ഗവ. യു പി സ്കൂൾ, പാപ്പിനിശ്ശേരി വെസ്റ്റ്/പ്രവർത്തനങ്ങൾ/2026-27
പ്രവേശനോത്സവം-2026-27
കുരുന്നുകളെ വരവേറ്റ് പാപ്പിനിശ്ശേരി വെസ്റ്റ് ഗവ. യു.പി. സ്കൂൾ; പ്രവേശനോത്സവം വേറിട്ട കാഴ്ചയായി
പാപ്പിനിശ്ശേരി: വർണ്ണക്കുടകളും പുത്തൻ ഉടുപ്പുകളുമണിഞ്ഞ് അറിവിന്റെ ലോകത്തേക്ക് ചുവടുവെച്ച കുരുന്നുകളെ വരവേറ്റ് പാപ്പിനിശ്ശേരി വെസ്റ്റ് ഗവ. യു.പി. സ്കൂൾ. പുത്തൻ അധ്യയനവർഷത്തെ വരവേൽക്കാൻ സ്കൂൾ അധികൃതരും നാട്ടുകാരും ചേർന്ന് വിപുലമായ പരിപാടികളാണ് ജൂൺ ഒന്നിന് കലാലയ മുറ്റത്ത് ഒരുക്കിയിരുന്നത്. രാവിലെയോടെ തന്നെ മാതാപിതാക്കളുടെ കൈപിടിച്ച് അക്ഷരമുറ്റത്തേക്ക് എത്തിയ നവാഗതരെ മുതിർന്ന വിദ്യാർത്ഥികളും അധ്യാപകരും ചേർന്ന് ഹൃദ്യമായി സ്വീകരിച്ചു.
രാവിലെ 10 മണിക്ക് സ്കൂൾ ഓഡിറ്റോറിയത്തിൽ വെച്ച് നടന്ന പ്രവേശനോത്സവ ചടങ്ങിൽ ഹെഡ്മാസ്റ്റർ ശ്രീ. എം. സുജിത്ത് സ്വാഗതം ആശംസിച്ചു. പി.ടി.എ പ്രസിഡന്റ് ശ്രീ. മോഹനൻ പി.വി. അധ്യക്ഷത വഹിച്ച യോഗം, കണ്ണൂർ ബ്ലോക്ക് പഞ്ചായത്ത് പ്രസിഡന്റ് ശ്രീ. പി. പ്രശാന്തൻ ഔദ്യോഗികമായി ഉദ്ഘാടനം ചെയ്തു.
"പൊതുവിദ്യാഭ്യാസ രംഗത്ത് അധ്യാപകരും രക്ഷിതാക്കളും തദ്ദേശ സ്വയംഭരണ സ്ഥാപനങ്ങളും ഒത്തൊരുമിച്ച് നടത്തുന്ന പ്രവർത്തനങ്ങളാണ് വിദ്യാലയങ്ങളുടെ യശസ്സ് ഉയർത്തുന്നത്," എന്ന് ഉദ്ഘാടന പ്രസംഗത്തിൽ അദ്ദേഹം ഓർമ്മിപ്പിച്ചു.
പുതിയ അധ്യയന വർഷത്തെ സമ്മാന വിതരണം ഗ്രാമപഞ്ചായത്ത് പ്രസിഡന്റ് ശ്രീ. പ്രദീപ് കുമാർ കെ. നിർവഹിച്ചു. കുട്ടികൾക്ക് മികച്ച ആശംസകൾ നേർന്നുകൊണ്ട് ഗ്രാമപഞ്ചായത്ത് വൈസ് പ്രസിഡന്റ് ശ്രീമതി ടി. പി. ചന്ദ്രമതി അനുമോദന പ്രസംഗം നടത്തി.
ചടങ്ങിൽ വിദ്യാഭ്യാസ ആരോഗ്യ കാര്യ സ്റ്റാന്റിംഗ് കമ്മിറ്റി ചെയർമാൻ ശ്രീ. ടി. കെ. ശശീധരൻ, ഗ്രാമപഞ്ചായത്ത് അംഗങ്ങളായ പി. സുരേഷൻ, ഒ. കുഞ്ഞിമൊയ്തീൻ, പ്രചിത്ര കെ.വി., മുബ് സീന. കെ.പി., നസ്രീന കെ., മദർ പി.ടി.എ പ്രസിഡന്റ് ശ്രീമതി സി.കെ. രേഷ്മ എന്നിവർ ആശംസകൾ അർപ്പിച്ചു സംസാരിച്ചു. നവാഗതർക്കുള്ള പഠനോപകരണങ്ങൾ പഞ്ചായത് പ്രസിഡൻ്റ് പ്രദീപൻ നിർവ്വഹിച്ചു. സ്റ്റാഫ് സെക്രട്ടറി ശ്രീ. മധു .വി നന്ദി അർപ്പിച്ചു.
ഔദ്യോഗിക ചടങ്ങുകൾക്ക് ശേഷം നവാഗതരായ കുരുന്നുകളെ കാമ്പസിലേക്ക് സ്വീകരിക്കുന്നതിനായി വൈവിധ്യമാർന്ന കലാപരിപാടികൾ അരങ്ങേറി. വിദ്യാലയ അന്തരീക്ഷത്തോട് കുട്ടികൾക്ക് ഇണക്കം വരാൻ വിദ്യാർത്ഥികളെയും രക്ഷിതാക്കളെയും ഒരുമിച്ച് പങ്കെടുപ്പിച്ചു കൊണ്ട് വിനോദ മത്സരങ്ങളും സംഘടിപ്പിച്ചിരുന്നു. ഒന്നാം ക്ലാസിലെയും എൽ.കെ.ജിയിലെയും മുഴുവൻ കുട്ടികൾക്കും പുതിയ ബാഗും പഠനോപകരണങ്ങളും ചടങ്ങിൽ വിതരണം ചെയ്തു. സ്കൂളിലെത്തിയ മുഴുവൻ കുട്ടികൾക്കും മധുരമേറിയ പാൽപായസം വിതരണം ചെയ്തതോടെയാണ് വിദ്യാലയത്തിലെ പുതിയ അധ്യയനവർഷത്തെ ആദ്യദിന ആഘോഷങ്ങൾക്ക് തിരശ്ശീല വീണത്.