ഇന്റർനെറ്റ്
ലോകത്തുള്ള ദശലക്ഷക്കണക്കിനു കമ്പ്യൂട്ടർ നെറ്റ്വർക്കുകളെ പരസ്പരം ബന്ധിപ്പിക്കുന്ന മഹാ നെറ്റ്‌വർക്കിനെയും, അവ നൽകുന്ന വിവിധ സൗകര്യങ്ങളെയും പൊതുവായി ഇന്റർനെറ്റ് എന്നു വിളിക്കുന്നു. പാക്കറ്റ് സ്വിച്ചിങ് അടിസ്ഥാനമാക്കിയ ഇന്റർനെറ്റ് പ്രൊട്ടോക്കോൾ എന്ന വിവരസാങ്കേതികവിദ്യയാണു് ഇന്റർനെറ്റ് എന്ന ആശയം പ്രാവർത്തികമാക്കുവാൻ ഉപയോഗിക്കുന്നതു്. വിവരസാങ്കേതികവിദ്യ സേവനങ്ങളായ വേൾഡ് വൈഡ് വെബ്, പിയർ-റ്റു-പിയർ നെറ്റ്വർക്ക്, ചാറ്റ്‍, ഇലക്ട്രോണിക്-മെയിൽ, ഓൺ‌ലൈൻ ഗെയിമിങ്, വാർത്താ സെർവീസുകൾ, എന്നീ സേവനങ്ങൾ നൽകിപ്പോരുന്ന ഇന്റർനെറ്റിനെ പൊതുവെ നെറ്റ് എന്നും വിശേഷിപ്പിക്കുന്നു.
പൊതുവായുള്ള ധാരണകൾക്ക് കടകവിരുദ്ധമായ വസ്തുതയാണു് ഇന്റർനെറ്റും വേൾഡ് വൈഡ് വെബും (WWW) പര്യായപദങ്ങൾ അല്ലെന്നുള്ളതു്. ഇന്റർനെറ്റ് എന്നു സൂചിപ്പിക്കുന്നതു പരസ്പരം ബന്ധിക്കപ്പെട്ടിരിക്കുന്ന കമ്പ്യൂട്ടറുകളുടെ സമാഹാരമാകുമ്പോൾ വേൾഡ് വൈഡ് വെബ് എന്നുള്ളത് ഇന്റർനെറ്റ് എന്ന മാധ്യമം ഉപയോഗിച്ചു പരസ്പരം ബന്ധിക്കപ്പെട്ടിരിക്കുന്ന ഇലക്ട്രോണിക്-ഡോക്യുമെന്റുകളുടെ സമാഹാരത്തെയും സൂചിപ്പിക്കുന്നു.
ഇന്റർനെറ്റിന്റെ ചരിത്രം
റഷ്യൻ വാർത്താവിനിമയ ഉപഗ്രഹമായ സ്പുട്നിക്കിന്റെ വിക്ഷേപണം അമേരിക്കൻ ഐക്യനാടിന് ഒരു വെല്ലുവിളിയായിതീരുകയും അവരുടെ പ്രതിരോധാവശ്യങ്ങൾക്കുള്ള ഗവേഷണസ്ഥാപനമായ അർപ്പ (ARPA)-അഡ്വാൻസ്ഡ് റിസേർച്ച് പ്രൊജെക്റ്റ് ഏജൻസി (advanced Research Project Agency), 1969-ൽ അർപനെറ്റ്‌ (ARPANET) എന്ന നെറ്റ്വർക്കിന് രൂപം കൊടുക്കുകയുണ്ടായി. ഇതിന്റെ ഉദ്ദേശ്യം യഥാർത്ഥത്തിൽ അമേരിക്കൻ ഐക്യനാടുകളിലെ മാത്രം സൈനികപരമായ നേട്ടങ്ങൾ ആയിരുന്നു. ഒരു കുടിയേറ്റവാണിജ്യരാജ്യമായ അമേരിക്കൻ ഐക്യനാടുകൾ അവരുടെ വാണിജ്യപരമായ നേട്ടങ്ങൾക്ക് അർപനെറ്റിനെ ഉപയോഗിക്കുവാൻ തുടങ്ങി. തൻമൂലം 1983ൽ അർപനെറ്റ്‌(ARPANET); മിൽനെറ്റ്(MILNET),അർപനെറ്റ്‌(ARPANET) എന്നിങ്ങനെ രണ്ടായി മാറി. മിൽനെറ്റിനെ മിലിട്ടറി നെറ്റ്വർക്ക് എന്നു വിളിക്കാ‍റുണ്ട്. അതുപോലെ തന്നെ അർപനെറ്റിന് ഡാർപ (DARPA) എന്ന തരം തിരിവ് ഉണ്ട്. ഡാർപ (DARPA)എന്നു വെച്ചാൽ ഡിഫൻസ് അഡ്വാൻസ്ഡ് റിസേർച്ച് പ്രൊജെക്റ്റ് ഏജൻസി (Defence Advanced Research Project Agency)ആകുന്നു. അർപ്പാനെറ്റിനെ മാർച്ച് 23, 1972ൽ ഡാർപ്പാനെറ്റ് ആക്കുകയും , വീണ്ടും ഫെബ്രുവരി 22, 1993ൽ അർപ ആക്കുകയും , വീണ്ടു തിരിച്ച് മാർച്ച് 11, 1996 ഡാർപാനെറ്റ് ആക്കുകയും ചെയ്തു.
