ഗവൺമെന്റ് വി. എച്ച്. എസ്. എസ്. വീരണകാവ്/പ്രവർത്തനങ്ങൾ/2024-25

ന‍ൂപ‍ുരധ്വനി2024

2024 സെപ്റ്റംബർ 26,27 തീയതികളിൽ സ്കൂൾ കലോത്സവം നൂപുരധ്വനി ഗവ.വി.എച്ച്.എസ്.എസ്,വീരണകാവിൽ ആഘോഷപൂർവം നടന്നു. 26 ന് രാവിലെ 9.30 ന് നടന്ന ഉദ്ഘാടന മീറ്റിംഗിൽ പ്രിൻസിപ്പൽ സ്വാഗതവും കലോത്സവ കൺവീനർ ശ്രീജ നന്ദിയും അറിയിച്ചു. ദീപം കൊളുത്തി ഉദ്ഘാടനം നടത്തിയ ശേഷം മുഖ്യാതിഥി പുലിയൂർ ജയകുമാർ സാർ ഇമ്പമാർന്ന സ്വരത്തിൽ നാടൻപാട്ടുകൾ പാടി കുട്ടികളെ കൈയിലെടുത്തു. സന്ദേശം നൽകിയ ഹെ‍ഡ്മിസ്ട്രസ് സന്ധ്യ ടീച്ചറിന്റെ പൂങ്കുയിലെ പാട്ട് സദസ്യർ വൻപിച്ച കൈയടിയോടെയാണ് സ്വീകരിച്ചത്. ജില്ലാ പഞ്ചായത്ത് മെമ്പർ രാധിക ടീച്ചർ,ബ്ലോക്ക് പഞ്ചായത്ത് പ്രസിഡന്റ് വിജയൻ പഞ്ചായത്ത് പ്രസിഡന്റ് സനൽകുമാർ,സ്റ്റാഫ് സെക്രട്ടറി സജീഷ് എസ് നായർ എന്നിവർ ആശംസകളർപ്പിച്ചു സംസാരിച്ചു.

രണ്ട് വേദികളിലായാണ് മത്സരങ്ങൾ നടന്നത്.വേദി ഒന്ന് ചിലങ്കയിലാണ് പ്രധാന നൃത്ത ഇനങ്ങൾ നടന്നത്. മറ്റ് മത്സരങ്ങൾ വേദി രണ്ട് നിളയിലും നടന്നു.

വാങ്മയം ഭാഷാപ്രതിഭാസ്കൂൾതല പരീക്ഷ

വിദ്യാരംഗം കലാസാഹിത്യവേദി 2024 സെപ്റ്റംബർ 25 ന് നടത്തിയ വാങ്മയം ഭാഷാപ്രതിഭാസ്കൂൾതല പരീക്ഷ സ്കൂൾ വിദ്യാരംഗം കലാസാഹിത്യവേദിയുടെ നേതൃത്വത്തിൽ ലൈബ്രറിയിൽ വച്ച് മലയാളം അധ്യാപകരായ സുരജ എസ് രാജിന്റെയും രാകേഷിന്റെയും നേതൃത്വത്തിൽ നടത്തി.

ഓണാഘോഷം@2024

2024 ലെ ഓണാഘോഷം സെപ്റ്റംബർ മാസം 13 ന് സ്കൂൾ ഓഡിറ്റോറിയത്തിൽ വച്ച് നടന്നു.വയനാട് ദുരന്തത്തിന്റെ പശ്ചാത്തലത്തിൽ മിതമായിട്ടാണ് ഓണം ആഘോഷിച്ചത്.ഓണസദ്യയും മറ്റ് ആഘോഷങ്ങളും ഒഴിവാക്കിയെങ്കിലും കുട്ടികളുടെ സന്തോഷത്തിനായി പായസവിതരണവും ചെറിയ ഓണപരിപാടികളും നടത്തി.മത്സരങ്ങളും ഘോഷങ്ങളും ഒഴിവാക്കി നടത്തിയ ഓണാഘോഷം പ്രമുഖ സാഹിത്യകാരൻ വിനോദ് വൈശാഖിയുടെ സാന്നിധ്യത്തിൽ ഉദ്ഘാടനം ചെയ്യപ്പെടുകയും ഹൃദ്യമായ കവിതാലാപനത്തിലൂടെ ഓണം നുകരുകയും ചെയ്തു.

ഉപജില്ലാ സ്പോർട്ട്സ് മീറ്റ് പങ്കാളിത്തം2024

ഉപജില്ലയിൽ നടന്ന വിവിധ സ്പോർട്ട്സ് മത്സരങ്ങളിൽ പങ്കെടുത്ത് വീരണകാവ് ടീം മികച്ച വിജയം നേടി.ധാരാളം കുട്ടികൾ ജില്ലാതലത്തിലേയ്ക്ക് സെലക്ഷൻ നേടി.കായികാധ്യാപകനായ ഷാജി സൈമൺ സാറിന്റെ നേതൃത്വത്തിൽ സന്ധ്യ ടീച്ചറിന്റെ നിർദേശാനുസരണം കുട്ടികൾ പരിശീലനം നടത്തുകയും മത്സരങ്ങളിൽ പങ്കെടുക്കുകയും ചെയ്തു.

