ദേവമാതാ ഹൈസ്കൂൾ പൈസക്കരി/എന്റെ ഗ്രാമം
'ചരിത്രവഴികളിലൂടെ
കണ്ണൂർ ജില്ലയുടെ കിഴക്കൻ മലയോരത്ത്, കുടക് ഗിരി നിരകളുടെ നിഴലിൽ സ്ഥിതി ചെയ്യുന്ന ഒരു കൊച്ചുകുടിയേറ്റ ഗ്രാമമാണ് പൈസക്കരി. സാംസ്കാരികവും സാമൂഹികവും സാമ്പത്തികവുമായ വളർച്ച, വിദ്യാഭ്യാസത്തിലൂടെ മാത്രമേ കരഗതമാകൂ എന്ന് ബോദ്യമുണ്ടായിരുന്ന കുടിയേറ്റ പിതാക്കന്മാർ പളളിയും പളളിക്കൂടവും സ്വായത്തമാക്കാനാണ് പ്രഥമത ശ്രമിച്ചത്.സംഘടിത കുടിയേറ്റം ആരംഭിച്ച് മൂന്ന് വർഷം കഴിഞ്ഞ് 1952 -ൽ പ്രൈമറി സ്ക്കൂളിനുവേണ്ട അംഗീകാരം നേടി പ്രവർത്തനം തുടങ്ങി.ഇതിനായി അന്നത്തെ ജനത അനുഭവിച്ച ക്ലേശങ്ങൾ വിവരണാതീതമാണ്. അപ്പോഴും ഹൈസ്ക്കുൾ വിദ്യാഭ്യാസം വിദൂരസ്വപ്നമായി അവശേഷിച്ചു. വളരെ ചുരുക്കം കുട്ടികൾ തളിപ്പറമ്പിലും പേരാവൂരിലും പോയി പഠനം നടത്തി. 1952- ൽ ചെമ്പേരിയിൽ ഹൈസ്ക്കുൾ അനുവദിച്ചുകിട്ടിയതോടെ അല്പം ആശ്വാസമായി. പക്ഷെ ഇവിടെ നിന്ന് ചെമ്പരിയിൽ പോയി വരാൻ 25 കിലോമീറ്ററോളം നടക്കേണ്ടിയിരുന്നു. 1962-ൽ പയ്യാവൂരിൽ ഹൈസ്ക്കുൾ അനുവദിച്ചെങ്കിലും അവിടെ പ്രവേശനം കിട്ടാൻ പ്രയാസം നേരിട്ടു. അതിനാൽ തന്നെ ബഹുഭൂരിപക്ഷത്തിന്റേയും വിദ്യാഭ്യാസം പ്രൈമറിതലത്തിൽ തന്നെ അവസാനിച്ചു.
ഹൈസ്ക്കുളിനു വേണ്ടിയുളള അർത്ഥപൂർണ്ണമായ ശ്രമം തുടങ്ങുന്നത് 1967 -ലാണ് .അപക്ഷകളും നിവേദനങ്ങളുമായി വർഷങ്ങൾ കടന്ന് പോയി. 1971 -ൽ ഹൈസ്ക്കൂൾ അനുവദിക്കാനുളള എല്ലാ സാഹചര്യവും ഒത്തുവന്നതാണ്. നിർഭാഗ്യവശാൽ അന്തിമ ലിസ്റ്റിൽ ഉൾപ്പെടുവാൻ കഴിഞ്ഞില്ല. ഈ കാലയളവിൽ ഹൈസ്ക്കുളിന് കെട്ടിടം പോലും നിർമ്മിക്കപ്പെട്ടിരുന്നു. 1975 -ൽ സർക്കാർ വീണ്ടും എയിഡഡ് സ്ക്കൂളുകൾ അനുവദിക്കാൻ തീരുമാനിച്ചതിനെ തുടർന്ന് അന്നത്തെ വികാരി ഫാദർ അബ്രഹാം പൊരുന്നോലിയുടെ നേതൃത്വത്തിൽ വീണ്ടും ശ്രമം ആരംഭിച്ചു. ശ്രി. സി. പി. ഗോവിന്ദൻ നമ്പ്യാർ എം . എൽ . എ സജീവമായി ഇടപെട്ടതിനെ തുടർന്ന് സ്വപ്ന സാക്ഷാത്കാരത്തിനുളള സാധ്യതയേറി. 1976 ഫെബ്രുവരി 8 ന് പുതിയ കെട്ടിടത്തിന്റെ ശിലാ സ്ഥാപനം അഭിവന്ദ്യ പിതാവ് മാർ .സെബാസ്റ്റ്യൻ വള്ളോപ്പളളി നിർവഹിച്ചു. ബഹുമാന്യനായ ഫാദർ അബ്രഹാം പൊരുന്നോലിയുടെ അധ്യക്ഷതയിൽ 14 – 06 – 1976 -ന് ചേർന്ന പൊതുസമ്മേളനത്തിൽവച്ച് ശ്രീ. സി . പി ഗോവിന്ദൻ നമ്പ്യാർ ഭദ്രദീപം കൊളുത്തി ദേവമാതാ ഹൈസ്ക്കുൾ ഉദ്ഘാടനം ചെയ്തു. വി . ടി അബ്രാഹം വെട്ടത്ത് എന്ന കുട്ടിയായിരുന്നു ആദ്യ അഡ്മിഷൻ നേടിയത്. 136 കുട്ടികളായിരുന്നു ആദ്യ ബാച്ചിൽ ഉണ്ടായിരുന്നത്.