ഡാർപ്പനെറ്റിന്റെ വാണിജ്യവൽക്കരണം തൊണ്ണൂറുകളുടെ മദ്ധ്യത്തോടെ, വാണിജ്യവൽക്കരിക്കപ്പെടുകയും, കൂടുതൽ പ്രയോഗത്തിൽവരുകയും മറ്റുള്ള രാജ്യങ്ങളിൽ പ്രാബല്യത്തിൽ വരുകയും ചെയ്തു. തുടർന്ന് മറ്റുരാജ്യങ്ങളിലേക്ക് വ്യാപിക്കുകയും കൂടുതൽ സാങ്കേതിക വിദ്യകൾ കണ്ടു പിടിക്കുകയും ചെയ്തു. ഇത് ലോകം മുഴുവൻ വ്യാ‍പിച്ചുകിടക്കുന്ന നെറ്റ്വർക്കിന് കാരണമാവുകയും ഇൻറർനെറ്റിന് വഴിതെളിക്കുകയും ചെയ്തു. അങ്ങനെ ഇന്നുകാണുന്ന ഇൻറർനെറ്റ് ഉണ്ടാ‍കുകയുൻ ചെയ്തു.
ഇന്റർനെറ്റുണ്ടാക്കിയ മാറ്റങ്ങൾ
സാങ്കേതികത്വം
ഇന്റർനെറ്റ് സേവനങ്ങൾ
വേൾഡ് വൈഡ് വെബ്
വേൾഡ് വൈഡ് വെബ് ഇന്റർനെറ്റിന്റെ പര്യായമാണെന്നു ഒരു ആശയം ആളുകൾക്കിടയിലുണ്ട്,പക്ഷെ അതു ശരിയല്ല. ഇന്റർനെറ്റ് എന്നാൽ പരസ്പരം ബന്ധപ്പെടുത്തിയിരിക്കുന്ന കമ്പ്യൂട്ടർ ശൃംഖലകളുടെ ഒരു കൂട്ടമാണ് , ടെലിഫോൺ ലൈനുകൾ, ഒപ്റ്റിക്കൽ ഫൈബറുകൾ, അല്ലെങ്കിൽ വയർലെസ് സംവിധാനങ്ങൾ ഉപയോഗിച്ചാണ് കമ്പ്യൂട്ടറുകൾ തമ്മിലും കമ്പ്യൂട്ടർ ശൃംഖലകൾ തമ്മിലും ബന്ധപ്പെടുത്തിയിരിക്കുന്നത്. എന്നാൽ വേൾഡ് വൈഡ് വെബ് എന്നു പറയുന്നത് പരസ്പരം ബന്ധപ്പെടുത്തിയിട്ടുള്ള പ്രമാണങ്ങളുടെ ഒരുകൂട്ടമാണ് ഹൈപ്പർലിങ്കുകളും , യു.ആർ.എല്ലുകളും ഉപയോഗിച്ചാണ് വേൾഡ് വൈഡ് വെബിലെ പ്രമാണങ്ങൾ പരസ്പരം ബന്ധപ്പെടുത്തിയിരിക്കുന്നത്. പ്രമാണങ്ങൾ എന്നു പറയുന്നത് എന്തുമാവാം ചിത്രങ്ങൾ, ശബ്ദങ്ങൾ, എച്ച്.റ്റി.എം.എൽ താളുകൾ, പ്രോഗ്രാമുകൾ, ഇങ്ങനെ . ഇന്റർനെറ്റുമായി ബന്ധപ്പെടുത്തിയിട്ടുള്ള ഏതെങ്കിലും കമ്പ്യൂട്ടറിൽ ഡിജിറ്റൽ രീതിയിലായിരിക്കും മേല്പറഞ്ഞ പ്രമാണങ്ങൾ സൂക്ഷിച്ചിരിക്കുക. വേൾഡ് വൈഡ് വെബ് ഇന്റർനെറ്റ് വഴിയാണ് നമുക്ക് ലഭിക്കുന്നത് എന്നു വേണമെങ്കിൽ പറയാം