YIP 7.0 ഐഡിയ ലെവൽ ടോപ്പ് ടെൻ സ്കൂൾ

തിരുവനന്തപുരം ജില്ലയിലെ വൈഐപി7.0 ഐഡിയ സബ്മിഷനിൽ മികച്ച പങ്കാളിത്തവുമായി വീരണകാവ് സ്കൂൾ മുന്നേറി. 51 ഐഡിയകളാണ് 52 ഗ്രൂപ്പുകളിലെ കുട്ടികൾ സബ്മിറ്റ് ചെയ്തത്.സംസ്ഥാനതലത്തിൽ കുട്ടികളുടെ എണ്ണത്തിലും സ്കൂളിന്റെ വലുപ്പത്തിലും ചെറുതെങ്കിലും നമ്മുടെ സ്കൂളിന് 24 മത് എത്താനായി. തിരുവനന്തപുരം ജില്ലയിൽ മൂന്നാമത് എത്തി സ്കൂൾ ടോപ്പ് ടെന്നിൽ എത്തിയത് അഭിമാനകരമായി മാറി.സന്ധ്യ ടീച്ചറിന്റെ പ്രോത്സാഹനവും ശാസ്ത്രപഥം കൺവീനർ ഡീഗാൾ സാറിന്റെ ഇടപെടലും ലിറ്റിൽ കൈറ്റ്സ് മിസ്ട്രസ് ലിസി ടീച്ചറിന്റെ നേതൃത്വത്തിൽ ലിറ്റിൽ കൈറ്റ്സ് കുട്ടികളുടെ അക്ഷീണ പ്രയത്നവുമാണ് ഈ നേട്ടത്തിന് കാരണമായത്.

സ്കൂൾ പാർലമെന്റ് ഇലക്ഷൻ 2024

ഓഗസ്റ്റ് മാസം തീയതി നടത്തിയ സ്കൂൾ പാർലമെന്റ് ഇലക്ഷൻ ജനാധിപത്യത്തിന്റെ മൂല്യം കുട്ടികളിൽ എത്തിക്കുന്നതിൽ പൂർണമായും വിജയിച്ചതായി പറയാം.നോമിനേഷൻ മുതൽ ഭാരവാഹികളുടെ തിരഞ്ഞെടുപ്പ് വരെ വിവിധ ഘട്ടങ്ങൾ കൃത്യമായി ജനാധിപത്യ രീതിയിൽ നടത്താനായി സ്റ്റാഫ് അഡ്വൈസറായി തിരഞ്ഞെടുക്കപ്പെട്ട ലിസി ടീച്ചർ ഹെഡ്മിസ്ട്രസ് സന്ധ്യ ടീച്ചറിന്റെ നിർദേശാനുസരണം പ്രയത്നിച്ചു.ഇതിൽ ലിറ്റിൽ കൈറ്റ്സ് കുട്ടികളുടെ സാങ്കേതിക സഹായം എടുത്തു പറയേണ്ടതാണ്.എല്ലാ അധ്യാപകരും അനധ്യാപകരും ഒന്നുപോലെ തിരഞ്ഞെടുപ്പിന്റെ ഒരുക്കങ്ങളിൽ പങ്കാളികളായി. സമ്മതി സോഫ്റ്റ്‍വെയർ ഉപയോഗിച്ച് നടത്തിയ തിരഞ്ഞെടുപ്പ് പൊതു തിരഞ്ഞെടുപ്പിലെ പോലെ ഇവിഎം മെഷീനിലെ വോട്ടെടുപ്പും ബാലറ്റ് ക്രമീകരണം വഴി ബാലറ്റിന്റെ ഉപയോഗവും കുട്ടികളിലെത്തിക്കാൻ സഹായകമായി.വിഎച്ച്എസ്ഇ യിൽ നിന്നും നവീൻ മുരുകൻ ചെയർ പേഴ്സണായും സ്കൂളിൽ നിന്നും 10 സിയിലെ രഞ്ചു എൽ സെക്രട്ടറിയായും തിരഞ്ഞെടുക്കപ്പെട്ടു.പെൺകുട്ടികൾക്കുള്ള സംവരണവും ഭാരവാഹിത്വത്തിൽ വിവിധ തലങ്ങൾക്കുള്ള സ്ഥാനവും കൃത്യമായി ക്രമീകരിച്ചാണ് ഇലക്ഷൻ നടത്തിയത്. മൂന്നു ബൂത്തുകളും വോട്ടെണ്ണൽ കേന്ദ്രവും പ്രോട്ടക്ഷൻ പോലീസും ബൂത്തിലെ പ്രിസൈഡിങ് ഓഫീസർ,പോളിംങ് ഓഫീസർ,പോളിങ് ഏജന്റുകൾ എല്ലാം കുട്ടികളിൽ പൊതുതിരഞ്ഞെടുപ്പിന്റെ പ്രാധാന്യം മനസിലാക്കിക്കാൻ സഹായിച്ചു.

