ജൂനിയർ റെഡ് ക്രോസ് (JRC) എന്നത് ഇന്ത്യൻ റെഡ് ക്രോസ് സൊസൈറ്റിയുടെ വിദ്യാർത്ഥി വിഭാഗമാണ്. കുട്ടികളിൽ സേവന സന്നദ്ധത, സ്വഭാവരൂപീകരണം, ദയ, സ്നേഹം, ആതുരശുശ്രൂഷ, വിദ്യാഭ്യാസ പ്രചാരണം തുടങ്ങിയ ഉത്കൃഷ്ട ആദർശങ്ങൾ വളർത്തിയെടുക്കുക എന്നതാണ് ഇതിന്റെ പ്രധാന ലക്ഷ്യം. ജാതി, മത, വർഗ്ഗ, രാഷ്ട്രീയ ഭേദമില്ലാതെ നിഷ്പക്ഷമായി പ്രവർത്തിക്കുന്ന ഒരു അന്താരാഷ്ട്ര സംഘടനയാണിത്.

ചരിത്രം: റെഡ് ക്രോസ് സൊസൈറ്റിയുടെ സ്ഥാപകൻ സ്വിറ്റ്സർലൻഡുകാരനായ ജീൻ ഹെൻറി ഡുനന്റ് ആണ്. 1863-ൽ ആണ് റെഡ് ക്രോസ് സ്ഥാപിതമായത്. അദ്ദേഹത്തിന്റെ ജന്മദിനമായ മെയ് 8 ലോക റെഡ് ക്രോസ് ദിനമായി ആചരിക്കുന്നു. ഒന്നാം ലോകമഹായുദ്ധകാലത്ത് യുദ്ധത്തിൽ മുറിവേറ്റവരെ സഹായിക്കാൻ കാനഡയിലെ കുട്ടികൾ മുന്നോട്ട് വന്നതിൽ നിന്നാണ് ജൂനിയർ റെഡ് ക്രോസ് എന്ന ആശയം രൂപം കൊള്ളുന്നത്. ഈ കുട്ടികളുടെ സേവന സന്നദ്ധത മുതിർന്നവരെപ്പോലും അത്ഭുതപ്പെടുത്തി. ക്ലാര ബർട്ടൺ എന്ന മഹതിയുടെ നേതൃത്വത്തിൽ 1920-ൽ ജൂനിയർ റെഡ് ക്രോസ് ഔദ്യോഗികമായി രൂപീകൃതമായി. 1925-ൽ ഇന്ത്യയിലും ജൂനിയർ റെഡ് ക്രോസ് പ്രവർത്തനമാരംഭിച്ചു.

ലക്ഷ്യങ്ങൾ:

ആരോഗ്യം അഭിവൃദ്ധിപ്പെടുത്തുക.
സേവനസന്നദ്ധതയുള്ള തലമുറയെ വാർത്തെടുക്കുക.
അന്താരാഷ്ട്ര സൗഹൃദം സമ്പുഷ്ടമാക്കുക.

പ്രവർത്തനങ്ങൾ: ജൂനിയർ റെഡ് ക്രോസ് വിദ്യാർത്ഥികൾ സ്കൂൾ തലത്തിൽ നിരവധി പ്രവർത്തനങ്ങളിൽ ഏർപ്പെടുന്നു:

