പിടുന്ന മലബാറിന്റെ മണ്ണിൽ അക്ഷരത്തിന്റെ കരുത്തിൽ സാഭിമാനം തലയുയർത്തി നിന്ന ഒരു കൊച്ചു നാട്ടിൻപുറം .അതെ, പെരുമ്പൊയിൽ ഗ്രാമവാസികൾക്ക് ദിശാബോധം കാണിച്ചു കൊടുത്ത സരസ്വതി ക്ഷേത്രത്തിന്റെ അസ്ഥി വാരത്തിൽ ജീവിതം സമർപ്പിച്ച മഹാ മനീഷികൾക്ക് നൂറ്റാണ്ടുകളുടെ പഴക്കമുണ്ട് . 1891 ൽ പൂക്കാട്ടൂരിലേക്ക് ജീവിതം പറിച്ച് നട്ട മന്നിയിൽ കുഞ്ഞിമൊയ്തീൻ ഹാജി ഒരു ഓത്തു പള്ളിക്ക് തുടക്കം കുറിച്ചു. ഹാജിയുടെ കാലശേഷം മകൻ മമ്മതു മൊല്ല പ്രസ്തുത ദൗത്യം ഏറ്റെടുത്തു.

മഞ്ചേരിയിലെ വിദ്യാഭ്യാസ വിചക്ഷണനായിരുന്ന സയ്യിദ് അബ്ദുൽ ഗഫൂർഷ ഒരു സ്കൂൾ തുടങ്ങേണ്ട ആവശ്യകത മമ്മത് മൊല്ലയെ ബോധ്യപ്പെടുത്തി.1923 ൽ സ്വന്തം വീട്ടുവളപ്പിൽ സ്ഥാപിച്ച ഓത്തു പള്ളിയിൽ സ്കൂൾ പഠനം കൂടി ആരംഭിച്ചു. 1925 ഓഗസ്ത് 31 ന് സ്കൂളിന് അതികൃതരുടെ അംഗീകാരം ലഭിച്ചു. 1944 ജൂലൈ 7 ന് നിരവധി ശിക്ഷ്യൻമാർക്ക് ജന്മമേകി കാലയവനികക്കുള്ളിൽ തിരോഭവിച്ചു. പിതാവ് മരിക്കുന്നതിന്റെ ഏതാനും മാസങ്ങൾക്ക് മുമ്പ് മലപ്പുറം ടൈനിംഗ് കോളേജിൽ നിന്നും ടീച്ചേഴ്സ് ടൈനിംഗ് കോഴ്സ് പാസ്സായ മകൻ മുഹമ്മദ് കുട്ടി എന്ന മാനു മാസ്റ്റർ 24-12-1943 ൽ സ്കൂളിൽ അധ്യാപകനായി സർവ്വീസിൽ പ്രവേശിച്ചു. പിതാവിന്റെ മരണ ശേഷം ഓത്തുപള്ളിയുടെയും പത്തിരിയാൽ മഹല്ലിന്റെ ഖാസിയുടെയും സ്കൂളിന്റെ മാനേജറുടെയും പദവികൾ ഏറ്റെടുക്കാൻ കാലം അദ്ദേഹത്തോട് ആവശ്യപ്പെടുകയായിരുന്നു.

1957 ലാണ് ഇന്ന് വിശാലമായ മഞ്ചേരി - വണ്ടൂർ റോഡിന്റെ അരികിൽ പത്തിരിയാലിന്റെ ഹൃദയ ഭാഗത്തേക്ക് സ്കൂൾ മാറ്റിയത്. തിരുവാലി പഞ്ചായത്തിലെ കൊച്ചു ഗ്രാമമായ പത്തിരിയാൽ എന്ന പ്രദേശത്തിലെയും പരിസര പ്രദേശങ്ങളിലെയും ജനങ്ങൾക്ക് വൈജ്ഞാനിക, സാംസ്കാരിക മുന്നേറ്റത്തിന് നെടും തൂനായി പ്രവർത്തിച്ച ഈ സ്ഥാപനം ഇന്ന് വണ്ടൂർ സബ് ജില്ലയിൽ തന്നെ മികവ് പുലർത്തിപ്പോരുന്ന ഒരു വിദ്യാലയമാണ്. വണ്ടൂർ സബ് ജില്ലാ കായിക മേളയിൽ ഒരു പതിറ്റാണ്ടിലേറെയായി ഈ വിദ്യാലയമാണ് മുന്നിട്ട് നിൽക്കുന്നത്. കലാമേളയിലും ശാസ്ത്ര മേളയിലും മറു പൂർവ്വപഠന മേഖലയിലും ഈ വിദ്യാലയം വരെ മുന്നിട്ട് നിൽക്കുന്നു.

ഇന്ന് LKG - മുതൽ 4-ാ ക്ലാസ്സ് വരെ തിരുവാലി, തൃക്കലങ്ങോട് ,എടവണ്ണ പഞ്ചായത്തുകളിലുൾപ്പെട്ട 634 കുട്ടികൾ ഇവിടെ പഠിച്ച് കൊണ്ടിരിക്കുന്നു. കുട്ടികളുടെ നിഖില മേഖലകളില് ശ്രദ്ധയർപ്പിച്ച് 17 അധ്യാപകരും ഇവിടെ പ്രവർത്തിക്കുന്നു.