വോട്ടേഴ്സ് സ്ലിപ്പുമായി ബൂത്തിലേയ്ക്ക്
തിരഞ്ഞെടുക്കപ്പെട്ട ക്ലാസ് ലീഡേഴ്സ്
ഭാരവാഹികൾ

ലിറ്റിൽകൈറ്റ്സ് സംസ്ഥാനതല അവാർഡ് ഫംങ്ഷൻ2024

മികച്ച ലിറ്റിൽ കൈറ്റ്സ് പ്രവർത്തനങ്ങൾക്ക് ഏർപ്പെടുത്തിയ സംസ്ഥാനതല അവാർഡിൽ മൂന്നാം സ്ഥാനം കരസ്ഥമാക്കി കൊണ്ട് വീരണകാവ് സ്കൂൾ തിരുവനന്തപുരം ജില്ലയ്ക്കും നെയ്യാറ്റിൻകര വിദ്യാഭ്യാസ ജില്ലയ്ക്കും അഭിമാനകരമായ ഒരു സ്കൂളായി മാറി.മലയോരമേഖലയിലെ സാധാരണക്കാരായ രക്ഷാകർത്താക്കളുടെ മക്കൾ പഠിക്കുന്ന ഈ സ്കൂളിൽ സർക്കാർ ലഭ്യമാക്കിയ എല്ലാ ഡിജിറ്റൽ ഉപകരണങ്ങളും സമയപരിമിതിയോ ഒന്നും നോക്കാതെ കുട്ടികളുടെ ഉന്നമനത്തിനായി പരമാവധി ഉപയോഗപ്പെടുത്തികൊണ്ടാണ് ഈ അവാർഡിനുള്ള നേട്ടത്തിലേയ്ക്ക് ഈ സ്കൂൾ എത്തിച്ചേർന്നത്. ലിറ്റിൽ കൈറ്റ്സിലെ കുട്ടികൾ കൈറ്റ് മിസ്ട്രസ് ലിസി ടീച്ചറിന്റെ നേതൃത്വത്തിൽ ചെയ്ത ലിറ്റിൽ കൈറ്റ്സ് പഠനപ്രവ‍ർത്തനത്തിന് പുറമയുളള സാമൂഹികസേവന പ്രവർത്തനങ്ങൾക്കാണ് ഈ അംഗീകാരം സ്കൂളിന് ലഭിച്ചത്. അയൽക്കൂട്ടങ്ങൾ കേന്ദ്രീകരിച്ച് നടത്തിയ സൈബർ സേഫ്റ്റി ക്ലാസ്, സമീപത്തെ എൽ പി, യു പി സ്കൂളുകളിൽ നൽകിയ ഐ ടി അധിഷ്ഠിത പരിശീലനം, അങ്കണവാടികളിൽ നൽകിയ ഇന്റാക്ഷനുകൾ,ചരിത്രബുക്ക് തയ്യാറാക്കൽ,വീർഗാഥ പ്രോജക്ട്, വൈഐപി പങ്കാളിത്തം,കർഷക പരിശീലനം തുടങ്ങി അനേകം പരിപാടികൾ 2023-2024 അധ്യയനവർഷത്തിൽ സ്കൂൾ നടപ്പിലാക്കിയിരുന്നു. പ്രശസ്തി പത്രവും ക്യാഷ് പ്രൈസും തിരുവനന്തപുരം നിയമസഭാമന്ദിരത്തിലെ ശങ്കരനാരായണൻ തമ്പി ഹാളിൽ വച്ച് നടന്ന മീറ്റീംഗിൽ മുഖ്യമന്ത്രി പിണറായി വിജയൻ സാർ നൽകി.വിദ്യാഭ്യാസ മന്ത്രിയും കൈറ്റ് സിഇഒ അൻവർ സാദത്ത് സാറും സന്നിഹിതരായിരുന്നു.

സ്വാതന്ത്ര്യദിനം2024

2024 ഓഗസ്റ്റ് 15 ന് സ്വാതന്ത്ര്യദിനാഘോഷം നടത്തി.കൺവീനർ സൗമ്യ എസിന്റെ നേതൃത്വത്തിൽ പ്രീപ്രൈമറി മുതൽ വി.എച്ച്.എസ്.സി വരെയുള്ള എല്ലാ കുട്ടികളെയും ഉൾക്കൊള്ളിച്ച് നടത്തിയ ദിനാചരണം വയനാട് ദുരന്തത്തിന്റെ പശ്ചാത്തലത്തിൽ അവരെ അനുസ്മരിക്കുകയും ലളിതമായും എന്നാൽ സ്വാതന്ത്ര്യത്തിന്റെ ഉൾക്കരുത്ത് ചോർന്ന് പോകാതെയും ആചരിച്ചു. നേരത്തെ തന്നെ തയ്യാറാക്കിവച്ചിരുന്ന കുഞ്ഞുങ്ങളുടെ പ്രോഗ്രാമുകളും റാലിയും നടത്തി.റാലി സ്കൂളിൽ നിന്നാരംഭിച്ച് പട്ടകുളം പാലം വരെ പോയി തിരിച്ചു വന്നു.സന്ധ്യ ടീച്ചറും രൂപ ടീച്ചറും പിടിഎ പ്രസിഡന്റ് അരുൺകുമാർ സാറും ചേർന്ന് ദേശീയ പതാക ഉയർത്തി. മീറ്റിംഗിനു ശേഷം നടന്ന കുട്ടികളുടെ വിവിധ കലാപരിപാടികൾ എല്ലാവരെയും ആകർഷിച്ചു.

LEAP ബോധവത്ക്കരണം

LEAP സർവെയിൽ പങ്കെടുത്ത തിരഞ്ഞെടുക്കപ്പെട്ട കുട്ടികളുടെ രക്ഷാകർത്താക്കളുമായി സംവദിക്കാനും അവരുടെ ഫലം അവലോകനം ചെയ്ത് കുട്ടികളുടെ മികവും തിരുത്തേണ്ടവയും ഫോക്കസ് ഏരിയകളും കണ്ടെത്തി കൂടുതൽ മിടുക്കരാക്കാനായി ബോധവത്ക്കരണവുമായി 2024 ഓഗസ്റ്റ് 12 ന് ബിആർസി തലത്തിൽ നിന്നും വന്ന ഫാക്കൽട്ടി ക്ലാസ് നയിച്ചു. സന്ധ്യടീച്ചർ സന്ദേശം നൽകി.സിആർസി കോർഡിനേറ്റർ മാർഗനിർദേശങ്ങൾ നൽകി.

