ഗവൺമെന്റ് വി. എച്ച്. എസ്. എസ്. വീരണകാവ്/സൗകര്യങ്ങൾ/വിവിധ ഉദ്യാനങ്ങൾ
വിവിധ ഉദ്യാനങ്ങൾ
സ്കൂളിന്റെ പ്രകൃതിസ്നേഹം വെളിവാക്കുന്ന ഈ ഉദ്യാനം വിദ്യാർത്ഥികളിൽ പരിസ്ഥിതിയോടുള്ള ഇണക്കവും യോജിപ്പും ഊട്ടിയുറപ്പിക്കാനും വരുംതലമുറ ജന്തുസസ്യജാലങ്ങളെ തന്റെ തന്നെ നിലനിൽപ്പിന്റെ അടിസ്ഥാനമാണെന്ന് തിരിച്ചറിഞ്ഞുകൊണ്ട് സംരക്ഷിക്കാനും ഉതകുന്ന തരത്തിലാണ് സജ്ജീകരിച്ചിരിക്കുന്നത്.വിവിധതരം സസ്യങ്ങളും,മത്സ്യങ്ങളും ചെറുജീവികളും ഇടയ്ക്കിടെ വിരുന്നു വരുന്ന കിളികളുമൊക്കെ ചേർന്ന് ഈ ചെറിയ ഉദ്യാനം വലിയ ജൈവവൈവിധ്യങ്ങളുടെ കേന്ദ്രമായി നിലനിൽക്കുന്നു.സ്കൂളിന്റെ പ്രധാന കെട്ടിടത്തിന്റെ മുൻവശത്തായും പുറകുവശത്തായുമാണ് ഇതിന്റെ സ്ഥാനം.പൂവിടുന്നതും ഇല കൊഴിയ്ക്കുന്നതുമായ മരങ്ങളും നിത്യഹരിതവനപ്രദേശങ്ങളിൽ കാണപ്പെടുന്ന വൃക്ഷങ്ങളും സ്കൂളിന്റെ പ്രകൃതിയുടെ മഹനീയമായ ഏടാണെന്നതിൽ തർക്കമില്ല.
കുഞ്ഞൂങ്ങളുടെ ശബ്ദത്തോടൊപ്പം അവരുടെ കളികളോടൊപ്പം മുറ്റത്ത് പാറിപ്പറക്കുന്ന ശലഭങ്ങൾ ഒരു കൗതുകകാഴ്ചയാണ്.ചിലപ്പോഴൊക്കെ കിങ്ങിണിച്ചെടിയിലും,കൃഷ്ണകിരീടത്തിലും മറ്റും തൂങ്ങികിടക്കുന്ന ശലഭലാർവയും പുഴുക്കളും ചിറകുമുളച്ചു പറക്കുന്ന ശലഭങ്ങളും ഈ ചെറിയ ഉദ്യാനത്തെ മനോഹരമാക്കുന്നു.അഡ്വ.ശ്രീ.സ്റ്റീഫൻ സാറാണ് ശലഭോദ്യാനത്തിന്റെ ജില്ലാതല ഉദ്ഘാടനം ഈ സ്കൂളിൽ വച്ച് നിർവഹിച്ചത്.വർണശബളങ്ങളായ പൂക്കൾ നറുപൂമണം വിതറി നിൽക്കുന്നത് പൂമ്പാറ്റകളെ വലുതായി ആകർഷിക്കുന്നുണ്ട്.പൂമ്പാറ്റകൾക്ക് തേനുണ്ണാമനുള്ള ചെടികൾ പ്രധാനമായും സ്കൂളിന്റെ മുൻഭാഗത്തായാണ് ക്രമീകരിച്ചിരിക്കുന്നത്.ചിത്രശലഭങ്ങൾക്ക് മുട്ടയിടായും പുതിയ ശലഭങ്ങൾ വിരിഞ്ഞിറങ്ങാനുമുള്ള വൈവിധ്യങ്ങളായ ചെടികൾ നട്ടിരിക്കുന്നത് സ്കൂളിന്റെ പുറകുവശത്താണ്.നാരകം,ഗരുഡക്കൊടി,തെറ്റി,അരളി,കണിക്കൊന്ന തുടങ്ങിയ ചെടികൾ ശലഭങ്ങളുടെ ഇഷ്ടസങ്കേതങ്ങളാകയാൽ ഇവ പാർക്കിൽ നട്ടിരിക്കുന്നു.ഇതിന്റെ ഇലകളിൽ ശലഭപുഴുക്കളെ സ്ഥിരമായി കാണാൻ സാധിക്കുന്നുണ്ട്.