വിദൂര കമ്പ്യൂട്ടിങ് (റിമോട്ട് ആക്സസ്)
ഒരാളുടെ കമ്പ്യൂട്ടർ മറ്റൊരിടത്തു നിന്നുകൊണ്ട് മറ്റൊരാൾ നിയന്ത്രിക്കുന്നസംവിധനമാണു വിദൂര കമ്പ്യൂട്ടിങ്. ഇത് ഇന്റെർനെറ്റിലൂടെയും ലോക്കൽ നെറ്റ്വർക്കിലൂടെയും സാധ്യമാകുന്നത് ആണ്. ഇതിനായി പ്രത്യേകം സൊഫ്റ്റ് വെയർ ഉപയോഗിക്കുന്നു. വിദൂര കമ്പ്യൂട്ടിങ് മിക്കവാറും ഉപയോഗിക്കുന്നത് കമ്പ്യൂട്ടറുകൾ ശരിയാക്കുന്നതിനാണ്. നിങ്ങളുടെ കമ്പ്യൂട്ടർ സോഫ്റ്റ്വെയർ ഓപ്പറെറ്റിങ് സിസ്റ്റം സംബന്ധമായ കേടുപാടുകൾ മറ്റൊരാൾക്ക് വേറൊരു നെറ്റ് വർക്കിൽ നിന്ന് കൊണ്ട് റിമോട്ട് ലോഗിൻ ചെയ്ത് കൊണ്ട് ശരിയാക്കാവുതാണ്.
വിവരസാങ്കേതികവിദ്യ സഹകരണസംഘങ്ങൾ
ഫയൽ ഷെയറിങ്
വൊയ്സ് ഓവർ ഐ.പി (VoIP)
VoIP അഥവാ ഇൻറർനെറ്റ് ടെലഫൊണി വരും കാലത്തെ മുഖ്യ വാർത്താവിനിമയ സം‌വിധാനമായാണ് കരുതപ്പെടുന്നത്. സാധാരണ ടെലഫോണുകൾ വഴിയുള്ള കമ്യൂണിക്കേഷൻ അനധിവിദൂര ഭാവിയിൽ തന്നെ ഇല്ലാതാവും. പകരം ഇൻറർനെറ്റ് വഴിയുള്ള വാർത്താവിനിമയം ആകും രംഗം കൈയടക്കുക. ഇന്നും അന്താരാഷ്ട്ര കോളുകൾ ചിലവേറിയതാണ്. മിനിട്ടടിസ്ഥാനത്തിൽ പണമടക്കേണ്ടി വരുന്നു. ഇൻറർനെറ്റ് ടെലഫൊണി വ്യാപകമാവുന്നതോടെ ഇതിൽ നിന്നും ഉപഭോക്താവ് സ്വതന്ത്രനാവുന്നു. നിയന്ത്രണമില്ലാതെ സംസാരിക്കുകയും കാണുകയുമൊക്കെ ചെയ്യാം!
ഇൻറർ‍നെറ്റിന്റെ അടിസ്ഥാനമായ പാക്കെറ്റ് സ്വിച്ചിങ്ങ് എന്ന സാങ്കേതിക വിദ്യയാണ് ഇൻറർനെറ്റ് ടെലഫൊണിയെ ചിലവു ക്കുറഞ്ഞതാക്കുന്നത്. നാം ഒരു ടെലഫോണിൽ കൂടി സംസാരിക്കുമ്പോൾ നമുക്കായി ഒരു ലൈൻ പൂർണമായും മാറ്റിവയ്ക്കപെടുന്നു. എന്നാൽ ഇൻറർനെറ്റ് വഴിയാകുമ്പോൾ തികച്ചും വ്യത്യസ്തമായ രീതിയിലാണ് കാര്യങ്ങൾ.