NAS മോഡൽ പരീക്ഷാഅവലോകനം

2024 ഓഗസ്റ്റ് 12 ന് നാസ് പരീക്ഷാ അവലോകനത്തിനായി വൈകിട്ട് സ്റ്റാഫ് റൂമിൽ ഒത്തുകൂടി. അധ്യാപകരുടെ അഭിപ്രായങ്ങളും നിർദേശങ്ങളും ചർച്ച ചെയ്തു.തുടർന്ന് എച്ച് എം പരീക്ഷാനടത്തിപ്പുമായി ബന്ധപ്പെട്ട കാര്യങ്ങൾ അറിയിച്ചു.ബിആർസി കോർഡിനേറ്റർ സിന്ധു ടീച്ചറും സന്നിഹിതയായിരുന്നു. പരീക്ഷയിൽ ബുദ്ധിമുട്ട് നേരിട്ട ഭാഗങ്ങളും തുടർന്ന് അതിനുള്ള പരിഹാരവും ചർച്ച ചെയ്തു.മികവാർന്ന രീതിയിൽ കുട്ടികളെ നാസ് പരീക്ഷയ്ക്ക് ഒരുക്കാനായി ക്ലാസുകൾ നൽകാൻ തീരുമാനിച്ചു.

YIP 6.0 സെലക്ട്ഡ് ലിസ്റ്റ് 2024 ഏഴ് ടീമുകൾ

YIP 6.0 യുടെ സെലക്ഷൻ ലിസ്റ്റിൽ നമ്മുടെ 13 ചുണക്കുട്ടികളുടെ 7 ടീമുകൾ ഇടം പിടിച്ചത് സ്കൂളിന് അഭിമാനമായി.ശാസ്ത്രപഥം കൺവീനർ ഡീഗാൾ സാറും ലിറ്റിൽ കൈറ്റ്സ് മിസ്ട്രസ് ലിസി ടീച്ചറും കുട്ടികൾക്ക് മാർഗനിർദേശം നൽകിയത് എച്ച് എമ്മിന്റെ പ്രോത്സാഹനത്തിലാണ്. ഹൈസ്കൂൾ ക്ലാസിലെ തിരഞ്ഞെടുക്കപ്പെട്ട കുട്ടികൾ ബിആർസി തല ട്രെയിനിംഗിൽ പങ്കെടുത്തു.ക്യാമ്പ് രസകരമായിരുന്നുവെന്ന് കുട്ടികൾ അഭിപ്രായപ്പെട്ടു.തിരഞ്ഞെടുക്കപ്പെട്ടവർക്ക് സ്കൂളിൽ ആദരവ് നൽകി.

ലിറ്റിൽ കൈറ്റ്സ് പ്രിലിമിനറി ക്യാമ്പ്2024

2024 ഓഗസ്റ്റ് 7 ന് ലിറ്റിൽ കൈറ്റ്സ് പുതിയ ബാച്ചിന്റെ പ്രവേശനക്ലാസായ പ്രിലിമിനറി ക്യാമ്പ് നടന്നു. മാസ്റ്റർ ട്രെയിനറായ അരുൺ സാറാണ്(കണിയാപുരം സബ്‍ജില്ല) ക്യാമ്പിന് നേതൃത്വം നൽകിയത്.ക്യാമ്പ് ഉദ്ഘാടനം ചെയ്ത് പിടിഎ പ്രസിഡന്റ് അരുൺകുമാർ സാർ മുൻപ്രവർത്തനങ്ങളെ ശ്ലാഘിച്ചു. പിടിഎ അംഗം അഡ്വ.ശിവകുമാർ സന്ദേശം നൽകി.ഹെഡ്മിസ്ട്രസ് സന്ധ്യടീച്ചർ മാർഗനി‍ർദേശങ്ങൾ നൽകി.തുടർന്ന് പത്തു മുതൽ അഞ്ചു മണി വരെ ക്യാമ്പ് നടന്നു.ലിറ്റിൽ കൈറ്റ്സ് മിസ്ട്രസുമാരായ ലിസി ടീച്ചറും സുരജ ടീച്ചറും ക്യാമ്പിൽ സജീവമായി ഇടപെട്ടു.ലിറ്റിൽ കൈറ്റ്സ് 2024-2027 ബാച്ചിലെ 33 കുട്ടികൾക്കാണ് ക്യാമ്പ് നടന്നത്.

