ഇരിങ്ങൽ യു പി സ്കൂൾ/ചരിത്രം

ഇരിങ്ങൽ ഗ്രാമത്തിൽ വിദ്യയുടെ വെളിച്ചം പകർന്നു കൊണ്ട് അറുപതു വർഷത്തിൽ അധികമായി നിലകൊള്ളുന്ന ഒരു മഹൽ സ്ഥാപനമാണ് ഇരിങ്ങൽ യു പി സ്കൂൾ. ഇരിങ്ങൽ പ്രദേശം പണ്ട് മുതലേ മൺപാത്ര നിർമാണത്തിന് പേര് കേട്ട സ്ഥലമായിരുന്നു. ഭൂരിഭാഗം ജനങ്ങളും മൺപാത്ര നിർമാണത്തിലും കൃഷിപ്പണിയിലും ഏർപ്പെട്ടു ഉപജീവനം കഴിക്കുന്നവരായിരുന്നു. ഈ പ്രദേശത്തെ കുട്ടികൾക്ക് വിദ്യാഭ്യാസത്തിനുള്ള സൗകര്യം വേണ്ടത്ര ഇല്ലായിരുന്നു.

സ്വതന്ത്ര ഇന്ത്യയിൽ നടപ്പിലാക്കിയ ഒന്നാം പഞ്ച വത്സര പദ്ധതിയുടെ ഭാഗമായി മലബാറിൽ നടപ്പിലാക്കിയ കമ്മ്യൂണിറ്റി ടെവേലോപ്മെന്റ്റ് സ്കീമിന്റെ ഭാഗമായി രൂപം കൊണ്ട ഗ്രാമ വികസന സമിതിയുടെ തീരുമാന പ്രകാരം ശ്രീ ചങ്ങാട്ടു കൃഷ്ണൻ നമ്പ്യാരുടെ നേതൃത്വത്തിൽ ഒരു എലിമെന്ററി സ്കൂൾ 1952 ജൂലൈ മാസം സ്ഥാപിക്കപ്പെട്ടു. ആദ്യ ഘട്ടത്തിൽ പൊയിലിലെ വടക്കൻ കുഞ്ഞിരാമന്റെ കടയിൽ ആരംഭിച്ച ക്ലാസ് പിന്നീട് തൊട്ടടുത്തുള്ള കുരിയാടൻ ഗോവിന്ദന്റെ ഓടിട്ട കെട്ടിടത്തിലേക്ക് മാറ്റി. 1953 ൽ പരിശീലനം സിദ്ധിച്ച അധ്യാപകനായി ശ്രീ പി പി അച്യുതൻ ചേർന്നപ്പോഴാണ് വിദ്യാലയത്തിന് അംഗീകാരം ലഭിച്ചത്. 1954 ഒക്ടോബർ 8 നു ഒരു താത്കാലിക കെട്ടിടത്തിൽ പ്രവർത്തിച്ചു വന്ന വിദ്യാലയം 1958 ൽ ഇന്നുള്ള സ്ഥലത്തെ സ്ഥിരം കെട്ടിടത്തിലേക്ക് മാറ്റി. 1964 ൽ യു പി സ്കൂൾ ആയി ഉയർത്തി. സമീപ പ്രദേശങ്ങളായ നരിക്കോട് , കുറ്റ്യേരി , പുളിയൂൽ , തിരുവട്ടൂർ, എന്നീ പ്രദേശങ്ങളിൽ നിന്ന് നിരവധി കുട്ടികൾ ഈ വിദ്യാലയത്തിൽ എത്തി. ആദ്യത്തെ മാനേജർ ആയ ചങ്ങാട് കൃഷ്ണൻ നമ്പ്യാരുടെ മകനായ ശ്രീ ഉണ്ണികൃഷ്ണൻ നമ്പ്യാർ 1954 മുതൽ ഈ വിദ്യാലയത്തിന്റെ മാനേജരായി ചുമതലയേറ്റു. ഇദ്ദേഹത്തിന്റെ നിര്യാണത്തെ തുടർന്ന് 2014 മുതൽ ഭാര്യയായ ശ്രീമതി ഇ എം സതി മാനേജരായി ചുമതല നിർവഹിച്ചു വരുന്നു.

ശ്രീ പി പി അച്യുതൻ , ശ്രീ കെ പി രാമചന്ദ്ര പൊതുവാൾ , ശ്രീ പി വി രാമചന്ദ്ര പൊതുവാൾ , ശ്രീ പി വി രാഘവൻ നായർ എന്നിവർ വിവിധ കാലങ്ങളിൽ ഈ സ്ഥാപനത്തിന്റെ പ്രധാന അധ്യാപകരായിരുന്നു. അതിനു ശേഷം 1991 വരെ ശ്രീ കെ ഉണ്ണികൃഷ്ണൻ നമ്പ്യാരും പിന്നീട് ശ്രീമതി ഡെയ്സി കുരുവിള , ശ്രീമതി ടി ആർ സുവർണ വള്ളി എന്നിവരും ഈ വിദ്യാലയത്തിന്റെ ഉയർച്ചക്ക് വേണ്ടി പ്രയത്നിച്ചിട്ടുണ്ട്. 2007 ൽ ചുമതലയേറ്റെടുത്ത ശ്രീമതി കെ പി ജയശ്രീ വിദ്യാലയത്തെ പുതിയ കലകഘട്ടത്തിലേക്കു നയിച്ച് കൊണ്ടിരിക്കുന്നു. ഈ വിദ്യാലയത്തിന്റെ ഉയർച്ചക്ക് വേണ്ടി പ്രഗത്ഭരായ പല അധ്യാപകരും സേവനം അനുഷ്ഠിച്ചിട്ടുണ്ട്.