എച്ച്.എഫ്.സി.ജി.എച്ച്.എസ്. തൃശ്ശൂർ/പ്രവർത്തനങ്ങൾ/2025-26/ജൂൺ (2025-2026)
2025-2026 പ്രവേശനോത്സവം
ഹോളി ഫാമിലി കൺവെൻറ് ഗേൾസ് ഹൈസ്കൂളിലെ പുതിയ അധ്യയന വർഷാരംഭം വർണ പ്രഭമായി. പ്രാർത്ഥനയോടെ ആരംഭിച്ച ചടങ്ങിൽ പ്രധാന അധ്യാപിക സിസ്റ്റർ ഗ്ലോറി സ്വാഗതം ആശംസിച്ചു. ഹോളി ഫാമിലി വിദ്യാലയത്തിന്റെ ലോക്കൽ മാനേജരും ഹോളി ഫാമിലി കോൺവെന്റ് മദർ സുപ്പീരിയറുമായ റവ. സിസ്റ്റർ ജെയ്സി ജോൺ സി എച്ച് എഫ് അധ്യക്ഷ പ്രസംഗം നടത്തിയ വേദിയിൽ തൃശൂർ ഫാമിലി അപ്പസ്തോലറ്റ് ഡയറക്ടറായ റവ. ഫാദർ ഡോക്ടർ ഫ്രാൻസിസ് വാഴപ്പിള്ളി ഉദ്ഘാടനം ചെയ്ത് സംസാരിച്ചു. സ്കൂൾ പിടിഎ പ്രസിഡന്റ് ശ്രീ രാജൻ അറക്കൽ, എം പി ടി എ പ്രസിഡന്റ് ഡോക്ടർ വിനീജ.എൻ.എസ് എന്നിവർ ആശംസകൾ അറിയിച്ച് സംസാരിച്ചു. കുട്ടികൾക്ക് പഠനോപകരണങ്ങൾ വിതരണം ചെയ്തു.മാലിന്യ വിമുക്ത കേരളത്തിനായി പ്രതിജ്ഞ എടുത്തു. സ്കൂൾ ക്വയറിന്റെ നേതൃത്വത്തിൽ പ്രവേശനോത്സവ ഗാനം ആലപിച്ചു. സ്റ്റാഫ് പ്രതിനിധി ലിൻഡ പോൾ കോളേങ്ങാടൻ എല്ലാവർക്കും നന്ദി അറിയിച്ചു സംസാരിച്ചു. ദേശീയ ഗാനം ആലപിച്ച് പ്രവേശനോത്സവ പരിപാടികൾക്ക് അവസാനമായി. പല വർണ്ണത്തിലുള്ള ബലൂണുകളും തൊപ്പികളും നൽകിയതും സെൽഫി കോണറുകൾ സജ്ജീകരിച്ചതും കുട്ടികൾക്ക് ആകർഷകമായി മാറി. ഉച്ചഭക്ഷണ പദ്ധതിക്ക് ഇന്ന് ആരംഭം കുറിച്ചു.
വിജയികളെ ആദരിച്ചു.
ഹോളി ഫാമിലി ഗേൾസ് ഹൈസ്കൂളിൽ 2024-2025 അധ്യായനവർഷത്തിൽ SSLC പരീക്ഷയിൽ വിജയം നേടിയവരേ ആദരിച്ചു.അനുമോദന സമ്മേളനം ഉദ്ഘാടനം ചെയ്തത് തൃശൂർവിദ്യാഭാസ ഡെപ്യൂട്ടി ഡറക്ടർ ശ്രീ ബാലകൃഷ്ണൻ സാറാണ്.എല്ലാ വിഷയങ്ങൾക്കും എപ്ലസ് കരസ്ഥമാക്കിയവർക്ക് പ്രത്യേക ഉപഹാരം ഈ അവസരത്തിൽ നൽകുകയുണ്ടായി. തുടർന്ന് നവജ്യോതി പ്രൊവിൻസ് വികാർ പ്രൊവിൻസിയൽ സിസ്റ്റർ ഷെറിൻ മരിയ , വിദ്യാലയ മാനേജർസിസ്റ്റർജെയ്സി ജോൺ , തൃശ്ശൂർ ഡിവിഷൻ കൗൺസിലർ ശ്രീമതി റെജി ജോയ്, പിടിഎ പ്രസിഡണ്ട് രാജൻ അറക്കൽ പ്രധാന അധ്യാപിക സിസ്റ്റർ ഗ്ലോറി അധ്യാപക പ്രതിനിധി ശ്രീമതി ജോജി ജോസഫ് എന്നിവർ ഈ അവസരത്തിൽ വിദ്യാർത്ഥികൾക്ക് ആശംസകൾ നേർന്നു.