പൊതുയോഗവും പിടിഎ എസ് എം സി എം പിടിഎ തിരഞ്ഞെടുപ്പും

2024 ഓഗസ്റ്റ് 6 ന് പൊതുയോഗം നടന്നു.രക്ഷാകർത്താക്കളുടെ സാന്നിധ്യം കുറവായിരുന്നുവെങ്കിലും യോഗം കൃത്യസമയത്ത് ആരംഭിച്ചു.പിടിഎ പ്രസിഡന്റ് സലാഹുദീൻ പിടിഎയുടെ പ്രവർത്തനം വിലയിരുത്തി സംസാരിച്ചു. റിപ്പോർട്ട് സ്റ്റാഫ് സെക്രട്ടറി ചുരുക്കി അവതരിപ്പിക്കുകയും ആശ ടീച്ചർ കണക്ക് അവതരിപ്പിക്കുകയും ചെയ്തു.തുടർന്ന് നടന്ന പൊതു തിരഞ്ഞെടുപ്പ് വാശിയേറിയതായിരുന്നു. വരണാധികാരിയായി സ്റ്റാഫ് തിരഞ്ഞെടുത്തിരുന്ന ജേക്കബ് സാറിന്റെ നേതൃത്വത്തിൽ ഇലക്ഷൻ നടത്തി. തുട‍ർന്ന് അരുൺകുമാർ സാറിനെ പ്രസിഡന്റായും മായയെ വൈസ് പ്രസിഡന്റായും കുമാരി ഗീതയെ എംപിടിഎ പ്രസിഡന്റായും ജിജിത്ത് ആർ നായരെ എസ്എംസി ചെയർമാനായി തിരഞ്ഞെടുത്തു.

സ്പോർട്ട്സ് മീറ്റ് 2024

2024 ലെ സ്പോർട്ട്സ് മീറ്റ് ഷാജി സൈമൺ സാറിന്റെ നേതൃത്വത്തിൽ ഓഗസ്റ്റ് രണ്ടു മുതൽ ഓഗസ്റ്റ് 10 വരെ നടന്നു.മീറ്റ് ഉദ്ഘാടനം ചെയ്ത് സംസാരിച്ച ധ്യാൻചന്ദ് അവാർഡ് ജേതാവ് ഒളിമ്പ്യൻ ലേഖ കുട്ടികൾക്ക് സ്പോർട്ട്സിന്റെ പ്രാധാന്യത്തെകുറിച്ച് സ്വന്തം ജീവിതാനുഭവങ്ങളിലൂടെ സംവദിച്ചു. ഇതിനോടനുബന്ധിച്ചുള്ള ദീപശിഖാപ്രയാണം അവർ ഏറ്റുവാങ്ങി. ദീപശിഖ കൊളുത്തിയ എച്ച് എം സന്ധ്യ ടീച്ചർ ദീപശിഖയോടൊപ്പം ഓടുകയും സ്റ്റേജിൽ കൈമാറാനായി എത്തുകയും ചെയ്തു.കുട്ടികൾ ആവേശപൂർവം മത്സരങ്ങളിൽ പങ്കെടുത്തു.

സ്പോർട്ട്സ് മീറ്റ് ലോഗോ പ്രകാശനം2024

2024 ഓഗസ്റ്റ് 2 ന് ഒളിപ്യൻ ലേഖാ മാഡത്തിന്റെ വരവ് വീരണകാവ് സ്പോർട്ട്സ് യൂണിറ്റിന് ഉണർവ് പകരുന്നു. സ്പോർട്ട്സ് മീറ്റ് ഉദ്ഘാടനം ചെയ്യാനെത്തിയ ഒളിമ്പ്യൻ ഇക്കൊല്ലത്തെ സ്പോർട്ട്സ് മീറ്റിന്റെ ലോഗോ പ്രകാശനം ചെയ്തു. ലോഗോ തയ്യാറാക്കിയ ലിറ്റിൽ കൈറ്റ്സിലെ ലിസി ടീച്ചറിനെ അഭിനന്ദിച്ചു. ലോഗോ പിടിഎ,എസ്എംസി അംഗങ്ങളും എച്ച് എമ്മും പ്രിൻസിപ്പലും സ്പോർട്ട്സ് മാസ്റ്റർ ഷാജി സൈമണും ചേർന്ന് ഏറ്റു വാങ്ങി.

ലിറ്റിൽ കൈറ്റ്സ് സംസ്ഥാന അവാർഡ് പിടിഎ എസ്എംസി എംപിടിഎ ആദരവ്

2024 ജൂലായ് 27 ന് 2023-2024 അധ്യയനവർഷത്തിലെ പിടിഎ,എസ്എംസി,എംപിടിഎ എന്നിവരുടെ ആദരവ് ലിറ്റിൽ കൈറ്റ്സ് പ്രതിനിധികൾ ഏറ്റുവാങ്ങി.മീറ്റിംഗിൽ വച്ച് അഡ്വ.സ്റ്റീഫൻ എംഎൽഎ നൽകിയ മൊമന്റോ കുട്ടികൾ ഏറ്റുവാങ്ങി.പിടിഎ പ്രസിഡന്റ് സലാഹുദീനും എസ്എംസി ചെയർമാൻ മുഹമ്മദ് റാഫിയും സംസ്ഥാനതലത്തിൽ ലഭിച്ച നേട്ടത്തിന് ലിറ്റിൽ കൈറ്റ്സ് കുട്ടികളെയും പ്രോത്സാഹനം നൽകിയ സന്ധ്യടീച്ചറിനെയും അവാർഡിനായി കഠിനപ്രയത്നം ചെയ്ത ലിസി ടീച്ചറിനെയും പ്രത്യേകം അഭിനന്ദിച്ചു.

