ജി.എച്ച്.എസ്. ബാനം/വിദ്യാരംഗം
അഞ്ഞൂറിലധികം വായനാക്കുറിപ്പുകളുമായി ബാനം സ്കൂളിൽ പതിപ്പ് പ്രകാശനം ചെയ്തു
ബാനം: അഞ്ഞൂറിലധികം വായനാക്കുറിപ്പുകളുമായി ബാനം ഗവ.ഹൈസ്‌കൂളിൽ പ്രത്യേക പതിപ്പുകൾ പ്രകാശനം ചെയ്തു. നൂറ്റമ്പതോളം എഴുത്തുകാരുടെ കൃതികൾ വായിച്ച് കുട്ടികൾ തയ്യാറാക്കിയ അഞ്ഞൂറോളം വായനാക്കുറിപ്പുകളാണ് പതിപ്പുകളിൽ ഉള്ളത്. വിദ്യാരംഗം കലാസാഹിത്യ വേദിയുടെ നേതൃത്വത്തിലായിരുന്നു പരിപാടി. പഴയകാല എഴുത്തുകാർ മുതൽ പുതിയ എഴുത്തുകാർ വരെയുള്ളവരുടെ ആസ്വാദനങ്ങൾ കുറിപ്പുകളിലുണ്ട്. പ്രധാനധ്യാപിക സി.കോമളവല്ലി പ്രകാശന കർമ്മം നിർവഹിച്ചു. സീനിയർ അസിസ്റ്റന്റ് പി.കെ ബാലചന്ദ്രൻ, വിദ്യാരംഗം കോഡിനേറ്റർ അനൂപ് പെരിയൽ, കെ.ആർ സുമതി എന്നിവർ സംസാരിച്ചു. സാഹിത്യ ക്വിസ്, വായനമത്സരം, ഉപന്യാസ രചന, കവിതാലാപനം, പ്രസംഗ മത്സരം, പുസ്തക പരിചയം, കയ്യെഴുത്ത് മത്സരം എന്നിവയും വായനവാരത്തിന്റെ ഭാഗമായി സംഘടിപ്പിച്ചിട്ടുണ്ട്.
വായനാസന്ദേശവുമായി ബാനം ഗവ.ഹൈസ്‌കൂളിൽ വായനമതിൽ
വായനാസന്ദേശവുമായി ബാനം ഗവ.ഹൈസ്‌കൂളിൽ വായനമതിൽ തീർത്തു. കുട്ടികൾ അവർ എഴുതിയ അക്ഷരങ്ങൾ, വാക്കുകൾ, വാക്യങ്ങൾ, കഥ, കവിത, ആസ്വാദനക്കുറിപ്പുകൾ തുടങ്ങിയവ കയ്യിലേന്തി വായനാമതിലിൽ അണിചേർന്നു. തുടർന്ന് വായനാദിന പ്രതിജ്ഞയും എടുത്തു. ജനപ്രതിനിധികൾ, നാട്ടുകാർ, രക്ഷിതാക്കൾ, അധ്യാപകർ, ജീവനക്കാർ തുടങ്ങിയവരും മതിലിന്റെ ഭാഗമായി. വിദ്യാരംഗം കലാസാഹിത്യ വേദിയുടെ നേതൃത്വത്തിലായിരുന്നു വ്യത്യസ്തമായ പരിപാടി സംഘടിപ്പിച്ചത്. പരപ്പ ബ്ലോക്ക് പഞ്ചായത്ത് വൈസ് പ്രസിഡന്റ് കെ.ഭൂപേഷ് വായനദിന സന്ദേശം നൽകി. കോടോം ബേളൂർ പഞ്ചായത്ത് സ്ഥിരം സമിതി അധ്യക്ഷൻ പി.ഗോപാലകൃഷ്ണൻ അധ്യക്ഷനായി. പി.ടി.എ പ്രസിഡന്റ് കെ.എൻ അജയൻ, പ്രധാനധ്യാപിക സി.കോമളവല്ലി, പി.കെ ബാലചന്ദ്രൻ, സഞ്ജയൻ മനയിൽ, അനൂപ് പെരിയൽ തുടങ്ങിയവർ സംസാരിച്ചു.