ലഹരി വിരുദ്ധ ബോധവൽക്കരണ ക്ലാസ്
ജൂൺ 5 വ്യാഴാഴ്ച ലഹരി വിരുദ്ധ ബോധവൽക്കരണ ക്ലാസ് ഹോളി ഫാമിലി വിദ്യാലയത്തിൽ വച്ച് നടന്നു. എമി ടീച്ചറാണ് സ്വാഗത പ്രസംഗം നടത്തിയത്. തൃശ്ശൂർ രാമവർമ്മപുരം പോലീസ് അക്കാദമിയിലെ സർക്കിൾ ഇൻസ്പെക്ടർ ഭുവനേശ് സാറാണ് ക്ലാസ് നയിച്ചത്. എങ്ങനെയാണ് ലഹരി എന്ന ചതിക്കുഴിയിലേക്ക് വിദ്യാർത്ഥികൾ എത്തിപ്പെടുക എന്നും അതിൽ നിന്ന് എങ്ങനെ രക്ഷപ്പെടാം എന്നും ക്ലാസിൽ പ്രതിപാദിച്ചു.പഠനം എന്ന ലഹരിയെ മുറുകെ പിടിച്ചാൽ ചതിക്കുഴികൾ ആകുന്ന ലഹരികളിൽ നിന്ന് രക്ഷപ്പെടാൻ വിദ്യാർത്ഥികൾക്ക് സാധിക്കുമെന്ന് അദ്ദേഹം സംസാരിച്ചു. കുട്ടികളുടെ പ്രതിനിധിയായി എസ്തർ ക്ലാസ് നയിച്ച സാറിന് പ്രത്യേകം നന്ദി അറിയിച്ചു.
വായന ദിനാചരണം
ജൂൺ 19 വായനദിനത്തോടനുബന്ധിച്ച് സ്കൂൾ അസംബ്ലിയിൽ വിദ്യാർത്ഥി പ്രതിനിധി വായനദിന സന്ദേശം നൽകുകയും എല്ലാ കുട്ടികളും വായനദിന പ്രതിജ്ഞ ചൊല്ലുകയും ചെയ്തു. കുട്ടികളിലെ വായന പ്രോത്സാഹിപ്പിക്കുന്നതിന് തുടക്കമിട്ടുകൊണ്ട് എല്ലാ ക്ലാസുകളിലും കുട്ടികൾ വീടുകളിൽ നിന്നും കൊണ്ടുവന്ന പുസ്തകങ്ങൾ ഉപയോഗിച്ച് വായനാ മൂല സജ്ജീകരിക്കുകയും ചെയ്തു.
വിദ്യാരംഗം കലാസാഹിത്യവേദി
വിദ്യാരംഗം കലാസാഹിത്യ വേദിയുടെ ആഭിമുഖ്യത്തിൽ ജൂൺ 20 ന് വായനാദിനചരണവും വിദ്യാരംഗം കലാസഹ്യ വേദിയുടെയും വിവിധ ക്ലബ്ബുകളുടെയും സംയുക്ത ഉദ്ഘാടനവും നടത്തി. വായനദിന സന്ദേശം നൽകിക്കൊണ്ട്, വിവിധ ക്ലബ്ബുകളുടെ ഉദ്ഘാടനം നടത്തിയത് തൃശ്ശൂർ ഡയറ്റ് റിട്ടയേഡ് അധ്യാപിക ശ്രീമതി മിനി ആർ ചെറിയാൻ ആയിരുന്നു. വ്യത്യസ്തമായ രീതിയിൽ രാസപ്രവർത്തനത്തിലൂടെ ഒരു അഗ്നിപർവത സ്ഫോടനം നടത്തിയാണ് ഉദ്ഘാടന കർമ്മം നടത്തിയത്. വായനയുടെ പ്രാധാന്യം ഊന്നി കാണിക്കുന്ന നൃത്തച്ചുവടുകളും ഗണിതം, ശാസ്ത്രം, ഇംഗ്ലീഷ് തുടങ്ങി ഓരോ ക്ലബ്ബുകളുടെയും വ്യത്യസ്ത കലാപരിപാടികളും ഉണ്ടായിരുന്നു. വിദ്യാരംഗത്തിൽ അംഗങ്ങളായ കുട്ടികൾ മുരുകൻ കാട്ടാക്കടയുടെ 'സൂര്യകാന്തി നോവ്' എന്ന കവിതയുടെ നൃത്താവിഷ്കാരം നടത്തി.
യോഗാ ദിനാചരണവും സംഗീത ദിനാചരണവും
ജൂൺ 25 ബുധനാഴ്ച വിദ്യാലയത്തിൽ യോഗാ ദിനവും സംഗീത ദിനവും ആചരിച്ചു. യോഗാദിനത്തോടനുബന്ധിച്ച് സ്കൂൾ ഓഡിറ്റോറിയത്തിൽ ഗാനത്തിന്റെ അകമ്പടിയോടെ യോഗ നടത്തുകയും യോഗാദിന സന്ദേശം നൽകുകയും ചെയ്തു.
സംഗീത ദിനത്തോടനുബന്ധിച്ച് സ്കൂൾ അസംബ്ലിയിൽ നാടൻപാട്ട്, ക്ലാസിക്കൽ പാട്ട്, വിവിധ ഭാഗങ്ങളിൽ ഉള്ള പാട്ട്, ചൂളമടിച്ചു കൊണ്ടുള്ള പാട്ട്, വയലിൻ വായന എന്നിവ ഉണ്ടായിരുന്നു.