അക്കാദമികപ്രവർത്തനങ്ങൾ മോണിറ്ററിംഗും എൽ ഇ ഡി നിർമാണവും

ഹെഡ്മിസ്ട്രസ് സന്ധ്യ ടീച്ചറിന്റെ ക്ലാസ് റൂം മോണിറ്ററിംഗും മാർഗനിർദേശങ്ങളും അക്കാദമിക മികവിലേയ്ക്ക് സ്കൂളിനെ നയിക്കുന്നു.ഇതിന് ഉദാഹരണമാണ് യു പി തലത്തിലെ ശാസ്ത്രപഠനങ്ങളും പ്രൈമറി,ഹൈസ്കൂൾ വിഭാഗങ്ങളിലെ ഐ ടി മികവും. എല്ലാ ഹൈസ്കൂൾ ക്ലാസ് റൂമുകളും ഹൈടെക്കാണ്.വൈദ്യുതി പ്രശ്നം കാരണം ഹൈടെക് പ്രവർത്തനങ്ങൾക്ക് തടസം നേരിട്ടാലും എത്രയും വേഗം അത് പരിഹരിക്കാറുണ്ട്. ക്ലാസ് റൂമുകളിലെ പഠനപ്രവർത്തനഭാഗമായി യു പി വിഭാഗം കുട്ടികൾ സയൻസ് അധ്യാപകനായ സജീഷ് സാറിന്റെ നേതൃത്വത്തിൽ എൽ ഇ ഡി ബൾബ് നിർമിച്ചത് കുട്ടികൾക്ക് ഫിസിക്സിന്റെ പാഠാശയങ്ങളും ജീവിതത്തിൽ ആത്മവിശ്വാസവും വളർത്താൻ പര്യാപ്തമായ പ്രവർത്തനമായിരുന്നു.

ചാന്ദ്രദിനം 2024

2024 ജൂലായ് 21, 22 ദിവസങ്ങളിൽ ലൂണാർ ദിനം ആചരിച്ചു. സോഷ്യൽ സയൻസ് ക്ലബ് ചാന്ദ്രദിനപതിപ്പ് മത്സരം നടത്തി. 10 A യിലെയും 9 A യിലെയും കുട്ടികൾ വിജയിച്ചു. ലിറ്റിൽ കൈറ്റ്സിന്റെ നേതൃത്വത്തിൽ നിലാവ് എന്ന വിഷയത്തിൽ ഡിജിറ്റൽ പെയിന്റിംഗ് മത്സരം നടത്തി. പ്രൈമറി വിഭാഗങ്ങളിൽ വീഡിയോ പ്രദർശനവും മറ്റ് മത്സരങ്ങളും സംഘടിപ്പിച്ചു.

ക്രാഫ്റ്റ് ശില്പശാല2024

2024 ജൂലായ് 19 ന് ബിആർസി സംഘടിപ്പിച്ച കരകൗശലശില്പശാലയിൽ കുട്ടികളും അധ്യാപകരും രക്ഷാകർത്താക്കളും ആവേശപൂർവം പങ്കെടുത്തു. രാവിലെ പത്തിന് ആരംഭിച്ച ശില്പശാല വൈകിട്ട് നാലിന് സമാപിച്ചു. പേപ്പർ ക്രാഫ്റ്റ് പരിശീലിച്ച കുട്ടികളും രക്ഷാകർത്താക്കളും വർണക്കൂടാരത്തിലേയ്ക്കുള്ള ക്രാഫ്റ്റ് വർക്കുകൾ ഏറ്റെടുത്ത് ചെയ്യാമെന്ന് തീരുമാനിച്ചു. ബിആർസി യിൽ നിന്നുള്ള പരിശീലകരുടെ ക്ലാസുകൾ എല്ലാവർക്കും പ്രയോജനപ്പെട്ടു.

ORC പ്രോഗ്രാം വേൾഡ് യൂത്ത് സ്കിൽ ഡേ

2024 ജൂലായ് 18 ന് ഉച്ചയ്ക്ക് തിരുവനന്തപുരം ചൈൽഡ് പ്രൊട്ടക്ഷൻ യൂണിറ്റിന്റെ നേതൃത്വത്തിൽ ലോക സ്കിൽ ഡേയുമായി ബന്ധപ്പെട്ട ബോധവത്ക്കരണം കൗമാരപ്രായക്കാർക്കായി സംഘടിപ്പിച്ചു. അവർ റെസ്പോൺസിബിലിറ്റി ഫോർ ചിൽഡ്രൻ എന്ന പ്രോഗ്രാമിന്റെ ഭാഗമായിട്ട് നടന്ന ക്ലാസിനു വേണ്ട കാര്യങ്ങൾ കൗൺസിലർ ബിസ്മി തോമസിന്റെ നേതൃത്വത്തിൽ നടന്നു. ചൈൽഡ് പ്രോട്ടക്ഷൻ യൂണിറ്റിൽ നിന്നും വന്ന സാറാണ് ക്ലാസ് നയിച്ചത്. സ്കിൽ ഡെവലപ്പ്മെന്റും വൈകാരിക ബാലൻസിങ്ങും കുട്ടികൾക്ക് ഉപകാരപ്രദമായിരുന്നു.കളികളിലൂടെ കൗമാരക്കാരുടെ പ്രശ്നങ്ങൾ കണ്ടെത്തുകയും അവരവർക്ക് തന്നെ പ്രശ്നപരിഹാരം കണ്ടെത്താനുള്ള സ്കിൽ വളർത്താനും പരിശീലനം ഉപകരിച്ചു.