ആരോഗ്യ ബോധവൽക്കരണം: ആരോഗ്യ പ്രശ്നങ്ങളെക്കുറിച്ചും ലഹരി ഉപയോഗത്തിന്റെ ദൂഷ്യവശങ്ങളെക്കുറിച്ചുമുള്ള ബോധവൽക്കരണ ക്ലാസുകൾ സംഘടിപ്പിക്കുന്നു.
സേവന പ്രവർത്തനങ്ങൾ: പാവപ്പെട്ട രോഗികളുടെ വീടുകളിൽ സഹായമെത്തിക്കുക, സ്ഥിരരോഗികളായ കുട്ടികൾക്ക് മരുന്നിനുള്ള സഹായം നൽകുക, ആശുപത്രി സന്ദർശനവും ശുചീകരണവും, വൃദ്ധസദനങ്ങൾ സന്ദർശിക്കുക തുടങ്ങിയവ.
പരിസ്ഥിതി സംരക്ഷണം: മഴക്കാല പൂർവ്വ ശുചീകരണ പ്രവർത്തനങ്ങൾ, സ്കൂൾ വളപ്പിലെ കൃഷി പ്രവർത്തനങ്ങൾ, വനവൽക്കരണ പരിപാടികൾ എന്നിവയിൽ പങ്കെടുക്കുന്നു.
ദുരിതാശ്വാസ പ്രവർത്തനങ്ങൾ: പ്രകൃതി ദുരന്ത സമയങ്ങളിൽ ദുരിതാശ്വാസ പ്രവർത്തനങ്ങളിൽ പങ്കാളികളാകുന്നു. ഉദാഹരണത്തിന്, കോവിഡ് മഹാമാരി സമയത്ത് പൾസ് ഓക്സിമീറ്റർ ചലഞ്ചിന്റെ ഭാഗമായി.
ബോധവൽക്കരണ ക്ലാസുകൾ: റോഡ് സുരക്ഷ, ശുചിത്വം തുടങ്ങിയ വിഷയങ്ങളിൽ ബോധവൽക്കരണ ക്ലാസുകൾ സംഘടിപ്പിക്കുന്നു.
പരീക്ഷകളും ഗ്രേസ് മാർക്കും: 8-ാം ക്ലാസ്സിൽ A ലെവൽ പരീക്ഷയും, 9-ാം ക്ലാസ്സിൽ B ലെവൽ പരീക്ഷയും, 10-ാം ക്ലാസ്സിൽ C ലെവൽ പരീക്ഷയും നടത്തുന്നു. ഈ പരീക്ഷകളിൽ വിജയിക്കുന്ന കുട്ടികൾക്ക് SSLC പരീക്ഷയിൽ 10 മാർക്ക് ഗ്രേസ് മാർക്ക് ലഭിക്കുകയും, +2 അഡ്മിഷന് മുൻഗണന ലഭിക്കുകയും ചെയ്യുന്നു.
ക്യാമ്പുകൾ: ഓരോ വർഷവും സബ്ജില്ലാ കമ്മിറ്റി സംഘടിപ്പിക്കുന്ന ക്യാമ്പുകളിൽ ജൂനിയർ റെഡ് ക്രോസ് അംഗങ്ങൾ പങ്കെടുക്കുന്നു.

അംഗത്വം: വിദ്യാലയങ്ങളിലെ വിദ്യാർത്ഥികൾക്ക് ജൂനിയർ റെഡ് ക്രോസിൽ അംഗമാകാൻ സാധിക്കും. ഓരോ വർഷവും നിശ്ചിത എണ്ണം പുതിയ കുട്ടികൾക്ക് അംഗത്വം നൽകുന്നു.

ജൂനിയർ റെഡ് ക്രോസ് "സേവനം, ആരോഗ്യം, സൗഹൃദം" എന്ന മുദ്രാവാക്യവുമായി മുന്നോട്ട് പോകുന്നു. നാളത്തെ മികച്ച പൗരന്മാരെ വാർത്തെടുക്കുന്നതിൽ ഈ സംഘടന വലിയ പങ്കുവഹിക്കുന്നുണ്ട്.

2025 ജൂലായ് 1 - ഡോക്ടർസ് ദിനം

ജൂലായ് 1 ഡോക്ടർസ് ഡേ യുമായി ബന്ധപ്പെട്ട് JRC യുടെ നേതൃത്വത്തിൽ മൂത്തേടത്ത് ഹൈസ്കൂൾ പൂർവ്വ വിദ്യാർഥികൂടിയായ Dr.വി പ്രശാന്തിനെ(Rtd. District Animal Husbandry Officer, Kannur.) ആദരിച്ചു. പരിപാടിയിൽ സ്റ്റാഫ്‌ സെക്രട്ടറി വി. പി സന്തോഷ്‌ മാസ്റ്റർ സ്വാഗതം ആശംസിച്ചു.ബഹുമാനപ്പെട്ട HM പി കെ രത്നാകരൻ മാസ്റ്റർ അധ്യക്ഷത വഹിച്ചു. പ്രിൻസിപ്പാൾ Dr. എ ദേവിക ടീച്ചർ ഉദ്‌ഘാടന കർമ്മം നിർവഹിച്ചു. സ്കൂൾ മാനേജർ അഡ്വ. വിനോദ് രാഘവൻ ഉപഹാരം നൽകി ആദരിച്ചു. SRG കൺവീനർ വി വി ലീനടീച്ചർ ആശംസകൾ നേർന്നു സംസാരിച്ചു.തുടർന്ന് ഡോ.വി പ്രശാന്തിന്റെ നേതൃത്വത്തിൽ ഹൈസ്കൂൾ ക്ലാസുകളിലെ കുട്ടികൾക്ക് പേവിഷ ബോധവൽക്കരണ ക്ലാസ് നടത്തി.