മൈക്രോഫോൺ വഴി കമ്പ്യൂട്ടറിൽ എത്തുന്ന ശബ്ദം ഡിജിറ്റൽ ഡാറ്റയുടെ ചെറു പാക്കറ്റുകളായി വിഭജിക്കപ്പെടുന്നു. ഓരോ പാക്കറ്റിലും, ഉത്ഭവ സ്ഥാനത്തെ ഐ.പി. വിലാസം ലക്ഷ്യ സ്ഥാനത്തെ ഐ.പി. വിലാസം ആകെ പാക്കറ്റുകളുടെ എണ്ണം, എത്രാമത്തെ പാക്കറ്റ് എന്നീ വിവരങ്ങൾ രേഖപ്പെടുത്തിയിരിക്കും. ഉത്ഭവ സ്ഥനത്തെ കമ്പ്യൂട്ടറിൽ നിന്നും പുറപ്പെടുന്ന ഡാറ്റ പാക്കറ്റുകൾ ലഭ്യമായ വിവിധ വഴികളിലൂടെ സഞ്ചരിച്ച് ലക്ഷ്യ സ്ഥാനത്ത് എത്തിച്ചേരുന്നു. ആ കമ്പ്യൂട്ടറിൽ അവ പഴയ പോലെ ഒന്നായി ചേർന്ന് പുനഃസൃഷ്ടിക്കപ്പെടുന്നു. ഇങ്ങനെ വിവിധ വഴികളിലൂടെ സഞ്ചരിക്കുന്നതിനാൽ ഒരു പ്രത്യേക ലൈൻ മാറ്റിവയ്ക്കപ്പെടുന്നില്ല. ഈ സാങ്കേതിക വിദ്യ VoIP അഥവാ ഇൻറർനെറ്റ് ടെലഫൊണി എന്നറിയപ്പെടുന്നു.
ഇൻറർനെറ്റ് ടെലഫൊണിയ്ക്ക് ചില വ്യവസ്ഥകൾ അഥവാ പ്രോട്ടൊക്കോളുകൾ ഉണ്ട്. H323, SIP എന്നിവ ആണിവ.
പായ്ക്കറ്റുകളുടെ സഞ്ചാരത്തിനിടക്ക് പല തടസ്സങ്ങളും നേരിടാം. ചിലപ്പോൾ ട്രാഫിക് തിരക്ക് മൂലം ഉണ്ടാകാവുന്ന താമസം അഥവാ “ഡിലേ”, ചില പായ്കറ്റുകൾ നഷ്ടമാകുന്നതു മൂലമുള്ള “ജിറ്റെറിങ്ങ്” ഇവ പലപ്പോഴും സംസാര സുഖത്തെ തടസ്സപ്പെടുത്താറുണ്ട്. എന്നാൽ “ബ്രോഡ്ബാൻഡ് ഇൻറർനെറ്റ്” ഉപയോഗിച്ചാൽ ഈ പ്രശ്നങ്ങൾ പരിഹരിക്കപ്പെടും.
ഇന്ന് ഇൻറർനെറ്റ് ടെലഫൊണി ഉപയോഗിച്ച് പ്രവർത്തിക്കുന്ന ധാരാളം ഉപകരണങ്ങൾ വിപണിയിൽ ലഭ്യമാണ്. കമ്പ്യൂട്ടർ ഉപയോഗിച്ചും അല്ലാതെയും ഇൻറർനെറ്റ് ടെലഫോണി വഴി സംസാരിക്കാൻ പറ്റുന്ന ഉപകരണങ്ങളുണ്ട്.
കമ്പ്യൂട്ടറിൽ നിന്നും കമ്പ്യൂട്ടറിലേക്ക് തികച്ചും സൗജന്യമായി സംസാരിക്കാം. ഇതിന്നാവശ്യമായ സോഫ്റ്റ്‌വെയറുകൾ ഇൻറർനെറ്റിൽ നിന്നും ഡൌൺലോഡ് ചെയ്തെടുക്കാവുന്നതാണ്.MSN Messenger, Yahoo! Messenger, Skype, Google Chat തുടങ്ങിയവയൊക്കെ ഇക്കൂട്ടത്തിൽ പെടും. കൂടാതെ “വിൻഡോസിനൊപ്പമുള്ള” നെറ്റ്മീറ്റിങും ഉപയോഗിക്കാം.
കമ്പ്യൂട്ടറിൽ നിന്നും മറ്റു ടെലഫോണിലേക്ക് വിളിക്കാന് ഗേറ്റ്‌വേ എന്ന ഉപകരണം ആവശ്യമാണ്. ഈ ആവശ്യത്തിനായി ഉപയോഗിക്കാവുന്ന കോളിങ് കാർഡുകൾ ഇന്ന് ലഭ്യമാണ്. ഇവയുപയോഗിച്ച് ചുരുങ്ങിയ ചിലവിൽ കമ്പ്യൂട്ടറിൽ നിന്നും ലോകത്തെവിടെയുമുള്ള ടെലഫോണിലേക്കും വിളിക്കാൻ കഴിയും.