ലോക ജനസംഖ്യാദിനം2024

2024 ജൂലായ് 11 ന് സോഷ്യൽ സയൻസ് ക്ലബിന്റെ നേതൃത്വത്തിൽ ലോകജനസംഖ്യാദിനാചരണം നടന്നു. ഇതുമായി ബന്ധപ്പെട്ട് നടന്ന ക്വിസ് മത്സരം സോഷ്യൽ സയൻസ് ക്ലബ് കൺവീനർ സിന്ധു ടീച്ചറിന്റെ നേതൃത്വത്തിൽ നടന്നു. ഫൈനൽ റൗണ്ടിലെത്തിയ കുട്ടികളെ വീണ്ടും ക്വിസ് മത്സരം നടത്തി വിജയികളെ കണ്ടെത്തി. ജനസംഖ്യാ കണക്കുകൾ അവതരിപ്പിച്ച് ബോധവത്ക്കരണം നടത്തി.

വായനയ്ക്ക് ഒരു കൈത്താങ്ങ്

കുട്ടികളിലെ വായനാശീലം പ്രോത്സാഹിപ്പിക്കാനും അവരെ അറിവിന്റെ മായികലോകത്ത് എത്തിക്കാനുമായി വായനാസാമഗ്രികൾ ശേഖരിക്കുന്നതിന്റെ ഭാഗമായി പിടിഎ വീരണകാവ് സർവീസ് സഹകരണസംഘത്തെ സമീപിക്കുകയും അവർ കുട്ടികൾക്ക് എന്നും പത്രം നൽകാമെന്ന് വാക്കു നൽകുകയും ചെയ്തു.ഇതിന്റെ ഭാഗമായി അവർ പത്രവുമായി ജൂലായ് ഒന്നാം തീയതി സ്കൂളിലെത്തുകയും സന്ധ്യ ടീച്ചറിനും രൂപടീച്ചറിനും കുട്ടികളുടെ പ്രതിനിധികൾക്കും പത്രം കൈമാറി ഉദ്ഘാടനം നടത്തുകയും ചെയ്തു.

വായനദിനം2024

2024 ജൂൺ 29 ന് കെ എം പണിക്കർ അനുസ്മരണവുമായി ബന്ധപ്പെട്ട് നടത്തുന്ന വായനാവാരാചരണത്തിന് തുടക്കം കുറിച്ചുകൊണ്ട് സ്കൂൾ ഓഡിറ്റോറിയത്തിൽ വായനദിനം ഉദ്ഘാടനം ചെയ്തു.ഹെഡ്മിസ്ട്രസ് സന്ധ്യ ടീച്ചർ സ്വാഗതം ആശംസിക്കുകയും രൂപ ടീച്ചർ ആശംസകളറിയിക്കുകയും ചെയ്തു.ലൈബ്രറിയുടെ നേതൃത്വത്തിൽ നടത്തിയ വായനപ്രവർത്തനങ്ങളുമായി ബന്ധപ്പെട്ട് തയ്യാറാക്കിയ മാഗസിൻ ലൈബ്രേറിയൻ റെൻഷി ഹെഡ്‍മിസ്ട്രസിനും പ്രിൻസിപ്പലിനും നൽകികൊണ്ട് പ്രകാശനം ചെയ്തു.വായനമത്സരവിജയികൾക്ക് സമ്മാനദാനം നൽകി.പിടിഎ അംഗം സിനി ആശംസകളറിയിച്ചു.സ്റ്റാഫ് സെക്രട്ടറി സജീഷ് എസ് നായർ നന്ദി അർപ്പിച്ചു.

ലോകലഹരിവിരുദ്ധദിനം2024

2024 ജൂൺ 26 ന് ലോകലഹരിവിരുദ്ധദിനം ആചരിച്ചു.രാവിലെ അസംബ്ലിയോടെ ആരംഭിച്ച ദിനാചരണത്തിൽ എക്സൈസ് ഉദ്യോഗസ്ഥൻ ലഹരിവിരുദ്ധ പ്രതിജ്ഞ ചൊല്ലിക്കൊടുത്തത് കുട്ടികളും സ്റ്റാഫും ഏറ്റുചൊല്ലി. ലഹരിവിരുദ്ധ സന്ദേശം നൽകിയ സന്ധ്യടീച്ചറും രൂപടീച്ചറും ലഹരിയോട് നോ പറയാൻ ആഹ്വാനം ചെയ്തു.കൗൺസിലർ ബിസ്മി തോമസിന്റെ നേതൃത്വത്തിൽ ലഹരിയോട് നോ പറയുക എന്ന സന്ദേശം നൽകുന്ന നൃത്താവിഷ്കാരം നടത്തിയത് ആകർഷണീയമായി. ലഹരിവിരുദ്ധ പോസ്റ്ററുകളും പ്രദർശിപ്പിച്ചു.

യോഗാദിനം2024

2024 ജൂൺ 21 ന് യോഗാദിനം സമുചിതമായി ആചരിച്ചു.ഷാജി സൈമൺ സാറിന്റെ നേതൃത്വത്തിൽ യോഗാ പ്രദർശനം നടന്നു.പ്രശാന്ത് സാർ യോഗാദിന സന്ദേശം നൽകി.യോഗാദിനത്തോടനുബന്ധിച്ച് ഡിസ്പ്ലേ ഉണ്ടായിരുന്നു.കുട്ടികൾ ചിട്ടയായ യോഗാപരിശീലനം നടത്തേണ്ടതിന്റെ ആവശ്യകത സന്ധ്യടീച്ചർ കുട്ടികളുമായി പങ്കുവച്ചു.യോഗയുടെ പ്രാധാന്യം മനസിലാക്കി കുട്ടികൾ യോഗയിൽ പങ്കെടുത്തു.മാളവികയും വൈഗയുമാണ് യോഗാ പ്രദർശനത്തിന് നേതൃത്വം നൽകിയത്.