വി.എച്ച്.എസ്.ഇ വിഭാഗം കെട്ടിടത്തിന്റെ ടെറസ്സിലാണ് ഓർക്കിഡ് ഗാർഡൻ സജ്ജീകരിച്ചിരിക്കുന്നത്.പലതരത്തിലുള്ള ഓർക്കിഡുകൾ ഗ്രീൻഹൗസിനകത്ത് സംരക്ഷിക്കപ്പെട്ടിരിക്കുന്നു.പ്രത്യേക പരിചരണം ആവശ്യമുള്ള ഒരു അലങ്കാരചെടിയായ ഓർക്കിഡ് ഒരു പരാദചെടിയാണ്.കുട്ടികളിൽ നിന്നും തിരഞ്ഞെടുക്കപ്പെട്ടവരാണ് ഗാർഡന്റെ സംരക്ഷണം.അഗ്രികൾക്കറിലെ അധ്യാപകരുടെ സഹായത്തോടെയാണ് ഇതിന്റെ പരിപാലനം.വിലയേറിയതും എളുപ്പത്തിൽ പിടിച്ചുകിട്ടാൻ പ്രയാസകരവുമായ വിവിധതരം ഓർക്കിഡുകൾ തരുന്നത് നയനമനോഹരമായ കാഴ്ച തന്നെയാണ്.
സ്കൂളിന്റെ പലഭാഗങ്ങളിലായി വിവിധതരം ചെടികളോടെ ഹാങ്ങിംഗ് ഗാർഡൻ സ്കൂളിന്റെ ഭംഗി കൂട്ടികൊണ്ട് നിലനിൽക്കുന്നു.പ്രധാനമായും ഓഡിറ്റോറിയത്തിന്റെ ചുറ്റുമുള്ള തൂണുകളിലാണ് ചെടികൾ തൂക്കിയിട്ടിരിക്കുന്നത്.
ജൈവവൈവിധ്യപാർക്കിന്റെ ഒരു ചെറിയ ഭാഗമാണ് റോക്ക് ഗാർഡനായി നീക്കിവച്ചിരിക്കുന്നത്.
സ്കൂളിന്റെ ഗേറ്റിനടുത്തായും ജൈവവൈവിധ്യപാർക്കിനുള്ളിലായും കാക്ടസ് ഗാർഡനുകൾ ക്രമീകരിച്ചിരിക്കുന്നു.ചെറുതെങ്കിലും വിവിധതരത്തിലുള്ള കള്ളിച്ചെടികൾ ഇവിടെ നട്ടിട്ടുണ്ട്.
ജൈവവൈവിധ്യപാർക്കിന്റെ ഒരു ഭാഗത്തായിട്ടാണ് തുളസിയും കറ്റാർവാഴയും നീലഅമരിയും കുന്നിയും തുടങ്ങി ഔഷധപ്രാധാന്യമുള്ള ചെടികളുടെ സ്ഥാനം.
കൃഷ്ണതുളസി,രാമതുളസി,വിക്സ് തുളസി തുടങ്ങി വ്യത്യസ്തയിനം തുളസിച്ചെടികൾ ഇവിടെ കാണാം.
ഒരു ചെറിയ വെർട്ടിക്കൽ ഗാർഡനും സ്കൂളിലുണ്ട്.