ഇ-വേസ്റ്റ് നിർമാർജന ബോധവത്ക്കരണം2024

2024 ജൂൺ 15 ന് ഇക്കോക്ലബിന്റെയും ലിറ്റിൽകൈറ്റ്സിന്റെയും ആഭിമുഖ്യത്തിൽ ഇ വേസ്റ്റ് നിർമാർജനബോധവത്ക്കരണ യജ്ഞം നടന്നു. ഇതിന്റെ ഭാഗമായി ഇക്കോ ക്ലബിലെ കുട്ടികൾ സജീഷ് സാറിന്റെ നേതൃത്വത്തിൽ വിവിധ മാലിന്യങ്ങളെ കുറിച്ച് ചർച്ച ചെയ്യുകയും സ്കൂളിൽ നിലവിൽ അപകടകരമായ മാലിന്യമെന്നത് ഇ വേസ്റ്റാണെന്ന് തിരിച്ചറിയുകയും ചെയ്തു.തുടർന്ന് അവർ സജീഷ് സാറിന്റെ നേതൃത്വത്തിൽ സ്കൂൾ ഐടി കോർഡിനേറ്റർ ലിസി ടീച്ചറിനെ കാണുകയും ടീച്ചർ ബോധവത്ക്കരണ ക്ലാസ് എടുക്കുകയും ചെയ്തു.തുടർന്ന് ലിറ്റിൽ കൈറ്റ്സ് കുട്ടികൾ ഇ-വേസ്റ്റ് തരംതിരിച്ച് നൽകുകയും ഇക്കോ ക്ലബംഗങ്ങൾ അത് സുരക്ഷിതമായി ഇ വേസ്റ്റ് കോർണറിലെത്തിക്കുകയും ചെയ്തു.

പേവിഷബാധനിയന്ത്രണബോധവത്ക്കരണം2024

2024 ജൂൺ 13 ന് വളർത്തുമൃഗങ്ങളുമായി നേരിട്ട് ഇടപഴകാൻ ഇഷ്ടപ്പെടുന്ന കുട്ടികളെ പേവിഷബാധയെകുറിച്ചും നേരിട്ടേണ്ട പ്രതിവിധികളെ കുറിച്ചും ബോധവത്ക്കരണം നടത്താനായി ഡോ.ജോയ് ജോൺ,വീരണകാവ് പ്രൈമറി ഹെൽത്ത് സെന്റർ എത്തുകയും സരസമായി സംസാരിച്ച സാർ കുട്ടികളിലേയ്ക്ക് വിഷയത്തിന്റെ ഗൗരവം എത്തിക്കുകയും ചെയ്തു.സസ്തനികളിൽ നിന്നാണ് പേവിഷബാധയുണ്ടാകുന്നതെന്നും എന്തെങ്കിലും കടിയോ നക്കലോ ഉണ്ടായാലും വീട്ടിലറിയിക്കണമെന്നും ചികിത്സയുടെ കാര്യങ്ങളുമെല്ലാം വ്യക്തമായി കുട്ടികളിലേയ്ക്ക പകർന്നു.

ലോക പരിസ്ഥിതി ദിനം 2024 ജൂൺ 5

ലോകപരിസ്ഥിതി ദിനം രാവിലെ സ്കൂൾ ഓഡിറ്റോറിയത്തിൽ വച്ച് നടന്നു.പൊതുപരിപാടികൾ ഓഡിറ്റോറിയത്തിൽ നടത്തിയ ശേഷം ഓരോ വിഭാഗങ്ങളും അവരവരുടെ ആഘോഷങ്ങൾ പ്രത്യേകമായി സമുചിതമായി നടത്തി. ആദ്യം തന്നെ വിദ്യാർത്ഥിപ്രതിനിധികളുടെ കോമ്പിയറിങ്ങോടെ ആരംഭിച്ചു.പ്രാർത്ഥനയ്ക്കു ശേഷം വൈഗ പ്രതിജ്ഞ ചൊല്ലിക്കൊടുത്തു.കുട്ടികൾ ഏറ്റുചൊല്ലി. യു പി കുട്ടികളുടെ പരിസ്ഥിതിദിന നാടകം ശ്രദ്ധേയമായി.പരിസ്ഥിതി ഗാനവും എയറോബിക്സും പരിസ്ഥിതിദിനത്തെ മനോഹരമാക്കി.

എല്ലാം സെറ്റ് -പ്രവേശനോത്സവം2024-2025

2024 ജൂൺ മൂന്നാം തീയതി രാവിലെ പത്ത് മണിയ്ക്ക് എല്ലാം സെറ്റ് ആക്കി പ്രവേശനോത്സവ മീറ്റിംഗ് ആരംഭിച്ചു. പിടിഎ പ്രസിഡന്റ് സലാഹുദീൻ അധ്യക്ഷനായിരുന്നു. പ്രവേശനോത്സവം നിലവിളക്ക് കൊളുത്തി ആനാകോട് വാർഡ് മെമ്പർ ജിജിത്ത് ആർ നായർ ഉദ്ഘാടനം ചെയ്തു. നവാഗതരെ പൂക്കൾ നൽകിയും കിരീടം നൽകിയും ചെരാത് നൽകിയും സ്വീകരിച്ചു.